Kuhiye “mootho wa Yehova” othima

1. Bibiliya analiganiha odhivela webaribari ninddi?

NINGA anawoga Bibiliya, odhivela webaribari onaligana ni mootho onahidda onadhela wa Yehova. ‘Oviha wa odhivela onaligana ni mootho, mootho onadhela wa Yehova. Newene manjhe owumba kinanda othimiha odhivela, newene mwihinjhe kadhinanda oridhiha odhivela.’b (Cân. 8:6, 7) Madhu ala enowaroromeliha anamatelana wihina ale etenle podi wonihana odhivela webaribari mmodha ni mukwaye.

2. Ethu baani anamatelana enahoweliwa werana wihina odhivela wewa ohuridhe?

² Anamatelana yegi ekanne odhivela webaribari ni wamukalakala enohoweleya wilibihedha. Motajhiha, karajhiha wubuwela mootho. Mootho podi okala mudhidhi wowinjhivene ohiddaga, mbwenye wihina ohuthime onohowela otetedhela. Wahiddoddelagavo kwini onothima. Mwamakalelo mamodhave, wegi odhivela wa anamatelana okale wooliba enohoweleya wasamalela matelo ewa. Malabo mamodha anamatelana podi woonaga wihina odhivela wewa onna oridha thabwathabwa yafwanyiwaga makathamiho ninga, ohukanna korowa, oredda ni wasamalela ahima. Ki akala ohutela obe ohuteliwa, onande addi wihina “mootho onadhela wa Yehova” okaleve wohiddeene vamateloni vawo? Ohudhera wula nnere woona dhithu tharu dhinukavihere okanna matelo oliba ni ohagalala.c

MUDHOWEGEVE MULIBIHAGA WANDANA WENYU NI YEHOVA

3. Okanna wandana woliba ni Yehova winakavihere aavi anamatelana olibiha odhivelana wewa? (Eclesiastes 4:12) (Osugwe fotu.)

³ Wihina “mootho onadhela wa Yehova” ohuthime mulobwana ni muhiyana enohowela okanna wandana woliba ni Yehova. Olibiha wanda wewa ni Yehova winakavihere aavi? Anamatelana yavahaga thima wandana enniwana ni Yehova, enoparihedha mabasa dholaga dhaye, ndo aliwa enorabela ni onowanda wawanana makathamiho yaridhihe odhivela wewa. (Omwileri Eclesiastes 4:12.) Muthu owithwelavo epaddi yomuzimuni onowilibihedha wihina etajhihe dhikalelo dha Yehova ninga, opama, ovilela ni olevelela. (Efé. 4:32–5:1) Anamatelana yonihaga dhikalelo ndha, odhivela enniwana mmodha ni mukwaye onerege wenjhedhedheya. Murogola dhaala anithaniwa Lena, ali ooteliwene muwari mwa yaka 25, ohuwoga egi: “Sokweya omudhivela ni omuriha muthu owithwelavo epaddi yomuzimuni.”

4. Mwahaya bwaddi Yehova adhe amusakulege Juze ni Mariya wihina ekale makolo a Mesiya?

⁴ Kabeni noone yopadduwa ya mBibiliyani. Nuufiya mudhidhi wihina Yehova aasakule makolo a Mesiya, oliye amusakule Juze ni Mariya naarive egaaliwo athu owinjhiva anihimo na Davidi. Mwaha waddi? Mwaha wi aliwa yahikanna wandana wooliba ni Yehova, teto oliye ahinona wihina aliwa yerege omusogoliha vamateloni vewa. Anamatelana enahudhera ddi ni yopadduwa ya Juze ni Mariya?

5. Alobwana etenle enahudhera ddi ni Juze?

⁵ Juze owiwelela dhoholela dha Yehova ahiddoddomile, eyo yahimuthukulela okala mulobwana apama. Motajhiha, dila tharu oliye wakela dhoholela dha Mulugu dhakavihere emudhaye. Dila dhatedhene ndha oliye ahiiwelela mowaguva, naarive ehoweleyaga wawerana masadduwo manlubale. (Mat. 1:20, 24; 2:13-15, 19-21) Mwaha wiwelela dhoholela dha Mulugu ahanda ombarela, omukavihera ni omusamalela Mariya. Mohaganyedha, eyo yahimuthukulela Mariya wenjhedhedha odhivela anniyena ni Juze. Alobwana etenle podi omutajhiha Juze wodhela osayela dhoholela dha mBibiliyani yasamalelaga emudhi yewa.d Mwaharaga dholaga dha mBibiliyani naarive ehoweleyaga wawerana masadduwo, munere wooniha wi munowadhivela ahiyana enyu ni munere walibiha matelo enyu. Murogola dhaala anakala elabo ya Vanuatu, ali oteliweene okwaranya yaka 20, anihina: “Mamunaga asayelaga ni aharaga dhoholela dha Yehova ginothabwa omuriha. Miyo kaginathuwathuwa ni ginororomela dhothoma dhaye.”

6. Ahiyana eteliwe enahudhera ddi ni Mariya?

⁶ Mariya ahikanna wandana wapama ni Yehova. Kahi wihina anna nroromelo mwaha wa mamune Juze mbwenye mwaha wi oliye ahinona pamadhene dholebela. (Osugwe nota na Bibiliya oomuhudherana va Lucas 1:46.) Teto ookumiha mudhidhi wihina apendde. (Luc. 2:19, 51) Mweebaribarene mwaha okala muthu owithwelavo epaddi yomuzimuni aali muhiyana apama. Peeno arogola owinjhiva enowilibihedha wihina ekale ninga Mariya. Motajhiha, murogola dhaala anithaniwa Emiko anihina: “Ngaali muddiye gisamalela meeka epaddi yomuzimuni. Vano nuuteliwa mamunaga dalobela ni deeddiha ohudhera wehu weemudhi. Mwaha wa yeyo miyo woona wihina ganna olamusa epaddaaga yomuzimuni, vano miyo wonelamo wi gohowela osamalelaga wandana waaga ni Yehova. Mbwenye peeno ginokumiha mudhidhi wihina gilibihe wandana waaga ni Yehova wodhela olobela, omwileri Bibiliya ni opendda ndhe ginilerimi.” (Gál. 6:5) Arogola oteliwa, mudidele olibiha wandana weenyu ni Yehova ndo munere wathukulela amamuninyu wuthethelani ni wudhivelagani. — Pro. 31:30.

7. Anamatelana enahudhera ddi ni Juze vamodha ni Mariya wodhela omwebedha Yehova vamodha?

⁷ Juze ni Mariya yalaba vamodha wihina yande olibiha wandana wewa ni Yehova. Aliwa yahinona wihina omwebedha Yehova vamodha ninga emudhi yaali ethu yathima. (Luc. 2:22-24, 41; 4:16) Podi wera werana eyo kiyaali ethu yokweya, thabwa-thabwa nuwaabaala ahima amodha, mbwenye aliwa yahanda. Juze ni Mariya yotajhiha yapama ya anamatelana a peeno! Ninga Juze ni Mariya akala we ohukanna ahima, podi okala yorusa odhowa omutugumanoni ni osayela mudhidhi wi mukanne ohudhera weemudhi. Teto podi wera sothabwa orusa ojha mudhidhi nyu abili muhudheraga ni mulobelaga. Mbwenye kudduwale wi mwamwebedhaga Yehova vamodha munothabwa wandana nuliye ni munowandana mmodha ni mukwaye. Bumwahaya, mwasogolihege mabasa omuzimuni mwigumini mweenyu.

8. Enaakavihere ddi anamatelana enafwanyiwa makathamiho okanna ohudhera weemudhi?

⁸ Onere ddi akala onofwanyiwa makathamiho vamateloni vawo? Podi wera kamunna efunelo yokanna ohudhera weemudhi vamodha. Akala dhili ndo nyu podi obajha ni mwana muselu wokweya onudhivelani aabili. Mweragana ndo munerege olibiha odhivela weenyu ni efunelo yowerana dhego dhomuzimuni vamodha.

MUJHEGE MUDHIDHI VAMODHA

9. Mwahaya bwaddi anamatelana egahowelaga osayela mudhidhi wi ekala vamodha?

⁹ Anamatelana, nyu podi olibiha odhivela weenyu wodhela ojha mudhidhi vamodha. Werana eyo enere wukaviherani ononana pama ni onona mubuwelo ni moonelo mmodha ni mukwaye. (Gén. 2:24) Kasugwa yapadduwile ni Lilia ni Ruslan nutelana, yaka 15 mundduli. Lilia onowoga egi: “Iyo nuubuwela wi nerege ojha mudhidhi wowinjhivene vamodha, mbwenye kahi yeyo yapaddunwe. Mudhidhi wamutene nakala opinyaminyiweene ni mabasa, dhithu dha vade ni wasamalela ahima. Vano iyo wonelamo wi nohowela osayela mudhidhi wi nikale vamodha, mwaha nahere niherana ndo nerege olapelana mmodha ni mukwaye.”

10. Anamatelana enaaparihedhe aavi mabasa yolebela ya Efésios 5:15, 16?

¹⁰ Ethu baani anamatelana enahoweliwa werana wihina ejhege mudhidhi vamodha? Aliwa podi olebela vajendani mudhidhi enaakalegiwa vamodha. (Omwileri Efésios 5:15, 16.) Ddibila dhaala anakala oNijeriya anithaniwa Uzondo anihina: “Gampanddaga porogaramaga ginopwehavo mudhidhi wihina gikale ni mwaadhaga teto ginopweha mburo wobajha.” (Fil. 1:10) Kasugwa yopadduwa ya Anastácia anakala elabo ya oMoldaviya. Oliye ateliwe ni nameeddela mulogo ni ohufwanya makalelo apama olabihedha mudhidhaye. Oliye anihina: “Miyo ginerana dhithu dhaaga mudhidhi ginonimi wi mamunaga ohupinyaminyeya ni mutholo dhaye, ndo namalaga nnowanda ofwanya mudhidhi wihina nikale vamodha.” Ki akala nyu muhuthabwa opinyaminyeya ni kamunanda ofwanya mudhidhi wihina mukale vamodha, munere ddi?

11. Mabasa baani Akila ni Pirisila yaapariwa vamodha?

¹¹ Anamatelana podi ohudhera ni yopadduwa ya Akila ni Pirisila, yaali anamatelana yathambwe ononiwa mudhidhi wa makiristawu oobajha. (Rom. 16:3, 4) Bibiliya kanathabwa owoga wodhela matelo ewa mbwenye onowoniha wi aliwa yalaba, yalaleya ni yaakavihera athu amodha vamodha. (At. 18:2, 3, 24-26) Teto mudhidhi wamutene Bibiliya awogaga wodhela Akila ni Pirisila enaromoliwa vamodha.

12. Anamatelana enahowela yere ddi wihina ejhege mudhidhi vamodha? (Osugwe fotu.)

¹² Anamatelana enamutajhihe aavi Akila ni Pirisila? Mwawubuwele mabasa munahowelinyu wapara. Nyu podi wapara mabasa mamodha vamodha? Munodhowesa mmalaleyelo vamodha? Akila ni Pirisila yoolabesa vamodha. Podi wera abiileene kamunna ganyu emodhave, mbwenye munoonamo aavi wapara mabasa mamodha vamodha ninga oxela ni wegeredha nyumba yenyu? (Ecl. 4:9) Mwakaviheranaga mmodha ni mukwaye, munerege wiwanana ni munerege okanna mudhidhi wothapanya vamodha. Roberti ni Linda eli ootelanene okwaranya yaka 50. Roberti onowoga egi: “Iyo kaninna mudhidhi wowinjhivene wihina nikale vamodha wi naredhe, mbwenye gasuwaga parato mwaraga ummihaga obe gamusamalelaga Jardi wula mwaraga agikaviheraga, miyo ginohagalala vanlubale. Wapara mabasa vamodha winonikavihera okala vamodha ni odhivela wehu onodhowave wenjhedhedheyaga.”

13. Wihina anamatelana ekanne wiwanana webaribari enahowela yerana ddi?

¹³ Mbwenye kuddiwale wihina okala vamodha kinatapulela wiwanana webaribari. Muhiyana dhaala ateliwe anakala elabo yoBarazili anihina: “Malabo yaala a peeno dhihikalawo dhithu dhowinjhiva dhinanipinyaminya ni dhinathukulela wubuwela wi kannahowela ojha mudhidhi vamodha mwaha wihina nnakala nyumba emodhave. Miyo gihudhera wi ethu enahoweleya kahi baahi okala vamodha, mbwenye nnohowela ojha mudhidhi neragana dhithu dhimodha vamodha.” Kasugwa ethu enerana Burunu ni mwariye Tays wihina ejhe mudhidhi vamodha. Oliye anihina: “Nafwanya mudhidhi wihina nikale vamodha, iyo nnohiya telefonidhihu wihina nande ojha pamadhene mudhidhi vamodha.”

14. Ethu baani enahowela werana anamatelana ehinadhiveliwa ojha mudhidhi vamodha?

¹⁴ Ki akala kamunadhiveliwa ojha mudhidhi vamodha? Podi wera kamunadhiveliwa werana dhithu dhimodhave obe mwakala vamodha kamunaliba onyanyuwelana. Munere ddi? Kabeni nihogolowele wubuwela wodhela mootho. Mootho kunahidda mowaguva. Wegi ohidde muthu anarajhiha ohelavo taparikwa, indo ohelagavo kwini dhinlubale. Muharaga yotajhiha ela, munoonamo aavi kadda labo ojhaga mudhidhi mung’onove vamodha? Muxixe werana dhithu dhinudhivelani ni musukume dhithu dhinuthukulelani okangana. (Tia. 3:18) Vang’ono vang’ono nyu podi ovenyihedha odhivela weenyu.

MURIHANEGE MMODHA NI MUKWAYE

15. Mwahaya bwaddi nriho ndhe nikala noofuneya wihina odhivela wa anamatelana ohumale?

¹⁵ Orihana ethu yinlubale vamateloni. Orihana onaliganihiwa ni Okisijeniyu. Wahikalawo Okisijeniyu mootho kunaliba othima. Emodhave ni matelo, vahikala nriho odhivela wa anamatelana podi oridha mowaguva. Mbwenye mulobwana ni muhiyana yilibihedhaga orihana mmodha ni mukwaye odhivela wewa winerege wenjhedhedheya. Podi wera onubuwela wi onowoniha nriho, mbwenye mamuno obe mwariyo anowoona wi anorihiwa? Penny ni mamune Arete eli ootelanene okwaranya yaka 25. Oliye anihina: “Makalelo nnarihanihu enonikavihera okanna murenddele vamuralani vehu. Nnakala otapuwene wihina nthapanye mwaha nihinona wihina ethu anubuwela mukwaye enere omukavihera mmodha.” Egi mwariyo obe mamuno oone wihina anorihiwa ethu baani onahoweliwe werana? Kabeni noone yopadduwa ya Abaraawu ni Saara.

16. Alobwana etenle enahudhera ddi ni Abaraawu? (1 Pedro 3:7) (Osugwe fotu.)

¹⁶ Abaraawu oomuriha Saara. Oliye onvuruwana Saara ni ovaha thima moonelo waye. Labo dhaala Saara ahithabwa otakaleliwa, vano oliye onfugulela murima waye Abaraawu ni omwaddela dhithu dhatedhene ubuweliye. Teto oliye owoga wihina dhithu dhatedhene dhapadduwa nibilina naali na Abaraawu. Ki vano Abaraawu ahimunyanyuwela Saara? Naari, kamunyanyuwenle. Oliye ahinona wihina Saara ali muhiyana owiwelela ni amukavihera. Abaraawu onvuruwana Saara ni osayela makalelo omariha muladduya. (Gén. 16:5, 6) Nnahudhera ddi? Alobwana ootela, ebaribari wihina muhukanna mutholo wothoma dhithu dha vamuralani. (1 Cor. 11:3) Naarive dhigaali ndo, yere okala yapama ovuruwana monelo wa ahiyana enyu muhunathi werana yothoma, thabwathabwa akala yothomaya enere wapatha aliwa. (1 Cor. 13:4, 5) Malabo modha mwadhiyo podi okala ootakaleliwene vano oliye wufugulela murima waye wihina uwaddele dhithu dhinampadduwela. We onoopwasedha onvuruwana ni nriho? (Omwileri 1 Pedro 3:7.) Angela ni Dmitry enaaja wakwaniha yaka 30 egaali ootelanene. Angela anowoga dhithu mamune eriliyena wihina oonihe wi anomuriha, oliye anowoga egi: “Dmitry anogivuruwanesa gatakaleliwa obe gafuna othapanya baahi. Oliye anogivilela, naarive ngaali onyanyuwene.”

17. Ahiyana eteliwe enahudhera ddi ni Saara? (1 Pedro 3:5, 6)

¹⁷ Saara owooniha wi omuriha Abaraawu wodhela orumedha dhothoma dhaye. (Gén. 12:5) Labo dhaala aliwa wawakela aleddo mohujhehedha vano Abaraawu othoma wavaha yoojha. Oliye omuloba Saara wihina aahiye mabasa aapariye wihina asasanye pawu dhowinjhiva. (Gén. 18:6) Saara orumedha yothoma ya Abaraawu mohulegela oliye werana aalobiwiye. Ahiyana ooteliwa, nyu podi omutajhiha Saara wodhela orumedha dhothoma dha amamuninyu. Mwerana ndo munere walibiha matelo enyu. (Omwileri 1 Pedro 3:5, 6.) Dmitry awogiwe ddima ya mundduli anowoga ethu anerana mwariye wihina oonihe wi onomuriha. Oliye anihina: “Miyo ginodhiveliwa makalelo Angela anarumeedhiye dhothoma dhaaga, naarive nihonaga ethu ele mwamakalelo mamodhave. Vano ele githomilimi yaheedda pama, oliye kanawoga egi; miyo kaguwaddenle vale?” Mwebaribarene sokweya omudhivela muthu anuuriha.

18. Enaapadduwe ddi anamatelana yilibihedhaga wihina mootho wewa wa odhivela ohuthime?

¹⁸ Peeno Saddana anna werana dhatedhene wihina anonge odhivela wa anamatelana. Oliye ohunona wihina anamatelana yahidhivelanaga mmodha ni mukwaye vang’ono vang’ono odhivela enniwana ni Yehova onerege ovuguwa. Mbwenye odhivela webaribari kunamala. Mwilibihedhe wihina odhivela munninyuna vamateloni okale ninga ole onawogiwa va livuru na Jhibo ya Salomawu. Bumwahaya mmusogolihege Yehova mmateloni mweenyu, mujhege mudhidhi vamodha murihaga mubuwelo ni dhofuna dha mmodha ni mukwaye. Mwerana ndo, munerege omuthithimiha Yehova ali ntxela na odhivela webaribari. Ndo ninga mootho onahidda pamadhene, odhivela munninyuna mmodha ni mukwaye onerege odhowave wenjhedhedheyaga ni mukalakala.