Tõod sebre

27 Rẽ poore, a Moyiiz ne Israyɛll nin-buiidã kãsem-dãmb yeela nin-buiidã yaa: “Tũ-y noy nins fãa mam sẽn na n kõ yãmb rũndã wã. 2 Daar ning yãmb sẽn na n dʋʋg Zʋrdẽ kʋɩlgã n tɩ kẽ soolem ning yãmb Wẽnnaam a Zeova sẽn na n kõ yãmbã pʋgẽ, bɩ y lugl kug-bɛda, n bolg-b goore.+ 3 Y sã n wa rʋʋg Zʋrdẽ kʋɩlgã bɩ y gʋls Tõ-kãngã goamã fãa kugã zutu, n tõog n kẽ soolem ning yãmb Wẽnnaam a Zeova sẽn na n kõ yãmbã pʋgẽ, tẽng sẽn pid ne bĩisim la sɩɩdo, wa a Zeova sẽn yaa yãmb yaab-rãmbã Wẽnnaamã sẽn pʋlem yãmbã.+ 4 Yãmb sã n wa rʋʋg Zʋrdẽ kʋɩlgã, yãmb segd n lugla kugã Eball+ tãngẽ wã, la y bolg-b goore, wa mam sẽn yet yãmb rũndã wã. 5 Yãmb segd n maana tẽn-kugr me be yãmb Wẽnnaam a Zeova yĩnga, tẽn-kugr b sẽn maan ne kuga. Yãmb pa segd n tall bũmb sẽn yaa kut n pees kugã ye.+ 6 Yãmb segd n maana yãmb Wẽnnaam a Zeova tẽn-kugrã ne kug sẽn pa peese, n maan maand sẽn yõogd bugum be n kõ yãmb Wẽnnaam a Zeova. 7 Yãmb segd n maana zems-n-taar maando,+ n dɩ-b be.+ Yãmb na n kɩdma sũ-noog yãmb Wẽnnaam a Zeova taoore.+ 8 Gʋls-y Tõ-kãngã goamã fãa vẽeneg kugã zutu.”+

9 Rẽ poore, a Moyiiz ne maan-kʋʋdbã sẽn yaa Levi buudã nebã goma ne Israyɛll nebã fãa n yeel yaa: “Israyɛll neba, bas-y bʋʋr n kelge! Rũndã, yãmb lebga y Wẽnnaam a Zeova nin-buiidu.+ 10 Yãmb segd n kelga y Wẽnnaam a Zeova koɛɛgã, n tũ a noyã+ la a tõodã mam sẽn togsd yãmb rũndã wã.”

11 Daar-n-kãnga, a Moyiiz goma ne nin-buiidã n yeele: 12 “Ad buud nins sẽn na n yals Gerizim+ tãngẽ wã n ning barka, yãmb sã n wa rʋʋg Zʋrdẽ kʋɩlgã: Yaa Sɩmeyõ buudã, Levi buudã, Zida buudã, Isakaar buudã, Zozɛf buudã, la Bẽnzame buudã. 13 Ad buud nins sẽn na n yals Eball+ tãngẽ wã n kãab wẽngã: Yaa Rubɛn buudã, Gaad buudã, Asɛɛr buudã, Zabulõ buudã, Dan buudã, la Naftali buudã. 14 Levi buudã neb na n zẽka b koees n gom ne Israyɛll nebã fãa n yeel yaa:+

15 “‘Kãab-wẽng bee ne ned ning sẽn na n pees bõn-naandga,+ bɩ n dõog bõn-naandg+ n solge. Tʋʋm-mit* a woto nug-tʋʋmd yaa bũmb a Zeova sẽn kisi.’+ (La nin-buiidã fãa na n leokame yaa: ‘Ãmiina!’*)

16 “‘Kãab-wẽng bee ne ned ning sẽn na n paoog a ba wall a ma.’+ (La nin-buiidã fãa na n leokame yaa: ‘Ãmiina!’)

17 “‘Kãab-wẽng bee ne ned ning sẽn na n serg a yak toadg bãnde.’+ (La nin-buiidã fãa na n leokame yaa: ‘Ãmiina!’)

18 “‘Kãab-wẽng bee ne ned ning sẽn na n kɩt tɩ zoang tudg a sore.’+ (La nin-buiidã fãa na n leokame yaa: ‘Ãmiina!’)

19 “‘Kãab-wẽng bee ne ned ning sẽn na n kao sãan bʋʋdo, bɩ kɩɩb* wall pʋg-kõor bʋʋd kɛgre.’+ (La nin-buiidã fãa na n leokame yaa: ‘Ãmiina!’)

20 “‘Kãab-wẽng bee ne ned ning sẽn na n kẽ ne a ba paga, bala a paooga a ba wã.’+ (La nin-buiidã fãa na n leokame yaa: ‘Ãmiina!’)

21 “‘Kãab-wẽng bee ne ned ning sẽn na n kẽ ne rũng buud fãa.’+ (La nin-buiidã fãa na n leokame yaa: ‘Ãmiina!’)

22 “‘Kãab-wẽng bee ne ned ning sẽn na n kẽ ne a tão, rat n yeel t’a ba wã bi-pugl wall a ma wã bi-pugla.’+ (La nin-buiidã fãa na n leokame yaa: ‘Ãmiina!’)

23 “‘Kãab-wẽng bee ne ned ning sẽn na n kẽ ne a pag ma.’+ (La nin-buiidã fãa na n leokame yaa: ‘Ãmiina!’)

24 “‘Kãab-wẽng bee ne ned ning sẽn na n soos n kʋ a to.’+ (La nin-buiidã fãa na n leokame yaa: ‘Ãmiina!’)

25 “‘Kãab-wẽng bee ne ned ning sẽn na n sak noor-madgr n kʋ bʋʋm soaba.’+ (La nin-buiidã fãa na n leokame yaa: ‘Ãmiina!’)

26 “‘Kãab-wẽng bee ne ned ning sẽn pa na n sak Tõ-kãngã goamã, la a tũ-bã.’+ (La nin-buiidã fãa na n leokame yaa: ‘Ãmiina!’)