Wegeredhe murima wawo

Naamuhudheraga Bibiliya, iyo nnafuna wi mubuwelo wa Yehova odahinye murima wehu. Ezdara ohunihiyedha yotajhiha yapama nnahowelihu ohara, oliye ‘ahegeredha murima waye wihina asayele nlamulo na Yehova.’ (Esd. 7:10) Nnande aavi wegeredha murima wehu neragana ohudhera wehu wa Bibiliya?

Olobele. Ohunathi obajha werana ohudhera wawo, olobele wa Yehova. Omulobe Yehova nikavihero wihina wande wonelamo ni oparihedhe mabasa dhithu onafuniwe ohudhera.​—Sal. 119:18, 34.

Okale owiyeviha. Yehova kanakavihera athu enithukula ni enubuwela wi kinahowela nikavihero wihina yonelamo ebaribari enafwanyeya mBibiliyani. (Luk. 10:21) Nahudheraga obe nasayelaga muselu wa mBibiliyani nnafunihu wonelamo, yoluba yehu kikalege ofuna otamaliwa ni athu amodha. Mbwenye wahudhera ethu ni wonelamo wi onohowela wawerana masadduwo mwigumini mwawo, okale owiyeviha ni wawerena masadduwo enahoweleya.

Ovuruwane jhibo modha Yomwene. Jhibo dhihikanna kopolo dhodahinya pamadhene murima wehu, teto dhinonegeredha wi nimwebedhe Yehova. Bumwahaya ovuruwana jhibo nihinathi obajha werana ohudhera wehu, podi onikavihera wegeredha murima wehu wihina nande opurelamo dhithu nnafunihu ohudhera.