Yesu Kiristu Baani?

1, 2. (a) Onona ndina na muthu oovuwa entapulela wi ohumunona pamadhene? Kawogamo. (b) Athu owinjhiva enawoga ddi wodhela Yesu?

EHIKALAWO athu oovuwa mwilaboni. Podi wera we ohunona ndina na muthu mmodha oli oovuwa. Mbwenye eyo kintapulela wi womunona pamadhene muthuya. Enohoweleya onona dhego dhowinjhiva dhamwegumini mwaye ni onona ekalelo yaye.

² Onowabihaga wiwa wodhela Yesu Kiristu, oliye ohukala elabo yela yavati yaka 2000 dhivirile. Mbwenye athu owinjhiva ehikanna mubuwelo dhohiyana wodhela Yesu. Amodha enawoga wi oliye ari muthu apama, amodhaya enawoga wi ari namavuhulela, athu amodha enawoga wi ari murumiwi a Mulugu. Kiwe onubuwela wi baani? — Osugwe wonelamo 12.

3. Ekalele ddi yofuneya onona ebaribari wodhela Yehova Mulugu ni Yesu Kiristu?

³ Onona ebaribari wodhela Yesu ethu enahoweleya. Mwahaya? Bibliya anowoga: ‘Wihina ekanne egumi yohimala, yunoneni nyu, Mulugu mmodha eebaribari, nuule mmurumilinyu, Yesu Kiristu.’ (João 17:3) Hee, wanona ebaribari wodhela Yehova ni Yesu Kiristu, onere okalawo malabo amatene mparayizu elabo yela yavati. (João 14:6) Ohiya eyo, omunona Yesu Kiristu winere wukavihera woona wi oliye tajhiha yapama ya egumi yehu, ni tajhiha yapama yowaweddiha athu amodha. (João 13:34, 35) Musolo 1 iyo nihihudhera ebaribari wodhela Mulugu. Vano nnafuna nihudhere ele Bibliya onahudhihiye wodhela Yesu.

NIHINFWANYA MESIYA!

4. Madhu owi ‘Mesiya’ obe ‘Kiristu’ entapulela ddi?

⁴ Yaka dha mundduli Yesu ahinabaliwe elabo yela yavati, Yehova ahipaganya wi eere omuruma Mesiya, obe Kiristu. Madhu owi ‘Mesiya’ enadhela wa ewogelo ya Hebrayiku, madhu owi ‘Kiristu’ enadhela wa Egrego. Madhu ala entapulela wi Mulugu ohumusakula Mesiya ni ohunvaha mabasa athima. Mesiya onere wakwaneliha dhopaganya dhatedhene dha Mulugu. Yesu podi onikavihera peeno. Mbwenye Yesu ahinathi obaliwa, athu owinjhiva yowikohesa, Mesiya onaakale aani?

5. Anamahara a Yesu yahinona wi Yesu ari Mesiya?

⁵ Anamahara a Yesu yahikanna ebaribari yowi Yesu aari Mesiya. (João 1:41) Motajhiha, Simiyawu Peduru ohuwoga ni Yesu egihina: ‘Nyu muli Kiristu.’ (Mateus 16:16) Ki iyo nnaroromele addi wi Yesu di Mesiya?

6. Yehova aakavihere addi athu omunona Mesiya aagiwa?

⁶ Yaka dhamundduli Yesu ahinabaliwe, anamavuhulela a Mulugu ehileba wodhela dhithu dhafuna wereya dhaakavihere athu omunona Mesiya. Dhakavihere addi? Kubuwela, we onafuna wamuhise muthu ohumunoniliwe wule dhinimelawo Karo. Akala ohaddeliwa ekalelo ya muthuule, eyo enere wukavihera omunona muthuya. Ni makalelo mamodhave, Yehova ohalabiyedha anamavuhulela wi ewoge ndhe Mesiya eregiyena ni dhithu dhafuna omwereyela. Wakwanela wa dhovuhulela ndha, dhihavaha athu ebaribari yonona wi Yesu di Mesiya.

7. Dhovuhulela baani bili dhintonyihedha wi Yesu di Mesiya?

⁷ Vala vihikala dhovuhulela bili. Yobajha, yaka 700 Yesu ahinabaliwe, namavuhulela Mikeya ahiwoga wi Mesiya aabaliwe elabo yo Obele. (Miqueias 5:2) Yesu abaliwe elabo yela! (Mateus 2:1, 3-9) Yanabili, Namavuhulela Daniyeli ohuwoga wi Mesiya ooneye yaka ya 29 E.C. (Daniel 9:25) Dhovuhulela nda bili dhinovaha ebaribari wi Yesu di Mesiya aagiwa. — Osugwe wonelamo 13.

8, 9. Yapadduwile ddi ni Yesu agamanle obaddiziwa, yatonyihedhile wi oliye ari Mesiya?

⁸ Yehova ahitonyihedha pamadhene wi Yesu ari Mesiya. Mulugu ahimuroromeliha Juwawu wi oliye agahona yintelelo yamukavihere omunona Mesiya. Yesu agaali mwihinjhe wo Jordawu wihina abaddiziwe ni Juwawu yaka ya 29 E.C., Juwawu ahona yintelelo. Bibliya onowoga yapadduwile: ‘Agamanle obaddiziwa, Yesu atavuwaga mmanjheni, mudhidhi yole odhulu wahifuguwa vano woona muzimu wotxena omukitelaga ninga kangayiwa. Ohiya eyo, nahikuma ndhu odhulu neraga: ‘Oyo di mwanaga, ginamudhivelimi, ginamurumedhimi.’’ (Mateus 3:16, 17) Juwawu agoonale yintelelo ele, oliye ahikanna ebaribari wi Yesu di Mesiya. (João 1:32-34) Yesu ahikala Mesiya mudhidhi yole vavethiliwiye muzimu wotxena wa Yehova. Oliye disakuliwe ni Mulugu wi akale Namathonga ni Mwene.—Isaías 55:4.

⁹ Dhovuhulela dha mBibliyani, madhu awogile Yehova, ele yapadduwile ni Yesu agamanle obaddiziwa, dhinovaha ebaribari wi Yesu di Mesiya. Yesu adhele wuvi, ni ari owi ddi? Kabeni none Bibliya onawogiye.

YESU ADHELE WUVI?

10. Bibliya onahudhiha ddi wodhela egumi ya Yesu ahinathi odha elabo yavati?

¹⁰ Bibliya onahudhiha wi Yesu akala odhulu ahinathi odha elabo yavati. Namavuhulela Mikeya ohuwoga wi Mesiya ahikalawo obajha ‘mudhidhi wakale.’ (Miqueias 5:2) Yesu ahiwoga dila dhowinjhivadhene wi oliye akala odhulu ahinathi obaliwa elabo yela yavati. (Omwileri João 3:13; 6:38, 62; 17:4, 5.) Yesu ahandana vanlubale ni Yehova ahinathi odha elabo yavati.

11. Mwahaya bwaddi Yesu adhe akalege athima vamentoni va Yehova?

¹¹ Yesu muthu athima vamentoni va Yehova. Mwahaya? Mwaha wi Mulugu ompaddusile Yesu ahinathi opaddusa dhatedhene. Bumwahaya Yesu agithaniwa ‘oobajha a dhopaddusiwa dhatene.’a (Colossenses 1:15) Yesu dofuneya vamentoni va Yehova woona wi oliye dipaddusiwe ni mwinnyene Yehova. Bumwahaya adhe ithaniwege ‘mwaana oobajha’. (João 3:16) Yesu ohumukavihera Yehova apaddusaga dhithu dhimodha. (Colossenses 1:16) Yesu onowithaniwa ‘ndhu’ mwaha wi Yehova ahimuruma wihina adhe alaleye muthenga ni anaavaha dhoholela angero ni athu elabo yela yavati.—João 1:14.

12. Nnonne addi wi Yesu ni Mulugu kahi muthu mmodhave?

¹² Athu atene enorumedha wi Yesu ni Mulugu muthu mmodha bahi. Mbwenye Bibliya kanahudhiha ndo. Bibliya onahudhiha wi Yesu ere opaddusiwa, mowindala Yesu ohukanna omambelelo. Mbwenye Yehova dipaddusile dhego dhamutene, oliye kanna omambelelo. (Salmos 90:2) Yesu kanahowelege okala ninga Mulugu. Mohisitheya Bibliya onohudhiha wi Babi di munlubale ompitha Mwaana. (Omwileri João 14:28; 1 Coríntios 11:3.) Yehova bahi dili ‘Mulugu akopolo dhatedhene.’ (Génesis 17:1) Oliye dili muthu oofuneya ni akopolo elabo yatene.—Osugwe wonelamo 14.

13. Mwahaya bwaddi Bibliya agawoga wi Yesu dooligana ni Mulugu ohoneya?

¹³ Yehova ni mwanaye Yesu, ehilaba vamodha yaka dhowinjhivadhene mudhidhi odhulu ni elabo yavati ehinapaddusiwe. Aliwa yodhivelana vanlubale! (João 3:35; 14:31) Yesu ohutajhiha pamadhene ekalelo ya babe, bumwahaya Bibliya agawoga wi oliye ‘dooligana ni Mulugu ohoneya.’—Colossenses 1:15.

14. Yandeyile addi mwaana oofuneya a Mulugu odha obaliwa elabo yela yavati?

¹⁴ Mwaana oofuneya a Yehova ohurumedha odha obaliwa elabo yavati. Eyo epadduwe addi? Motikiniha Yehova ahithukula egumi yamwanaye odhulu weka mbani mwanamwali ohunagonege nimulobwana ithaniwa Mariya. Nimukalelo yola Yesu kaanna babe oomwilini. Mariya ahimbala mwaana ologomana, onvaha ndina na Yesu.—Lucas 1:30-35.

YESU AARI OWIDDI?

15. Nnande addi omunona pamadhene Yehova?

¹⁵ Wileri mBibliyani livuru na Mateus, Marcos, Lucas, João onere ohudhera wodhela egumi ni ekalelo ya Yesu. Malivuru yala a mBibliyani enithaniwa muthenga dhixa. Woona wi Yesu onoligana pamadhene ni babe, nde onileriwe podi wukavihera omunona pamadhene Yehova. Bumwahaya Yesu adhe erege: ‘Ole agoonile ohumona Baba.’—João 14:9.

16. Yesu ahudhihesa ddi? Ndhe ahudhiha Yesu dhadhela wani?

¹⁶ Athu owinjhiva yamwithana Yesu ‘Namahudhiha.’ (João 1:38; 13:13) Ethu yoofuneya Yesu ahudhihiye bu ‘muthenga dhapama dhomwene.’ Ki omwene oyo ddi? Omwene wa Mulugu, omwene onathongege elabo yatene yavati, omwene oyo, onere wareliha athu atene enamwiwelela Mulugu. (Mateus 4:23) Dhatedhene ahudhiha Yesu dhadhela wa Yehova. Yesu owogile ayi: ‘Ndhe ginahudhihimi kadhinadhela mmuruni mwaga, mbwenye dhinadhela wa ole ogirumile.’ (João 7:16) Yesu ahinona wi Yehova onofuna wi athu enone muthenga womwene wa Mulugu onalamulege elabo yela yavati.

17. Yesu ahudhiha wuvi? Mwahaya bwaddi Yesu adhe hilibiherege wihina aahudhihe athu?

¹⁷ Yesu ahudhiha wuvi? Mburo bu mburo yafwanyeyawo athu. Oliye ahudhiha muthemba, muluwani, murampani, mwatemwene mwakala athu emwebedhaga Mulugu ni mmavade mwaathu. Oliye kajheha wi athu edhowe vakaliye. Oliye owaveda athuya. (Marcos 6:56; Lucas 19:5, 6) Yesu oolabihedha mudhidhi ni kopolo dhaye wi aahudhihe athu. Mwahaya? Mwaha ahinona wi siyene Mulugu afuniye wi oliye erena, ni oomwiwelela Babe. (João 8:28, 29) Yesu oolaleya mwaha wi owakalela thagaraga athu. (Omwileri Mateus 9:35, 36.) Oliye ahinona wi anamaholela dhigereja kiyahudhiha ebaribari wodhela Mulugu ni omwene waye. Mowindala oliye owilibihera wi aakavihere athu atene wiwa muthenga dhapama dhomwene.

18. Ekalelo baani anna Yesu enudhivela?

¹⁸ Yesu owadhivela athu ni owapwatha. Oliye ari muthu owaddameleya naathu, teto athu yodhiveliwa othapanya nuuliye. Anamwani yodhiveliwa okala nuuliye. (Marcos 10:13-16) Yesu ari muthu apama. Oliye ootakaleliwa kunya ni obure. (Mateus 21:12, 13) Mudhidhi Yesu agali elabo yavati, ahiyana kiyoneliwamo newene kiyarihiwa. Mbwenye Yesu owathithimiha ahiyana. (João 4:9, 27) Yesu ari muthu owiyeviha vanlubale. Motajhiha, nlabo nimodha ahisuwa manyalo anamaharaye, mabasa yapariwesa mudhidhi yole ni adhari.—João 13:2-5, 12-17.

19. Yopadduwa baani enatonyihedha wi Yesu ahinona nde athu yahoweliwa ni owakavihera?

¹⁹ Yesu oonona ele athu yahoweliwa, ni owakavihera. Ohutonyihedha eyo mudhidhi alabihedhiye kopolo dha Mulugu wihina erihe matikiniho. (Mateus 14:14) Motajhiha, mulobwana mmodha anna maranya ahidhowa wali Yesu omuloba: ‘Nabuya mwafuna givulumuseni.’ Agoonile goyi ni oredda anna mulobwana ole Yesu ahukuuwa. Oliye ahimukalela thagaraga ofiyedha omukavihera. Nuwindo Yesu otapula nlada naye, omuhidelana mulobwanoole ni owoga eraga: ‘Miyo ginofuna! Vulumuwa.’ Mudhidhi yole maranya ale orimela! (Marcos 1:40-42) Kubuwela makalelo ahagalale mulobwana ole?

YESU OOMUROROMELA BABE MUDHIDHI WATENE

20, 21. Mwahaya bwaddi Yesu adhe akalege tajhiha yapama ya muthu onafuna omwiwelela Mulugu?

²⁰ Yesu tajhiha yapama ya muthu onafuna omwiwelela Mulugu. Yesu oomuroromela Yehova naari onihiwaga goyi naamwiddanaaye obe naari dhihimweddelaga pama. Motajhiha, Yesu kaathegile mudhidhi Saddana amwehiliye. (Mateus 4:1-11) Amudhaaye kiyarumedha wi oliye di Mesiya, yahiwoga wi oliye ‘ohusavuwa,’ mbwenye Yesu odhowanave eragana efunelo ya Mulugu. (Marcos 3:21) Ethu emodhaya sowi amwiddani a Yesu yamonihaga goyi, kawerele obure, mbwenye odhowave amuroromelaga Mulugu.—1 Pedro 2:21-23.

²¹ Naari onihiwaga goyi, Yesu ahimuroromela Yehova ofiyedha okwa waye. (Omwileri Filipenses 2:8.) Kubuwela goyi onile Yesu nlabo nakwiliye. Oliye omagiwa, anamona owoota omwinkedha wi ohumunyemula Mulugu, otorihiwa ni anamathonga abure, muthithi waathu omuteya, atoropa omuukutha vanlubale aliwa omukomela vantxikwani. Ahinathi okwa Yesu wera: ‘Dhihakwanela!’ (João 19:30) Yesu agakwile yahivira malabo mararu vano Yehova onvenyiha muukwani ni mwiili womuzimuni. (1 Pedro 3:18) Egavinre malabo owinjhiva, Yesu ohogolowela odhulu, ‘ogirati mono wojha wa Mulugu ojhehaga wi Mulugu anvahe omwene.’— Hebreus 10:12, 13.

22. Ofuru baani ninnihuna mwaha Yesu omwiwelela Babe?

²² Wiwelela wa Yesu, ohunivaha ofuru wowakela egumi yohimala mparayizu elabo yela yavati. Musolo onaharela, nnere ohudhera makalelo baani okwa wa Yesu onnivahiwa ofuru wowakela egumi yohimala.