A AMOS SEBRE
1 Ad a Amos* sẽn da naag Tekowa+ pe-kɩɩmbã goamã. A paama vẽnegr sẽn gomd Israyɛll yelle, Zida rĩm a Ozɩyas+ wakatẽ wã ne a Zowaas+ biig a Zerobowam+ sẽn yaa Israyɛll rĩmã wakatẽ, yʋʋm a yiib sẽn deng tẽn-digimdgã.+ 2 A yeelame:
“A Zeova na n kelma Siyõ wa gɩgemde.
A na n zĩnda Zerizalɛm n zẽk a koɛɛgã.
Pe-kɩɩmbã rũmsã wãbneg zĩis na n maana sũ-sãanga.
Karmell tãngã zug na n kʋɩɩme.”+
3 “Ad a Zeova sẽn yeele:
‘“Damaas nebã kɩɩsg* a tãab yĩnga, la b kɩɩsg a naas yĩnga, mam pa na n toeem m yam-yãkrã ye.
Bala b pãba Galaad nebã ne kut tʋʋm-teed b sẽn tar n pãbd koodo.+
4 Rẽ n so tɩ mam na n kɩt tɩ bugum sig a Azayɛll+ roogã zugu,
n dɩ a Bɛn-hadaad gasd nins sẽn tar pãngã.+
5 Mam na n kaoo Damaas+ kʋɩlensã sogdsã.
Mam na n sãama neb nins sẽn be Bikat-avɛnnã,
la sẽn be-a Bɛt-edɛn n dɩt naamã.*
Siiri nebã na n kẽnga yembd Kɩɩre.”+ Yaa a Zeova n yeele.’
6 Ad a Zeova sẽn yeele:
‘“Gaaza nebã kɩɩsg a tãab yĩnga,+ la b kɩɩsg a naas yĩnga, mam pa na n toeem m yam-yãkrã ye.
Bala b yõka yembs sull tõr+ n ning Edom nebã nusẽ.
7 Rẽ n so tɩ mam na n kɩt tɩ bugum sig Gaaza lalgã zugu,+
n dɩ a gasd nins sẽn tar pãngã.
8 Mam na n sãama neb nins sẽn be Asdoodã,+
la sẽn be-a Askalon+ n dɩt naamã.*
Mam na n zẽka m nug n sɩbg Ekron.+
Filisti neb nins sẽn ketã na n sãamame.”+ Yaa a Zeova sẽn yaa Zu-soab sẽn ka to wã n yeele.’
9 Ad a Zeova sẽn yeele:
‘Tɩɩr nebã kɩɩsg a tãab yĩnga,+ la b kɩɩsg a naas yĩnga, mam pa na n toeem m yam-yãkrã ye.
Bala b yõka yembs sull tõr n ning Edom nebã nusẽ.
Sẽn paase, b pa tẽeg saam-biir kaoolã yell ye.+
10 Rẽ n so tɩ mam na n kɩt tɩ bugum sig Tɩɩr lalgã zugu,
n dɩ a gasd nins sẽn tar pãngã.’+
11 Ad a Zeova sẽn yeele:
‘Edom nebã kɩɩsg a tãab yĩnga,+ la b kɩɩsg a naas yĩnga, mam pa na n toeem m yam-yãkrã ye.
Bala b riga b ba-biisã ne sʋʋse.+
Sẽn paase, b zãgsame tɩ b kõn zoe b nimbãaneg ye.
B sũ-yikrã pʋgẽ, b tɛɛd-b lame n tõsd n pa basdẽ ye.
B sũyã kell n yika ne-b n pa sigd ye.+
13 Ad a Zeova sẽn yeele:
‘“Amon nebã kɩɩsg a tãab yĩnga,+ la b kɩɩsg a naas yĩnga, mam pa na n toeem m yam-yãkrã ye.
Bala b weeda Galaad pagb nins sẽn tʋtã, sẽn na yɩl n yalg b mensã soolem.+
14 Rẽ n so tɩ mam na n kɩt tɩ bugum sig Raba+ lalgã zugu,
n dɩ a gasd nins sẽn tar pãngã.
Tãb-biisã sã n wa zabd ne tẽngã, zabr kaasg n na n zĩndi.
Sob-kẽeng n na n fug daar-n-kãnga.
15 B rĩmã na n kẽnga yembdo, yẽ ne a nanambsã.”+ Yaa a Zeova n yeele.’
2 “Ad a Zeova sẽn yeele:
‘“Mowaab nebã kɩɩsg* a tãab yĩnga,+ la b kɩɩsg a naas yĩnga, mam pa na n toeem m yam-yãkrã ye.
Bala b yõoga Edom rĩmã kõab n maan goore.
2 Rẽ n so tɩ mam na n kɩt tɩ bugum yõk Mowaabe, n dɩ Keriyot+ gasd nins sẽn tar pãngã.
Mowaab nebã na n kii bʋʋr sẽn yaa kãseng pʋgẽ,
ne zabr kaasg la bard rãamde.+
4 Ad a Zeova sẽn yeele:
‘Zida nebã kɩɩsg a tãab yĩnga,+ la b kɩɩsg a naas yĩnga, mam pa na n toeem m yam-yãkrã ye.
Bala b zãgsa maam a Zeova tõogã.*
Sẽn paase, b pa sak mam noyã ye.+
B yaab-rãmbã sẽn da tũud zirẽ-beed ninsã kɩtame tɩ b bʋdge.+
6 Ad a Zeova sẽn yeele:
‘Israyɛll nebã kɩɩsg a tãab yĩnga,+ la b kɩɩsg a naas yĩnga, mam pa na n toeem m yam-yãkrã ye.
Bala b koosda nin-tɩrsã sẽn na yɩl n paam wanzuri,
la b koosd naong rãmbã sẽn na yɩl n paam neooda.+
Rao ne a biig kẽeda ne pʋg-sad-yɛnga,
n sãamd mam yʋʋrã sẽn yaa sõngã.
8 Tẽn-kugr fãa sɛɛgẽ,+ b tẽegda fut nins neb a taabã sẽn gãneg b nengẽ n deeg samã+ n gãe.
B raada divẽ wã ne ligd ning b sẽn deesd neb nins b sẽn dogl yaoodã nengẽ, n yũud b wẽnnaam-dãmbã roogẽ.’
9 ‘Yaool n yaa maam n sãam Amoor nebã b taoore.+
B ra yaa nin-wogd wa sɛɛdr tɩɩse, la b tar pãng wa sɛnn tɩɩse.
Mam sãama b fãa wa b sẽn sãamd tɩɩg ne a biis la a yẽg to-to wã.+
10 Mam yiisa yãmb Ezɩpt soolmẽ wã,+
n kɩt tɩ y pasg we-raoogã yʋʋm pis-naas pʋgẽ,+
sẽn na yɩl tɩ y tɩ soog Amoor nebã soolem.
11 Mam yãka yãmb kambã kẽer tɩ b yɩ no-rɛɛsdba,+
Yãmb a Israyɛll neba, pa yɩ woto sɩda?’ Yaa a Zeova n yeele.
12 ‘La yãmb da kõta Nazireyẽ-rãmbã divẽ tɩ b yũuda,+
la y yet no-rɛɛsdbã yaa: “Yãmb pa segd n togs bãngr-goam ye.”+
13 Woto yĩnga, mam na n bedsa yãmb y zĩigẽ wã,
wa sarɛt sẽn pid ne kood b sẽn kɛ sẽn bedsd bũmb ning fãa sẽn be a tẽngrã.
14 Sẽn zoet-a wʋsg pa na n yã zĩig n zoe n kẽng ye.+
Sẽn tar-a pãng pa na n kell n tall a pãngã ye.
Zabr gãndaoog baa a ye pa na n fãag a yõor ye.*
15 Tãb-tãood pa na n yals a zĩigẽ ye.
Ned ning nao sẽn tʋʋl pa na n põs ye.
Wed-rʋʋd pa na n fãag a yõor ye.*
16 Baa sẽn tar-a raood* n yɩɩd zabr gãndaadã sʋkã
na n zoee beell daar-n-kãnga.’+ Yaa a Zeova n yeele.”
3 “Yãmb a Israyɛll neba, kelg-y goam nins a Zeova sẽn togs yãmb wɛɛngẽ, yãmb a buud ning tõr a sẽn yiis Ezɩpt soolmẽ wã wɛɛngẽ:
2 ‘Tẽngã buud toɛy-toɛyã fãa sʋka, yaa yãmb bal la mam yãk-yã.*+
Rẽ n so tɩ mam na n sok yãmb y kongrã fãa yĩnga.+
3 Neb a yiib na n tũu taab n kẽn tɩ b pa reng n kõ taab sɛk sɩda?*
4 Gɩgemd na n kelma kãgrẽ tɩ rũng kae a sẽn na n yõk sɩda?
Gɩgem-poll na n bee a zĩigẽ n wũundẽ tɩ sã n pa a paama bũmb n yõk sɩda?
5 Liuul na n lʋɩɩ bẽdg pʋgẽ tɩ pa ned n bẽd-a sɩda?*
Bẽdg na n pagame tɩ pa a yõka bũmb sɩda?
6 B sã n peeb baorg tẽng pʋgẽ, nebã pa rigd sɩda?
Yel-beed sã n maan tẽng pʋgẽ, pa a Zeova n maan bũmb sɩda?
7 Bala a Zeova sẽn yaa Zu-soab sẽn ka to wã pa na n maan bũmbu,
t’a pa reng n vẽneg no-rɛɛsdbã sẽn yaa a tʋm-tʋmdbã a yel-soalgdgã ye.+
8 Gɩgemdã kelmame!+ Ãnda n pa na n yɛɛse?
A Zeova sẽn yaa Zu-soab sẽn ka to wã gomame! Ãnda n pa na n togs bãngr-gomde?’+
9 ‘Moon-y Asdood gasd nins sẽn tar pãngã zutu,
la Ezɩpt soolmã gasd nins sẽn tar pãngã zutu,
n yeele: “Tigm-y taab Samari tãensã zutu.+
Ges-y zũnd-zãnd ning sẽn be a pʋgẽ wã,
la zãmb ning sẽn be be wã.+
10 Bala neb nins sẽn tʋmd nen-kɛglem tʋʋma, la b wat ne sãoong n paamd paoongo, n pidsd b gasdã sẽn tar pãngã
pa mi sẽn yaa tɩrg sẽn maand to-to ye.” Yaa a Zeova n yeele.’
11 Woto wã, ad a Zeova sẽn yaa Zu-soab sẽn ka to wã sẽn yeele:
‘Bɛɛb n na n gũbg soolmã.+
Bãmb na n kɩtame tɩ y pãngã sa,
la b zɛ y gasd nins sẽn tar pãngã.’+
12 Ad a Zeova sẽn yeele:
‘Pe-kɩɩm sẽn yiisd pesg kars a yiib wall a tʋb-gɩrg bal gɩgemd noorẽ to-to wã,
yaa woto la b na n fãsg ‘Israyɛll nebã,
sẽn be-b Samari n zĩ goeen-bɛd sẽn yaa neeb zutu, la b gãe gãas sẽn bʋgs* zutã.’+
13 Tãb-biis Wẽnnaam a Zeova sẽn yaa Zu-soab sẽn ka to wã yeelame: ‘Kelg-y-yã, la y keoog a Zakoob yagensã.*
14 Bala daar ning mam sẽn na n sok Israyɛll nebã b kɩɩsgã* yĩngã,+
mam na n sok-b-la Betɛll tẽn-kugã yĩng me.+
B na n kɛɛ tẽn-kugrã yɩɩlã n lub tẽnga.+
15 Mam na n luba waood wakat roogã ne tʋʋlg wakat roogã me.’
4 “Yãmb a pagb nins sẽn yaa wa Basan niis n be Samari tãngã zugã,+
kelg-y gom-kãngã.
Yãmb yaa pagb sẽn wẽgd nimbãan-neba,+ n namsd naong rãmba,
la sẽn yet b sɩdb* yaa: ‘Tall-y rãam n wa kõ-d tɩ d yũ!’
2 A Zeova sẽn yaa Zu-soab sẽn ka to wã wẽena ne a sõmblmã n yeele:
‘“Kelg-y-yã! Wakat n wat tɩ b na n zẽk yãmb ne koaas bãense,
la b zẽk yãmb sʋkã neb nins sẽn ketã ne leoose.
3 Yãmb ned kam fãa na n teesa tɩrg n tɩ tũ lalgã võorẽ n yi.
B na n diga yãmb tɩ y tees Harmon.” Yaa a Zeova n yeele.’
5 Yãmb a Israyɛll neba, yõog-y bur sẽn ning rabɩll tɩ yɩ bark pʋʋsg maoongo.+
Zẽk-y y koɛɛg n moon n wilg bũmb nins y sẽn kõ ne yamleoogã!
Bala yaa rẽ maaneg n noom yãmba.’ Yaa a Zeova sẽn yaa Zu-soab sẽn ka to wã n yeele.
6 ‘Sã n yaa ne maam, mam kɩtame tɩ y yẽnã lebg yɩlma, rɩɩb sẽn pa be* yãmb tẽnsã fãa pʋsẽ wã yĩnga,
la m kɩt tɩ y pa le tar dɩɩb* y rotã fãa pʋsẽ ye.+
Baa ne rẽ, yãmb pa lebg n wa mam nengẽ ye.’+ Yaa a Zeova n yeele.
7 ‘Sẽn paase, mam monga yãmb saaga, kẽebgã ket tɩ kiuug a tãabo.+
Mam kɩtame tɩ saagã ni tẽng a ye n bas tẽng a to.
Saagã ra niida pʋʋg a ye pʋgẽ,
la pʋʋg a to pʋgẽ a ra pa niidi, hal tɩ pʋ-kãng kʋɩtẽ.
8 Tẽns a yiib bɩ a tãab neb ra tuumdame n kẽngd tẽng a ye pʋgẽ n dat n paam koom n yũ,+
la b ra pa paamd tɩ sekd-b ye.
Baa ne rẽ, yãmb pa lebg n wa mam nengẽ ye.’+ Yaa a Zeova n yeele.
9 ‘Mam sɩbga yãmb ne pems-tʋʋlg la kood bãase.+
Yãmb paasa y zẽedã zĩis la y viyn pʋtã sõore,
la sʋyã wa n wãba yãmb kankamsã la y oliiv tɩɩsã.+
Baa ne rẽ, yãmb kell n pa lebg n wa mam nengẽ ye.’+ Yaa a Zeova n yeele.
10 ‘Mam kɩtame tɩ Ezɩpt bã-loangdgã buud yõk yãmba.+
Mam kʋʋ yãmb kom-bɩɩsã ne sʋʋse,+ la m yõg y wed-moosã.+
Mam kɩtame tɩ kũ-rãmbã sẽn be yãmb sik-zĩigẽ wã yũug kẽ y yõ-bogdã.+
Baa ne rẽ, yãmb pa lebg n wa mam nengẽ ye.’ Yaa a Zeova n yeele.
11 ‘Mam kɩtame tɩ sãoong wa yãmb zut
wa maam a Wẽnnaam sẽn sãam Sodom ne Gomoor to-to wã.+
Yãmb da yaa wa raoog b sẽn yiis bugmẽ.
Baa ne rẽ, yãmb pa lebg n wa mam nengẽ ye.’+ Yaa a Zeova n yeele.
12 Yãmb a Israyɛll neba, yaa woto la mam na n maan yãmba.
Yãmb a Israyɛll neba, sẽn mik tɩ yaa woto la mam na n maan yãmbã,
bɩ y segl y mens n seg y Wẽnnaamã.
13 Bala yẽ n yaa Soab ning sẽn maan tãensã,+ la a naan sobgã.+
A togsda ninsaalbã yẽ tagsa sẽn yaa a soaba.
A kɩtdame tɩ zĩ-yẽegr lebg lika.+
A tabda tẽngã zĩ-zãntsã.+
A yʋʋrã yaa tãb-biis Wẽnnaam a Zeova.”
5 “Yãmb a Israyɛll neba, kelg-y goam nins mam sẽn togsd yãmb tɩ yaa wa sũ-sãang yɩɩllã:*
2 ‘Israyɛll sẽn yaa pa-kuilã lʋɩɩme.
A pa le tõe n yik ye.
B raag-a lame n bas t’a be a meng tẽngẽ wã a yembre.
Ned kae n na n zẽk-a ye.’
3 “Bala ad a Zeova sẽn yaa Zu-soab sẽn ka to wã sẽn yeele:
‘Tẽng ning sẽn tʋmd tãb-biis tusr zabrẽ wã, neb koabg n na n kelle,
tɩ sẽn tʋmd-a neb koabgã, neb piig kell Israyɛll buudã yĩnga.’+
4 “Bala ad a Zeova sẽn yet Israyɛll buudã neba:
‘Bao-y maam n kell n vɩɩmde.+
Ra kẽng-y Gilgall+ wall y pɩʋʋg n kẽng Bɛɛr-seba ye.+
Bala sɩd-sɩda, Gilgall nebã na n kẽnga yembdo,+
tɩ Betɛll me sãam zãnga.*
6 Bao-y-yã a Zeova n kell n vɩɩmde,+
sẽn na yɩl t’a sũ-puugrã ra wa widg wa bugum a Zozɛf buudã zugu,
n dɩt Betɛll tɩ ned kae n na n kiis-a ye.
8 Soab ning sẽn maan Kima ãd-sullã ne Kesill ãd-sullã,*+
Soab ning sẽn toeemd lik bida tɩ lebg yibeoogã,
Soab ning sẽn kɩtd tɩ wĩndg lebg lik wa yʋngã,+
Soab ning sẽn tigimd mogrã ko-rãmbã
n kiigd-b tẽn-gãongã zugã+
yʋʋr la a Zeova.
9 A na n kɩtame tɩ sãoong wa pãng soabã zugu,
la a sãam zĩis nins sẽn gũbg lalsã.
10 Nebã kisa sẽn be-b tẽngã rignoorẽ n wilgd nebã b kongrã,
la b kis neb nins sẽn togsd sɩdã.+
11 Yãmb sẽn sokd naong soab pʋʋg yaoodo,
la y reegd a kood tɩ yaa fadgã* yĩnga,+
yãmb pa na n kell n zĩnd y rotã y sẽn me ne kug b sẽn peesã pʋsẽ,+
wall y kell n yũ y viyn pʋt nins y sẽn sel tɩ yaa sõma n yɩɩdã divẽ ye.+
12 Bala mam miime tɩ y kɩɩsgã yaa wʋsgo,
la tɩ y yel-wẽnã yaa kãsemse.
Yãmb maanda nin-tɩrg pãnga.
Y reegda noor-madgre,
n zãgsdẽ tɩ y kõn kao naong soab bʋʋd tɩrg tẽngã rignoorẽ ye.+
13 Rẽ n so tɩ neb nins sẽn tar yam-vẽenemã na n sĩnd wakat kãnga,
bala na n yɩɩ yel-beed wakate.+
Dẽ, a Zeova sẽn yaa tãb-biis Wẽnnaamã na n zĩnda ne yãmb
wa yãmb sẽn yet t’a bee ne yãmbã.+
tɩ daar ninga a Zeova sẽn yaa tãb-biis Wẽnnaamã
na zoe a Zozɛf yagens nins sẽn ketã nimbãanega.’+
16 “Woto wã, ad a Zeova, a Zeova sẽn yaa tãb-biis Wẽnnaamã sẽn yeele:
‘Wiisg n na n zĩnd zãma wã zĩisẽ fãa.
Soayã fãa zutu, b na n yetame yaa: “Kayto! Kayto!”
B na n boola ka-koaadb tɩ b wa yãb kʋʋre,
la b bool kʋ-yãbdb tɩ b wa wiisi.’
17 ‘Wiisg n na n zĩnd viyn pʋʋg fãa pʋgẽ,+
bala mam na n pasga yãmb sʋk n looge.’ Yaa a Zeova n yeele.
18 ‘Toog bee ne neb nins sẽn gũud a Zeova daarã ne b sũy fãa wã!+
Yãmb tagsdame t’a Zeova daarã, yɛlã na n yɩɩ wãn ne yãmba?+
A na n yɩɩ lika, a pa na n yɩ vẽenem ye.+
19 Na n yɩɩ wa ned sẽn zoet n na n põs gɩgemde, n tɩ seg urse,*
n tɩ kẽ a roogẽ wã n dɩk a nugã n tik lalgã, tɩ waaf kɛ-a.
20 Rẽ yĩnga, a Zeova daarã pa na n yɩ lika, n pa yɩ vẽenem sɩda?
A pa na n yɩ libsgu, n pa yɩ vẽenem sɩda?
21 Mam kisa yãmb tigã.+ Mam pa nong-b baa bilf ye.
Mam sũur pa noom ne kũun nins y sẽn kõt y tigiss sẽn yaa zallã sasa wã yũug ye.
22 Baa yãmb sã n kõ maam maand sẽn yõogd bugum ne kũun toor-toore,
pa na n yɩ maam noog ye.+
Yãmb zems-n-taar maandã y sẽn na n kʋ rũm-nobds n maanã pa na n ta mam yam ye.+
23 Zãag-y y yɩɩlã bʋʋr ne maam.
M da le wʋm y yʋʋm-teed sẽn tar rissã rãamd ye.+
24 Kɩt-y tɩ tɩrlem zoe wa koom,+
la wa kʋɩlg sẽn pa kʋɩt koom.
25 Yãmb a Israyɛll neba, yʋʋm pis-naasã yãmb sẽn zĩnd we-raoogẽ wã,
yãmb kõo maam maand la kũun toor-toor sɩda?+
26 Masã, yãmb na n tʋka y rĩm a Sakut ne a Kevan*
sẽn yaa y bõn-naandsã y sẽn maanã, y wẽnnaamã ãdgã,
27 tɩ mam na n kɩtame tɩ y kẽng yembd Damaas poore.’+ Yaa soab ning yʋʋr sẽn yaa tãb-biis Wẽnnaam a Zeova wã n yeele.”+
6 “Toog bee ne Siyõ neb nins sẽn kɩs b mens sɩdã,*
neb nins sẽn be Samari tãngã zug tɩ b yam gãe bãanã,+
buud ning sẽn yaa kãseng n yɩɩd buud toɛy-toɛyã fãa sʋkã nin-kãsemsã,
Israyɛll buudã neb sẽn kẽnd neb nins nengẽ wã!
2 Kẽng-y Kalne n tɩ gese.
Yi-y be n kẽng Hamat-kãsengẽ wã,+
la y sãag n ta Gat sẽn be Filisti nebã soolmẽ wã.
B sãoo rĩun-kãensã* sɩda?
B soolmã yalem yɩɩda yãmb soolmã sɩda?
4 B gãee wob-yẽn gãas zutu,+ la b yɛɛd n zĩ goeen-bɛd zutu,+
n wãbd bãgrã pe-raadã la nag-poal nins sẽn nobã.*+
5 Pɛndgã* sã n wa wẽedẽ, b tiigd n pʋda yɩɩlle.+
B maanda yʋʋm-te-paal wa a Davɩɩde.+
6 B pidsda wũmbli wã divẽ n yũuda,+
la b zaeed kaam sẽn yaa sõma wʋsgo.
La b maanda b toog kae ne a Zozɛf yagensã yel-beedã.*+
7 Rẽ n so tɩ b na n lʋɩ yembsã taoor tɩ b kẽng yembdo.+
Neb nins sẽn da yɛɛd n zĩẽ wã tigã sẽn naagd ne bʋʋrã na n saame.
8 ‘A Zeova sẽn yaa Zu-soab sẽn ka to wã wẽena ne a meng*+ n yeele:
‘“Mam kisa a Zakoob yagensã wuk-m-mengã.+
Mam kisa b gasd nins sẽn tar pãngã.+
Mam na n dɩka galʋ-tẽngã ne bũmb nins sẽn pid-a wã n ning neb a taab nusẽ.’+ Yaa a Zeova sẽn yaa tãb-biis Wẽnnaamã n yeele.
9 “‘“Neb piig sã n kell ro-yɛng pʋga, bãmb me na n kiime. 10 B roagd* n na n wa wʋk-b n tɩ yõog bugum yembr-yembre. A na n talla b kõabã n yi roogẽ wã. Rẽ poore, a na n soka ned ning fãa sẽn be roogã ro-pʋsẽ wã yaa: ‘Ned n ket be ne foo bɩ?’ A na n leokame yaa: ‘Ned a to kae ye!’ Dẽ, a na n yeelame yaa: ‘Kell n sĩndi! Bala pa wakat b sẽn segd n pʋd a Zeova yʋʋrã ye.’”
11 Bala yaa a Zeova n kõt noore.+
A na n wãa ro-bɛdã tɩ b lebg raboodo,
la a wã ro-bõonegã tɩ b lebg zõm-zõme.+
12 Wed-moos zoeta pĩig zug sɩda?
Ned na n koo pĩig zug ne niis sɩda?
13 Yãmb maanda sũ-noog ne bũmb sẽn ka yõodo,
la y yetẽ yaa: “Pa ne tõnd mens tõog la d sẽn lebg pãens rãmbã* sɩda?”+
14 Woto wã, Israyɛll neba, mam na n kɩtame tɩ buud wa zab ne yãmba.+
B na n namsa yãmb sẽn sɩng Lebo-hamat*+ n tãag Araba wã kosoogã.’* Yaa a Zeova sẽn yaa tãb-biis Wẽnnaamã n yeele.”
7 Ad bũmb ning a Zeova sẽn yaa Zu-soab sẽn ka to wã sẽn wilg maam: Mam yãa a sẽn tigim kalwaare, yaoolem koodã* sẽn wa n sɩng yiibã sasa. Yaa yaoolem kood nins sẽn yi b sẽn wʋr rĩmã rũmsã yamd poorã. 2 Kalwaarã sẽn wãb soolmã moodã la tɩɩsã n sa wã, mam yeelame: “Zu-soab sẽn ka to a Zeova, m bõos tɩ y maan sugri!+ A Zakoob yagensã na n yɩɩ wãn n põse?* Bala b ka pãng ye!”+
3 Dẽ, a Zeova toeema yam.*+ A Zeova yeelame yaa: “Bõn-kãngã pa na n yɩ ye.”
4 Ad bũmb ning a Zeova sẽn yaa Zu-soab sẽn ka to wã sẽn wilg maam: Mam wʋma a Zeova sẽn yaa Zu-soab sẽn ka to wã sẽn yeel tɩ b sɩbg soolmã ne bugum. Bugmã rɩɩ ko-zulumsã sẽn yalmã, la a rɩ soolmã babg a ye. 5 Dẽ, mam yeelame yaa: “Zu-soab sẽn ka to a Zeova, m bõos tɩ y bas woto.+ A Zakoob yagensã na n yɩɩ wãn n põse?* Bala b ka pãng ye!”+
6 Dẽ, a Zeova toeema yam.*+ A Zeova sẽn yaa Zu-soab sẽn ka to wã yeelame yaa: “Bõn-kãngã me pa na n yɩ ye.”
7 Ad bũmb ning a sẽn wilg maam: Mam yãa a Zeova sẽn yas lalg b sẽn tall wĩ-makdg* n me zugu. A ra zãada wĩ-makdg a nugẽ. 8 A Zeova soka maam yaa: “Amose, bõe la fo ne-yã?” Tɩ mam leok yaa: “Wĩ-makdga.” T’a Zeova yeele: “Mam na n ninga wĩ-makdg Israyɛll nebã sẽn yaa mam nin-buiidã sʋka. Mam pa na n le kõ-b sugr ye.+ 9 A Izaak yagensã zĩ-zãntsã+ na n lebga raboogo. Israyɛll wẽnd-dotã na n sãamame.+ Mam na n waa ne sʋʋg n zab ne a Zerobowam buudã neba.”+
10 A Amazɩya sẽn yaa Betɛll maan-kʋʋdã+ tʋma koɛɛg tɩ b tɩ taas Israyɛll rĩm a Zerobowam+ n yeele: “A Amos bee Israyɛll buudã sʋka, n pirsd nebã n dat tɩ b kɩɩs yãmba.+ Soolmã neb yam yii a goamã fãa.+ 11 Bala ad a Amos sẽn yete: ‘B na n kʋʋ a Zerobowam ne sʋʋga. Sɩd-sɩda, b na n yiisa Israyɛll nebã b soolmẽ wã n tall-b n kẽng yembdo.’”+
12 Rẽ poore, a Amazɩya yeela a Amos yaa: “Foom a bãngda,* zoe n kẽng Zida soolmẽ wã n tɩ bao rɩɩb* be. Yaa be la fo tõe n togs bãngr-goama.+ 13 La fo pa segd n le togs bãngr-goam Betɛll ye.+ Bala yaa rĩm wẽnd-doogo,+ la rĩung roogo.”
14 Rẽ la a Amos leok a Amazɩya yaa: “Mam da pa no-rɛɛsa, m pa no-rɛɛs biig me ye. Mam da yaa rũm-kɩɩma,+ la m get wom-sees* yelle. 15 La a Zeova kɩtame tɩ mam bas rũmsã gũubu. A Zeova yeela maam yaa: ‘Kẽng n tɩ togs Israyɛll sẽn yaa mam nin-buiidã bãngr-goama.’+ 16 Masã, kelg a Zeova sẽn yeele: ‘Fo yetame yaa: “Ra togs bãngr-goam n ning Israyɛll taale,+ la f ra moon+ me n ning a Izaak yagensã taal ye.” 17 Woto wã, ad a Zeova sẽn yeele: “Fo pagã na n lebga pʋg-yoodr tẽngã pʋgẽ. B na n kʋʋ fo kom-dibli wã ne f kom-pugli wã ne sʋʋse. B na n maga fo pʋtã ne wĩir n pʋɩ neb a taaba. Fo mengã na n kii soolem sẽn yaa rẽgd pʋgẽ. Sɩd-sɩda, b na n yiisa Israyɛll nebã b soolmẽ wã n tall-b n kẽng yembdo.”’”+
8 Ad bũmb ning a Zeova sẽn yaa Zu-soab sẽn ka to wã sẽn wilg maam: Mam yãa tɩ-bi-moaam* sẽn be peoog pʋgẽ. 2 Dẽ, a soka maam yaa: “Amose, yaa bõe la fo ne-yã?” Tɩ mam leok yaa: “Mam nee tɩ-bi-moaam sẽn be peoog pʋgẽ.”* T’a Zeova yeel maam yaa: “Saabã wakat taa Israyɛll nebã sẽn yaa mam nin-buiidã yĩnga. M pa na n le kõ-b sugr ye.+ 3 ‘Baraare, wẽnd-doogã yɩɩl na n lebga wiisgu.+ B na n loba kũ-rãmb wʋsg zĩig fãa+ tɩ lebg sɩddd!’ Yaa a Zeova sẽn yaa Zu-soab sẽn ka to wã n yeele.
4 Yãmb a neb nins sẽn tabd naong rãmbã, kelg-y-yã,
n paas neb nins sẽn kɩtd tɩ soolmã sik-m-mens rãmbã paamd bõnã,+
5 la sẽn yete: ‘Dabʋr la ki-paalgã tigr na n sa+ tɩ d paam n koos d koodo?
Dabʋr la Vʋʋsg daarã+ na n sa tɩ d paam n kõ kood tɩ b koose?
Dẽ, d na n tõog n maana efa* makdgã kɩdga,
n maan sɩkl* makdgã bedre,
la d toeem d balãns-rãmbã sẽn na yɩl n zãmb neba.+
6 Dẽ, d na n tõog n dɩka wanzuri n da nimbãan-neba,
n dɩk neooda n kõ n deeg naong soaba,+
la d koos kood ning sẽn pa sõma wã.’
7 A Zeova wẽena ne soab ning poorẽ a Zakoob sẽn zẽkd a zugã,+ n yeele:
‘Mam pa na n tol n yĩm b tʋʋm-tʋmdɩ wã baa a yembr ye.+
Soolmã tõr kõn yɩ wa Nill kʋɩlgã koom sẽn pid n puugdẽ wã sɩda?
A pa na n gudg la a sig wa Nill kʋɩlgã sẽn be Ezɩptã sɩda?’+
9 A Zeova sẽn yaa Zu-soab sẽn ka to wã yeelame yaa: ‘Baraare,
mam na n kɩtame tɩ wĩntoogã kẽ wĩnto-sʋka,
la m kɩt tɩ soolmã lebg lik wĩntoogo.+
Mam na n kɩtame tɩ seesã fãa sẽgen boto, la m kɩt tɩ zutã fãa kõoge.
Mam na n kɩtame tɩ yɩ wa ned sẽn yãbd a bi-ribl-yend kʋʋre.
Ra-kãng baasgã na n sɩd yɩɩ toogo.’
11 A Zeova sẽn yaa Zu-soab sẽn ka to wã yeelame: ‘Daar n wate,
tɩ mam na n kɩt tɩ kom kẽ soolmã,
la pa na n yɩ rɩɩb* kom wall koom ko-yũud ye.
Na n yɩɩ a Zeova goamã kelgr kom la b ko-yũudu.+
12 Nebã na n kẽndame la b lengdẽ, n yit mogr a ye n kẽngd mogr a to,
la b yit rɩtg n kẽngd yaanga.*
B na n yeebdame n baood a Zeova goamã n na n kelge, la b pa na n paam ye.
13 Baraare, pʋg-sad-neeb sẽn pa mi raoa,
n paas kom-bɩɩs na n soba ko-yũudã yĩnga.
14 Bãmb yaa neb nins sẽn wẽend ne Samari+ wẽn-faadã* n yetẽ:
“Foom a Danne,+ d wẽenda ne fo wẽnnaamã sẽn vɩ wã!”
B yetame me: “D wẽenda ne Bɛɛr-seba+ sorã!”
B na n lʋɩɩme, n pa le yik yɛs ye.’”+
9 Mam yãa a Zeova+ sẽn yas tẽn-kugrã zugu. A yeelame: “Wẽ ra-lukã zugu, tɩ rigno-kogsã rigimdi. Fiuus ra-lugsã zutã, tɩ mam na n kʋʋ nin-buiidã yaoolem dãmbã ne sʋʋga. Sẽn zoet-bã baa a ye pa na n tõog n zãag zĩig ye. Sẽn makd-a n na n põs pa na n tõog n põs ye.+
mam nugã na n yiis-b-la be.
B sã n dʋ saasẽ,
mam na n kɩtame tɩ b yi be n sigi.
3 B sã n solg Karmell tãngã zugu,
mam na n gẽes-b-la be n yõg-ba.+
B sã n sig mogrã tẽngr sẽn na yɩl n solg tɩ m da yã-ba,
mam na n kɩtame tɩ waafã kɛ-b be.
4 B sã n tall-b n kẽng yembd b bɛɛbã soolmẽ,
mam na n kɩtame tɩ b kʋ-b be ne sʋʋse.+
Mam ninã na n bee b zutu, la pa sẽn na n maan-b neer yĩng ye. Yaa sẽn na n maan-b wẽnga.+
5 Bala tãb-biis naab a Zeova sẽn yaa Zu-soab sẽn ka to wã n yaa Soab ning sẽn na n sɩɩs soolmã*
n kɩt t’a yẽnege,+ tɩ neb nins fãa sẽn be a pʋgẽ wã maan sũ-sãangã.+
Soolmã tõr na n yɩɩ wa Nill kʋɩlgã koom sẽn pid n puugdẽ wã.
A na n siga wa Nill kʋɩlgã sẽn be Ezɩptã.+
6 ‘Soab ning sẽn met a rʋʋds saasẽ,
la a met a roogã tẽngã zugẽ wã,
Soab ning sẽn tigimd mogrã ko-rãmbã
n kiigd-b tẽn-gãongã zugã+
yʋʋr la a Zeova.’+
7 A Zeova yeelame: ‘Yãmb a Israyɛll neba, yãmb pa wa Kuus nebã mam nifẽ sɩda?
Mam pa yiis Israyɛll nebã Ezɩpt soolmẽ wã,+
n yiis Filisti nebã Kɛrɛte,+ la m yiis Siiri nebã Kɩɩr+ sɩda?’
8 ‘Kelg-y-yã! Maam a Zeova sẽn yaa Zu-soab sẽn ka to wã nin bee rĩung ning sẽn maand yel-wẽnã zugu.
Mam na n menes-a-la tẽn-gãongã zugu.+
La m pa na n menes a Zakoob buudã neb zãng ye.’+ Yaa a Zeova n yeele.
9 ‘Bala mam na n kõo noore.
Mam na n zugsa Israyɛll nebã buud toɛy-toɛyã fãa sʋka,+
wa ned sẽn tar goaadg n goodẽ,
tɩ kugr baa a ye pa lʋɩt tẽngã.
10 Sʋʋg n na n kʋ mam nin-buiidã sʋk neb nins fãa sẽn maand yel-wẽnã.
Yaa neb nins sẽn yete: “Yel-beedã pa na n pẽneg tõnd wall a ta-d ye.”’
11 ‘Baraare, mam na n lebs n tilga a Davɩɩd zãndã*+ sẽn da lʋɩ wã.
M na n yẽda võyã.*
Mam na n lebs n manega a raboogã.
M na n lebs n me-a lame t’a yɩ wa pĩndã,+
12 sẽn na yɩl tɩ mam nin-buiidã soog Edom+ neb nins sẽn ketã,
la buud toɛy-toɛyã fãa sẽn zãad mam yʋʋrã.’ Yaa a Zeova, soab ning sẽn maand rẽ wã n yeele.
13 A Zeova yeelame: ‘Wakat n wat
tɩ mam nin-buiidã na n sɩng koobo, tɩ b nan pa kẽeb n sa ye.
B na n sɩnga bʋdbo, n nan pa tab viyn biisã n sa ye.+
Divẽ-noog na n tosda tãensã zutu,+
14 Mam na n talla Israyɛll nebã sẽn yaa mam nin-buiidã sẽn da be yembdã n lebg n wa.+
B na n lebs n mee b tẽnsã sẽn lebg raboodã n zĩnd b pʋsẽ.+
B na n sela viyn tɩɩse, n yũ b divẽ wã.+
B na n sela zẽedo, n dɩ b biisã.’+
15 ‘Mam na n zĩnig-b-la b soolmẽ wã.
Ned pa na n tol n le yiis-b
soolem ning mam sẽn kõ-bã pʋgẽ ye.’+ Yaa yãmb Wẽnnaam a Zeova n yeele.”
Rat n yeel tɩ “Sẽn yaa zɩɩbo,” bɩ “Sẽn tʋk zɩɩbo.”
Bɩ, “nin-kʋʋr.”
Ebre, “sẽn zãad-a naam dasaar n be Bɛt-edɛnnã.”
Ebre, “sẽn zãad-a naam dasaar n be Askalonnã.”
Bɩ, “nin-kʋʋr.”
Ebre, “bʋ-kaoodã.”
Bɩ, “zãmsgã.”
Ges-y gom-biis võor bilgrã zĩigẽ.
Bɩ, “sɩɩg ye.”
Bɩ, “sɩɩg ye.”
Bɩ, “sẽn tar-b sũy sẽn kɛgem.”
Ebre, “bãng-yã.”
Bɩ, “zems taab n seg taab sɩda?”
Pa rẽ bɩ, “tɩ rɩɩb pa be a pʋgẽ sɩda?”
Bɩ, “gãas sẽn maan Damaas.”
Bɩ, “kõ kaset n ning a Zakoob yagensã taale.”
Bɩ, “nin-kʋʋrã.”
Pa rẽ bɩ, “Rot wʋsg.”
Bɩ, “zu-soben-dãmb.”
Bɩ, “n kɩɩse.”
Bɩ, “mam sẽn pa kõ yãmb rɩɩb.”
Ebre, “bur.”
Bɩ, “kʋʋr yɩɩllã.”
Pa rẽ bɩ, “lebg sɩ-wẽns zĩiga.”
Absẽnt yaa tɩɩga, t’a sũmã yaa toog liga n le yaa zẽnem.
Woto yaa ãd-sul yʋya, tɩ f sã n be tẽngã zug n get-b bɩ b wõnd rũms la teed kẽere.
Fadg yaa lampo buudu.
Yaa we-rũng sẽn tar nao a naas n yaa bedre, t’a noorã wõnd baag noore.
Wẽnnaam-dãmb a yiibã tõe n makda Satirn b sẽn da waoogd wa wẽnnaamã.
Bɩ, “sẽn sek b mensã.”
Vẽenega, yaa Zida ne Israyɛll rĩungã yell la b gomda.
Bɩ, “lol-poalã.”
Bɩ, “Yʋʋm-teoog sẽn tar rissã.”
Ebre, “b pa lʋɩ bãag a Zozɛf yagensã yel-beedã yĩng ye.”
Bɩ, “a sɩɩgã.”
Ebre, “B ba wã ba-biig.”
Absẽnt yaa tɩɩga, t’a sũmã yaa toog liga n le yaa zẽnem.
Ebre, “paam yɩɩlã.”
Bɩ, “Hamat noor.”
Ges-y gom-biis võor bilgrã zĩigẽ.
Rat n yeel tɩ kood nins sẽn yit yʋʋm-vẽkr la wao-fugdg kiuugã pʋgẽ wã.
Ebre, “yiki?”
Bɩ, “maana a bãngẽ.”
Ebre, “yiki?”
Bɩ, “maana a bãngẽ.”
Yaa wĩir b sẽn sẽbg a noorã ne kutu, kugr wall yagdo, tɩ b tar n makd lalg n na n bãng a sã n yasa tɩrga.
Yaa ned sẽn taasd a taab bũmb Wẽnnaam sẽn vẽneg-a t’a yã.
Ebre, “wãb bur.”
Yaa tɩɩg sẽn wõnd kankanga.
Bɩ, “tɩ-biis sẽn moogd sɩpaolg.”
Tõe tɩ yaa kankam ne Mak kɛgl la sẽn be peoogã pʋgẽ wã.
Ges-y vẽnegr ning sẽn yaa B14.
Ges-y vẽnegr ning sẽn yaa B14.
Bɩ, “tẽngã.”
Bɩ, “kʋʋr yɩɩla.”
Ebre, “bur.”
Bɩ, “wĩndgã sẽn yitẽ.”
Ebre, “Samari taalã.”
Ges-y gom-biis võor bilgrã zĩigẽ.
Bɩ, “dũniyã.”
Bɩ, “fu-roogã. sẽokã.”
Bɩ, “b võyã.”
Ebre, “yẽnegd.”