A ƐSDRAS SEBRE

1 Pɛrs rĩm a Sirus+ naamã pipi yʋʋmdã, sẽn na yɩl t’a Zeova gomdã a Zeremi+ sẽn da togsã pidsi, a Zeova pirsa Pɛrs rĩm a Sirus t’a yiis koɛɛga, n kɩt tɩ b moon a soolmã fãa pʋgẽ. A kɩtame me tɩ b gʋls koe-kãnga.+ A mooname n yeel yaa:

2 “Ad Pɛrs rĩm a Sirus koɛɛga: ‘A Zeova sẽn yaa saasẽ Wẽnnaamã kõo maam tẽngã soolem toɛy-toɛyã fãa,+ la a yeel maam tɩ m me roog n kõ-a Zerizalɛm+ sẽn be Zida wã. 3 Ãnd dãmb n be yãmb sʋkã n naag a nin-buiidã? Bɩ b Wẽnnaamã zĩnd ne-ba. La bɩ b kẽng Zerizalɛm sẽn be Zida wã n tɩ lebs n me Israyɛll Wẽnnaam a Zeova roogã. Yẽ n yaa Wẽnnaam sɩd-sɩdã, soab ning roog sẽn da be Zerizalɛmmã.* 4 Ned ning fãa sẽn be sãand weoogo,+ sẽn yaa zĩig ning fãa la a soab be-yã, bɩ a yagsã* sõng-a ne wanzuri la sãnem, teed la rũmsi, n paas yamleoog kũuni, Wẽnnaam sɩd-sɩdã roog+ ning sẽn da be Zerizalɛmmã yĩnga.’”

5 Dẽ, Zida buudã ne Bẽnzame buudã rot taoor dãmba, n paas maan-kʋʋdbã ne Levi buudã neba, rat n yeel tɩ neb nins fãa Wẽnnaam sẽn kɩt tɩ b tʋlg n tʋm tʋʋmdã segla b mense, n na n kẽng n tɩ lebs n me a Zeova roogã sẽn da be Zerizalɛmmã. 6 Yamleoog kũunã fãa sẽn yãk a toogo, b yagsã teel-b lame, n kõ-b* wanzuri ne sãnem laase, teed a taaba, rũms la bõn-sõma.

7 Sẽn paase, rĩm a Sirus lebsa a Zeova roogã teed nins a Nebukadnezaar sẽn da wʋk Zerizalɛm n wa ning a wẽnnaamã roogẽ wã.+ 8 Pɛrs rĩm a Sirus kɩtame t’a Mitredat sẽn yaa arzɛgsã gũudã yiis teedã, n sõd fãa n kõ a Sesbazaar*+ sẽn yaa Zida soolmã naabã.

9 Ad teedã sõore: Yaa sãnem laas sẽn wõnd yaas bãmb pis-tã, wanzuri laas sẽn wõnd yaas bãmb tusri, laas a taab bãmb pisi la a wɛ, 10 sãnem la-bõones pis-tã, wanzuri la-bõones kobs-naas la piiga, la teed a taab bãmb tusri. 11 Sãnemã la wanzuri wã teedã fãa sõor yɩɩ tus a nu la kobs-naase. A Sesbazaar talla te-kãens fãa n kẽng Zerizalɛm, wakat ning yembsã+ sẽn yi Babilon n kẽng Zerizalɛmmã.

2 Ad soolmã neb nins sẽn yi yembdã,+ neb nins Babilon rĩm a Nebukadnezaar sẽn da kẽes yembd Babilonne,+ tɩ b ned kam fãa wa leb a tẽngẽ,+ Zerizalɛm ne Zida wã. 2 Yaa neb nins sẽn tũ a Zorobabɛlle,+ a Yesuwa,+ a Neemi, a Seraya, a Reelaya, a Mardose, a Bilsanne, a Mispaare, a Bigvayi, a Rehum, la a Baana n wa wã.

Ad Israyɛll rap nins fãa sẽn tũ n kẽngã sõore:+ 3 A Paros yagensã yɩɩ neb tus a yi la koabg la pis-yopoe la a yiibu. 4 A Sefatiya yagensã yɩɩ neb kobs-tã la pis-yopoe la a yiibu. 5 A Aara+ yagensã yɩɩ neb kobs-yopoe la pis-yopoe la a nu. 6 A Pahat-mowaab+ yagensã sẽn yaa a Yesuwa ne a Zowaab yagensã yɩɩ neb tus a yi la kobs-nii la piig la a yiibu. 7 A Elam+ yagensã yɩɩ neb tusr la kobs-yi la pis-nu la a naase. 8 A Zatu+ yagensã yɩɩ neb kobs-wɛ la pis-naas la a nu. 9 A Zakayi yagensã yɩɩ neb kobs-yopoe la pis-yoobe. 10 A Bani yagensã yɩɩ neb kobs-yoob la pis-naas la a yiibu. 11 A Bebayi yagensã yɩɩ neb kobs-yoob la pisi la a tãabo. 12 A Azgaad yagensã yɩɩ neb tusr la kobs-yi la pisi la a yiibu. 13 A Adonikam yagensã yɩɩ neb kobs-yoob la pis-yoob la a yoobe. 14 A Bigvayi yagensã yɩɩ neb tus a yi la pis-nu la a yoobe. 15 A Adin yagensã yɩɩ neb kobs-naas la pis-nu la a naase. 16 A Atɛɛr yagensã sẽn yaa a Ezekɩyaas yagensã yɩɩ neb pis-wɛ la a nii. 17 A Bezayi yagensã yɩɩ neb kobs-tã la pisi la a tãabo. 18 A Zora yagensã yɩɩ neb koabg la piig la a yiibu. 19 A Hasum+ yagensã yɩɩ neb kobs-yi la pisi la a tãabo. 20 A Gibaar yagensã yɩɩ neb pis-wɛ la a nu. 21 Betlehɛm rapã yɩɩ koabg la pisi la a tãabo. 22 Netofa rapã yɩɩ pis-nu la a yoobe. 23 Anatot+ rapã yɩɩ koabg la pisi la a nii. 24 Azmavɛt rapã yɩɩ pis-naas la a yiibu. 25 Kiryat-yeyarim ne Kefira la Beerot rapã yɩɩ kobs-yopoe la pis-naas la a tãabo. 26 Rama+ ne Geba+ rapã yɩɩ kobs-yoob la pisi la a ye. 27 Mikmaas rapã yɩɩ koabg la pisi la a yiibu. 28 Betɛll ne Ayi+ rapã yɩɩ kobs-yi la pisi la a tãabo. 29 Nebo+ rapã yɩɩ pis-nu la a yiibu. 30 Magbis rapã yɩɩ koabg la pis-nu la a yoobe. 31 Elam a to wã yagensã yɩɩ neb tusr la kobs-yi la pis-nu la a naase. 32 A Harim yagensã yɩɩ neb kobs-tã la pisi. 33 Lood ne Hadiid la Ono rapã yɩɩ kobs-yopoe la pisi la a nu. 34 Zeriko rapã yɩɩ kobs-tã la pis-naas la a nu. 35 Sena rapã yɩɩ tus a tãab la kobs-yoob la pis-tã.

36 Ad maan-kʋʋdbã+ sõore: A Yedaya+ yagensã sẽn yaa a Yesuwa+ yagensã yɩɩ neb kobs-wɛ la pis-yopoe la a tãabo. 37 A Imeer+ yagensã yɩɩ neb tusr la pis-nu la a yiibu. 38 A Pasʋʋr+ yagensã yɩɩ neb tusr la kobs-yi la pis-naas la a yopoe. 39 A Harim+ yagensã yɩɩ neb tusr la piig la a yopoe.

40 Ad Levi buudã neb+ sõore: A Yesuwa ne a Kadmiyɛll+ yagensã sẽn yaa a Hodaviya yagensã yɩɩ neb pis-yopoe la a naase. 41 Ad yɩɩn-yɩɩndbã+ sõore: A Azaf+ yagensã yɩɩ neb koabg la pisi la a nii. 42 Ad rigno-gũudbã+ yagens sõore: A Salum yagensã, a Atɛɛr yagensã, a Talmo+ yagensã, a Akuub+ yagensã, a Hatita yagensã, la a Sobayi yagensã. B fãa yɩɩ neb koabg la pis-tã la a wɛ.

43 Ad wẽnd-doogã tʋm-tʋmdbã:*+ A Ziya yagensã, a Hasufa yagensã, a Tabawot yagensã, 44 a Keroos yagensã, a Siyaha yagensã, a Padõ yagensã, 45 a Lebana yagensã, a Hagaba yagensã, a Akuub yagensã, 46 a Hagaab yagensã, a Salmayi yagensã, a Hanan yagensã, 47 a Gidɛll yagensã, a Gahaar yagensã, a Rehaya yagensã, 48 a Rezĩn yagensã, a Nekoda yagensã, a Gaazam yagensã, 49 a Uuza yagensã, a Paseya yagensã, a Besayi yagensã, 50 a Asna yagensã, a Mewunim yagensã, a Nefusim yagensã, 51 a Bakbuk yagensã, a Hakufa yagensã, a Harhʋʋr yagensã, 52 a Baazlut yagensã, a Mehida yagensã, a Harsa yagensã, 53 a Barkos yagensã, a Sisera yagensã, a Tema yagensã, 54 a Neziya yagensã, ne a Hatifa yagensã.

55 Ad a Salomo tʋm-tʋmdbã yagensã: A Sotayi yagensã, a Soferɛt yagensã, a Peruuda+ yagensã, 56 a Yaala yagensã, a Darkon yagensã, a Gidɛll yagensã, 57 a Sefatiya yagensã, a Hatill yagensã, a Pokerɛt-hazebayim yagensã, ne a Ami yagensã.

58 Wẽnd-doogã tʋm-tʋmdbã* ne a Salomo tʋm-tʋmdbã yagensã fãa sõor yɩɩ neb kobs-tã la pis-wɛ la a yiibu.

59 Ad neb nins fãa sẽn yi Tɛll-mela, Tɛll-harsa, Keruubi, Adõn ne Imeere, la sẽn pa tõog n vaees n bãng b buudã rot la b sẽn yitẽ, n bãng b sã n yaa Israyɛll nebã:+ 60 Yaa a Delaya yagensã, a Tobiya yagensã ne a Nekoda yagensã. Fãa yɩɩ neb kobs-yoob la pis-nu la a yiibu. 61 Maan-kʋʋdbã sʋka, yɩɩ a Habaya yagensã, a Hakooz+ yagensã, ne a Barzɩlayi+ yagensã. Yaa Barzɩlayi ning sẽn kẽ kãadem ne Galaad rao a Barzɩlayi bi-pugl a ye wã, tɩ b ra boond-a ne a rɛɛmbã yʋʋrã. 62 Nin-kãensã gẽesa b sõadgã sɛbã n na n paam kaset sẽn wilgd b sẽn yaa buud ning nebã, la b pa yã ye. Rẽ n so tɩ b pa kõ-b sor tɩ b na n naag n tʋmd maan-kʋʋrã tʋʋmd ye.*+ 63 Guvɛrneerã* yeel-b lame tɩ b pa tõe n dɩ bũmb nins sẽn yaa sõamyã wʋsgã,+ sã n pa b wa n paama maan-kʋʋd sẽn na n tũnug ne Urimmã ne Tumimmã+ n sok Wẽnnaam.

64 Nebã fãa sõor yɩɩ tus-pis-naas la a yiibu, la kobs-tã la pis-yoobe,+ 65 yem-daadã la yem-pogsã sẽn da yaa neb tus a yopoe la kobs-tã la pis-tã la a yopoe wã sẽn pa naage. B leb n da tara pagb la rap kobs-yi sẽn yaa yɩɩn-yɩɩndba. 66 B wed-moosã sõor da yaa kobs-yopoe la pis-tã la a yoobe, tɩ b bõn-weesã* yaa kobs-yi la pis-naas la a nu. 67 B yʋgma wã sõor da yaa kobs-naas la pis-tã la a nu, tɩ b bõensã yaa tus a yoob la kobs-yopoe la pisi.

68 B sẽn wa n ta Zerizalɛm zĩig ning a Zeova roogã sẽn da be wã, buudã rot taoor dãmb kẽer kõo yamleoog kũun+ Wẽnnaam doogã yĩnga, sẽn na yɩl tɩ b lebs n me-a* a zĩigẽ wã.+ 69 B kõo wa sẽn zems b tarem tʋʋmdã yĩnga. Yaa sãnem darkem* tus-pis-yoob la a yembre, wanzuri min* tus a nu,+ la maan-kʋʋdb kasaabs koabga. 70 Maan-kʋʋdbã, Levi buudã nebã, nin-buiidã kẽere, yɩɩn-yɩɩndbã, rigno-gũudbã n paas wẽnd-doogã tʋm-tʋmdbã* tɩ zĩnda b tẽnsẽ wã, tɩ Israyɛll neb a taabã fãa sẽn ketã* me tɩ zĩnd b tẽnsẽ.+

3 Kiuug a yopoe-n-soabã+ sẽn wa n ta tɩ Israyɛll nebã* be b tẽnsẽ wã, b zemsa taab noor a yembr n tigim taab Zerizalɛm. 2 A Yehozadak biig a Yesuwa+ ne a maan-kʋʋd-taasã, n paas a Seyatiyɛll+ biig a Zorobabɛll+ ne a ba-biisã yikame n me Israyɛll Wẽnnaamã tẽn-kugrã, tɩ b na n maand maand sẽn yõogd bugum a zugu, wa b sẽn gʋls Wẽnnaam dao a Moyiiz Tõogã+ pʋgẽ wã.

3 Dẽ, b maana tẽn-kugrã zĩig ning a sẽn da be pĩndã, baa b sẽn da zoet soolem nins sẽn gũbg bãmbã nebã.+ B sɩngame n maand maand sẽn yõogd bugum tẽn-kugrã zug n kõt a Zeova. Yaa yibeoog la zaabr maand sẽn yõogd bugmã.+ 4 Rẽ poore, b maana Zãn tigrã wa sẽn zems b sẽn gʋlsã.+ Daar ne a to fãa, b ra maanda maand sẽn yõogd bugum, tɩ zemsd sõor nins b sẽn segd n kõ daar fãa wã.+ 5 Wakat kãng tɛka, b ra maanda wakat fãa maoong sẽn yõogd bugmã,+ ki-paalã maandã,+ la tig nins b sẽn maand a Zeova yĩngã maando,+ n paas maand ned ning fãa sẽn kõ a Zeova yamleoog kũun+ yĩnga. 6 Kiuug a yopoe-n-soabã+ pipi daarã tɛka, b sɩngame n maand maand sẽn yõogd bugum n kõt a Zeova, baa ne b sẽn da nan pa yẽbg a Zeova roogã.

7 B kõo kug-pɛɛsdbã+ ne nug-tʋʋm dãmbã+ ligdi, la b kõ Sɩdõ ne Tɩɩr nebã rɩɩbo, rãam, la kaam b sẽn tall sɛɛdr ra-bɛd n tũ mogrã n yi Libã n wa Zope,+ wa sẽn zems noor ning Pɛrs rĩm a Sirus+ sẽn kõ wã yĩnga.

8 B sẽn wa Wẽnnaam doogẽ wã Zerizalɛmmã poore, yʋʋm a yiib-n-soabã kiuug a yiib-n-soabã pʋgẽ, a Seyatiyɛll biig a Zorobabɛlle, a Yehozadak biig a Yesuwa ne b ba-biis a taabã, maan-kʋʋdbã ne Levi buudã nebã, la neb nins fãa sẽn yi yembd+ n wa Zerizalɛmmã sɩnga tʋʋmdã. B yãka Levi buudã neb nins yʋʋm sẽn zems pisi bɩ sẽn yɩɩd rẽ wã, tɩ b na n ges a Zeova roogã tʋʋmã yelle. 9 Dẽ, a Yesuwa, a kambã la a ba-biisã, ne a Kadmiyɛll la a kambã sẽn yaa a Zida yagensã, n paas a Henadaad+ yagensã, b kambã ne b zakã neb sẽn yaa Levi buudã nebã naaga taab n na n ges neb nins sẽn tʋmd Wẽnnaam doogã tʋʋmã yelle.

10 Metbã sẽn wa n yẽbg a Zeova roogã,+ maan-kʋʋdbã yeelga b tʋʋmã futu, n dɩk tãntãado,+ t’a Azaf kambã sẽn yaa Levi buudã nebã rɩk waase, tɩ b yik n yaas n pẽg a Zeova wa sẽn zems Israyɛll rĩm a Davɩɩd sẽn wilgã.+ 11 B ra yɩɩndame la b reesdẽ,+ n pẽgd a Zeova la b pʋʋsd-a barka, n yetẽ: “Bala a yaa sõma. A nonglmã Israyɛll yĩngã paada wakat fãa.”+ Dẽ, nin-buiidã fãa zẽka b koees n pẽg a Zeova, b sẽn yẽbg a Zeova roogã yĩnga. 12 Maan-kʋʋdb wʋsgo, Levi buudã nebã, la buudã rot taoor dãmba, rat n yeel tɩ nin-kẽemb nins sẽn yã pĩnd roogã+ zẽka b koees n yãbe, b sẽn wa n yã roogã yẽbgrã. Wakat kãnga, neb a taab me ra zẽkda b koees n kaasd ne sũ-noogo.+ 13 Nebã ra pa tõe n bãng sũ-noogã rãamd n bak ne yãbrã rãamd ye. Bala nin-buiidã ra kaasda ne b pãng fãa, hal tɩ rãamdã zãagd zĩig wʋsgo.

4 Zida ne Bẽnzame bɛɛbã+ sẽn wa n wʋm tɩ sẽn yi-b yembd n wa wã+ meta roog n na n kõ Israyɛll Wẽnnaam a Zeova wã, 2 tao-tao bala b kẽnga a Zorobabɛll ne buudã rot taoor dãmb nengẽ, n tɩ yeel-b yaa: “Bɩ y bas tɩ d naag yãmb n me, bala tõnd me waoogda* yãmb Wẽnnaamã,+ la d maand maand n kõt-a, sẽn sɩng ne Asiiri rĩm a Esar-hadon+ sẽn tall tõnd n wa ka wã naam wakate.”+ 3 La a Zorobabɛll ne a Yesuwa, la Israyɛll buud toor-toorã rot taoor dãmb yeela bãmb yaa: “Yãmb pa tar sor n na n naag tõnd n me roog n kõ tõnd Wẽnnaamã ye.+ Yaa tõnd bal n na n me roogã n kõ Israyɛll Wẽnnaam a Zeova, wa Pɛrs rĩm a Sirus sẽn yeel tõndã.”+

4 Dẽ, tẽngã nebã ra komsda Zida nebã raood wakat fãa la b kẽesd-b rabeem, sẽn na yɩl tɩ b bas meebã.+ 5 Bãmb yaoo sagendba, sẽn na yɩl tɩ b kɩt tɩ Zida nebã magbã ra yãk neng ye.+ B maana woto Pɛrs rĩm a Sirus naamã sasa n tãag Pɛrs rĩm a Daryuus+ naamã wakate. 6 Rĩm a Asuerus naamã sɩngrẽ, b gʋlsa sebr n dõd Zida ne Zerizalɛm nebã. 7 La Pɛrs rĩm a Artazɛgzɛs naamã wakate, a Bislam ne a Mitredat la a Tabeyɛll ne a tʋmd-n-taasã gʋlsa sebr n tool rĩm a Artazɛgzɛse. B lebga sebrã ne Arameyẽ buud-gomdã,+ n gʋls-a ne Arameyẽ gʋls-biisi.*

8 * A Rehum sẽn yaa goosneema wã nin-kãsengã, ne a Simsayi sẽn yaa gʋlsdã gʋlsa sebr n tool rĩm a Artazɛgzɛs n dõd Zerizalɛm nebã. Ad b sẽn yeel sebrã pʋgẽ: 9 (Sebrã toaandb yaa a Rehum sẽn yaa goosneema wã nin-kãsengã, a Simsayi sẽn yaa gʋlsdã ne b tʋmd-n-taasã, la bʋ-kaoodbã ne guvɛrneer-dãmb a taabã, seb-gʋlsdbã, Erɛk+ nebã, Babilon nebã, sẽn be-b Suuz+ tẽngã, rat n yeel tɩ Elam nebã,+ 10 la buud a taabã neb nins nin-kãseng a Asnapaar sẽn tar ziirã sẽn tall n kẽng yembdo, n tɩ zĩndg Samari tẽnsẽ wã+ la soolem a taabã sẽn be Kʋɩlgã* rʋʋndã. 11 Ad sebrã b sẽn tool-a wã goama.)

“Rĩm a Artazɛgzɛse, yaa y tʋm-tʋmdbã, rap nins sẽn be Kʋɩlgã rʋʋndã n toond sebrã: 12 Bɩ rĩmã bãng tɩ Zʋɩf-rãmb nins sẽn yi yãmb nengẽ n wa tõnd nengẽ wã taa Zerizalɛm. B lebs n meta tẽngã sẽn yaa tõatb la nin-wẽns tẽngã. B lebs n meta lalsã,+ la b manegd tẽngã yẽbgrã. 13 Bɩ rĩmã bãng tɩ b sã n lebs n me tẽngã ne a lalsã n sa, b pa na n yao lampo, fadgo,*+ la sor yaood ye. La woto na n kɩtame tɩ rĩm-dãmbã bõne. 14 Sẽn mik tɩ tõnd yaoodã yita na-yirã,* pa zems tɩ d getẽ tɩ b wẽgd rĩmã ye. Yaa rẽ n so tɩ d tool sebrã n na n wilg rĩmã, 15 sẽn na yɩl tɩ y vaees y yaab-rãmbã kibay sebr pʋgẽ.+ Yãmb na n yãa kibayã sebr pʋgẽ tɩ tẽngã nebã yaa tõatba, n namsd rĩm-dãmbã la soolem toor-toor neba, la tɩ neb n da be soolmã pʋgẽ n wat ne gudgr hal pĩndã. Yaa rẽ n wa ne tẽngã sãoongã.+ 16 Tõnd wilgda rĩmã tɩ y sã n bas tɩ b lebs n me tẽng-kãngã la b maneg a lalsã n baase, yãmb pa na n le tõog n soog* soolmã sẽn be Kʋɩlgã rʋʋndã ye.”+

17 Rĩmã tʋma koɛɛg tɩ b tɩ taas a Rehum sẽn yaa goosneema wã nin-kãsengã, la a Simsayi sẽn yaa gʋlsdã ne b tʋmd-n-taas a taabã sẽn da be Samari wã, ne soolem ning sẽn be Kʋɩlgã rʋʋndã neb a taabã, n yeele:

“Mam pʋʋsda yãmba! 18 B karma sebr ning yãmb sẽn tool tõndã neer* mam taoore. 19 M kõo noor tɩ b maan vaeesgo, la b yãame tɩ hal pĩndã, neb n da kɩɩsd rĩm-dãmbã tẽngã pʋgẽ, la tɩ tõatb la tẽn-dãmbdb n da be be.+ 20 Rĩm-dãmb sẽn tall pãng n da so Zerizalɛm, n dɩt naam Kʋɩlgã rʋʋndẽ soolmã tõr zugu, tɩ nebã ra yaood-b lampo, fadgo,* ne sor yaoodo. 21 Woto, bɩ y yiis noor n kɩt tɩ nin-kãensã bas tʋʋmdã, n da lebs n me tẽngã n tãag mam sẽn na n kõ noore. 22 Gũus-y neer n da reem yel-kãng wɛɛngẽ, tɩ rĩmã yɛlã ra wa sãam n paas ye.”+

23 B sẽn karem rĩm a Artazɛgzɛs sebrã a Rehum ne a Simsayi sẽn yaa gʋlsdã ne b tʋmd-n-taasã taoorã, tao-tao bala b kẽnga Zʋɩf-rãmbã nengẽ Zerizalɛm n modg-b tɩ b bas tʋʋmdã. 24 Yɩɩ wakat kãng la b bas Wẽnnaam doogã sẽn da be Zerizalɛmmã meebo. B kell n basa meebã n tãag Pɛrs rĩm a Daryuus+ naamã yʋʋm a yiib-n-soabã.

5 No-rɛɛs a Aaze+ ne a Ido+ yageng a Zakari+ sẽn yaa no-rɛɛsã togsa bãngr-goam Zʋɩf-rãmbã sẽn da be Zida ne Zerizalɛmmã wɛɛngẽ, Israyɛll Wẽnnaamã sẽn da be ne-bã yʋʋr yĩnga. 2 Rẽ la a Seyatiyɛll biig a Zorobabɛll+ ne a Yehozadak biig a Yesuwa+ lebs n sɩng Wẽnnaam doogã+ sẽn da be Zerizalɛmmã meebo. La Wẽnnaam no-rɛɛsdbã ra bee ne-ba, n teend-ba.+ 3 Wakat kãnga, a Tatenayi sẽn yaa soolem ning sẽn be Kʋɩlgã* rʋʋndã guvɛrneerã, ne a Setar-bozenayi n paas b tʋmd-n-taasã waa b nengẽ, n sok-b yaa: “Ãnda n kõ yãmb noor tɩ y me ro-kãngã, la y lugl raadã b zĩisẽ?” 4 B paasame yaa: “Togs-y tõnd neb nins sẽn met ro-kãngã yʋya.” 5 Wẽnnaam sẽn da be ne* Zʋɩf-rãmbã kãsem-dãmbã+ yĩnga, a Tatenayi ne a poorẽ dãmbã pa tõog n gɩdg-b ye. La b gʋlsa sebr n tool a Daryuusi, n gũ t’a gʋls sebr n leok-b yel-kãng wɛɛngẽ.

6 Ad sebr ning a Tatenayi sẽn yaa soolem ning sẽn be Kʋɩlgã rʋʋndã guvɛrneerã, ne a Setar-bozenayi, n paas b tʋmd-n-taasã sẽn yaa soolem ning sẽn be Kʋɩlgã rʋʋndã guvɛrneer-dãmb a taabã sẽn tool rĩm a Daryuusã goama. 7 B gʋls-a lame n wilg bũmb ning b sẽn yã wã. B yeelame yaa:

“Sebr b sẽn tool rĩm a Daryuusi:

“Bɩ laafɩ zĩnd ne yãmba! 8 Bɩ rĩmã bãng tɩ tõnd kẽnga Zida soolmẽ wã, Wẽnnaam sẽn yaa kãsengã roogẽ wã n mik tɩ b meta roogã ne kug-bɛda, la b ningd ra-bɛd a lalsẽ wã. Nebã tʋmda ne yẽesem, tɩ tʋʋmdã kẽngd taoor b sẽn tʋmd wʋsgã yĩnga. 9 Dẽ, tõnd soka b kãsem-dãmbã yaa: ‘Ãnda n kõ yãmb noor tɩ y me ro-kãngã, la y lugl raadã b zĩisẽ?’+ 10 Sẽn paase, tõnd soka bãmb b yʋyã sẽn na yɩl n gʋlse, tɩ y bãng neb nins sẽn lʋɩt tʋʋmdã taoorã.

11 “Ad b sẽn leok tõnd to-to: ‘Tõnd yaa saasã la tẽngã Wẽnnaamã tʋm-tʋmdba. Tõnd lebg n meta roog ning b sẽn da me yʋʋm wʋsg sẽn loogã. Yaa roog ning Israyɛll rĩm-kãseng sẽn da me wã.+ 12 La tõnd yaab-rãmbã sẽn puug saasã Wẽnnaamã+ sũurã yĩnga, a ning-b-la Babilon rĩm a Nebukadnezaar+ sẽn yaa Kalde nedã nugẽ, t’a sãam ro-kãngã,+ la a yõg nin-buiidã n kẽng yembd Babilonne.+ 13 Baa ne rẽ, Babilon rĩm a Sirus naamã pipi yʋʋmdã, a kõo noor tɩ b na n lebs n me Wẽnnaam doogã.+ 14 Sẽn paase, rĩm a Sirus yiisa Wẽnnaam doogã sãnemã la wanzuri wã teed sẽn da be Babilon wẽnd-doogẽ wã, teed nins a Nebukadnezaar sẽn da wʋk Zerizalɛm wẽnd-doogẽ wã n tall n wa Babilon wẽnd-doogẽ wã.+ B wʋka te-kãens n kõ rao yʋʋr sẽn boond t’a Sesbazaare,*+ a Sirus sẽn da yãk t’a yaa guvɛrneerã.+ 15 A Sirus yeel-a lame yaa: “Wʋk te-kãensã n kẽng n tɩ bĩng Zerizalɛm wẽnd-doogẽ wã. La bɩ b lebs n me Wẽnnaam doogã a pĩnd zĩigẽ wã.”+ 16 Dẽ, Sesbazaar-kãng waame, n yẽbg Wẽnnaam doogã+ sẽn be Zerizalɛmmã. B lebs n sɩnga a meeb wakat kãng tɛk n tãag masã, la ket n nan pa sa ye.’+

17 “Sã n taa rĩmã yam, bɩ a kɩt tɩ b vaees Babilon rĩm-dãmbã laog bĩngr zĩigẽ, n ges rĩm a Sirus sã n da kõo noor sẽn na yɩl tɩ b lebs n me Wẽnnaam doogã sẽn be Zerizalɛmmã,+ la b tool tõnd rĩmã sẽn na n yeel bũmb ning yel-kãng wɛɛngẽ wã.”

6 Yaa rẽ poor la rĩm a Daryuus kõ noore, tɩ b vaees Babilon roog ning pʋgẽ b sẽn bĩngd bõn-sõma wã la seb-kʋdã.* 2 La b yãa seb-pindem Ɛkbatan sẽn be Medi soolmẽ wã tãn-soben-doogã pʋgẽ. Ad goam nins b sẽn da gʋls seb-pindmã pʋgẽ:

3 “Rĩm a Sirus naamã pipi yʋʋmdã, a yiisa noor Wẽnnaam doogã sẽn be Zerizalɛmmã wɛɛngẽ,+ n yeele: ‘Bɩ b lebs n me roogã t’a yɩ zĩig ning b sẽn segd n maand maandã, la b yẽbg-a zĩig ning a sẽn da be wã. A zãntlmã segd n yɩɩ kãntɩɩg pis-yoobe,* t’a yalmã yɩ kãntɩɩg pis-yoobe.+ 4 A segd n talla kug-bɛd ruls a tãabo, la ra-bɛd rulg a yembre.+ La bɩ b yãk ligd rĩmã koglgẽ n yao bõn-kãens yĩnga.+ 5 Sẽn paase, bɩ b tall Wẽnnaam doogã sãnemã ne wanzuri wã teed a Nebukadnezaar sẽn da wʋk Zerizalɛm n tall n wa Babilonnã,+ n tɩ bĩng-b b zĩigẽ wã Wẽnnaam doogã pʋgẽ.’+

6 “Foom a Tatenayi sẽn yaa soolem ning sẽn be Kʋɩlgã* rʋʋndã guvɛrneerã, la a Setar-bozenayi ne y tʋmd-n-taasã sẽn yaa soolem ning sẽn be Kʋɩlgã rʋʋndã guvɛrneer-dãmb a taabã,+ yãk-y y noor be. 7 Ra gɩdg-y Wẽnnaam doogã tʋʋmd ye. Zʋɩf-rãmbã guvɛrneer ne Zʋɩf-rãmbã kãsem-dãmbã na n lebs n mee Wẽnnaam doogã a pĩnd zĩigẽ wã. 8 Sẽn paase, mam yiisa noor n na n wilg bũmb ning yãmb sẽn segd n maan n kõ Zʋɩf-rãmbã kãsem-dãmbã Wẽnnaam doogã meeb yĩnga: Yãk-y ligd rĩmã koglg pʋgẽ,+ rat n yeel tɩ lampo wã b sẽn deesd soolem ning sẽn be Kʋɩlgã rʋʋndã n yao nin-kãensã tao-tao, sẽn na yɩl tɩ b kell n kẽng taoor ne tʋʋmdã n da bas ye.+ 9 La sẽn yaa bũmb ning fãa la maan-kʋʋdbã sẽn be Zerizalɛmmã yeel tɩ b ratame, yãmb segd n kõt-b-la bõn-kãens daar ne a to fãa n da vaal ye. Tɩ yaa lol-poala,+ pe-raado,+ la pe-bi+ sẽn na n maan maand sẽn yõogd bugum n kõ saasẽ Wẽnnaamã, wall bɩle,+ yamsem,+ divẽ+ la kaam,+ 10 sẽn na yɩl tɩ b ket n maand maand sẽn tat saasẽ Wẽnnaamã yam, la b pʋʋsdẽ tɩ rĩmã ne a kambã vɩɩmd n kaoose.+ 11 Mam leb n yiisa noor n wilg tɩ ned sã n kɩɩs mam noorã, b na n fooga a roogã ra-bedre, n sẽb-a raoogã zugu,* la b kɩt t’a zakã lebg nebã fãa we-kɛɛng zĩiga,* a beegrã yĩnga. 12 Rĩm wall ned ning fãa sẽn na n zẽk a nug n kɩɩs no-kãngã n sãam Wẽnnaam doogã sẽn be Zerizalɛmmã, bɩ Wẽnnaam ning sẽn kɩt t’a yʋʋrã be beenẽ wã+ sãam a soabã. Yaa maam a Daryuus n kõ no-kãngã. Bɩ b tũ-a tao-tao.”

13 Dẽ, a Tatenayi sẽn yaa soolem ning sẽn be Kʋɩlgã rʋʋndã guvɛrneerã, la a Setar-bozenayi+ ne b tʋmd-n-taasã tũu bũmb nins fãa rĩm a Daryuus sẽn yeelã tao-tao. 14 No-rɛɛs a Aaze+ ne a Ido yageng a Zakari+ bãngr-goamã kenga Zʋɩf-rãmbã kãsem-dãmbã raoodo, tɩ b ra ket n met roogã,+ tɩ tʋʋmdã kẽngd taoore. B mee roogã n baase, wa Israyɛll Wẽnnaamã sẽn yeelã,+ la wa a Sirus+ ne a Daryuus+ la Pɛrs rĩm a Artazɛgzɛs+ sẽn kõ noorã. 15 B mee roogã n sa Adaar* kiuugã rasem a tãab-n-soabã, rĩm a Daryuus naamã yʋʋm a yoob-n-soabã.

16 Rẽ poore, Israyɛll nebã, maan-kʋʋdbã, Levi buudã neb+ la neb a taabã sẽn yi yembd n lebg n wa wã maana tigr ne sũ-noogo, Wẽnnaam doogã pakr yĩnga. 17 B waa ne lols koabga, pe-raad kobs-yi la pe-bi kobs-naas Wẽnnaam doogã pakr yĩnga, la b wa ne boees piig la a yiib wa sẽn zems Israyɛll buudã sõore,+ tɩ yɩ yel-wẽnd maoong Israyɛll nebã fãa yĩnga. 18 B zĩniga maan-kʋʋdbã ned kam fãa a sullẽ, la b zĩnig Levi buudã ned fãa a buud sullẽ Wẽnnaam tʋʋmdã Zerizalɛmmã yĩnga,+ wa b sẽn gʋls a Moyiiz sebrã pʋgẽ wã.+

19 Neb nins sẽn yi yembdã maana Pakã, pipi kiuugã rasem piig la a naasã.+ 20 Maan-kʋʋdbã ne Levi buudã neb fãa gill yɩlga b mense,+ tɩ b fãa lebg yɩlma. B kodga Pakã maoong neb nins fãa sẽn yi yembd n lebg n wa wã yĩnga, b maan-kʋʋd-taasã yĩnga, la b mensã yĩnga. 21 Dẽ, Israyɛll neb nins fãa sẽn yi yembd n wa wã rɩɩme, n paas ned ning fãa sẽn wa n naag-ba, n lak a meng ne soolmã buud a taabã tʋʋm-dẽgdã n waoogd* Israyɛll Wẽnnaam a Zeova wã.+ 22 B leb n maana Bur sẽn pa ning rabɩll tigrã+ rasem a yopoe, bala a Zeova kõ-b-la sũ-noog wʋsgo, la a kɩt tɩ Asiiri rĩmã sũur yɩ noog ne-b+ t’a sõng-ba,* Israyɛll Wẽnnaamã sẽn yaa Wẽnnaam sɩd-sɩdã roogã meeb pʋgẽ.

7 Bõn-kãensã poore, Pɛrs rĩm a Artazɛgzɛs+ naamã sasa, a Ɛsdras+ lebg n waame. A Ɛsdras* yaa a Seraya+ biiga, t’a Seraya yaa a Azariya biiga, t’a Azariya yaa a Hilkiya+ biiga, 2 t’a Hilkiya yaa a Salum biiga, t’a Salum yaa a Zadok biiga, t’a Zadok yaa a Ayituub biiga, 3 t’a Ayituub yaa a Amariya biiga, t’a Amariya yaa a Azariya+ biiga, t’a Azariya yaa a Merayot biiga, 4 t’a Merayot yaa a Zeraya biiga, t’a Zeraya yaa a Uuzi biiga, t’a Uuzi yaa a Buki biiga, 5 t’a Buki yaa a Abisuwa biiga, t’a Abisuwa yaa a Fineyaas+ biiga, t’a Fineyaas yaa a Eleazaar+ biiga, t’a Eleazaar yaa maan-kʋʋdbã taoor soab a Aarõ+ biiga. 6 A Ɛsdras yii Babilon n wa. A ra yaa seb-gʋlsd sẽn mi a Moyiiz Tõogã+ Israyɛll Wẽnnaam a Zeova sẽn da kõ wã sõma. Rĩmã kõ-a-la bũmb ning fãa a sẽn kosã, bala a Zeova sẽn yaa a Wẽnnaamã ra bee ne-a.*

7 Israyɛll neb kẽere, maan-kʋʋdbã, Levi buudã nebã,+ yɩɩn-yɩɩndbã,+ rigno-gũudbã+ la wẽnd-doogã tʋm-tʋmdb*+ kẽnga Zerizalɛm, rĩm a Artazɛgzɛs naamã yʋʋm a yopoe-n-soabã. 8 A Ɛsdras waa Zerizalɛm kiuug a nu soabã, rĩmã naamã yʋʋm a yopoe-n-soabã sasa. 9 Pipi kiuugã pipi daarã, a yii Babilon n tɩ ta Zerizalɛm kiuug a nu soabã pipi daarã, bala a Wẽnnaamã sẽn yaa sõmblem soabã ra bee ne-a.*+ 10 A Ɛsdras ra yãka yam a sũur pʋgẽ* n na n vaees a Zeova Tõogã la a tũ-a,+ la a zãms nebã Tõogã noyã la a goamã Israyɛlle.+

11 Rĩm a Artazɛgzɛs gʋlsa sebr n kõ maan-kʋʋd a Ɛsdras sẽn yaa seb-gʋlsda, la sẽn mi a Zeova noyã la a tõodã a sẽn kõ Israyɛll nebã sõma wã. Ad sebrã goama:

12 * “Yaa a Artazɛgzɛs+ sẽn yaa rĩm-dãmb rĩmã n kõ maan-kʋʋd a Ɛsdras sẽn yaa saasã Wẽnnaamã Tõogã seb-gʋlsdã seb-kãngã: Bɩ laafɩ hakɩɩk zĩnd ne foo. 13 Mam kõo noor tɩ Israyɛll neb nins fãa sẽn be mam soolmẽ wã, n paas b maan-kʋʋdbã ne Levi buudã neb nins sẽn dat n tũ foo n kẽng Zerizalɛmmã looge.+ 14 Yaa rĩmã ne a sagendb a yopoe wã n tʋmd foo, tɩ f tɩ vaees n ges b sã n tũuda fo Wẽnnaamã Tõogã sẽn be fo nengẽ wã* Zida la Zerizalɛm. 15 Bɩ f zã wanzuri wã ne sãnemã rĩmã ne a sagendbã sẽn kõ Israyɛll Wẽnnaamã ne yamleoogã, soab ning roog sẽn be Zerizalɛmmã, 16 la wanzuri wã ne sãnemã fãa fo sẽn deegd Babilon soolmã fãa pʋgẽ wã, ne kũunã nin-buiidã ne maan-kʋʋdbã sẽn kõt ne yamleoog b Wẽnnaamã roog sẽn be Zerizalɛmmã yĩngã.+ 17 Fo segd n talla ligd-kãngã tao-tao n da lolse,+ pe-raado,+ pe-bi,+ ne kood+ la divẽ+ b sẽn na n paas n maan maandã. Fo segd n tall-b lame n tɩ maan maoong yãmb Wẽnnaamã roogã sẽn be Zerizalɛmmã tẽn-kugrã zugu.

18 “Foo ne f saam-biisã tõe n talla wanzuri wã ne sãnemã sẽn kellã n maan bũmb ning fãa y sẽn dat n maane, wa sẽn zems yãmb Wẽnnaamã raabo. 19 La fo segd n talla teed nins fãa b sẽn kõ foo yãmb Wẽnnaamã roogã tʋʋm yĩngã, n tɩ bĩng Wẽnnaam taoor Zerizalɛm.+ 20 Bũmb nins fãa sẽn ket tɩ yaa tɩlɛ tɩ y kõ yãmb Wẽnnaamã roog yĩngã, b na n yãka rẽ rĩmã laog bĩngr zĩigẽ+ n kõ-yã.

21 “Maam a rĩm a Artazɛgzɛs kõo arzɛgs bĩngdbã fãa sẽn be soolem ning sẽn be Kʋɩlgã* rʋʋndẽ wã noore, tɩ bũmb ning fãa maan-kʋʋd a Ɛsdras+ sẽn yaa saasã Wẽnnaamã Tõogã seb-gʋlsdã sẽn na n kos yãmbã, bɩ y kõ-a tao-tao. 22 Yãmb tõe n kõ-a lame n tãag wanzuri talã* koabga, bɩle koor* koabga, divẽ bat* koabga,+ kaam bat koabga.+ La yamsmã+ pa segd n tall koak ye. 23 Bɩ y maan saasã Wẽnnaamã sẽn yeelã fãa ne yẽesem, saasã Wẽnnaamã+ roogã yĩnga, tɩ sũ-puugr da wa rĩmã soolem ne a kambã zug ye.+ 24 Sẽn paase, mam keoogda yãmb tɩ y pa tar sor n na n deeg lampo, fadgo,*+ la sor yaood maan-kʋʋdbã ne Levi buudã nebã, sẽn wẽed-b yʋʋm-teedã,+ rigno-gũudbã, wẽnd-doogã tʋm-tʋmdbã,*+ la Wẽnnaam doogã tʋm-tʋmdb a taabã nengẽ ye.

25 “La foom a Ɛsdrase, tik yam ning fo Wẽnnaamã sẽn kõ foomã,* n yãk bʋ-kaood-sõngdb ne bʋ-kaoodba, tɩ b bʋʋd soolem ning sẽn be Kʋɩlgã rʋʋndã neba, neb nins fãa sẽn mi yãmb Wẽnnaamã tõodã. La ned sã n be b sʋkã n pa mi tõodã, yãmb segd n zãms-a lame.+ 26 Ned ning fãa sẽn pa tũ yãmb Wẽnnaamã Tõogã la rĩmã noyã, b segd n sɩbg-a-la zĩig pʋgẽ. B tõe n kʋ-a lame, bɩ n dig-a n yiis soolmẽ wã, wall b rogl-a yaoodo, pa rẽ bɩ n kẽes-a bãens roogo.”

27 Bɩ tõnd yaab-rãmbã Wẽnnaam a Zeova paam pẽgre, soab ning sẽn kɩt tɩ rĩmã bãng a sũurẽ tɩ b segd n nagsa a Zeova roogã sẽn be Zerizalɛmmã!+ 28 A maana maam neer rĩmã+ ne a sagendbã+ taoore, la rĩmã nanambsã fãa sẽn tar tõogã taoore. Rẽ n so tɩ m tall raoodo,* bala mam Wẽnnaam a Zeova sẽn yaa sõmblem soabã ra bee ne maam. Mam tigma Israyɛll taoor dãmbã tɩ b tũ maam n kẽng Zerizalɛm.

8 Ad buudã rot taoor dãmb yʋy b sẽn gʋlse, wa sẽn zems b buudu. Yaa neb nins sẽn tũ maam n yi Babilonne, rĩm a Artazɛgzɛs+ naamã sasa wã: 2 A Fineyaas+ yagensã sʋk yaa a Gɛrsom. A Itamaar+ yagensã sʋk yaa a Dãniyɛlle. A Davɩɩd yagensã sʋk yaa a Hatusi. 3 A Paros yageng a Sekaniya yagensã sʋk yaa a Zakari. Rap koabg la pis-nu n naag-a, tɩ b gʋls b yʋyã wa sẽn zems b roto. 4 A Pahat-mowaab+ yagensã sʋk yaa a Zeraya biig a Eliyoenayi, n paas rap kobs-yi. 5 A Zatu+ yagensã sʋk yaa a Yahaziyɛll biig a Sekaniya, n paas rap kobs-tã. 6 A Adin+ yagensã sʋk yaa a Zonatã biig a Ebɛɛde, n paas rap pis-nu. 7 A Elam+ yagensã sʋk yaa a Ataliya biig a Yesaya, n paas rap pis-yopoe. 8 A Sefatiya+ yagensã sʋk yaa a Mikayɛll biig a Zebadiya, n paas rap pis-nii. 9 A Zowaab yagensã sʋk yaa a Yeyiyɛll biig a Abdiyaase, n paas rap kobs-yi la piig la a nii. 10 A Bani yagensã sʋk yaa a Zosifiya biig a Selomiti, n paas rap koabg la pis-yoobe. 11 A Bebayi+ yagensã sʋk yaa a Bebayi yageng a Zakari, n paas rap pisi la a nii. 12 A Azgaad+ yagensã sʋk yaa a Hakatan biig a Zohananne, n paas rap koabg la piiga. 13 Yaoolem dãmbã yaa a Elifelɛte, a Yeyɛlle, la a Semaya sẽn yaa a Adonikam+ yagensã, n paas rap pis-yoobe, 14 ne a Bigvayi+ yagens a Utayi ne a Zabuudi, n paas rap pis-yopoe.

15 Mam tigma bãmb kʋɩlg ning sẽn zoet n teesd Ahava+ wã noore. Tõnd tilga d sik-zĩigã beenẽ rasem a tãabo. La mam gẽesa nebã la maan-kʋʋdbã sʋka, n mik tɩ Levi buudã ned baa a yembr kae ye. 16 Dẽ, mam tʋmame tɩ b tɩ bool a Eliyezɛɛre, a Ariyɛlle, a Semaya, a Ɛlnatanne, a Yariibe, a Ɛlnatanne, a Natã, a Zakari la a Mesulam sẽn yaa taoor dãmbã, ne a Zoyariib la a Ɛlnatan sẽn yaa karen-saam-dãmbã. 17 La mam kõ-b-la noor a Ido wɛɛngẽ. Yẽ yaa zĩig ning b sẽn boond tɩ Kasifiya wã taoor soaba. Mam yeel-b lame tɩ b yeel a Ido ne a saam-biisã sẽn yaa wẽnd-doogã tʋm-tʋmdb* nins sẽn be Kasifiya wã tɩ b tall tʋm-tʋmdb n wa kõ tõndo, tõnd Wẽnnaamã roogã tʋʋm yĩnga. 18 Sẽn mik tɩ tõnd Wẽnnaamã sẽn yaa sõmblem soabã ra bee ne-dã,* b talla rao sẽn tar yam n wa kõ tõndo. Yaa a Israyɛll biig a Levi yageng a Mali+ b sẽn boond t’a Serebiya+ wã, ne a kambã la a ba-biisã. B sõorã yaa rap piig la a nii, 19 n paas a Hasabiya, ne Merari buudã ned+ a Yesaya la a ba-biisã ne b kambã. B sõorã yaa rap pisi. 20 Wẽnd-doogã tʋm-tʋmdb* nins a Davɩɩd ne nanambsã sẽn kõ tɩ b na n tʋmd ne Levi buudã neb sʋkã, neb kobs-yi la pisi n da naage. B ra gʋlsa b fãa yʋya.

21 Rẽ poore, mam kɩtame tɩ nebã loe noor Ahava kʋɩlgã noore, sẽn na yɩl n sik d mens d Wẽnnaamã taoore, la d bao t’a wilg-d sor d so-taokã sasa, la a kogl tõnd ne d kambã la d paoongã fãa. 22 Mam da zoeta yãnd n pa rat n kos rĩmã t’a kõ tõnd sodaas ne wed-rʋʋdb tɩ b kogl tõnd ne d bɛɛbã sorã zug ye. Bala tõnd da yeela rĩmã yaa: “Tõnd Wẽnnaamã sẽn yaa sõmblem soabã bee ne neb nins sẽn baood-a wã.+ La a zabda ne neb nins fãa sẽn basd-a wã ne pãnga, la ne sũ-puugri.”+ 23 Dẽ, tõnd loee noor n kos d Wẽnnaamã t’a wilg-d sor d so-toakã sasa. La a kelga tõnd kosgã.+

24 Mam yãka maan-kʋʋdb taoor dãmb piig la a yiibu. Yaa a Serebiya ne a Hasabiya,+ n paas b ba-biisã sʋk neb piiga. 25 Rẽ poore, mam maka wanzuri wã ne sãnemã la teedã zɩslem n dɩk n kõ-ba. Yaa kũun nins rĩmã ne a sagendbã n paas a nanambsã la Israyɛll neb nins fãa sẽn da be be wã sẽn kõ tõnd Wẽnnaamã roogã yĩngã.+ 26 Mam maka wanzuri talã* kobs-yoob la pis-nu n kõ-ba, n paas wanzuri teed bãmb koabg sẽn zems talã a yiibu, sãnem talã koabga, 27 sãnem la-bõones pisi sẽn zems darik* tusri, ne zũud halaal teed a yiib sẽn pɩnda, n yaa neer wa sãnem.

28 La mam yeel-b lame yaa: “Yãmb yaa sõng a Zeova yĩnga.+ Teedã me yaa sõamyã. Wanzuri wã ne sãnemã yaa yamleoog kũun b sẽn kõ yãmb yaab-rãmbã Wẽnnaam a Zeova. 29 Zã-y bõn-kãensã sõma, hal n wa mak-b a Zeova roogã ro-pʋsẽ wã,* maan-kʋʋdbã taoor dãmb ne Levi buudã neb taoore, n paas Israyɛll buudã rot taoor dãmb nanambsã sẽn be Zerizalɛmmã taoore.”+ 30 La maan-kʋʋdbã ne Levi buudã neb reega wanzuri wã ne sãnemã la teedã b sẽn mak n kõ-bã, n na n tall n kẽng tõnd Wẽnnaamã roogẽ Zerizalɛm.

31 Tõnd wa n yii Ahava+ kʋɩlgã noor pipi kiuugã rasem piig la a yiibã+ n na n kẽng Zerizalɛm. La tõnd Wẽnnaamã ra bee ne-do. A kogla tõnd sorã zug ne bɛɛbã la fãadbã. 32 Tõnd taa Zerizalɛm+ n zĩnd beenẽ rasem a tãabo. 33 Rasem a naas-n-soabã, tõnd maka wanzuri wã ne sãnemã la teedã tõnd Wẽnnaamã roogẽ+ n kõ maan-kʋʋd a Uuri biig a Meremote.+ A Fineyaas biig a Eleazaar ra bee ne-a, t’a Yesuwa biig a Zozabaad+ sẽn yaa Levi buudã nedã n paas a Nowadiya ne a Binuwi+ me ra be ne-ba. 34 Tõnd sõda bũmb fãa, la d mak b zɩslem n gʋls n bĩngi. 35 Neb nins sẽn da yi yembd n wa wã maana maand sẽn yõogd bugum n kõ Israyɛll Wẽnnaamã: Yɩɩ lols piig la a yiib+ Israyɛll nebã fãa yĩnga, pe-raad pis-wɛ la a yoobe,+ pe-bi pis-yopoe la a yopoe sẽn yaa raado, la boees piig la a yiibu,+ yel-wẽnd maoong yĩnga. Woto fãa yɩɩ maoong b sẽn yõog bugum a Zeova yĩnga.+

36 Rẽ poore, tõnd dɩka rĩmã noorã+ n kõ soolmã guvɛrneer-dãmbã taoor dãmb ne soolem ning sẽn be Kʋɩlgã* rʋʋndã+ guvɛrneer-dãmba. Dẽ, b sõnga nin-buiidã, la b kõ-b bũmb nins sẽn yaa tɩlɛ Wẽnnaam doogã yĩngã.+

9 Bõn-kãensã fãa sẽn maan n sa wã bala, nanambsã pẽnega maam n yeele: “Israyɛll nebã ne maan-kʋʋdbã la Levi buudã neb pa lak b mens ne Kanaã nebã, Hɛt nebã, Perɛɛz nebã, Zebuus nebã, Amon nebã, Mowaab nebã, Ezɩpt nebã+ la Amoor nebã,+ sẽn yaa soolem nins sẽn gũbg-bã nebã, la ne b tʋʋm nins Wẽnnaam sẽn kisã ye.+ 2 B peega bu-kãens kom-pugli wã kẽer n maan bãmb mensã pagba, la b peeg sãnda n kõ b kom-dibli wã.+ Bãmb sẽn yaa buud sẽn welg toorã+ tɩ kalma soolem toɛy-toɛyã neba.+ Yel-wẽn-kãngã pʋgẽ, yaa nanambsã ne kombɛɛmbã n beeg n tɩ yɩɩda.”

3 Mam sẽn wʋm gom-kãensã wã bala, mam pãrga m fuugã ne m kobr sẽn yaa bãg-vɩɩdã, la m gʋs m zugã zoobdã ne m toɛɛngã, n zĩnd ne sũ-sãang wʋsgo. 4 Rẽ poore, neb nins fãa sẽn nand Israyɛll Wẽnnaamã goamã wa n gũbga maam, neb nins sẽn yi yembd n wa wã sẽn pa maan sɩd ne Wẽnnaamã yĩnga, tɩ mam zĩnd ne sũ-sãang n tãag zaabr kood biis kũunã sasa.+

5 Zaabr kood biis kũunã wakat sẽn ta,+ mam yika zĩig ning m sẽn da zĩ ne m sũ-sãangã, ne m fuugã la m kobr sẽn yaa bãg-vɩɩdã sẽn pãrgã, n yĩgimd n zẽk m nus n tees mam Wẽnnaam a Zeova. 6 Mam yeelame yaa: “Mam Wẽnnaam, yãnd n tar maam. Mam Wẽnnaam, mam getame tɩ pa zems tɩ m zẽk m neng n ges yãmb ye. Bala tõnd beegrã lebga wʋsg d zugu, tɩ d taalã zẽk n ta saasã.+ 7 Hal tõnd yaab-rãmbã wakat n tãag rũndã, tõnd taalã yaa kãsenga.+ Tõnd kongrã yĩnga, yãmb ninga tõnd ne d rĩm-dãmbã, la d maan-kʋʋdbã soolem toɛy-toɛyã rĩm-dãmb nusẽ, tɩ b kʋ tõnd ne sʋʋse,+ n kẽes-d yembdo,+ n fã tõnd+ la b ning-d yãnd wa sẽn yaa to-to rũndã wã.+ 8 La tõnd Wẽnnaam a Zeova, wakat bilf pʋgẽ, tõnd paama lohorem yãmb nengẽ, y sẽn bas tɩ tõnd neb bilf põse, y sẽn kɩt tɩ d paam bãan y zĩ-sõngẽ wã,+ la y sẽn kɩt tɩ d paam sũ-noogo,* la d paam d mens bilf d yembdã pʋgẽ wã. 9 Bala baa tõnd sẽn yaa yembsã,+ yãmb sẽn yaa tõnd Wẽnnaamã pa raag tõnd n bas d yembdã pʋgẽ ye. Yãmb maana tõnd neer tɩ d paam lohorem Pɛrs rĩm-dãmbã taoore,+ sẽn na yɩl tɩ d le paam pãng n zẽk yãmb sẽn yaa tõnd Wẽnnaamã roogã,+ n maneg a ra-boogã, la sẽn na yɩl n paam koglg* Zida la Zerizalɛm.

10 “La masã, tõnd Wẽnnaam, bõn-kãensã fãa poore, tõnd na n yeelame tɩ bõe? Bala tõnd basa yãmb noyã 11 yãmb sẽn tũnug ne no-rɛɛsdbã sẽn yaa yãmb tʋm-tʋmdbã n kõ tõndã. Yãmb da yeelame: ‘Soolem ning yãmb sẽn dabd n na n tɩ soogã yaa soolem sẽn yaa rẽgdo, soolem toɛy-toɛyã nin-buiidã tʋʋm-dẽgdã yĩnga, la b tʋʋm nins mam sẽn kisã yĩnga. B kɩtame tɩ soolmã pid ne rẽgdo,+ sẽn sɩng a kɩreng a ye n tãag a to wã. 12 Woto wã, bɩ y ra rɩk y kom-pugli wã n kõ b kom-dibli wã, la y ra peeg b kom-pugli wã n kõ y kom-dibli wã ye.+ Yãmb pa segd n bao n na n kɩt tɩ b paam laafɩ, wall paoong a bada.+ Yaa sẽn na yɩl tɩ y paam pãnga, n dɩ soolmã bõn-sõma wã, la tɩ yãmb ne y kambã soog-a wakat fãa yĩnga.’ 13 Bũmb ning fãa sẽn paam tõnd d tʋʋm-wẽnsã yĩng la d taalã sẽn yaa kãsengã yĩngã, (bala yãmb sẽn yaa tõnd Wẽnnaamã pa maan tõnd wa sẽn zems d kongrã ye.+ Yãmb kɩtame tɩ tõnd sẽn be ka wã põse,)+ 14 tõnd segd n le kɩɩsa yãmb noyã, n maan kãadem kaool* ne buud nins sẽn tʋmd tʋʋm-kãensã yãmb sẽn kisã sɩda?+ Yãmb sũurã pa na n puug wʋsg ne tõnd tɩ y sãam-d zãnga, n pa bas ned baa a ye t’a zoe, bɩ n põsg a yõor sɩda? 15 Israyɛll Wẽnnaam a Zeova, yãmb yaa tɩrga,+ bala tõnd neb bilf n põs n tãag rũndã. Tõnd bee yãmb taoor rũndã ne taale. Bala bõn-kãensã fãa poore, tõnd ned baa a ye ra pa tar sor n na n yaas yãmb taoor ye.”+

10 A Ɛsdras sẽn wa n pʋʋsdẽ+ la a vẽnegd nin-buiidã yel-wẽn n togsdẽ, n gãe tẽng n yãbd Wẽnnaam doogã noorã, neb kʋʋng n wa n gũbg-a. Yaa pagb la rap la kamb sẽn yaa Israyɛll neba, tɩ nebã fãa ra yãbd wʋsgo. 2 Dẽ, a Yeyiyɛll+ biig a Sekaniya sẽn yaa a Elam+ yagengã yeela a Ɛsdras yaa: “Tõnd pa maan sɩd ne d Wẽnnaamã, d sẽn kẽ kãadem ne soolmã pagb sẽn yaa bu-zẽmsã* yĩnga.+ La ne rẽ fãa, saagr n ket Israyɛll yĩnga. 3 Bɩ d maan kaool ne d Wẽnnaamã,+ n dig pagbã ne kamb nins fãa b sẽn dogã, wa sẽn zems a Zeova sẽn yeelã, la wa sẽn zems neb nins sẽn nand tõnd Wẽnnaamã goamã sẽn yeelã.+ Bɩ d maan wa Tõogã sẽn wilgã. 4 Yiki, bala yellã bee fo nugẽ. Sẽn paase, tõnd bee ne foo. Tall raoodo, n maan bũmbu.”

5 Rẽ la a Ɛsdras yik-yã, n kɩt tɩ maan-kʋʋdbã taoor dãmbã, ne Levi buudã neb la Israyɛll nebã fãa wẽen tɩ b na n maana bũmb ning b sẽn yeelã.+ Dẽ, b wẽename. 6 Rẽ poore, a Ɛsdras yika Wẽnnaam doogã noore, n tɩ kẽ a Eliyasɩɩb biig a Yehohanan doogẽ wã.* La baa a sẽn kẽ be wã, a pa rɩ rɩɩb bɩ n yũ koom ye. Bala a ra bee sũ-sãang pʋgẽ, neb nins sẽn yi yembd n wa wã sẽn pa maan sɩd ne Wẽnnaamã yĩnga.+

7 Rẽ poore, b moona Zida ne Zerizalɛm fãa n yeel tɩ sẽn yi-b yembd n wa wã fãa wa tigim taab Zerizalɛm, 8 la tɩ ned ning fãa sẽn pa wa ka la rasem a tãabo, b na n deega a paoongã fãa, la b rig-a n yiis neb nins sẽn yi yembd n wa wã sʋka,+ wa sẽn zems noor ning nanambsã ne kãsem-dãmbã sẽn dɩkã. 9 Dẽ, Zida ne Bẽnzame rapã fãa tigma taab Zerizalɛm rasem a tãab pʋgẽ, rat n yeel tɩ kiuug a wɛ soabã rasem pisi wã daare. Nin-buiidã fãa ra zĩi Wẽnnaam doogã samand a ye pʋgẽ n digda, yell ning sẽn da be wã yĩnga, la saagã sẽn da niid wʋsgã yĩnga.

10 Rẽ poore, maan-kʋʋd a Ɛsdras yikame n yeel-b yaa: “Yãmb pa maan sɩd ne Wẽnnaam, yãmb sẽn kẽ kãadem ne pagb sẽn yaa bu-zẽmsã yĩnga.+ Woto wã, yãmb paasa Israyɛll nebã taalã. 11 Masã, vẽneg-y y yel-wẽnã n togs yãmb yaab-rãmbã Wẽnnaam a Zeova, la y maan a raabã. Lak-y y mens ne soolmã neba, la ne pʋg-kãensã sẽn yaa bu-zẽmsã.”+ 12 Rẽ la nin-buiidã fãa zẽk b koees n leok yaa: “Tõnd na n maana wa yãmb sẽn yeelã bal kɛpɩ. 13 La nebã yaa wʋsgo, tɩ yaa saas wakat me. Nebã pa tõe n yaas yɩng ye. Sẽn paase, yellã welgr pa na n yɩ daar a ye bɩ rasem a yiib ye. Bala tõnd beegrã yaa kãseng wʋsgo. 14 Woto wã, d bõos tɩ y bas tɩ tõnd nanambsã tigim nin-buiidã yʋʋr yĩnga.+ La bɩ neb nins fãa sẽn be tõnd tẽnsẽ wã n kẽ kãadem ne pagb sẽn yaa bu-zẽmsã wa wakat ning b sẽn na n wilg-bã, bãmb ne b tẽngã kãsem-dãmb la a bʋ-kaoodba, hal tɩ d wa tõog n sigs d Wẽnnaamã sũur sẽn yik wʋsg yel-kãngã wɛɛngẽ wã.”

15 La a Asayɛll biig a Zonatã ne a Tikva biig a Yaziya kɩɩsa noorã, t’a Mesulam ne a Sabtayi+ sẽn yaa Levi buudã neb teel-ba. 16 Baasgo, neb nins sẽn yi yembd n wa wã maana bũmb ning b sẽn da pʋlmã. Maan-kʋʋd a Ɛsdras ne buud toor-toorã rot taoor dãmb fãa yʋy b sẽn boolã wa n tigma taaba, kiuug piig soabã pipi daare, n na n bao yellã vɩʋʋgo. 17 Pipi kiuugã pipi daarã ne a na n ta, tɩ b welga rap nins sẽn da kẽ kãadem ne bu-zẽmsã yellã n sa. 18 B bãngame tɩ maan-kʋʋdbã kamb kẽer kẽe kãadem ne pagb sẽn yaa bu-zẽmse.+ A Yehozadak biig a Yesuwa+ kambã ne a Yesuwa ba-biisã sʋka, yaa a Maaseya, a Eliyezɛɛre, a Yariibe, la a Gedaliya. 19 La b pʋlmame tɩ b na n kɩtame tɩ b pagbã looge. Sẽn mik tɩ b tara taalã, b ned kam fãa na n yãka pe-raoog a rũm-bõonegã sʋk n wa kõ b taalã yĩnga.+

20 A Imeer+ yagensã sʋk yaa a Hanani ne a Zebadiya. 21 A Harim+ yagensã sʋk yaa a Maaseya, a Eli, a Semaya, a Yeyiyɛll la a Ozɩyase. 22 A Pasʋʋr+ yagensã sʋk yaa a Eliyohenayi, a Maaseya, a Ismayɛlle, a Netanɛlle, a Zozabaad la a Eleyasa. 23 Levi buudã nebã sʋk yaa a Zozabaade, a Simeyi, a Kelaya (rat n yeel t’a Kelita,) a Petaya, a Zida ne a Eliyezɛɛre. 24 Yɩɩn-yɩɩndbã sʋk yaa a Eliyasɩɩbe, tɩ rigno-gũudbã sʋk yaa a Salum, a Telɛm la a Uri.

25 Israyɛll nebã sʋka, ad rap nins sẽn beegã: A Paros+ yagensã sʋk yaa a Ramiya, a Iziya, a Malkiya, a Miyaminni, a Eleazaare, a Malkiya la a Benaya. 26 A Elam+ yagensã sʋk yaa a Mataniya, a Zakari, a Yeyiyɛlle,+ a Abdi, a Yeremot la a Eli. 27 A Zatu+ yagensã sʋk yaa a Eliyohenayi, a Eliyasɩɩbe, a Mataniya, a Yeremote, a Zabaad la a Aziza. 28 A Bebayi+ yagensã sʋk yaa a Yehohanan, a Hananiya, a Zabayi la a Atlayi. 29 A Bani yagensã sʋk yaa a Mesulam, a Maluki, a Adaya, a Yasuubi, a Seyall la a Yeremote. 30 A Pahat-mowaab+ yagensã sʋk yaa a Adna, a Kelalle, a Benaya, a Maaseya, a Mataniya, a Bɛtsalɛlle, a Binuwi la a Manase. 31 A Harim+ yagensã sʋk yaa a Eliyezɛɛre, a Isiya, a Malkiya,+ a Semaya, a Simeyon, 32 a Bẽnzame, a Maluk la a Semariya. 33 A Hasum+ yagensã sʋk yaa a Matenayi, a Matata, a Zabaade, a Elifelɛte, a Yeremayi, a Manase la a Simeyi. 34 A Bani yagensã sʋk yaa a Maadayi, a Amram, a Uwɛlle, 35 a Benaya, a Bediya, a Keluhi, 36 a Vaniya, a Meremote, a Eliyasɩɩbe, 37 a Mataniya, a Matenayi la a Yaasu. 38 A Binuwi yagensã sʋk yaa a Simeyi, 39 a Selemiya, a Natã, a Adaya, 40 a Maknadebayi, a Sasayi, a Sarayi, 41 a Azareyɛlle, a Selemiya, a Semariya, 42 a Salum, a Amariya la a Zozɛfe. 43 A Nebo yagensã sʋk yaa a Yeyɛlle, a Matitiya, a Zabaade, a Zebina, a Yadayi, a Zowɛll la a Benaya. 44 Nin-kãensã fãa kẽe kãadem ne pagb sẽn yaa bu-zẽmse,+ la b kɩtame tɩ b pagbã ne b kambã fãa looge.+