OHUDHRA 52
Mwahaya bwaddi ekala yapama owara ni makalelo apama ni okala owiwegeredhene?
Kadda muthu ohukanna mukalelo waye wowara ni wowiyegeredha. Mbwenye mBibliyani ehikalamo malagano enanikavihera owara dhithu dhinanidhivela wula nihalumpe malamulo a Yehova. Vano kabeni nawoone malagano ayo.
1. Ethu baani enaanikavihere osakula muwarelo wehu ni makalelo ehu owiwegeredha?
Iyo niri adhaari a Yehova, bumwahaya sapama okala owegeredheyene ni owara ni mukalelo ‘wohivaha manyazo, wofwanelela ni wapama.’ Ni makalelo yala nnowoniha ‘nroromelo nehu [obe omwebedha wehu] Mulugu.’ (1 Timóteo 2:9, 10) Wasugwe malagano mannayi: (1) ‘Dhowara dhehu dhikalege dhofwanelela.’ Podi wihina omutugumano ohona wi Anamona a Yehova ehikanna muwarelo wohiyana-iyana. Mbwenye dhowara dhewa ni makalelo ewa osamalela mathithi enowoniha wihina enoomuriha Mulugu, Yehova. (2) Dhowara dhehu ‘dhihivahege manyazo’, obe dhihonihege mwili wa muthu, newene kaniwarege dhowara wi nathukulena athu murima. (3) Nnowoniha wi nihikanna “mukalelo wapama” nahiharaga moda obe elemelelo yothimagelaga kadda yowara enakuma. (4) Ekalelo yehu yonihege “nroromelo ninnihuna ni Mulugu,” obe nawonihage athu atene wi nnamwebedha Mulugu ebaribari. — 1 Coríntios 10:31.
2. Mukalelo wehu wowara onaapatha aavi addibilihu?
Ebaribari wihina iyo podi osakula dhowara nnafunihu, mbwenye sapama wubuwela makalelo muwarelo wehu onapathiwa athu amodha. Nnowilibihera wihina dhowara dhehu dhihakwakwathusege athu amodha. Mbwenye nnafuna ‘nahagalase amwanddamani ehu ni nalibihe.’— Omwileri Romanos 15:1, 2.
3. Muwarelo wehu onaavahe aavi onamona ndina na Yehova?
Mudhidhi watene niwarege dhowara dhofwanelela, thabwa-thabwa nadhowaga omutugumanoni ni mmabasani olaleya. Kannafuna wi dhowara dhehu dhakwakwathuse athu, dhathukulelaga ohuvuruwana muthenga nnalaleyihu. Mbwenye, nnafuna niware mwamakalelo ‘enathithimiha dhohudhiha dha Mulugu ehu,’ dhathukulelaga athu ohudhera wodhela Yehova. — Tito 2:10.
OHUDHERE DHITHU DHIMODHA
Woone makalelo oowara ehu ni owiwegeredha enakaviheriwa athu onona wihina niri makiristawu ebaribari.
Muwarelo wehu podi wooniha akala nnowariiha obe naari anamathonga. Emodhave muwarelo wehu omurihege Yehova naarive aganonne dhithu dhiri mmurimani mwehu
4. Owara ni makalelo apama onowoniha wihina nnomuriha Yehova
Ethu yinlubale enanithukulela othuwa-thuwela muwarelo wehu ddi? Mmwileri Salmos 47:2, mwamala muthapanyedhe makoho enaharela:
Iyo nnonvaha onamona Yehova. Onamona ngo onavolowela aavi makalelo ehu owara?
Ononamo wihina nnohowela othuwa-thuwela muwarelo wehu obe makalelo nrihu nadhowaga omutugumanoni obe mmabasani olaleya? Mwaha waddi?
5. Makalelo othoma dhithu dhapama wodhela muwarelo wehu ni makalelo ehu owiwegeredha
Dhowara dhehu kadhinahoweleya okala dhokwima, mbwenye dhikalege dhofuladhene ni dhiwananege ni mburoya nnayihuwo obe nirihuvo. Mmwileri 1 Coríntios 10:24 ni 1 Timóteo 2:9, 10. Mwamala muthapanyedhe ethu enanithukulela ohuwara dhowara . . .
dhowara dhohufwanelela obe dhinathabwa ovahiwa thima ni elabo.
dhomaga, dhokwiva, dhowonela obe dhimodhadhene dhinoniha mwili wa muthu.
Kale Yehova ahavaha amwaana Ezarayeli malamulo ohiyana-iyana amulabihedhaga Moses. Peeno makiristawu kinawiwelela malamulo ayo. Mbwenye, malamulo ayo enonihudhiha makalelo owubuwela a Yehova. Mmwileri Deuteronómio 22:5, mwamala muthapanyedhe nikoho nnaharela:
Mwahaya bwaddi nigahowela orabela dhowara muhiyana aneriye awara okalaga ninga mulobwana vano mulobwana awara okalaga ninga muhiyana. Ni mweddelo ola ahiyana eni yasatha mathithi okalaga ninga alobwana vano alobwana waaluwa mathithi okalaga ninga ahiyana?
Mmwileri 1 Coríntios 10:32, 33 ni 1 João 2:15, 16, mwamala muthapanyedhe makoho enaharela:
Ekalele ddi yapama wikoha ayi: ‘Ekalelo yaga yere omutakalela ddibila mmulogoni obe muthu a vamuruddani vaaga?’
Athu a murudda waga enawara ni eniyegeredha aavi?
Ononamo wi mukiristawu ere ofwanelela owara obe wiwegeredha ni makalelo yayo? Mwaha waddi?
Iyo podi owara ni wiwegeredha mwamakalelo ohiyana-iyana enamuhagalasa Yehova
ATHU AMODHA ENAWOGA YEGI: “Kaginapwatha dhithu enawoga athu amodha. Kadda muthu ohukanna ofuru wowara dhithu anafuniye.”
We onorumedha? Mwaha waddi?
OVIRISEDHA
Nathoma dhithu dhapama wodhela makalelo owara ni owiwegeredha, nnowoniha wi nnomuriha Yehova ni nnowariiha athu amodha.
Ogwaddela
Mwahaya baddi muwarelo wehu ni makalelo ehu owiwegeredha ekala athima vamentoni va Yehova?
Dholaga baani dha mBibliyani dhinanikavihera wodhela makalelo owara ni owiwegeredha?
Muwarelo wehu onaavahe aavi onamona wapama obe wabure ndina na Yehova?
WEGI ONONE DHITHU DHIMODHA
Woone makalelo dhowara dhawo dhinawogiwa wodhela we.
“Gwarda ropawo anawoga ddi wodhela we?” (Epaddi ya mu jw.org)
Woone mwahaya bwaddi ekala yapama orajhiha wubuwela ohunamukose tatuwaje.
“Bibliya anawoga ddi wodhela tatuwaje?” (Epaddi ya mu jw.org)
Wawone malagano a mBibliyani enukavihere othoma dhithu dhowara.
“Dhowara dhawo dhinowoniha wihina onomulabela Mulugu?” (A Sentinela, Setembro a 2016)
Woone makalelo muhiyana dhala arumedhiye mukalelo wowara wa athu amodha.
“Mukalelo waga wowara ni wowiyegeredha wogikwakwathusa” (Despertai!, 22 a Dezembro a 2003)