Mudhidhi Mulugu athongaga dhopaddusiwa dhatedhene dhaali dhowiwanana ni dhahikanna murenddele
Mwahaya bwaddi nigahowela Omwene wa Mulugu?
Numala athu opaddusiwa, namapaddusa ehu, anithaniwa Yehova, oliye baahi daali namathonga. Oliye oothonga nuudhivela. Opaddusa mburo woriya — mundda wa Ideni wihina athu ekalegemo. Ni onvaha Adawu ni Eva dhoojha ni mabasa athima. (Génesis 1:28, 29; 2:8, 15) Yahere yiwelela onamathonga wodhivela wa Mulugu, athu yerege okanna murenddele.
Makolwihu oobajha, omurugunuwela Mulugu vamodha ni othonga waye
Bibiliya onowoga wi mungero mmodha osadduwa okala Saddana Ddiyabo, oliye wera Mulugu kanathonga pama. Wera athu yerege ohagalala ehiwelelaga onamathonga wa Mulugu. Mowukuula, makolo ehu oobajha, omwiwelela Saddana vano omurugunuwela Mulugu. — Génesis 3:1-6; Apocalipse 12:9.
Woona wi Adawu ni Eva yahimurugunuwela Mulugu ninga namathonga ewa aliwa wigariwa mparayizu, oyelela ejhehedho yokalawo ni mukalakala vamodha ni egumi yologomana. (Génesis 3:17-19) Aniwa yabalegiiwa yerege woona goyi mwaha yothoma ela. Bibiliya anawoga egi, mwaha wa otheega wa Adawu, ‘yothega ehivolowa mwilaboni ni okwa ohuvolowa mwaha wa yothega.’ (Romanos 5:12) Otheega ohudhana makathamiho mamodha, Bibiliya anowoga egi: ‘Mudhidhi athu enaathongiwa akwiwa yatotelaga goyi.’ (Eclesiastes 8:9) Ni madhu mamodha athu yathongaga goyi enoothabwa mwilaboni.
MUDHIDHI ATHU YAMBELIWA OTHONGA
Ninrodi omurugunuwela Mulugu
Muthu oobajha othonga anawogiwa mBibiliyani di Ninrodi. Oliye kiwelela onamathonga wa Yehova. Okuma mudhidhi wa Ninrodi athu enna owedha wa othonga enowawoniha goyi athu amodha. Yaka 3000 mundduli mwene Salomawu ohuwoga eraga: ‘Miyo woona mutori dhaliba yataabusiwa, mbwenye kuwaali muthu owalibiha. Athu yataabusa yahikanna owedha, bumwahaya kaliwo muthu owalibiha.’ — Eclesiastes 4:1.
Peeno dhithudha dhili ndo. Yaka ya 2009 Revista na Organização das Nações Unidas nihiwoga neraga, vano onothabwa wooneya onamathonga wabure wi “bunathabwa otota makathamiho mwilaboni.”
MUDHIDHI WA MASADDUWO
Elabo enaahowela anamathonga apama ni othonga wapama. Siyeno apagannye namapaddusa ehu.
Onamathonga waathu newene kuwaandile omariha makathamiho manlubale aathu
Mulugu ohutikitera onamathonga, obe omwene, onalamulege vanburoni va onamathonga waathu, ni ‘Omwene wa Mulugu baahi bunathongege malabo amatene.’ (Daniel 2:44) Buumwene yoyo matxikwi ni matxikwi athu enalobiwa wi odhe. (Mateus 6:9, 10) Mbwenye omwene oyo kahi Mulugu anathonga. Oliye amusakule muthu aali elabo yavati. Mulugu amusakule aani?