Dhatedhene mwaha wa emwerumweru!

ANAMWALI dhaala yeraga weedda murudda wa Bagayo wineddiwa malondda elabo yo Filipina. Aliwa woona karinya yolaleyana mbwenye kihabuwile. Helen, murogola alaba ni karinya ele wateyela anamwali ale. Naari dhigarive ndo aliwa kayimenle, mbwenye yahitikina mwaha wa murogola ole wateyela.

Mudhidhi mmodhene anamwali ale yahogolowela vaade egaagwenle mmunibasini vano aliwa wawona madhu yalebiwe vapalakani ya Nyumba ya Omwene ninga ale yawoniliwa va karinyani: jw.org. Vano aliwa okita mmunibasini mune wihina yawone mawora a mutugumano dhohiyana-iyana a Nyumba yele ya Omwene.

Egavinre mwana malabo anamwali ale abili odhowa omutugumanoni, ohumunona muthu yanfwanyiliwa Murogola Helen! Aliwa omubuwela mowaguva; teto wubuwela wihina aali mwihiyana mmodhave aateyelege. Helen anowoga egi: “Aliwa nugaddamela gahithuwa-thuwa vang’ono. Gubuwela wihina gere wathegela.” Anamwali ale omwaddela murogola Helen ethu yathukulele odhowa omutugumano.

Mutugumano dhahadhivela vanlubale, ni mwaha wanona addibila. Nuwawona addibila exeelaga mutugumano nuumala wivelela wihina yakavihere. Namwali mmodha ohutama elabo ele yo Filipina, mbwenye mmodhaya ohubajha otugumana ni ohubajha omuhudhera Bibliya — dhatedhene mwaha wa emwerumweru!