Yehova anawaakula aavi malobelo ehu?

1-2. Makoho baani athu enniwana?

ONOWABIHAGA wanganyedha akala Yehova onowawakula malobelo awo? Akala eyo enopadduwaga ni we, kuli weka. Addibila owinjhiva ehiwoga wi enowikohaga akala Mulugu onowawakula malobelo ewa, thabwathabwa mudhidhi yafwanyiwiwa makathamiho. Dhithu ninga dhendha dhaanipadduwelaga, podi okala yorusa onona akala Yehova onowawakula malobelo ehu.

² Ohudhera wula, nnere woona mwahaya bwaddi nigahowela omuroromela Yehova wi anowawakula malobelo aadhaaraye. (1 João 5:15) Teto, nnere wawakula makoho ala: Mwahaya bwaddi malabo mamodha iyo podi wubuwelaga wi Yehova kanawakula malobelo ehu? Ki Yehova anawaakula malobelo ehu nimakalelo baani?

MALABO MAMODHA YEHOVA KANAWAKULA MALOBELO EHU NINGA NNAJHEHEDHIHU

3. Mwahaya bwaddi Yehova agafuna wihina nilobelege wa oliye?

³ Bibiliya onowoga wihina Yehova ononidhivela vanlubale ni nili athima vamentoni vaye. (Ag. 2:7; 1 João 4:10) Bumwahaya aganiloba onfiyedha oliye ni malobelo. (1 Ped. 5:6, 7) Yehova onoofuna vanlubale wi nandane ni oliye wihina nande wawanana makathamiho amwigumini.

4. Nnonne aavi wi Yehova onowawakula malobelo aadhaaraye? (Osugwe fotu.)

⁴ MBibiliyani nnofwanyamo dhopadduwa dhowinjhiva dhinawoga wodhela makalelo Yehova awakunliye malobelo aadhaaraye. Onowubuwela yopadduwa modha? Podi wera onowubuwela yopadduwa ya mwene Davidi. Egumi yaye yatene oliye, ahifwanyiwa makathamiho ohiyana-iyana wodhela oharahariwa naamwiddani, teto oliye oolobesa nikavihero na Yehova wodhela olobela. Nlabo dhaala oliye olobela egi: ‘Yehova Mulugwaga nvuruwane nlobelo naaga, mugivuruwane galobaga nikavihero neenyu. Mugakule mowiwanana ni ororomeleya ni opama munninyuna.’ (Sal. 143:1) Yehova wawakula malobelo a Davidi wodhela omoobola mmakathamihoni ale owopiha yanfwanya. (1 Sam. 19:10, 18-20; 2 Sam. 5:17-25) Bumwahaya Davidi adhe awogege egi: ‘Yehova kali wolapela ni ale enanvuwiha.’ Ni iyoya podi okanna ebaribari emodhave. — Sal. 145:18.

5. Nerege Yehova ahawakula malobelo adhaari aye akale ninga yajhehedhiwa? Owoge yotajhiha. (Osugwe fotu.)

⁵ Podi wera Yehova kanawakula malobelo ehu ninga najhehedhihu. Siyeyo yapadduwile ni murumiwi Pawulo. Oliye omuloba Yehova wihina amukavihere mwaha ‘mwinga [anniyena] mmwiilini.’ Murumiwi Pawulo ahilobela dila tharu mwaha wa makathamiho ala. Nerege Yehova ahawakula malobelo ala? Hee ahawakula, mbwenye kawakunle ninga ajhehedhiye. Ohiya wamariha makathamiho yanfwanya murumiwi Pawulo, Yehova onvaha kopolo ahoweliye wihina adhowegeve amulabelaga nuroromeleya. — 2 Cor. 12:7-10.

6. Mwahaya bwaddi malabo mamodha enakala ninga Yehova kanawakula malobelo ehu?

⁶ Malabo mamodha Yehova podi wawakula malobelo ehu mwamakalelo nahajhehedhihu. Mbwenye okanne ebaribari wi Yehova ohunona ele eli yapama wa iyo. Oliye podi ‘onreeliha okunamo ele nnalobihu obe nnubuwelihu.’ (Efé. 3:20) Bumwahaya, Yehova podi wawakula malobelo ehu mwamakalelo ohiyana ni mudhidhi nahinajhehedhihu.

7. Mwahaya bwaddi malabo mamodha nigahowela wasaddula malobelo ehu? Owoge yotajhiha.

⁷ Iyo podi wasaddula malobelo ehu noonelamo efunelo ya Yehova. Kasugwa epadduwe ni ddibila anithaniwa Martin Poetzinger. Nuutelawene, ddibila ole ovokedhiwa mukambura okampo nazista. Omabajhowene oliye olobela wa Yehova amulobaga wihina amukumihe mukambura wi adhowe amusamalelege mwariye ni adhowegeve aparaga mabasa olaleya. Mbwenye nuuvira sumana biili, oliye wonelamo wi eyo kiyaali efunelo ya Yehova. Mwaha wa yeyo, oliye obajha olobela egi: “Yehova kamwerena, gooniheni efunelo yenyu.” Nuwindo, oliye obajha wawubuwela addibila amodha yali mukambura ninga oliye. Owinjhiva wa aliwa, yali othuwathuwene yawubuwelaga amwariwa ni aniwa. Voharela ddibila Martin olobela egi: “Yehova, ginowutamalelani wodhela ogivaha mutholo muxa. Vano gikavihereni walibiha addibilaga.” Dhahivira yaka tanu nennayi eragana ndo!

8. Naweragana malobelo ethu baani nahinahowelihu odduwala?

⁸ Nnohowela ohidduwala wi Yehova anere wakwanihedha efunelo yaye mudhidhiya wafiya. Efunelo eyo enovolowelavo wamariha makathamiho aatene ni goyi enanifwanya ninga— ngovi, oredda ni okwa. Yehova anere wakwanihedha efunelo yaye alabihedhaga omwene waye. (Dan. 2:44; Apo. 21:3, 4) Mbwenye nlabo nna nahinafiye, Yehova anna omweenya Saddana othonga elabo ela.b (João 12:31; Apo. 12:9) Ahere Yehova amariha ovanene makathamiho enanifwanya, yakalege ninga onamathonga wa Saddana bwapama. Vano, enatapulela wi nnohowela omujheha Yehova wakwaneliha dhithu apaganyiliye. Teto eyo kinatapulela wi Yehova kananikavihera. Vano nnere woona makalelo Yehova ananikaviheriye peeno.

PEENO YEHOVA ANAWAKULA MALOBELO EHU NIMAKALELO BAANI?

9. Nimakalelo baani Yehova ananikaviheriye nafunaga werana yothoma? Owogemo yopadduwa.

⁹ Yehova anonivaha thotho nnahowelihu. Yehova ononipaganya wi anere onivaha thotho wihina nerena dhothoma dhapama. Teto, iyo nnohowela thotho ndha nafunaga werana dhothoma dhathima mwigumini mwehu. Ninga motajhiha, nafunaga othoma okala addiye obe akala nnafuna otela. (Tia. 1:5) Kasugwa yopadduwa ya murogola dhaala ali muddiye anithaniwa Mariya.c Murogola ola alaba ninga piyonera, voharela oliye omunona ddibila dhaala. Murogola ola onowoga egi: “Iyo wandana vanlubale ofiyedha obajha odhivelana mmodha ni mukwaye. Mbwenye gahinona wihina gohowela werana yothoma mwigumini mwaaga. Mwaha wa yeyo miyo wawerana malobelo owinjhivene wa Yehova. Gafunimi sowihina Yehova agiholele, mbwenye gahinona wi Yehova kaagiwaddihedhe werena yothoma mwigumini mwaaga.” Murogola ola onorumedha wi Yehova ahimwakula mwaha oloba thotho. Nimakalelo baani? Oliye osayela mmalivuruni mwehu muselu dhamukavihere wawakula makoho amatene anniyena. Teto ahipwasedha ovuruwana dholaga dhapama yanvahe amaye. Dhatedhene ndha dhahimukavihera Mariya opendda dhithu dhampadduwela. Mwaha wa yeyo, oliye aherana yothoma yapama.

10. Mowiwanana ni Filipenses 4:13, Yehova anakavihera aavi adharaaye? Owoge yotajhiha. (Osugwe fotu.)

¹⁰ Yehova anonivaha kopolo nnahowelihu wihina nivilele. Ndala ninga amukaviheriye murumiwi Pawulo, Yehova anere onivaha kopolo nnahowelihu wihina nande wavilelana makathamiho enanifwanya. (Omwileri Filipenses 4:13.) Kasugwa makalelo Yehova amukaviheriye ddibila dhaala anithaniwa Benjami wawanana makathamiho ohiyanahiyana. Ddibila Benjami ohuvira yaka dhowinjhivadhene namudhaye elabo yo wAfrika murudda winathawela athu enadhela elabo dhohiyana-iyana. Ddibila ola onowoga egi: “Miyo goolobelesa malabo amatene wa Yehova gimulobaga wihina agikavihere werana ele eli yapama vamentoni vaye. Yehova ahawakula malobelo aaga wodhela ogikavihera okanna murenddele ni oliba murima wihina gande olaleya ni wodhela ogivaha malivuru yagikavihera odhowagave gilibihaga nroromelo naaga. Wileri dhopadduwa dha addibila ni onona wi Yehova owakavihera ovilela, wahigikavihera wilibihedha wihina gidhowegeve gikalaga ororomeleya wa Yehova.”

11-12. Nimakalelo baani Yehova analabihedhiye addibilihu wihina awakule malobelo ehu? (Osugwe fotu.)

¹¹ Yehova onowalabihedha addibila wihina anikavihere. Emahiyu ahinathi okwa, Yesu ahilobela dila dhowinjhivadhene. Kahiyo wihina Yesu afuna wi athu yubuwelege wihina eere onyemula ndina naababe. Mwaha oliye ahilobela alobaga wi eyo yahipadduwe. Mbwenye ohiya Yehova werana ele Yesu alobiliye, oliye waruma angero wihina emulibihe. (Luc. 22:42, 43) Yehova podi onikavihera wodhela omuruma ddibila wihina aniligarele obe onaredhela wihina anilibihe. Mwebaribareene iyo aatene podi werana ethu-sithu obe wawaja ‘madhu apama’ wihina nalibihena addibilihu.— Pro. 12:25.

¹² Kasugwa yopadduwa ya murogola anithaniwa Miriam. Nuuvira mwana sumana agamuyelele mamune muukwani, Miriam aali yekaye vaade owukuwene ni ahoonaga ethu yowera. Oliye obajha wunla ofiyedha ohandaga omala, teto omuhoowela muthu wihina ethapanye. Oliye onowoga egi: “Miyo kaganda omuligarela muthu, bumwahaya miyo olobela wa Yehova. Mudhidhi gilobelaga wula gunlaga telefonaaga obajha withana. Aali namaholela mulogo dhaala gamunonnimi pamadhene.” Miriam ahitodoleya vanlubale mwaha oligareliwa nnamaholela mulogo ali ni mwariye. Oliye kananganyedha wi di Yehova amurumile namaholela mulogo ole omuligarela.

13. Owoge yotajhiha enoniha wi Yehova podi walabihedha ale yahinamwebedha wihina awakule malobelo ehu.

¹³ Yehova podi walabihedha athu yahinamwebedha wihina anikavihere. (Pro. 21:1) Malabo mamodha, Yehova podi wawakula malobelo ehu wodhela walabihedha athu yahinamwebedha wihina anikavihere. Motajhiha, Yehova ahimweriha mwene Artaxerxi omweenya Neemiya ohogolowela oJeruzale wihina akavihere mabasa oomaga txinga. (Nee. 2:3-6) Peeno Yehova podi werana emodhave wodhela walabihedha athu yahinamwebedha wihina enikavihere.

14. Yopadduwa ya murogola Soo Hing, yukavihere nimakalelo baani? (Osugwe fotu.)

¹⁴ Murogola anithaniwa Soo Hing, uhoona makalelo Yehova amukaviheriye wodhela omulabihedha Mediku dhaala. Mwanaye ahikanna dhiredda dhohiyana-iyana dhamuthukulela musolo onvereya. Mwaniwa nuumukosa asidenti, murogola ola ni mamune othoma wahiya mabasa wihina yamusamaalelege mwaniwa. Mwaha wa yeyo, aliwa obajha orameyeliwa korowa. Murogola Soo Hing onowoga wihina dhithudha dhahithabwa orusa ofiyedha oliye ohandaga ovilela. Vano, oliye olobela wa Yehova ni murima waye wamutene amulobaga wihina amukavihere. Mediku ole amusamalela mwanaye owoga wihina eere wakavihera. Mwaha wa yeyo Soo Hing ni mamune, yahikaviheriwa nanamathonga ofiyedha ovahiwa nyumba wihina ekalegemo. Omagomihedhowa oliye onowoga egi: “Iyo nihoona nlada na Yehova nnikaviheraga. Mwebaribarene oliye ‘namavuruwana a malobelo.’” — Sal. 65:2.

WIHINA NANDE WOONA NI ORUMEDHA DHOWAKULA DHA YEHOVA WODHELA MALOBELO EHU ENOHOWELEYA OKANNA NROROMELO

15. Emukavihere murogola Yoko wonelamo wi Yehova anna wawakula malobelo aye ddi?

¹⁵ Malabo owinjhivene malobelo ehu kinakuliwa mwamakalelo najhehedhihu. Mbwenye dhowakula dha malobelo Yehova ananivahiye, sidhendhe nnahowelihu wihina ndidele okala ororomeleya wa oliye. Bumwahaya okalege mento wihina woone makalelo Yehova anawakuliye malobelo awo. Murogola dhaala anithaniwa Yoko ubuwela wihina Yehova kawaakula malobelo aye. Mwaha wa yeyo oliye obajha olebela vapapelini dhithu amulobiiye Yehova. Nuuvira mudhidhi, oliye othukula papeli nne osugwa ni woona wihina Yehova ahawakula malobelo owinjhiva ni mamodha adduwanliye. Bumwahaya sapama waaja mudhidhi wihina nipendde makalelo Yehova anawakuliye malobelo ehu. — Sal. 66:19, 20.

16. Makalelo mamodha owoniha wi nihikanna nroromelo baavi? (Hebreus 11:6)

¹⁶ Iyo nnowoniha wi nihikanna nroromelo naalobelaga wa Yehova ni narumedhaga makalelo Yehova anawakuliye malobelo ehu naarive awakulaga mwamakalelo nahajhehedhihu. (Omwileri Hebreus 11:6.) Kasugwa yotajhiha ya Mike ni mwariye Chrissy. Yoluba yewa yaali odhowa oBeteli. Aliwa enowoga yegi: “Iyo nahilebela petisawu oBeteli yaka dhowinjhivadhene. Teto noolobelesa wa Yehova wodhela muselu yola, mbwenye kanniithaniwege.” Mike ni Chrissy yahikanna ebaribari wihina Yehova ohunona pama epaddi baani yahoweliwa olabihedhiwa. Aliwa yahididela odhowagave yeragana ndhe enandiwa wodhela olaba ninga apiyonero murudda dhinahoweleya anamalaleya ni wodhela okavihera mabasa omaga Nyumba dha Omwene. Peeno aliwa enalaba ninga anameeddela mulogo. Mike onowenjhedhedha egi: “Kahiyo malabo amatene Yehova anawakuliye malobelo ehu mwamakalelo nnajhehedhihu. Mbwenye oliye kanahiyege wawakula malobelo ehu mwamakalelo apama wodhela werana dhithudha mwamakalelo nahubuwelihu.”

17-18. Mowiwanana ni Salmo 86:6, 7, ethu baani nahinahowelihu wanganyedha?

¹⁷ Omwileri Salmos 86:6, 7. Davidi ahikanna ebaribari wihina Yehova owaavuruwana ni owawakula malobelo aye. Ni weya podi okanna ebaribari emodhave. Dhopadduwa nonilihu ohudhera wula, dhinonikavihera woonelamo wihina Yehova podi onivaha thotho ni kopolo nnahowelihu wihina nande ovilela. Oliye podi walabihedha addibilihu ni ale yahinamwebedha wihina enikavihere.

¹⁸ Ebaribari wi Yehova kanaawaakule malobelo ehu mwamakalelo nnajhehedhihu, mbwenye ethu nahinanganyedhihu sowihina, oliye aneere wawakula malobelo ehu. Yehova anere onivaha ethu nnahowelihu mudhidhi wofwanelela. Bumwahaya odidele olobela ni nroromelo okannaga ebaribari wi Yehova aneere wusamalela peeno ni mwilaboni exa oliye anere wakwanihedha ‘efunelo ya dhithu dhatedhene dhinakalamo.’ — Sal. 145:16.