Wonelemo Pama
1. Babiloniya Munddimuwa ddi?
Nnonne aavi wihina “Babiloniya Munddimuwa” anatapulela gereja dhatedhene dhowoota? (Apocalipse 17:5) Karajhiha wubuwela:
Babiloniya Munddimuwa onovolowela muselu dha mwilaboni yatene. Bibliya onihina Babiloniya Munddimuwa, akiratile ‘vaari va muthithi waathu ni va malogo.’ Oliye ohukanna ‘omwene wanamathonga amwilaboni.’ — Apocalipse 17:15, 18.
Babiloniya Munddimuwa kanatapulela pulitika newene malondda. Nnonne mwaha ‘mamwene amwilaboni’ ni ‘anameeddiha malondda’ kinatolosiwe vamodha nuliye. — Apocalipse 18:9, 15.
Babiloniya Munddimuwa onowalapeliha athu ni Mulugu. Anithaniwa namararuwa mwaha analaba vamodha ni anamathonga egaanaga korowa dhewa ni dhithu dhimodha. (Apocalipse 17:1, 2) Onowaleketha athu amwilaboni yatene. Teto ohukanna nibili naathu aatene epiwe mwilaboni yavati. — Apocalipse 18:23, 24.
Ohogolowele ohudhera 13 ponto 6
2. Mesiya aathwanyuwe alini?
Yovuhulela ya sumana 69 enonikavihera wonelamo mudhidhi aathwanyuwe Mesiya. — Omwileri Daniel 9:25.
Sumana ndho 69 dhabajhe alini? Yaka ya 455 M.W.O. Yaka yele, musadoro Neemiya odhowa oJeruzale wihina ‘avenyihedhe ni amage’ luwani yo Jeruzale. — Daniel 9:25; Neemias 2:1, 5-8.
Sumana ndho 69 dhaamale mudhidhi mungasi? Dhovuhulela dhimodha dha Bibliya dhinihina kadda labo enatapulela yaka yantero. (Números 14:34; Ezequiel 4:6) Bumwahaya, kadda sumana enatapulela yaka tanu nabiili. Va yovuhulela ela, sumana 69 dhinakala yaka 483 (sumana 69 x malabo 7).
Sumana ndha 69 dhimanle alini? Nakontari yaka 483 okuma 455 M.W.O., dhinagomela yaka ya 29 M.W.a Yaka yeyo Yesu obaddiziwa ni okala Mesiya. — Lucas 3:1, 2, 21, 22.
Ohogolowele ohudhera 15 ponto 5
3. 455 M.W.O.3. Makalelo oojha murombwe enavolowela nikame
Ehikalawo makalelo oojha murombwe nnalabihedhiwa nikame na mureddaya, makalelo ayo mamodha makiristawu kinarumedha, ninga ovaha nikame obe okumihiwamo ni okoyiwa epaddi emodhene wihina nlabihedhiwe muthu amala woperariwa.— Deuteronómio 15:23.
Mbwenye makalelo mamodha kadda muthu podi olabihedha mubuwelo waye. Ninga izami ya nikame hemodiyalise, hemodiluwisawu, rekuperasawu intraoperatoriya dha selula obe olabihedha makina murima-madhadhu. Kadda mukiristawu athomege makalelo anafuniye wihina nikame naaye nlabihedhiwe mudhidhi wowoperariwa, obe akosaga izami obe terapiya. Kadda mediku ohukanna makalelo aneddihiye dhithu ndha. Bumwahaya, mukiristawu ahinarumedhe woperariwa, okosa izami obe terapiya, anofwanelela onona ethu eneriwena nikame naaye. Karajhiha wubuwela ponto ndha:
Ki akala epaddi ya nikame naaga enere ohabusedhiwa mburo mmodha teto nikamena niimele mwari mwa mudhidhene? Goonege nikame nno ninga na mmwiilini mwaaga, obe mubuwelo waga were ogithukulela woona wi nnofwanelela ‘okuthuleliwa vati’? — Deuteronómio 12:23, 24.
Ki akala mudhidhi goperariwaga obe gijhaga murombwe bu murombwe, vano nikame naaga nikumihiwamo nipwehiwa mburo mmodhaya ni nsadduliwa vang’ono, vano nnohogoloseliwa mmwiilini mwaaga? Mubuwelo waaga werege oginyemela?
Ohogolowele ohudhera 39 ponto 3
4. Ohiyana
Bibliya onowakongomedha anamatelana okala vamodha. Oliye anowoniha wihina mulobwana ni muhiyana yahiyana kitelane ni muthu mmodha. (1 Coríntios 7:10, 11) Mbwenye dhihikala dhithu dhinawenya makiristawu ohiyana.
Akala mulobwana kanafunawene osapela muralaye: Makalelo ayo podi othukulele murala ohukanna yoojha. — 1 Timóteo 5:8.
Akala mulobwana obe mwariye enowana ofiyedha oporosana: Makalelo ayo podi ofiyedha egumi ya mulobwana obe ya muhiyana okala vang’ovini. — Gálatas 5:19-21.
Akala mulobwana obe muhiyana anowerana dhatedhene wihina amukoddihe mukwaye omulabela Yehova: Eyo enopweha vang’ovini wandana anniyena ni Yehova. — Atos 5:29.
5. Feriyado ni festa
Makiristawu kinajha festa ya feriyado enamukuula Yehova. Mbwenye dhikalawo dhithu kadda mukiristawu anafwaneleliye olabihedha mubuwelo waye oxagihiwe ni Bibliya wihina athome ethu yowerana. Woone dhopadduwa.
Muthu era okanne Natali apama. Omwakule wegihina “Ginotamalela.” Akala muthuya anofuna onona mwahaya bwaddi ohumujhaga Natali obe festa emodha podi opatha mudhidhi yoyo wihina omwaaddele.
Akala mamuno obe mwariyo, ahili Namona a Yehova, ohuwithana wihina wajhe festa vamodha namudhaye. Mubuwelo wawo wuwenya odhowa, omwaaddele mamuno obe mwariyo wihina festa ele yeeddaga, dhakalawo dhilemelelo dhiniwanana ni gereja dhowoota, onere osusavo.
Patarawu awo uvaha mwanakorowa ya omagomihero wa yaka. Sabure orumedha? Naari, mbwenye sapama orajhiha opendda ethu enamuthukulela wuvaha mukonoya. Patarawu awo anoona wi mwanakorowaya enokosa epaddi ya festa ya omagomihero wa yaka? Obe makalelo owatamalela mabasa wapanriwe?
Muthu uvaha mukono omagomihero wa yaka. Muthuya podi owoga egi: “Gihinona wihina kunajha festa, mbwenye ginafuna guuvahe mukono ola.” Podi wera muthuya onowuwoniha opama. Mbwenye, sapama wikoha: ‘Nerege oliye anafuna ehe nroromelo naaga obe anafuna wi gijhege festa ndha?’ Vano ogubuwele elaya, yothomaya sawo akala onere orumedha obe naari wakela mukono oyo. Nnafuna nikanne mubuwelo wapama ni nikale athu oororomeleya nathomaga dhithu dhatedhene. — Atos 23:1.
Ohogolowele ohudhera 44 ponto 1
6. Dhiredda dhoovaliwa
Onere ddi wakanna oredda woovala? Nnowadhivela athu, bumwahaya, nikala pole-pole ahavaliha athu amodha oredda ola. Nnokala pasope naarive nanganyedhaga akala nikanna oredda ola woovala obe naari. Nnerana ndo mwaha Bibliya onihina: ‘Omudhivelege mwanddamanaawo ninga onidhiveliwe.’ — Romanos 13:8-10.
Eyoya enatapulela ddi? Muthu anna oredda woovala kakalege oobajha wawaddamela akwaye wihina awabarasari, avahe mada obe beju. Newene katakaleliwege athu amodha yahimwithanelaga vade vewa wihina yaredhe vamodha. Sapama omwaddela namaholela aanamaholela mulogo wihina ohukanna oredda woovala ahinathi obaddiziwa. Ndo, enere ovediwa makalelo obarela egumi yaathu amodha enaabaddiziwe. Ki akala muthuya ahikanna ebaribari wi ohukanna oredda woovala? Enahoweleya eere ddi ahinabajhe omwenddi? Anohowela odhowa ospitale wihina apenddiwe nikame naaye. Nimakalelo yala, muthuya anowoniha wi anowapwatha athu amodha, mowiwanana ni yolebela enihina ‘kamusayelege dhofuna dhenyu baahi, mbwenye musayelege dhofuna dha athu amodha.’ — Filipenses 2:4.
Ohogolowele ohudhera 56 ponto 2
7. Muselu dha malondda ni dha malamulo
Iyo podi orabela muladdu mwaha oleba dhithu dhatedhene niwananilihu, podive akala nerilena ni ddibila a mmulogoni. (Jeremias 32:9-12) Naari dhigarive ndo, malabo mamodha makiristawu podi ohiwanana mwaha korowa obe dhithu dhimodha. Eyo yapadduwa, yere okala yapama othapanyedha muladduya mwamakalelo apama, ehimwithanile muthu mmodhaya.
Nnawedhe addi owooga muladdu dhinlubale ninga ojhelana ni ohiwanana? (Omwileri Mateus 18:15-17.) Yesu ohunihudhiha dhithu tharu wihina niharege:
Niwoge muladduya ni ddibilihu baahi ahirivo muthu mmodha. — Osugwe versu 15.
Dhahenyeya omulobe ddibila mmodha obe abili ammulogoni owithwelavo omuzimuni wihina yuvelele wadhowaga owoga nuliye. — Osugwe versu 16.
Naari dhigarive ndo muladduya ohumala, ethu emodhaya enahoweleya werana fuwasayela anamaholela mulogo. — Osugwe versu 17.
Wasumela addibilihu podi wathukulela athu amodhaya omubuwelana obure Yehova vamodha ni mulogo. (1 Coríntios 6:1-8) Mbwenye dhihikalawo dhithu dhimodha dhinahoweleya othapanyedha o tiribunale. Motajhiha ninga omwalana, muthu anahalena ahima, anaavahege dhoojha, ale enahalena dhithudha. Mukiristawu anadhowa o tribunale wihina athapanyedhe muladdu waye, eragana dhatedhene wihina okalevo wiwanana, kanaviriganiha ele Bibliya anawogiye.
Ki-to muthuya iiya, ampa muthu, amurarusa mwaana, anvada muthu ni dhithu dhimodha? Yapadduwa ndo, mukiristawu athoma wawaddela anamathonga kanaviriganiha dholaga dha mBibliyani.
a Okuma yaka ya 455 M.W.O., ofiyedha yaka ya 1 M.W.O., dhinakala yaka 454. Okuma yaka ya 1 M.W.O., ofiyedha yaka ya 1 M.W., yaka modha (kawili yaka zero). Okuma yaka ya 1 M.W., ofiyedha yaka ya 29 M.W., dhinakala yaka 28. Ndo dhinakala yaka dhowakwana 483.