20 “Ad a Zeova sẽn yeele: ‘Yãmb sã n tõog n sãam kaool ning mam sẽn maan wĩndgã wɛɛngẽ, la kaool ning mam sẽn maan yʋngã wɛɛngẽ wã, n gɩdg wĩndg la yʋng tɩ b pa wa b wakate,+ 21 yaa rẽ poor bal la kaool ning mam sẽn maan ne m tʋm-tʋmd a Davɩɩdã na n tõog n sãame,+ t’a pa le paam yageng sẽn na n zĩnd a geerã zug n yɩ rĩm n dɩ naam ye.+ Yaa woto me ne kaool ning mam sẽn maan ne maan-kʋʋdbã sẽn yaa Levi buudã nebã sẽn yaa mam tʋm-tʋmdbã.+