Kibayã pipi sebre

13 A Davɩɩd yẽsa ne tãb-biis tusr-tusr nanambsã, ne tãb-biis koabg-koabg nanambsã la ne taoor soab fãa.+ 2 Rẽ poore, a Davɩɩd yeela Israyɛll nin-buiidã fãa yaa: “Sã n nooma yãmba, la sã n taa tõnd Wẽnnaam a Zeova yam, bɩ y wa tɩ d tʋm koɛɛg Israyɛll soolmã fãa pʋgẽ d ba-biisã sẽn ketã nengẽ, la maan-kʋʋdbã ne Levi buudã nebã sẽn be b tẽnsẽ+ la b rũms wãbneg zĩisẽ wã nengẽ, n bool-b tɩ b wa. 3 Bɩ d tɩ tall tõnd Wẽnnaamã Koglgã+ n wa.” B ra pa ges koglgã yell a Sayull wakatã tɛk ye.+ 4 Nin-buiidã fãa saka a Davɩɩd sẽn yeelã. Bala rẽ ra yaa sõma nin-buiidã fãa nifẽ. 5 Woto, a Davɩɩd tigma Israyɛll nebã fãa, sẽn sɩng ne Ezɩpt kʋɩlgã* n tãag Lebo-hamate,*+ tɩ b na n tɩ rɩk Wẽnnaam Koglgã Kiryat-yeyarim n wa.+

6 A Davɩɩd ne Israyɛll nebã fãa yii Baalla+ n na n kẽng Kiryat-yeyarim sẽn be Zida soolmẽ wã, n tɩ wa ne Wẽnnaam a Zeova Koglgã, soab ning sẽn zao a geerã sẽn be seribẽ-rãmbã+ zugã.* Yaa koglg ning taoor nebã sẽn boond Wẽnnaam yʋʋrã. 7 La bãmb rɩka Wẽnnaam Koglgã n sagl niis sarɛt-paall+ pʋgẽ, n yi a Abinadaab yirã, t’a Uuza ne a Ayio da get sarɛtã yell t’a kẽnda.+ 8 A Davɩɩd ne Israyɛll nebã fãa ra kɩdemda ne b pãng fãa Wẽnnaam taoor ne yɩɩla, pendse, yʋʋm-teed a taab sẽn tar rissi, bembendo,*+ waase,+ la ne tãntãado.+ 9 La b sẽn wa n ta Kidon zɛɛgẽ wã, a Uuza tẽega a nug n gãd Koglgã, bala niisã maaname t’a ra rat n lʋɩ. 10 Rẽ kɩtame t’a Zeova sũurã puug ne a Uuza t’a kʋ-a, a sẽn tẽeg a nug n gãd Koglgã+ yĩnga. Yẽ kii beenẽ, Wẽnnaam taoore.+ 11 La a Davɩɩd sũur yikame, a Zeova sũur sẽn puug t’a sɩbg a Uuza zĩig pʋgẽ wã yĩnga. La b boola zĩ-kãng tɩ Perɛɛz-uuza* hal n tãag rũndã.

12 Baraare, Wẽnnaam rabeem kẽe a Davɩɩd t’a yeele: “Mam na n maana a wãn tɩ Wẽnnaam Koglgã wa mam nengẽ?”+ 13 A Davɩɩd pa tall Koglgã n wa a tẽngẽ wã ye. La yẽ kɩtame tɩ b tall-a n kẽng Gat* rao a Obɛɛd-edom zakẽ wã. 14 Wẽnnaam Koglgã paa ne Gat rao a Obɛɛd-edom zakã rãmba, n maan kiis a tãab a zakẽ wã. La a Zeova ra ningda a Obɛɛd-edom zakã rãmb ne bũmb nins fãa a sẽn so wã barka.+