Kibayã pipi sebre
5 Ad a Israyɛll bi-kãseng a Rubɛn+ kom-dibli wã. A Rubɛn da yaa a bi-kãsenga, la a sẽn dẽgem a ba wã gãagã+ yĩnga, b rɩka a kãsengã n kõ a Israyɛll bi-ribl a Zozɛf+ kom-dibli wã. Rẽ n so tɩ b sẽn na n sõd b roogã rãmb yʋyã, b pa geelg a Rubɛn wa a ba wã bi-kãseng ye. 2 Baa a Zida+ sẽn da yɩɩd a ba-biisã, tɩ soab ning sẽn da na n wa lebg naabã yi a pendẽ wã,+ yɩɩ a Zozɛf n paam kãsengã. 3 A Israyɛll bi-kãseng a Rubɛn kom-dibli wã yɩɩ a Hanoke, a Palu, a Ɛsron la a Karmi.+ 4 A Zowɛll kom-dibli wã yɩɩ a Semaya, t’a Semaya rog a Goog, t’a Goog rog a Simeyi. 5 A Mise roga a Rehaya, t’a Rehaya rog a Baalle. 6 A Baal roga a Beera, a soab ning Asiiri rĩm a Tilgat-pilnezɛɛr+ sẽn yõk n kẽng yembdã. A Beera ra yaa Rubɛn buudã neb taoor soaba. 7 A Beera ba-biisã neb nins yʋy sẽn da be sõadgã sɛb pʋsẽ wã, roog fãa ne a neb yʋyã yɩɩ a Yeyɛll sẽn da yaa taoor soabã, a Zakari, 8 ne a Zowɛll bi-ribl a Sema bi-ribl a Azaaz bi-ribl a Bela. A Bela roogã neb zĩnda soolem ning sẽn sɩng Arowɛɛr+ n tãag Nebo ne Baal-meyonnã.+ 9 Yaang sẽnesã, bãmb zĩnda hal we-raoogã sɩngrẽ n tãag Efrat kʋɩlgã+ noore. Bala b rũmsã ra lebga wʋsg Galaad+ soolmẽ wã. 10 A Sayull naamã wakate, bãmb zaba ne Hagaar nebã n tõog-ba. Woto, Galaad yaang sẽnesã soolmã fãa pʋgẽ, bãmb reega b fu-rotã n zĩnd b pʋsẽ.
11 Gaad buudã neb ra yɛga Rubɛn buudã nebã, Basan soolmẽ wã hal n tãag Salka.+ 12 Basan soolmẽ wã, a Zowɛll n da yaa taoor soaba, t’a Safam yaa yiib-n-soaba, n paas a Yanayi ne a Safat. 13 B ba-biisã sẽn da yaa b buudã rot nebã yɩɩ a Mikayɛll, a Mesulam, a Saba, a Zorayi, a Yakan, a Ziya la a Ebɛɛr. B fãa ra yaa bãmb b yopoe. 14 Ad a Abihayɩll kom-dibli wã. Yẽ ra yaa a Uuri bi-ribla, t’a Uuri yaa a Yarowa bi-ribla, t’a Yarowa yaa a Galaad bi-ribla. A Galaad ra yaa a Mikayɛll bi-ribla, t’a Mikayɛll yaa a Yesisayi bi-ribla, t’a Yesisayi yaa a Yado bi-ribla, t’a Yado bi-ribl yaa a Buuz. 15 A Guni bi-ribl a Abdiyɛll bi-ribl a Ayi n da yaa b buudã roogã neb taoor soaba. 16 Bãmb zĩnda Galaade,+ Basan+ soolmã ne tẽns nins a sẽn so wã,* la rũms wãbneg zĩisã fãa sẽn be Saarõ soolmẽ wã n tãag b todsã. 17 B gʋlsa b fãa yʋyã sõadgã sebr pʋgẽ, Zida rĩm a Zotam+ ne Israyɛll rĩm a Zerobowam*+ naamã wakate.
18 Rubɛn buudã ne Gaad buudã la Manase buudã pʋɩ-sʋk ra tara gãndaad tus-pis-naas la a naas la neb kobs-yopoe la pis-yoob sẽn bob gãnd la sʋʋs b tãb-biisã sʋka. Bãmb da bobda tãbdo,* la b ra yaa neb sẽn mi zabr sõma. 19 Bãmb zaba ne Hagaar nebã,+ a Yetʋʋr yagensã, la a Nafis+ ne a Nodaab yagensã. 20 La zabrã sasa, Wẽnnaam sõng-b lame tɩ b tõog Hagaar nebã ne neb nins fãa sẽn da be ne-bã. Bala bãmb kosa Wẽnnaam sõngr zabrã pʋgẽ, tɩ Wẽnnaam leok b kosgã b sẽn teeg yẽ wã yĩnga.+ 21 Bãmb yõga b rũmsã. Yɩɩ yʋgma tus-pis-nu, ne piis tus-kobs-yi la pis-nu, la bõens tus a yi, n paas neb* tus-koabga. 22 B kʋʋ neb wʋsgo, bala yaa Wẽnnaam+ meng n da zabd zabrã. Bãmb deega b soolmã n zĩnd be n tãag yikrã wakate.+
23 Manase buudã+ neb pʋɩ-sʋk zĩnda sẽn sɩng Basan n tãag Baal-hɛrmo ne Seniir la Hɛrmo tãngã+ soolmã. Bãmb da yaa wʋsgo. 24 Ad b buudã rot taoor dãmba: Yaa a Efɛɛr, a Iseyi, a Eliyɛll, a Azriyɛll, a Zeremi, a Hodaviya la a Yadiyɛll. B ra yaa gãndaado, neb yʋy sẽn yi, la b buudã rot taoor dãmba. 25 Bãmb pa maan sɩd ne b yaab-rãmbã Wẽnnaamã ye. Bãmb tũu bu-zẽmsã sẽn da be soolmã pʋgẽ wã wẽnnaam-dãmba,*+ bu-zẽms nins Wẽnnaam sẽn da menes bãmb taoorã. 26 Rẽ n so tɩ Israyɛll Wẽnnaamã pirs Asiiri+ rĩm a Pull (rat n yeel tɩ Asiiri rĩm a Tilgat-pilnezɛɛr+) t’a yõg Rubɛn buudã ne Gaad buudã la Manase buudã nebã pʋɩ-sʋk n tall n kẽng yembd Hala, Haboor, Haara la Gozan+ kʋɩlgã noore. La bãmb keta be hal n tãag rũndã.