Zeremi sebre

27 A Zoziyas biig a Zowakim sẽn yaa Zida rĩmã naamã sɩngrẽ, a Zeova goma ne a Zeremi: 2 “Ad a Zeova sẽn yeel maamã: ‘Maan yubl-balgdg sẽbds la a raado, n pid f yublã. 3 Rẽ poor bɩ f rɩk-b n kõ koe-taasdb nins sẽn wa Zida rĩm a Sedesiyaas nengẽ Zerizalɛmmã, tɩ b tall n tɩ kõ Edom+ rĩmã, Mowaab+ rĩmã, Amon nebã+ rĩmã, Tɩɩr+ rĩmã, la Sɩdõ+ rĩmã. 4 Kɩt tɩ b tɩ yeel b zu-soben-dãmbã yaa:

“‘“Ad Israyɛll Wẽnnaam a Zeova sẽn yaa tãb-biis naabã sẽn yeele, tɩ y segd n tɩ yeel y zu-soben-dãmbã: 5 ‘Yaa ne mam pãn-kãsengã, la ne m kang sẽn tar pãngã maasem la m maan tẽngã, ninsaalbã la rũmsã sẽn be tẽn-gãongã zugã. Mam dɩka tẽngã n kõ mam sẽn dat a soaba.*+ 6 Masã, mam dɩka soolem-kãensã fãa n ning Babilon rĩm a Nebukadnezaar+ sẽn yaa mam tʋm-tʋmdã nugẽ. Mam dɩka baa we-rũmsã sẽn be weoogẽ wã n kõ-a, tɩ b na n sak-a. 7 Buud toɛy-toɛyã fãa na n saka yẽ ne a biigã la a yagengã, hal n tãag a soolmã wakat sẽn na n ta.+ Yaa wakat ning buud wʋsg la rĩm-kãsems sẽn na n kɩt t’a lebg b yambã.’+

8 “‘“‘Buud wall rĩung sã n zãgs t’a kõn sak Babilon rĩm a Nebukadnezaare, la a zãgs t’a kõn pid Babilon rĩmã yubl-balgdgã, mam na n sɩbga bu-kãng ne sʋʋga,+ kom la bã-loangdga,* hal tɩ m wa kɩt t’a Nebukadnezaar menes-b zãnga.’ Yaa a Zeova n yeele.

9 “‘“‘Woto wã, ra kelg-y y no-rɛɛsdbã, y bag-bʋgdbã, yãmb neb nins sẽn bilgd zãmsd võorã, y tɩt rãmbã, la y neb nins sẽn maand yel-soalmã sẽn yet yãmb tɩ “Babilon rĩmã pa na n soog yãmbã” ye. 10 Bala b togsda yãmb bãngr-goam sẽn yaa ziri, n na n kɩt tɩ b tall yãmb n kẽng zĩig sẽn zãr ne y soolmã. Mam na n sãeega yãmba, tɩ y sãame.

11 “‘“‘La buud ning sẽn na n pid Babilon rĩmã yubl-balgdgã la a sak-a, mam na n basame t’a kell n pa* a soolmẽ wã, n ko a tẽngã la a zĩnd be.’ Yaa a Zeova n yeele.”’”

12 Mam goma ne Zida rĩm a Sedesiyaas+ me woto n yeele: “Pid-y Babilon rĩmã yubl-balgdgã, la y sak yẽ ne a nin-buiidã, tɩ rẽ la y na n kell n vɩɩmde.+ 13 Bõe yĩng tɩ sʋʋga,+ kom+ la bã-loangdg+ na n kʋ foo ne f nin-buiidã, wa a Zeova sẽn yeel buud ning sẽn pa na n sak Babilon rĩmã wɛɛngẽ wã? 14 Ra kelg-y no-rɛɛsdbã sẽn yet yãmb tɩ ‘Babilon rĩmã pa na n soog yãmbã’+ ye. Bala b togsda yãmb bãngr-goam sẽn yaa ziri.+

15 “A Zeova yeelame: ‘Mam pa tʋm-b ye. B togsda bãngr-goam sẽn yaa ziri ne mam yʋʋre, tɩ na n kɩt tɩ m sãeeg yãmb tɩ y sãame, yãmb ne no-rɛɛsdb nins sẽn togsd yãmb bãngr-goamã.’”+

16 Mam yeela maan-kʋʋdbã ne nin-buiidã fãa yaa: “Ad a Zeova sẽn yeele: ‘Ra kelg-y y no-rɛɛsdbã sẽn togsd yãmb bãngr-goam n yetẽ tɩ “ka la bilf bala, b na n talla a Zeova roogã teed n yi Babilon n lebg n wa!”+ wã ye. Bala b togsda yãmb bãngr-goam sẽn yaa ziri.+ 17 Ra kelg-y-b ye. Sak-y Babilon rĩmã tɩ rẽ la y na n kell n vɩɩmde.+ Sã n pa rẽ, tẽn-kãngã na n lebga raboogo. 18 La b sã n sɩd yaa no-rɛɛsdba, t’a Zeova goamã sɩd be ne-ba, bɩ b yõk a Zeova sẽn yaa tãb-biis naabã sɛɛga, t’a kɩt tɩ b ra wʋk teed nins sẽn ket a Zeova roogẽ wã, Zida rĩmã zakẽ wã,* la Zerizalɛm pʋgẽ wã n tall n kẽng Babilon ye.’

19 “Bala ad a Zeova sẽn yaa tãb-biis naabã sẽn yeel ra-lugsã+ wɛɛngẽ, Mogrã,*+ bilim-bilim-dãmbã,+ la teed a taabã sẽn ketã b sẽn bas tẽn-kãngã pʋgẽ wã wɛɛngẽ. 20 Yaa teed nins Babilon rĩm a Nebukadnezaar sẽn pa wʋke, a sẽn wa n na n tall a Zowakim biig a Zekoniya sẽn yaa Zida rĩmã, ne Zida la Zerizalɛm nin-kãsemsã fãa n yi Zerizalɛm n kẽng yembd Babilonnã.+ 21 Ad Israyɛll Wẽnnaam a Zeova sẽn yaa tãb-biis naabã sẽn yeele, teed nins b sẽn bas a Zeova roogẽ wã, Zida rĩmã zakẽ wã,* la Zerizalɛmmã wɛɛngẽ: 22 ‘“B na n tall-b lame n kẽng Babilonne,+ tɩ b pa be n tãag wakat ning mam sẽn na n tẽeg b yelle.” Yaa a Zeova n yeele. “Rẽ poore, m na n tall-b lame n lebg n wa, n lebs-b zĩ-kãngã.”’”+