Ohiwegeredha wihina obaddiziwe?

Mudhidhi omuhudheraga Bibliya ohudhera dhithu dhohiyana-iyana wodhela Yehova. Teto podi wera ohusaddula egumawo ni onowerana ndhe ohudheriwe. Mbwenye podi wera dhikalawo dhithu dhinuhiha wipeleka wa Yehova ni obaddiziwa. Ohudhera wula, nnere woona dhithu dhinuwanganyedhiha obaddiziwa nimakalelo ogonjhiha.

1. Wegi obaddiziwe enohoweleya onona dhithu dhatene dhiri mBibliyani?

Wihina obaddiziwe onohowela okanna ‘enonelo yowakwana ya ebaribari.’ (1 Timóteo 2:4) Eyo kinatapulela wihina obaddiziwe enohoweleya onona wakula makoho aamatene a mBibliyani. Naarive ogabaddiziwe kale odideleve ohudhera wodhela Yehova. (Colossenses 1:9, 10) Mbwenye wegi obaddiziwe enohoweleya wanona malagano manlubale a Mmadhuni a Mulugu. Bumwahaya anamaholela mulogo enere wukavihera onona akala ohuhudhera malagano ayo obe naari wihina obaddiziwe.

2. Dhithu baani onahoweliwe werana wahinathi obaddiziwa?

Ohunabaddiziwe, enohoweleya ‘othwaruwa ni ohiya mweddelo wawo wakale’. (Omwileri Atos 3:19.) Eyo enatapulela wihina ohuhiya dhithu ndhe weriwena kale dhabure nuwindo oloba nikavihero wa Yehova. Teto enatapulela wi ohuthoma werana efunelo ya Yehova ni kunafuna ohogolowela werana ethu-siithu yabure. Ethu emodha onahoweliwe werana fuwoona mutugumano dhatedhene ni odhowa mmabasani oolaleya.

3. Mwahaya bwaddi ohugahowela woova obaddiziwa?

Athu amodha enowoova ohanda werana dhatedhene empaganyiwa Yehova. Ebaribari wihina malabo mamodha onerege oviriganiha. Bibliya anowaawoga ahiyana vamodha ni alobwana yaviriganiha. Mbwenye kuddiwale Yehova kanajheha wihina adhaari aye ekale oologomana. (Omwileri Salmos 103:13, 14.) Oliye anohagalala weragana ele onandiwe! Teto oliye anere wukavihera. Mwebaribarene Yehova anopaganya wi ‘Kavo ethu enanimwalanihe nuudhivela waye.’ — Omwileri Romanos 8:38, 39.

OHUDHERE DHITHU DHIMODHA

4. Omunone pama Yehova

Wihina ofiyedhe obaddiziwa enahoweleya omunone Yehova ofiyedha waani? Enohoweleya omunona Yehova ofiyedha omudhivelaga ni okanna efunelo yomuhagalasa. Musugwe VIDIYU, wihina moone ethu anamahudhera Bibliya yeriliwana wihina emunone pama Yehova, mwamala muthapanyedhe nikoho nnaharela.

VIDIYU: Dhithu yerilena athu amodha ofiyedha obaddiziwa (3:56)

• Nvidiyuni, ethu baani yakavihere athu amodha wiwegeredha ofiyedha obaddiziwa?

Mmwileri Romanos 12:2, mwamala muthapanyedhe makoho dhinaharela:

• Onowanganyedha dhithu anahudhiha Bibliya? Onowanganyedha akala anamona a Yehova enohudhiha ebaribari?

• Wanganyedhaga, enahoweleya were ddi?

5. Egonjhihaga makathamiho wihina ebaddiziwe

Atene iyo nahifwanyiwa dhoweha nuupeleka egumihu wa Yehova wi nibaddiziwe. Wihina moone yopadduwa dhala, musugwe VIDIYU, mwamala muthapanyedhe makoho enaharela.

VIDIYU: Mwaha omudhivela Yehova anogonjhiha dhoweha (5:22)

• Nvidiyuni, dhoweha baani agonjhihe Narangerel wi amulabele Yehova?

• Odhivela anna Narangerel ni Yehova wimukavihere aavi ogonjhiha dhoweha?

Mmwileri Provérbios 29:25 ni 2 Timóteo 1:7, mwamala muthapanyedhe nikoho nnaharela:

• Enanivaha oliba murima ofiyedha wagonjhiha makathamiho ddi?

6. Ororomele nikavihero na Yehova

Yehova anere wukavihera wihina omuhagalase.Musugwe VIDIYU, mwamala muthapanyedhe nikoho nnaharela.

VIDIYU: Jeova anere wukavihera (2:50)

• Nvidiyuni, ethu baani yamukoddiha namahudhera aBibliya obaddiziwa?

• Ki elibihe omuroromela waye Yehova ddi?

Mmwileri Isaías 41:10, 13, mwamala muthapanyedhe nikoho nnaharela:

• Wipeleka wa Yehova, onakanne aavi ebaribari wihina onere wakwanihedha yothoma yawo?

7. Wenjhedhedhe otamalela wawo odhivela wa Yehova

Opendda makalelo Yehova anudhiveliye onere wenjhedhedha odhivela wawo ni efunelo yawo yomulabela. Mmwileri Salmos 40:5, mwamala muthapanyedhe nikoho nnaharela:

• Mareeliho manlubale Yehova uvahiliye baavi?

Namavuhulela Jeremiya omudhivela Yehova ni Madhu a Yehova, teto ovaha thima oneti anniyena womulabela Yehova. Jeremiya ahiwoga egi: ‘Mwaha wa madhu enyu ginothaba ni enohagalasa murima waaga, mwaha ginothukula ndina nenyu, Yehova Mulugwaga.’ (Jeremias 15:16) Wawakule makoho enaharela:

• Mwahaya bwaddi okala oneti munlubale okala Namona a Yehova?

• Onofuna obaddiziwa ni okala Namona a Yehova?

• Ehikalawo ethu enukoddiha?

• Moonelo wawo, enahoweleya were ddi wihina obaddiziwe?

OVIRISEDHA

Nnikavihero na Yehova, podi ogonjhiha makathamiho bi makathamiho wihina obaddiziwe.

Ogwaddela

• Wihina obaddiziwe onohowela onona dhithu dhatedhene dhiri mBibliyani?

• Dhithu baani onahoweliwe osaddula ohunabaddiziwe?

• Mwahaya bwaddi ehikala yapama ohiya wi woova wuhihe obaddiziwa?

WEGI ONONE DHITHU DHIMODHA

Woone ethu enukavihere wihina obaddiziwe.

“Ohiwegeredha wihina obaddiziwe?” (A Sentinela, Março a 2020)

Woone makalelo oogonjhiha dhoweha dhuhihe obaddiziwa

“Enagihiha obaddiziwa ddi?” (A Sentinela, Março a 2019)

Woone makalelo mulobwana agonjhihiye makathamiho manlubale wihina abaddiziwe.

‘Enuhiha obaddiziwa ddi?’ (1:10)

Omabajho, mulobwana dhaala ithaniwa Ataa owanganyedha akala yere okala yapama obaddiziwa. Vano woone ethu emuthukulenle werana yothoma ela yinlubale.

Ginofwanelela? (7:21)