A RUT SEBRE

1 Wakat ning bʋ-kaoodbã sẽn da wa n kaood bʋʋdã,+ kom n kẽ Israyɛlle. La rao a yembr ne a pag la a kom-dibli a yiib n yi Betlehɛm+ Zida soolmẽ wã n tɩ zĩnd Mowaab+ soolmẽ wã. 2 Raoã yʋʋr la a Elimelɛke,* t’a pagã yʋʋr la a Naomi.* A kom-dibli a yiibã yʋy la a Malon* ne a Kilyonne.* B ra yita Efrate, Betlehɛm sẽn be Zida soolmẽ wã. Bãmb taa Mowaab n zĩnd be.

3 Kaoosg zugẽ, a Naomi sɩd a Elimelɛk maana kaalem n bas-a ne a kom-dibli a yi wã. 4 A Naomi kom-dibli wã wa n kẽe kãadem ne Mowaab kom-pugli. A ye yʋʋr la a Orpa, t’a to wã yʋʋr la a Rut.+ B zĩnda be na maan yʋʋm piiga. 5 Rẽ poore, a kom-dibli a yiibã, a Malon ne a Kilyon me maana kaalem, t’a Naomi ra pa le tar a kambã, la a pa le tar sɩd me ye. 6 Woto, a Naomi yika ne a bi-pagbã n na n yi Mowaab soolmẽ wã n leb a ba-yirã. Bala a wʋmame t’a Zeova le ninga a nin-buiidã barka, n kõ-b rɩɩbo.*

7 A Naomi yika zĩig ning a sẽn da be ne a bi-pagbã n looge. B sẽn wa n dɩk sor n lebd Zida wã, 8 a Naomi yeela a bi-pagb a yiibã yaa: “Leb-y y ma-rãmb rotẽ. La bɩ a Zeova maan yãmb neere,+ wa y sẽn maan maam ne m kom-dibli wã sẽn ki wã neerã. 9 Bɩ a Zeova sõng yãmb ned kam fãa t’a paam sɩda, la bãan zĩiga.”*+ Rẽ poore, a moka bãmba, la b zẽka b koees n yãbe. 10 La bãmb da yeta a Naomi yaa: “Ayo! Tõnd na n tũu foo n kuil f nebẽ wã.” 11 La a Naomi yeelame: “M kamba, lebg-y n kuil-y-yã. Bõe yĩng tɩ y na n tũ maam? Mam tõe n le roga kom-dibli tɩ b yɩ yãmb sɩdb bɩ?+ 12 M kambã, lebg-y n kuil-y-yã. Lebg-y-yã. Bala mam kʋʋlame n pa tõe n le kẽ kãadem ye. La baa m sã n da tõe n paam sɩd yʋn-kãngã n dog kom-dibli, 13 yãmb na n zĩnd n gũume tɩ b lebg kãsemb bɩ? Y na n basame n pa kẽ kãadem bãmb yĩng sɩda? Ayo, m kamba, mam sã n tags a Zeova sẽn zab ne maam tɩ maan yãmb bũmb ningã, sãamda m sũur wʋsgo.”+

14 La bãmb leb n zẽka b koees n yãbe. Rẽ poore, a Orpa moka a sɩdã ma, la a looge. La a Rut kell n paa ne a Naomi. 15 Dẽ, a Naomi yeelame yaa: “Gese! Fo pʋg-to wã leba a nebẽ, la a wẽnnaam-dãmbẽ. Lebg n tũ-a tɩ y kuili.”

16 La a leokame yaa: “Ra pẽdg maam tɩ m lebg n bas-f ye. Bala fo sẽn na n kẽng zĩig ningã, ma-me na n kẽnga be. La zĩig ning fo sẽn na n gãandã, ma-me na n gãanda be. Fo nebã na n yɩɩ mam neba, la fo Wẽnnaamã na n yɩɩ mam Wẽnnaam.+ 17 Fo sẽn na n ki zĩig ningã, be la ma-me na n ki, la be la b na n mum maam. Bɩ a Zeova sɩbg maam ne sɩbg-kãsenga, bũmb a to sã n welg maam ne foom tɩ pa kũum.”

18 A Naomi sẽn yã t’a Rut rata ne a sũur fãa n tũ-a wã, a basame n pa le pẽdg-a t’a kuil ye. 19 Bãmb b yiibã fãa kell n tũu taab n ta Betlehɛm.+ La b sẽn ta wã bala, tẽngã fãa rãmbame, tɩ pagbã ra sokdẽ yaa: “Yaa a Naomi la woto bɩ?” 20 La a Naomi ra yeta pagbã yaa: “Da bool-y maam t’a Naomi* ye. Bool-y maam t’a Maara,* bala Sẽn-tõe-a-fãa wã kɩtame tɩ vɩɩmã lebg toog liga ne maam.+ 21 Mam sẽn wa n yit ka wã tɩ m tara bũmb fãa, la a Zeova kɩtame tɩ mam lebg n wa nus-vɩɩdo. Bõe yĩng tɩ y na n bool-m t’a Naomi? Bala yaa Wẽnnaam a Zeova, Sẽn-tõe-a-fãa wã n wẽnemd n zab ne maam la a kɩt tɩ yel-beed paam-ma.”+

22 Yɩɩ woto la a Naomi yi Mowaab soolmẽ wã n lebg n kuili,+ yẽnda ne a bi-pag a Ruti. Bãmb taa Betlehɛm orzã* tigsg sɩngr wakate.+

2 A Naomi sɩdã ra tara roagd sẽn tar arzɛk wʋsgo, t’a yʋʋr la a Bowaaze.+ A ra yaa a Elimelɛk buudã neda.

2 A Rut sẽn yaa Mowaab nedã yeela a Naomi yaa: “M kota sor n na n tɩ pʋgl kẽebdb nins sẽn na n maan maam neerã, n yiis+ kood b pʋtẽ wã.” T’a Naomi yeel-a yaa: “Kẽnge, m biiga.” 3 Dẽ, a Rut kẽnga pʋtẽ wã n tɩ pʋgd kẽebdbã n yiisd koodo. La a wa n tɩ kẽe pʋʋg a ye pʋgẽ, mik yaa a Bowaaz sẽn yaa a Elimelɛk buudã nedã+ pʋʋgo.+ 4 A Bowaaz wa n yii Betlehɛm n wa, n pʋʋs kẽebdbã n yeele: “A Zeova zĩnd ne yãmba.” La bãmb leokame: “Bɩ a Zeova ning yãmb barka.”

5 A Bowaaz soka tʋm-tʋmd ning sẽn get kẽebdbã yellã yaa: “Pʋg-kãngã yaa ãnd neda?” 6 La tʋm-tʋmdã leokame: “Pagã yaa Mowaab neda.+ A tũu a Naomi n yi Mowaab soolmẽ wã n wa.+ 7 Yẽ sokame yaa: ‘M tõe n bõos n pʋgla kẽebdbã n yiis+ la m tigs koodã zut b sẽn bas b poorẽ wã bɩ?’ La yibeoogẽ tɛk n tãag masã, a ra ket n tʋmdame. A sẽn nan tɩ zĩnd zãndẽ wã n na n vʋʋs bilf la woto.”

8 Dẽ, a Bowaaz yeela a Rut yaa: “Kelge, m biiga. Ra kẽng ned a to pʋʋgẽ n tɩ yiisi, wall f kẽng zĩig a to ye. Kell n pa mam tʋm-tʋmd-pogsã sɛɛgẽ.+ 9 Ges zĩig ning bãmb sẽn kẽebdã neere, n pʋgl-ba. Mam yeela m tʋm-tʋmdbã tɩ b ra sɩɩs* foom ye. Ko-yũud sã n wa tar-fo, bɩ f kẽng ko-yũusẽ wã n tɩ yãk koomã mam tʋm-tʋmdbã sẽn toogã n yũ.”

10 Dẽ, a Rut lʋɩɩme n fõgen a neng tẽng n yeele: “Bõe yĩng tɩ yãmb maan maam neer woto, la bõe yĩng tɩ y get m yelle, tɩ mam yaool yaa sãana?”+ 11 A Bowaaz leoka yẽ yaa: “B togsa maam bũmb nins fãa fo sẽn maan f sɩdã ma neer yĩnga, fo sɩdã kaalem poorã, la fo sẽn bas f ba la f ma ne f roagdbã tẽnga, n na n tɩ zĩnd ne buud fo sẽn da pa mi wã.+ 12 Bɩ a Zeova keo foo f sẽn maanã yĩnga,+ la bɩ Israyɛll Wẽnnaam a Zeova, soab ning pɩgsẽ fo sẽn wa n soondã+ rol-f tɩ pidi.”* 13 T’a Rut yeel yaa: “M zu-soaba, bark y maan-neerã yĩnga. Bala yãmb belsa maam, la y gom n gãneg mam yam, baa mam sẽn pʋd n pa yãmb tʋm-tʋmd-poakã.”

14 Rɩɩbã wakate, a Bowaaz yeela a Rut yaa: “Kolg n wãb buri. Yãk f burã n suk divẽ-miisgẽ wã.” Dẽ, a Rut zĩndame n yɛgl kẽebdbã. A Bowaaz kõ-a-la kood b sẽn sẽ, la yẽ wãbame n tɩge, hal tɩ kelle. 15 A Rut sẽn yik n na n yiis koodã,+ a Bowaaz yeela a tʋm-tʋmdbã yaa: “Bas-y-yã-a t’a yiis baa koodã zut* sʋka, la y ra nams-a ye.+ 16 Sẽn paase, yãkd-y koodã n basdẽ t’a pʋgd n yiisdẽ, la y ra gɩdg-a ye.”

17 Woto, a Rut kell n yiisa koodã n tãag zaabre.+ A sẽn wa n pãb koodã a sẽn yiisã, a paama orz* na maan efa* a yembre. 18 Rẽ poore, a tʋkame n kẽ tẽngã pʋgẽ, la a sɩdã ma yãa koodã a sẽn yiisã. A Rut yãka rɩɩbã me a sẽn da rɩ n tɩg tɩ kellã+ n kõ a sɩdã ma.

19 Dẽ, a sɩdã ma sok-a lame yaa: “Yɛ la fo tɩ yiis rũndã? Yɛ la fo tʋm-yã? Bɩ ned ning sẽn maan foo neerã paam barka.”+ La yẽ togsa a sɩdã ma ned ning pʋʋgẽ yẽ sẽn tɩ tʋmã, n yeele: “Mam sẽn tɩ tʋm rao ning pʋʋgẽ wã yʋʋr la a Bowaaze.” 20 Rẽ la a Naomi yeel a bi-pagã yaa: “Bɩ a Zeova sẽn nong sẽn ki-bã la sẽn vɩ-bã ne nonglem sẽn pa satã+ ning yẽ barka.” A Naomi paasame: “Raoã yaa tõnd roagda.+ Yẽnda yaa sẽn tõe n yao-b n deeg tõndã nin-yende.”+ 21 Dẽ, a Rut sẽn yaa Mowaab nedã yeelame: “Raoã leb n yeela maam yaa: ‘Kell n pa m tʋm-tʋmdbã sɛɛgẽ hal tɩ b kẽeb m koodã fãa n sa.’”+ 22 A Naomi yeela a bi-pag a Rut yaa: “M biiga, fo sẽn na n pʋgl a Bowaaz tʋm-tʋmd-pogsã n yiisdẽ n são fo sẽn na n kẽng ned a to pʋʋgẽ tɩ b wa tɩ namsd-fo.”

23 Woto, a Rut paa ne a Bowaaz tʋm-tʋmd-pogsã n yiis koodã, n tãag orzã*+ ne bɩle wã kẽebg saabo. La a kell n zĩnda ne a sɩdã ma.+

3 A Naomi sẽn yaa a Rut sɩd-ma wã yeel-a lame yaa: “M biiga, mam pa segd n bao roog* n kõ foom+ tɩ f yellã maneg sɩda? 2 A Bowaaz pa tõnd roagd la?+ Yaa yẽ tʋm-tʋmd-pogs la fo sẽn da be ne wã. Yʋngã, a yelgda a orz* zɛɛgẽ wã. 3 So koom la f sõ kaam sẽn tar yũ-noogo, la f yeelg f fut nins sẽn yaa neeb n yɩɩdã* n kẽng zɛɛgẽ wã. Da maan tɩ raoã bãng tɩ fo waa be, hal t’a rɩ la a yũ n sa. 4 A sã n wa n na n gãand bɩ f ges zĩig ning a sẽn gãandã, n kẽng n tɩ pilg a fuugã a naoẽ wã n gãand be. A na n wilga foom fo sẽn segd n maanega.”

5 Rẽ la a Rut yeel-yã: “Mam na n maana bũmb ning fãa yãmb sẽn yeel maamã.” 6 Woto, yẽ kẽnga zɛɛgẽ wã n tɩ maan bũmb nins fãa a sɩdã ma sẽn yeel-a t’a maanã. 7 Wakat kãng t’a Bowaaz rɩtame la a yũud t’a sũurã noomẽ. Rẽ poore, a tɩ gãanda orzã* sẽn da rʋrã sɛɛga. A Rut soos n tɩ pilga a fuugã a naoẽ wã n gãand be. 8 Yʋn-sʋkã, raoã wa n sɩnga rigbu, n doog n yã tɩ pag n gãe a naoẽ wã. 9 A sokame yaa: “Fo yaa ãnda?” T’a Rut leoke: “Mam yaa yãmb tʋm-tʋmd-poak a Rut. Tẽeg-y y fuugã n pil y tʋm-tʋmd-poakã,* bala yãmb tara sor n tõe n yao n deeg maam.”+ 10 Rẽ la a Bowaaz yeel-yã: “Bɩ a Zeova ning-f barka, m biiga. Fo sẽn maan bũmb nins pĩndã wilgdame tɩ f tara nonglem. La fo sẽn maan bũmb ning masã wã maneg n wilgda fo nonglmã vẽenega.+ Bala fo pa bao kom-bɩɩse, b yaa naong rãmb wall arzɛgs rãmb ye. 11 Woto wã m biiga, ra maan rabeem ye. Mam na n maana bũmb ning fãa fo sẽn yeelã.+ Bala tẽngã nebã fãa* miime tɩ fo yaa pʋg-sõng tɛkẽ! 12 Yaa sɩd tɩ mam tara sor n tõe n yao n deeg foo,+ la ned a to n kĩ ne yãmb n yɩɩd maam.+ 13 Dẽ wã, bɩ f pa ka yʋngã. Beoog yibeoogo, a sã n na n yao n deeg-fo, yaa sõma! Bɩ a yao n deeg-fo.+ La a sã n pa rat n yao n deeg-fo, mam wẽenda ne a Zeova sẽn vɩ wã tɩ m na n yao n deeg-f lame. Gãand ka n gũ beoogo.”

14 Woto, a Rut kell n gãanda a Bowaaz naoẽ wã n ta yibeoogo. La a yikame tɩ zĩigã nan pa yẽeg n sek ned na yã a to n bãng ye. A Bowaaz yeelame: “Ned pa segd n bãng tɩ pag n wa zɛɛgẽ wã ye.” 15 A Bowaaz leb n yeelame: “Wa ne f zugẽ fuugã fo sẽn ningã, n tẽeg n gãd sõma.” Dẽ, a Rut tẽeg-a lame t’a Bowaaz mak orzã* seya a yoob* n kiig n tʋk-a. Rẽ poore, a Bowaaz kẽnga tẽngã pʋgẽ.

16 A Rut taa a sɩdã ma nengẽ, t’a sok-a yaa: “Fo kẽnd maana wãna,* m biiga?” A Rut togs-a-la bũmb ning fãa a Bowaaz sẽn maan n kõ-a wã. 17 A paasame: “A kõo maam orzã* seya a yoobe, n yeel maam yaa: ‘Da kuil f sɩdã ma nengẽ nug-zaal ye.’” 18 Dẽ, a Naomi yeelame: “M biiga, zĩnd ka n tãag f sẽn na n bãng yellã sẽn na n baas to-to. Bala a Bowaaz na n maana a sẽn tõe fãa n welg yel-kãngã rũndã.”

4 A Bowaaz kẽnga tẽngã rignoor+ n tɩ zĩndi. La ade! A sẽn da yeel tɩ ned ning tara sor n na n yao n deeg a Rutã+ wa n loogdame, t’a Bowaaz yeele: “Zagla, wa loog n zĩnd ka.” La yẽ kẽngame n tɩ zĩndi. 2 Woto, a Bowaaz boola tẽngã kãsem-dãmb+ piig n yeel-ba: “Zĩnd-y ka.” La bãmb zĩndame.

3 Dẽ, a Bowaaz yeela sẽn tar-a sor n tõe n yao wã+ yaa: “A Naomi sẽn yi Mowaab soolmẽ wã n lebg n wa wã+ segd n koosa tõnd ba-biig a Elimelɛk pʋʋgã.+ 4 Rẽ n so tɩ mam tags tɩ m segd n togsa foo la m yeel-f tɩ f ra pʋʋgã tẽngã nebã taoore, la tõnd nin-buiidã kãsem-dãmbã taoore.+ Fo sã n na n yao n deeg-a lame, bɩ f yao n deeg-a. La f sã n pa na n yao n deeg-a, bɩ f togs-m tɩ m bãnge. Bala fo n tar sor n na n yao n deeg-a, tɩ mam pʋgda.” T’a leoke: “Mam na n yao n deegame.”+ 5 Dẽ, a Bowaaz yeelame: “Daar ning fo sẽn na n da pʋʋgã a Naomi nengẽ wã, fo segd n da-a-la Mowaab pag a Rut sẽn yaa kiidã pagã me nengẽ, sẽn na yɩl tɩ kiidã yʋʋrã kell n pa a pʋɩɩrẽ wã.”+ 6 La rao ning sẽn tar sor n na n da pʋʋgã leokame: “Mam pa tõe n yao n deeg-a ye. Bala m tõe n wa bõna m meng pʋɩɩrã. Mam kõta foo sor tɩ f yao n deeg-a. Mam pa tõe n yao n deeg-a ye.”

7 Pĩnd wẽndẽ wã, Israyɛlle, b sã n da rat n kõ ned sor t’a yao n deeg bũmb wall a tek bũmb ne bũmb a to, ad b sẽn da minim n maandẽ: Nin-yendã segd n pidga a neoodr+ n kõ a to wã. Yaa woto la neb ra wilgd tɩ b zemsa taab bũmb wɛɛngẽ Israyɛlle. 8 La sẽn da segd-a n yao n deeg pʋʋgã sẽn yeel a Bowaaz t’a reeg n da wã poore, a pidga a neoodrã. 9 Rẽ poore, a Bowaaz yeela kãsem-dãmbã la nin-buiidã fãa yaa: “Rũndã, yãmb yaa kaset+ tɩ mam deega bũmb nins fãa a Elimelɛk ne a Kilyon la a Malon sẽn so wã a Naomi nengẽ n da. 10 Sẽn paase, mam deegda a Malon pag a Rut sẽn yaa Mowaab nedã n na n maan m paga, sẽn na yɩl tɩ kiidã yʋʋrã kell n pa a pʋɩɩrẽ wã,+ t’a yʋʋrã me ra menem a ba-biisã sʋka, la a tẽngã neb sʋk ye.* Rũndã, yãmb yaa kaseto.”+

11 Rẽ la nin-buiidã fãa sẽn da be tẽngã rignoorẽ wã ne kãsem-dãmbã yeel-yã: “Tõnd yaa kaseto! La bɩ a Zeova kɩt tɩ pag ning sẽn na n kẽ fo roogẽ wã yɩ wa a Rasɛll ne a Leya sẽn yalg Israyɛll buudã.+ Bɩ f yidg Efrata,+ la f paam yʋ-noog* Betlehɛmme.+ 12 Bɩ kamb nins a Zeova sẽn na n kõ foo pʋg-kãngã maasem yĩngã+ kɩt tɩ fo roogã neb lebg wa a Tamaar ne a Zida biig a Perɛɛz roogã rãmba.”+

13 Woto, a Bowaaz peega a Rut n maan a paga. A kẽe ne-a, t’a Zeova kɩt t’a rɩk pʋg n dog bi-ribla. 14 Pagbã yeela a Naomi yaa: “Bɩ a Zeova yʋʋr paam pẽgre, yẽ sẽn kɩt tɩ fo paam ned sẽn yao n deeg foo rũndã wã. Bɩ b moon biigã yʋʋr Israyɛll soolmã pʋgẽ! 15 A* kɩtame tɩ fo vʋʋge, la a na n teela foo f kʋʋlem wakate. Bala yaa f bi-pagã sẽn nong foo,+ la sẽn tar yõod n yɩɩd kom-dibli a yopoe wã n dog-a.” 16 Dẽ, a Naomi rɩka biigã a yãoogẽ, la yẽ gesa a yelle.* 17 La yagsã pagb pʋda biigã yʋʋre. Bãmb yeelame yaa: “A Naomi paama bi-ribla,” la bãmb pʋda a yʋʋr t’a Obɛɛde.+ A yaa a Zese*+ ba, t’a Zese yaa a Davɩɩd ba.

18 Ad a Perɛɛz+ roogã neba:* A Perɛɛz roga a Ɛsron.+ 19 A Ɛsron roga a Ram, t’a Ram rog a Aminadaabe.+ 20 A Aminadaab+ roga a Naasõ, t’a Naasõ rog a Salmo. 21 A Salmo roga a Bowaaze, t’a Bowaaz rog a Obɛɛde. 22 A Obɛɛd roga a Zese,*+ t’a Zese rog a Davɩɩde.+