Mwene a Omwene wa Mulugu baani?

• Asakuliwe ni Mulugu. ‘Di miyo gimutikitere mwene aaga . . . Guvahe malogo ninga yowakela yawo, winagomela elabo ninga nvaho wawo’. — Salmos 2:6, 8.

• Amuhabile mwene Davidi. ‘Nihibaleliwa mwana amulobwana, nihivahiwa mwanamulobwana . . . Analamulege elabo yaatene ni murenddele wa mpaddo wa Davidi ni mureddele waye kunadha omala, anere otikitera Omwene waye’ — Isaías 9:6, 7.

• Obaliwe oBele. ‘Ni weya Bele . . . , wa we onere okuma ole anakale namathonga  . . . Ovuwa waye, onere ofiya winagomela elabo.’ — Miqueias 5:2, 4.

• Onyemuliwa ni opiwa. ‘Oliye onyemuliwa mbwenye kanipwathile . . . Oliye ohutoroliwa mwaha wa dhothega dhehu. Ohunyenyiwa mwaha wa dhoviriganiha dhehu.’ — Isaías 53:3, 5.

• Ovenyihiwa mukwani ni ovahiwa nthithimiho. ‘Kamunagihiye Mmasiye. Kamunenye wi mudhari enyu ororomeleya avudde mmasiye . . . Ohagalala oli nlada nenyu nojha ni mukalakala.’ — Salmos 16:10, 11.

Yesu Kiristu namathonga oofwanelela

Mwa athu atene, anaakwanihedha dhatenene di muthu mmodha baahi, Yesu Kiristu. Eyo enowiwanana ni ele mungero awogileye ni maye Yesu Mariya eraga: ‘Mulugu anere omuthikela mpaddo wa Davidi, ababe, . . . ni Omwene waye kunaamale.’ — Lucas 1:31-33.

Yesu kahi namathonga a elabo yavati. Mwebaribarene, oliye anathongege elabo yavati agaali odhulu ninga Mwene a Omwene wa Mulugu. Mwahaya bwaddi Yesu akala Namathonga oofwanelela? Osugwe dhithu erilena Yesu agaali elabo yavati.

• Yesu owaapwatha athu. Yesu owakavihera athu aatene, kapwatha akala mulobwana, mwihiyana, muzombwe obe owuluvala. Oliye owasamalela athu atene, kapwatha akala ahinona wadheliwa obe naari. (Mateus 9:36; Marcos 10:16) Labo nimodha mulobwana dhala anna maranya omuloba Yesu egi: ‘Mwafuna podi ogivulumusa,’ Yesu omweddela thagaraga onvulumusa mulobwana ole. — Marcos 1:40-42

• Yesu ohunihudhiha makalelo omuhagalasa Mulugu. Oliye enre: ‘Nyu kamukale adhari a Mulugu ni a Dhorela.’ Oliye wera naweddihege akwihu ninga munafunihu wihina aliwa eneddihege — nna nlagano nnoniwe vanlubale. Ohiya eyo oliye ohoniha wihina Mulugu anowoona makalelo nnubuwelihu, ohiya ndhe baahi nnerihu. Bumwahaya, wihina nimuhagalase Mulugu nnohowela osugweraga dhithu dhili mmurimani mwehu. (Mateus 5:28; 6:24; 7:12) Yesu ohuwoga wi, nafunaga okanna ohagalala webaribari, nihudhere ndhe anafuna Mulugu namala nivirihemo. — Lucas 11:28.

• Yesu ohunihudhiha makalelo owoniha odhivela. Dhowera ni madhu a Yesu dhahikanna kopolo dhaddiginya murima dha ale yanvuruwana. ‘Athu aatene yootikina makalelo aye ohudhiha, oliye ahudhiha ninga muthu anna owedha, ohiyana ni anamahudhiha ewa’. (Mateus 7:28, 29) Yesu wera: ‘Mudidele wadhivela amwiddani enyu.’ Oliye ahifiyedha walobelela ale yafuna ompa eraga: ‘Babani mwalevelele, mwaha kinonne eneriwa.’ — Mateus 5:44; Lucas 23:34.

Mohanganyedha Yesu di muthu oofwanelela wi athonge elabo yatene mwaha okala muthu oofuneya ni apama. Ki anambele othonga alini elabo yavati?