Ezekɩyɛll sebre
32 Yʋʋm piig la a yiib-n-soabã, kiuug piig la a yiib-n-soabã pipi daarã, a Zeova le goma ne maam n yeele: 2 “Ninsaal biiga, yɩɩl sũ-sãang yɩɩll* Ezɩpt rĩm a Farawõ wɛɛngẽ, n yeel-a yaa:
‘Fo ra yaa wa buud toɛy-toɛyã gɩgem-poll sẽn tar pãnga,
la b kɩtame tɩ fo sĩndi.
Fo ra yaa wa mogrã bõn-bãnde,+ n da be f kʋɩlsẽ wã n pugda,
n gudgd koomã ne f naoã, la f bendgd kʋɩlsã koom.’
3 Ad a Zeova sẽn yaa Zu-soab sẽn ka to wã sẽn yeele:
‘Mam na n tũnuga ne buud wʋsg neb kʋʋngo, n lob m gãmbrã fo zugu.
B na n yaaga foo ne mam zĩm-gãmbrã.
4 Mam na n daag-f lame n bas tẽn-gãongã zugu.
M na n loba foo weoogẽ wã.
M na n kɩtame tɩ liuuli wã sẽn yɩgd yĩngrã wa zaoond fo zugu,
la m kɩt tɩ tẽngã tõr we-rũmsã wãb foo n tɩge.+
5 Mam na n loba fo nemdã tãensã zutu,
la m pids londã ne fo yĩngã bũmb nins sẽn na n kellã.+
6 Mam na n kɩtame tɩ fo zɩɩmã raag n madg tẽngã hal n ta tãensã zutu,
la a pid kʋɩlsã.’*
7 ‘Fo sã n wa ki, m na n luda saasã la m kɩt tɩ ãdsã sẽn be saasẽ wã sobge.
Mam na n luda wĩntoogã ne sawato.
Kiuugã me pa na n le kõ a vẽenemã ye.+
8 Fo yĩnga, m na n kɩtame tɩ bũmb nins fãa sẽn be saasẽ n kõt vẽenemã sobge,
la m kɩt tɩ lik bui fo soolmã.’ Yaa a Zeova sẽn yaa Zu-soab sẽn ka to wã n yeele.
9 ‘Mam na n kɩtame tɩ buud wʋsg neb sũy sãame, m sã n wa tall fo nebã n kẽng yembd buud a taab nengẽ,
soolem toor-toor fo sẽn pa bãng pʋgẽ.+
10 Mam na n kɩtame tɩ rabeem wʋsg yõk buud wʋsg neba,
tɩ b rĩm-dãmbã rig ne rabeem fo yĩnga, wakat ning mam sẽn na n zẽk m sʋʋgã b taoorã.
Fo lʋɩɩsã daare,
b na n digdame n pa satẽ, tɩ ned kam fãa yɛɛsd a vɩɩm yĩnga.’
11 Bala ad a Zeova sẽn yaa Zu-soab sẽn ka to wã sẽn yeele:
‘Babilon rĩmã sʋʋgã na n waa fo zugu.+
12 Mam na n kɩtame tɩ zabr gãndaad sẽn tar pãng wʋsg kʋ fo tãb-biisã ne sʋʋse.
B fãa yaa buud nins neb sẽn yaa toos n yɩɩdã neba.+
B na n kɩtame tɩ Ezɩpt wuk-m-mengã sa, la b menes a tãb-biisã fãa.+
13 M na n sãama a rũmsã fãa a koomã sẽn yaa wʋsgã noore.+
Ninsaal naoor wall rũng nao-beong baa a ye pa na n le bendg a koomã ye.’+
14 ‘Wakat kãnga, mam na n kɩtame tɩ koomã lebg yɩlemde,
la m kɩt tɩ kʋɩlsã koom zoe wa kaam.’ Yaa a Zeova sẽn yaa Zu-soab sẽn ka to wã n yeele.
15 ‘Mam sã n wa kɩt tɩ Ezɩpt lebg raboogo, soolem b sẽn yiis bũmb nins fãa sẽn da pid-a wã,+
mam sã n wa kʋ neb nins fãa sẽn be a pʋgẽ wã,
b na n bãngame tɩ mam yaa a Zeova.+
16 Woto yaa sũ-sãang yɩɩlle. Hakɩɩka, nebã na n yɩɩl-a lame.
Buud toɛy-toɛyã kom-pugli na n yɩɩl-a lame.
B na n yɩɩl-a-la Ezɩpt yĩnga, la a tãb-biisã fãa yĩnga.’ Yaa a Zeova sẽn yaa Zu-soab sẽn ka to wã n yeele.”
17 Yʋʋm piig la a yiib-n-soabã, kiuugã rasem piig la a nu soabã daare, a Zeova le goma ne maam n yeele: 18 “Ninsaal biiga, wiis Ezɩpt tãb-biisã yĩnga, la f kɩt t’a sig tẽngã zĩ-zulungẽ wã, yẽ ne buud nins sẽn tar pãng wʋsgã kom-pugli, n naag sẽn sigd-b bokẽ wã.*
19 “‘Fo neerem yɩɩda ãnda? Sig n tɩ gãand ne sẽn pa kẽ-b bãongã!’
20 “‘Ezɩpt nebã* na n lʋɩɩ neb nins b sẽn kʋ ne sʋʋsã sʋka.+ B kʋʋ Ezɩpt* ne sʋʋga. Vu-y-yã-a ne a tãb-biisã fãa n looge.
21 “‘Zabr gãndaad nins sẽn tar pãng n yɩɩdã na n paa Yaoogã* zĩ-zulumsẽ wã n gom ne yẽ la a sõangdbã. Sãmbg sẽn kae, b na n sigame n tɩ gãand wa neb nins sẽn pa kẽ bãongã. B na n kʋ-b-la ne sʋʋse. 22 Asiiri bee be ne a kʋʋngã fãa. B yaadã karg n gũbg-a lame. Yaa sʋʋg n kʋ b fãa.+ 23 A yaadã bee bokã* zĩ-zulumsẽ wã, t’a kʋʋngã karg n gũbg a yaoogã. Yaa sʋʋg n kʋ b fãa, bala b ra kẽesda nin-vɩɩsã soolem neb rabeem.
24 “‘Elam+ bee be t’a tãb-biisã fãa karg n gũbg a yaoogã. Yaa sʋʋg n kʋ b fãa. B siga tẽngã zĩ-zulungẽ wã n pa kẽ bãong ye. B yaa neb sẽn da kẽesd nin-vɩɩsã soolem neb rabeem. Masã, b na n paama yãnde, ne neb nins sẽn sigd bokẽ wã.* 25 B maana gãag zĩig a yĩng neb nins b sẽn kʋ wã sʋka, t’a tãb-biisã fãa karg n gũbg a yaadã. B fãa yaa neb sẽn pa kẽ bãongo. B kʋ-b-la ne sʋʋse, bala b ra kẽesda nin-vɩɩsã soolem neb rabeem. B na n paama yãnde, ne neb nins sẽn sigd bokẽ wã.* B ning-a-la neb nins b sẽn kʋ wã sʋka.
26 “‘Mesɛk ne Tuball+ la b* tãb-biisã fãa bee be. B* yaadã karg n gũbg-a lame.* B fãa yaa neb sẽn pa kẽ bãongo. B kõs-b-la ne sʋʋse, bala b ra kẽesda nin-vɩɩsã soolem neb rabeem. 27 B pa na n naag zabr gãndaad nins sẽn tar pãng wʋsgo, la sẽn pa kẽ bãong n ki wã sɩda? Yaa sẽn sig-b Yaoogẽ* wã ne b zab-teedã. B na n ninga b sʋʋsã b zutã tẽngre,* la b rogl b yel-wẽnã b kõabã zutu, bala zabr gãnda-kãens sẽn tar pãng wʋsgã ra kẽesda nin-vɩɩsã soolem neb rabeem. 28 La sã n yaa ne foo,* b na n bedsa foo neb nins sẽn pa kẽ bãongã sʋka. Fo na n naaga neb nins b sẽn kʋ ne sʋʋsã n gãande.
29 “‘Edom+ bee be. Baa a rĩm-dãmbã ne a nanambsã fãa sẽn da yaa pãens rãmbã, b kɩtame tɩ b gãand neb nins b sẽn kʋ ne sʋʋsã sʋka. Bãmb me na n naaga neb nins sẽn pa kẽ bãongã,+ la neb nins sẽn sigd bokẽ wã* n gãande.
30 “‘Rɩtg nanambsã* fãa bee be, n paas Sɩdõ+ neb nins fãa sẽn naag b sẽn kʋ b rãmbã tɩ b sig ne paoogre, baa b sẽn da kẽesd nebã rabeem ne b pãngã. B pa kẽ bãong ye. B na n naaga neb nins b sẽn kʋ ne sʋʋsã n gãande. B na n paama yãnde, ne neb nins sẽn sigd bokẽ wã.*
31 “‘A Farawõ na n yãa bõn-kãensã, n paam belsg ne bũmb nins fãa sẽn paam a tãb-biisã.+ B na n kʋʋ a Farawõ ne a tãb-biisã fãa ne sʋʋse.’ Yaa a Zeova sẽn yaa Zu-soab sẽn ka to wã n yeele.
32 “‘A Farawõ sẽn da kẽesd nin-vɩɩsã soolem neb rabeemã yĩnga, yẽ ne a tãb-biisã na n naaga neb nins sẽn pa kẽ bãongã, neb nins b sẽn kʋ ne sʋʋsã n gãande.’ Yaa a Zeova sẽn yaa Zu-soab sẽn ka to wã n yeele.”