A ZOWƐLL SEBRE
1 Ad goam nins a Zeova sẽn togs a Petuwɛll biig a Zowɛllã:*
2 “Yãmb a kãsem-dãmbã, kelg-y yãoã.
Yãmb a soolmã* neb fãa, maag-y y yĩng n kelge.
Bõn-kãngã buud zoe n maana yãmb wakatẽ wã,
wall y yaab-rãmbã wakatẽ sɩda?+
3 Togs-y y kambã bõn-kãnga,
tɩ y kambã rɩk-a n togs b kambã,
tɩ b kambã me rɩk-a n togs zãmaan ning sẽn pʋgdã.
4 Bũmb ning sʋy nins sẽn dɩt bũmb fãa wã sẽn basã, kalwaarã n dɩ.+
Bũmb ning kalwaarã sẽn basã, sʋy nins sẽn pa tar pɩgsã n dɩ.
Bũmb ning sʋy nins sẽn pa tar pɩgsã sẽn basã, sʋy nins sẽn dɩt wʋsgã n dɩ.+
5 Yãmb a rã-yũud-kãase,+ nek-y n yãb-y-yã!
Yãmb a divẽ-yũudbã fãa, wiis-y-yã,
bala divẽ-noog pa le be yãmb yĩng ye.+
6 Bu-zẽng neb n kẽ mam soolmã. Yaa buud sẽn tar pãnga, t’a nebã sõor ka tɛk ye.+
B yẽnã yaa wa gɩgemd yẽna,+ tɩ b yɛyã me yaa wa gɩgemd yɛya.
7 B sãama mam viyn tɩɩgã, la b wãb mam kankangã n kell a viukã. B yolem-b-la zãng la b lob-b kɛɛnga.
B wãba b wil-poalã tɩ b lebg peelse.
8 Wiis-y wa pʋg-sad sẽn pa mi rao sẽn yer bot n wiisdẽ,
a pʋg-sademdẽ sɩd* sẽn ki yĩnga.
9 B pa le kõt kood biis kũun+ ne divẽ kũun+ a Zeova roogẽ wã ye.
Maan-kʋʋdbã sẽn yaa a Zeova tʋm-tʋmdbã maanda sũ-sãanga.
10 B sãama pʋtã, tɩ tẽngã maand sũ-sãanga.+
Bala b sãama koodã, divẽ-paalgã kʋɩɩme, tɩ kaam me kaẽ ye.+
12 Viyn tɩɩsã kʋɩɩme,
tɩ kankamsã zelge.
Gernaad tɩɩsã, komsã la pomm tɩɩsã,
tɩɩsã fãa sẽn be pʋtẽ wã kʋɩɩme.+
Bala nin-buiidã sʋka, sũ-noogã toeem n lebga yãnde.
13 Yãmb a maan-kʋʋdba, yeelg-y bot* n maan sũ-sãanga.*
Yãmb a neb nins sẽn tʋmd tẽn-kugrẽ wã, wiis-y-yã.+
Mam Wẽnnaamã tʋm-tʋmdba, wa-y wẽnd-doogẽ wã, n yeelg bot n gãand yʋngã.
Bala ned pa le wat ne kood biis kũun+ la divẽ kũun+ yãmb Wẽnnaamã roogẽ ye.
14 Moon-y no-loeere. Moon-y tigsg sẽn yaa zalle.+
Tigm-y kãsem-dãmbã ne soolmã neb fãa
yãmb Wẽnnaam a Zeova roogẽ wã,+ n yãb n kos a Zeova sõngre.
15 Na n yɩɩ toog daare!
Bala a Zeova daarã kolgame.+
A na n waa ne sãoong sẽn yit Sẽn-tõe-a-fãa wã nengẽ!
16 B pa kɩt tɩ rɩɩb pa le be tõnd taoore,
la b kɩt tɩ sũ-noog la kɩdeng sa tõnd Wẽnnaamã roogẽ sɩda?
17 B bʋta bõn-buudu,* tɩ kʋɩtẽ.*
Teedã bĩngr dot sãamame.
Baoã lʋɩɩme, bala koodã kʋɩɩme.
18 Baa rũmsã wẽeda siri!
Niisã yeebdame n pa mi b sẽn dabdẽ, bala b pa paamd yamd ye!
Piisã paamda sɩbgre.
19 Zeova, yaa yãmb la m na n boole.+
Bala bugum n dɩ rũmsã wãbneg zĩis sẽn be we-raoogẽ wã.
Bug-witim n dɩ tɩɩsã fãa sẽn be pʋtẽ wã.
20 Baa we-rũmsã baoodame tɩ y wa sõng-ba,
bala kʋɩlsã koom kʋɩɩme.
Bugum n dɩ rũmsã wãbneg zĩis sẽn be we-raoogẽ wã.”
2 “Peeb-y baorg Siyõ!+
Kaas-y zabr kaasg mam tãn-sõngã zugu.
Buud n be t’a nebã yaa wʋsgo, la b tar pãnga.+
Buud zɩ n zĩnd n yaa wa bu-kãnga,
la a to pa na n le zĩnd
zãmaan woo zãmaan me ye.
3 Bugum n be a taoor n dɩtẽ,
tɩ bug-witim dɩt a poorẽ wã.+
Soolmã sẽn be a taoorã yaa wa Edɛn zẽedã zĩiga,+
la a poorẽ wã yaa we-raoog sẽn yaa vɩʋʋgo.
Baa fʋɩ pa tõe n põs ye.
4 B wõnda wed-moose,
n zoet wa zabr wed-moose.+
5 B sã n wa yɩgd n tĩimsd tãensã zutu, b rãamdã yaa wa saar-dãmb* rãamde,+
wa bugum sẽn dɩt mood ne pãng bʋʋre.
Yaa wa buud sẽn tar pãng neb sẽn tong taab tɩ ned fãa tar a zĩiga.+
6 Bãmb yĩnga, buud toɛy-toɛyã neb na n maana yɩɩr wʋsgo.
Nebã fãa nens na n bendgame.
7 B zoet n wata wa zabr gãndaado.
B kanda lalg wa sodaase.
Ned fãa teesa a taoore.
B pa lakd n bas b soayã ye.
8 B pa tusd taab ye.
Ned fãa tũuda a sore.
Zab-teed sã n lub kẽere,
b taabã ket n kẽngda taoore.
9 B fõrd n kẽeda tẽngã. B zoeta lalgã zugu.
B rʋʋda rotã zutu. B tũuda feneta wã n kẽed wa wagda.
10 Soolmã rigda b taoore, tɩ saasã me rigda.
Wĩntoogã ne kiuugã lebga lika,+
tɩ ãdsã me pa le tar vẽenem ye.
11 A Zeova na n zẽka a koɛɛg a tãb-biisã taoore,+ bala a tãb-biisã yaa ka tɛka.+
Sẽn pidsd-a a gomdã tara pãnga.
A Zeova daarã yaa kãsenga, n kẽesd rabeem wʋsgo.+
Ãnda n tõe n yals daar-n-kãnga?”+
12 A Zeova yeelame: “Baasgo, nan pa kẽ n bõog ye. Lebg-y n wa-y mam nengẽ ne y sũyã fãa,+
n loe noore,+ n yãb la y wiisi.
13 Bas-y y futã+ pãrsg la y pãrs y sũyã.+
Lebg-y n wa-y y Wẽnnaam a Zeova nengẽ,
bala a yaa sõmblem soab la nimbãan-zoɛta. A sũur pa yikd tao-tao ye.+ A pida ne maan-neere.+
Woto, a na n toeema yam* yel-beedã a sẽn dat n kɩt tɩ wa wã wɛɛngẽ.
14 Ãnda n mi? Tõe t’a toeem yam* n bas bũmb ning a sẽn da yãk yam n na n maanã,+
la a ning yãmb barka.
Yaa sẽn na yɩl tɩ y tõog n kõ yãmb Wẽnnaam a Zeova kood biis kũun la divẽ kũuni.
15 Peeb-y baorg Siyõ!
Moon-y no-loeere. Moon-y tigsg sẽn yaa zalle.+
16 Tigm-y nebã. Yɩlg-y nin-buiidã.+
Tigm-y nin-kẽembã.* Tigm-y kambã ne kamb nins sẽn ket n yẽsemdẽ wã.+
Bɩ pʋg-paalã sɩd yi a ro-taoorã, tɩ pʋg-paalã me yi a roogẽ wã.
‘Zeova, zoe-y y nin-buiidã nimbãanega.
Ra bas-y tɩ bu-zẽmsã rɩ naam yãmb pʋɩɩrã zugu,
n kɩt tɩ b lebg bũmb b sẽn yaand ye.
Bõe yĩng tɩ buud toɛy-toɛyã na n sokdẽ tɩ “b Wẽnnaamã bee yɛ?”’+
18 Dẽ, a Zeova na n talla yẽesem a soolmã wɛɛngẽ,
la a zoe a nin-buiidã nimbãanega.+
19 A Zeova na n leoka a nin-buiidã n yeele:
‘Mam na n kɩtame tɩ y paam koodo, divẽ-paalg la kaam.
Yãmb na n dɩɩme hal tɩ sek-yã.+
Mam pa na n le kɩt tɩ y yɩ bũmb b sẽn yaand bu-zẽmsã sʋk ye.+
20 Mam na n diga sẽn yit-b rɩtgã tɩ b zãag ne-yã.
Mam na n sãeeg-b lame tɩ b kẽng zĩig sẽn yaa koɛɛng la vɩʋʋgo.
Mam na n kɩtame tɩ b tãb-biis nins sẽn be taoorã tees yaang mogrã* sẽnese,
la m kɩt tɩ sẽn be-b poorẽ wã tees nin-taoor mogrã* sẽnese.
21 Foom a soolem, ra maan dabeem ye.
Kɩdem la f maan sũ-noogo, bala a Zeova na n maana bõn-kãsemse.
22 Yãmb a we-rũmsã sẽn be weoogẽ wã, ra maan-y rabeem ye.
Bala rũmsã wãbneg zĩis sẽn be we-raoogẽ wã na n lebga maasa,+
tɩ tɩɩsã wom biisi.+
Kankamsã ne viyn tɩɩsã na n woma wʋsgo.+
23 Yãmb a Siyõ neba, kɩdm-y la y maan sũ-noog y Wẽnnaam a Zeova yĩnga,*+
bala a na n kõo yãmb dẽenem saag tɩ seke.
A na n kɩtame tɩ sa-bɛd ni yãmb yĩnga,
la a kɩt tɩ dẽenem saag la yaoolem saag ni wa pĩndã.+
24 Zeesã na n pida ne kood biis sẽn yaa yɩlemde.
Vẽ wẽkr bogdã na n pida ne divẽ-paalga, tɩ zĩis nins b sẽn maand kaamã me pid ne kaam.+
25 Mam sẽn tʋm m tãb-bi-kʋʋngã tɩ b wa yãmb sʋk+ n sãam bũmb nins yʋʋm wʋsgã,
mam na n lebs-y lame.
Yaa kalwaarã, sʋy nins sẽn pa tar pɩgsã, sʋy nins sẽn dɩt wʋsgã, la sʋy nins sẽn dɩt bũmb fãa wã sẽn sãam bũmb ninsã.
26 Sɩd-sɩda, yãmb na n dɩɩme n tɩge,+
la y pẽg y Wẽnnaam a Zeova yʋʋrã.+
Yẽ n yaa soab ning sẽn maan bõn-kãsems yãmb yĩngã.
Mam nin-buiidã pa na n tol n le paam yãnd ye.+
27 Woto, yãmb na n bãngame tɩ mam bee Israyɛll nebã sʋka,+
tɩ mam yaa yãmb Wẽnnaam a Zeova,+ la tɩ Wẽnnaam a to kae ye!
Mam nin-buiidã pa na n tol n le paam yãnd ye.
28 Rẽ poore, mam na n pʋdga m vʋʋsmã+ neb buud fãa zutu,
la yãmb kom-dibli wã ne y kom-pugli wã na n togsa bãngr-goama.
Yãmb nin-kẽembã na n zãmsa zãmsdo,
tɩ y kom-bɩɩsã yã vẽnegr toor-toore.+
29 Wakat kãnga, mam na n pʋdga m vʋʋsmã
m yem-daadã la m yem-pogsã zut menga.
30 Mam na n maana yel-soalem saasẽ la tẽngã zugu.
Zɩɩm ne bugum la bug-zõos n na n zĩndi.+
31 Wĩntoogã na n lebga lik tɩ kiuugã lebg miuug wa zɩɩm,+
nand t’a Zeova ra-kãsengã sẽn kẽesd rabeemã ta.+
32 La ned ning fãa sẽn pʋʋsd ne a Zeova yʋʋrã na n paama fãagre.+
Bala neb nins sẽn na n põsã na n zĩnda Siyõ tãngã zug la Zerizalɛm,+ wa a Zeova sẽn yeelã.
Yaa neb nins sẽn pa na n ki wã, a Zeova sẽn boond b rãmbã.”
3 “Bala kelg-y-yã! Ra-kãens la wakat kãnga,
mam sã n wa tall Zida ne Zerizalɛm neb nins sẽn da be yembdã n lebg n wa,+
2 mam na n tigma bu-zẽmsã fãa
Mam na n kaoo b bʋʋd be,+
bũmb ning b sẽn maan Israyɛll nebã sẽn yaa mam nin-buiid la m pʋɩɩrã yĩnga.
Bala b sãeeg-b-la buud toɛy-toɛyã sʋka,
la b weel mam soolmã n pʋɩ taaba.+
3 B maana bãnd n pʋɩ mam nin-buiidã.+
B ra koosda bi-ribl sẽn na yɩl n yao pʋg-yoodre,
la b koos bi-pugl sẽn na yɩl n paam divẽ n yũ.
4 Yãmb a Tɩɩr ne Sɩdõ la Filisti soolmã fãa neba,
yãmb ningda maam taal bõe yĩnga?
Yãmb rokda y sũur ne maam m sẽn maan wẽng yĩng bɩ?
Yãmb sã n dokda y sũuri,
mam na n yɩɩ tao-tao n kɩt tɩ y sũ-dokrã lebg n wa y zut ne tʋʋlem.+
5 Bala yãmb wʋka mam wanzuri wã ne m sãnemã,+
la y tall mam bũmb nins sẽn yaa sõma n yɩɩdã n kẽng y wẽnd-dotẽ wã.
6 Yãmb dɩka Zida ne Zerizalɛm nebã n koos ne Gɛrk-rãmbã,+
sẽn na yɩl tɩ b zãag wʋsg ne b soolmã.
7 Mam na n kɩtame tɩ b yi zĩis nins y sẽn tall-b n tɩ koosã,+
la m kɩt tɩ y sũ-dokrã lebg n wa y zutu.
8 Mam na n dɩka y kom-dibli wã la y kom-pugli wã n koos ne Zida nebã,+
tɩ bãmb me rɩk-b n koos ne Saba sẽn yaa buud sẽn zãrã neba.
Bala yaa a Zeova meng n yeele.
9 Moon-y buud toɛy-toɛyã sʋk n yeel yaa:+
‘Segl-y y mens zabr yĩnga! Kɩt-y tɩ gãndaadã yi!
Bɩ sodaasã fãa kolge! Bɩ b sɩng kẽna!+
10 Rɩk-y y wãgsã n kud sʋʋse, la y rɩk y goetã n kud kãna.
Bɩ sẽn pa tar-a pãngã yeel yaa: “Mam tara pãng wʋsgo.”
11 Yãmb a buud nins fãa sẽn karg n gũbgã, wa n sõng-y-yã! Tigm-y taaba!’”+
Zeova, kɩt-y tɩ y pãens rãmbã* sig zĩ-kãnga.
12 “Bɩ buud toɛy-toɛyã neb yik n wa a Zozafat longẽ wã.*
Bala mam na n zĩnda be n kao buud nins fãa sẽn karg n gũbgã bʋʋdo.+
13 Rɩk-y goet n wʋre, bala koodã bɩɩme.
Wa n kẽ-y n tab-y-yã, bala vẽ wẽkr bokã pidame.+
Sĩmsã pidame n puugdẽ, bala b wẽnemã yaa wʋsgo.
14 Neb kʋʋn-kʋʋngo. Neb kʋʋn-kʋʋng n be bʋ-kaoorã* longẽ,*
bala daar ning a Zeova sẽn na n kao nebã bʋʋd be wã kolgame.+
15 Wĩntoogã ne kiuugã na n lebga lika,
tɩ ãdsã me pa le tar vẽenem ye.
16 A Zeova na n kelma Siyõ wa gɩgemde.
A na n paa Zerizalɛm n zẽk a koɛɛgã.
Saasã ne tẽngã na n digimdame,
la a Zeova na n yɩɩ soondg zĩig a nin-buiidã yĩnga,+
la pãng zĩig Israyɛll nebã yĩnga.
17 Woto, yãmb na n bãngame tɩ mam yaa yãmb Wẽnnaam a Zeova n be Siyõ, mam tãn-sõngã zugu.+
18 Wakat kãnga, divẽ-noog n na n tosd tãensã zutu,+
tɩ bĩisim zoet kunkubã zutu.
Koom n na n zoet Zida kʋɩlsã fãa pʋsẽ.
19 La Ezɩpt na n lebga zĩ-vɩʋʋgo,+
tɩ Edom lebg we-raoog sẽn yaa zĩ-vɩʋʋgo,+
wẽnem ning b sẽn maan Zida nebã,+
la b sẽn daag bʋʋm dãmb zɩɩm b soolmã pʋgẽ wã yĩnga.+
20 La neb n na n zĩnd Zida wakat fãa.
Neb n na n zĩnd Zerizalɛm zãmaan woo zãmaana.+
Rat n yeel t’a “Zeova yaa Wẽnnaam.”
Bɩ, “dũniyã.”
Ebre, “pʋg-paal sɩdã.”
Orz yaa kood sẽn wõnd bɩle.
Ebre, “sẽb-y y sees.”
Bɩ, “pãb y yãoogã.”
Pa rẽ bɩ, “kankam-koeemse.”
Bɩ, “kʋɩt b pell-dãmbã tẽngre.”
Bɩ, “dũniyã.”
Yaa bũmb sẽn wõnd sarɛt tɩ wed-moos tatẽ.
Bɩ, “maana a bãngẽ.”
Bɩ, “maan a bãngẽ.”
Bɩ, “kãsem-dãmbã.”
Yaa zãnd buudu.
Rat n yeel tɩ Mog-kɩɩngã.
Rat n yeel tɩ Mediterane mogrã.
Ebre, “la y maan sũ-noog y Wẽnnaam a Zeova pʋgẽ.”
Rat n yeel t’a “Zeova yaa bʋ-kaooda.”
Bɩ, “tẽn-nabrẽ wã.”
Bɩ, “y zabr gãndaadã.”
Bɩ, “tẽn-nabrẽ wã.”
Bɩ, “yam-yãkrã.”
Bɩ, “tẽn-nabrẽ.”
Bɩ, “kosoogo.”