A ZAKARI SEBRE
1 A Daryuus+ naamã yʋʋm a yiib-n-soabã kiuug a nii-n-soabã, a Zeova goma ne no-rɛɛs a Zakari.*+ A Zakari yaa a Berekɩya biiga, t’a Berekɩya yaa a Ido biiga. A yeelame yaa: 2 “A Zeova sũur da yika wʋsg ne yãmb yaab-rãmbã.+
3 “Yeel nin-buiidã yaa: ‘Ad a Zeova sẽn yaa tãb-biis naabã sẽn yeele: “‘Lebg-y n wa-y mam nengẽ.’ Yaa a Zeova sẽn yaa tãb-biis naabã n yeele. ‘Dẽ, mam na n lebg n waa yãmb nengẽ.’+ Yaa a Zeova sẽn yaa tãb-biis naabã n yeele.”’
4 “‘Ra yɩ-y wa y yaab-rãmbã ye. Pĩnd wẽndẽ no-rɛɛsdbã ra yet-b lame yaa: “Ad a Zeova sẽn yaa tãb-biis naabã sẽn yeele: ‘M bõos tɩ y bas y tʋʋm-wẽnsã la y manesem-wẽnsã.’”’+
“‘La b pa kelg maam ye. B pa kelg mam goamã baa bilf ye.’+ Yaa a Zeova n yeele.
5 “‘Yãmb yaab-rãmbã bee yɛ rũndã-rũndã? La no-rɛɛsdbã yẽ, b vɩɩ wakat fãa yĩng bɩ? 6 La goam la noy nins m sẽn da kɩt tɩ no-rɛɛsdbã sẽn yaa mam tʋm-tʋmdbã moonã, yãmb yaab-rãmbã yãa b pidsgu. Bɩ bõe?’+ Rẽ n so tɩ b lebg n wa mam nengẽ n yeel yaa: ‘A Zeova sẽn yaa tãb-biis naabã maana tõnd wa sẽn zems d tʋʋm-tʋmdɩ wã la d manesmã, wa sẽn zems a sẽn da yeel t’a na n maana tõndã.’”+
7 A Daryuus naamã yʋʋm a yiib-n-soabã,+ kiuug piig la a ye soabã rasem pisi la a naasã daare, rat n yeel tɩ Sebat* kiuugã pʋgẽ, a Zeova kɩtame tɩ no-rɛɛs a Zakari sẽn yaa a Berekɩya biiga, la a Ido yagengã yã vẽnegre, n yeele: 8 “Mam paama vẽnegr ne yʋngo. Mam yãa rao sẽn zao wed-mo-miuug n yas longẽ wã, mirt tɩɩsã sʋka. Wed-moos sẽn yaa miidu, zẽes la pɛɛl n da be a poorẽ wã.”
9 Dẽ, mam sokame: “M zu-soaba, yaa ãnd dãmb la woto?”
Malɛk ning sẽn da gomd ne maamã leokame yaa: “Mam na n wilga foo b sẽn yaa b rãmba.”
10 Rao ning sẽn da yas mirt tɩɩsã sʋkã yeelame: “Yaa a Zeova sẽn tʋm b rãmb tɩ b yi n gilg tẽngã zugã.” 11 B yeela a Zeova malɛk ning sẽn da yas mirt tɩɩsã sʋkã yaa: “Tõnd gilga tẽngã zugu, n mik tɩ tẽngã tõr zĩi ne laafɩ la bãane.”+
12 Dẽ, a Zeova malɛkã yeelame: “Zeova sẽn yaa tãb-biis naaba, yãmb na n basame n pa zoe Zerizalɛm ne Zida tẽnsã nimbãaneg hal tɩ ta dabʋre?+ Yãmb sũurã yika ne bãmb yʋʋm pis-yopoe wã pʋgẽ.”+
13 A Zeova leoka malɛk ning sẽn da gomd ne maamã ne gom-noodo, la ne belsg goama. 14 Rẽ poore, malɛk ning sẽn da gomd ne maamã yeela maam yaa: “Zẽk f koɛɛg n yeele: ‘Ad a Zeova sẽn yaa tãb-biis naabã sẽn yeele: “Mam na n sõnga Zerizalɛm la Siyõ ne yẽesem. Mam na n maana rẽ ne yẽesem wʋsgo.+ 15 Mam sũurã yika wʋsg ne buud nins sẽn zĩ bãanã.+ Bala mam sũurã ra pa yik wʋsg ye.+ La bãmb paasa yel-beedã pãnga.”’+
16 “Woto wã, ad a Zeova sẽn yeele: ‘“Mam na n le zoee Zerizalɛm nimbãanega.+ B na n mee mam doogã a pʋgẽ.+ B na n maga Zerizalɛm ne wĩ-makdga.”+ Yaa a Zeova sẽn yaa tãb-biis naabã n yeele.’
17 “Le zẽk f koɛɛg n yeel yaa: ‘Ad a Zeova sẽn yaa tãb-biis naabã sẽn yeele: “Mam tẽnsã na n le pida ne bõn-sõma. A Zeova na n le belsa Siyõ.+ A na n le yãka Zerizalɛm.”’”+
18 Dẽ, mam zẽka m neng n yã yɩɩl a naase.+ 19 Mam soka malɛk ning sẽn da gomd ne maamã yaa: “Bõn-kãensã makda bõe?” T’a leok n yeele: “Yaa yɩɩl nins sẽn sãeeg Zida+ ne Israyɛll+ la Zerizalɛm+ nebã.”
20 Rẽ poore, a Zeova wilga maam nug-tʋʋm dãmb a naase. 21 Mam sokame yaa: “Nin-kãensã wat n na n maana bõe?”
T’a yeele: “Yaa yɩɩn-kãensã la sẽn sãeeg Zida nebã hal tɩ ned baa a ye ra pa tõe n zẽk a zugã. Nin-kãensã na n waame, n kẽes-b rabeem. B na n wa kaoo buud toɛy-toɛyã yɩɩlã. Yaa buud nins sẽn zẽk b yɩɩl n zab ne Zida soolmã sẽn na yɩl n sãeeg a nebã.”
2 Mam zẽka m neng n yã rao sẽn zãad wĩ-makdg+ a nugẽ. 2 Dẽ, mam sokame yaa: “Yaa yɛ la fo rabda?”
T’a yeele: “Mam dabd n na n tɩ maka Zerizalɛm, n bãng a yalmã la a woglmã.”+
3 Malɛk ning sẽn da gomd ne maamã yiime, tɩ malɛk a to wa seg-a. 4 Dẽ, a yeel-a lame yaa: “Zoe n tɩ yeel bi-bɩɩgã yaa: ‘“Nebã ne rũmsã sẽn na n lebg wʋsg Zerizalɛmmã yĩnga,+ b na n zĩnda Zerizalɛm+ wa b sẽn be tẽng sẽn pa gũbg lalg pʋgẽ. 5 Mam na n lebga wa bugum lalg n gũbg-a,+ la m kɩt tɩ m ziirã pid-a.”+ Yaa a Zeova n yeele.’”
6 “Wa-y-yã! Wa-y-yã! Zoe-y n yi-y rɩtg soolmã.”+ Yaa a Zeova n yeele.
“Bala mam da kɩtame tɩ y sãeeg n kẽ ween-vɩɩs a naasã.”*+ Yaa a Zeova n yeele.
7 “Siyõ neba, wa-y-yã! Yãmb sẽn be Babilon pʋgẽ wã,+ zoe-y n loog-y-yã. 8 Bala ad a Zeova sẽn yaa tãb-biis naabã, soab ning sẽn paam ziiri, tɩ rẽ poor t’a tʋm maam buud nins sẽn da zɛɛd yãmbã+ nengẽ wã sẽn yeele: ‘Ned ning fãa sẽn sɩɩs yãmb sɩɩsa mam nin-beelle.+ 9 Bala masã, mam na n zẽka m nug n zab ne-ba. B na n lebga b yembsã te-zɛɛdem.’+ Woto, yãmb na n bãngame tɩ sɩd yaa a Zeova sẽn yaa tãb-biis naabã n tʋm maam.
10 “Foom a Siyõ bi-pugla, kɩdem sũ-noogo.+ Bala mam watame,+ n na n zĩnd fo pʋgẽ.”+ Yaa a Zeova n yeele. 11 “Baraare, buud wʋsg neb na n zĩnda maam a Zeova poorẽ.+ B na n lebga mam neba. Mam na n zĩnda yãmb sʋka.” Woto, yãmb na n bãngame tɩ sɩd yaa a Zeova sẽn yaa tãb-biis naabã n tʋm maam yãmb nengẽ. 12 A Zeova na n sooga Zida tɩ yɩ a pʋɩɩr tẽn-gãong ning sẽn yaa sõngã zugu. A na n le yãka Zerizalɛm.+ 13 Bɩ ninsaalbã* fãa sĩnd a Zeova taoore. Bala a yita a zĩ-sõngẽ wã n na n maan bũmbu.
3 Rẽ poore, a wilga maam maan-kʋʋdb kãsem a Zozuwe+ sẽn yas a Zeova malɛkã taoore, t’a Sʋɩtãan+ yas a nug-rɩtgã n na n kɩɩs-a. 2 Dẽ, a Zeova malɛkã yeela a Sʋɩtãan yaa: “Sʋɩtãana, m bas-f-la ne a Zeova!+ M bas-f-la ne a Zeova sẽn yaa soab ning sẽn yãk Zerizalɛmmã!+ Nin-kãngã pa wa raoog sẽn dɩt bugum b sẽn yiis bugmẽ sɩda?”
3 La a Zozuwe ra yera fu-rẽgd n yas malɛkã taoore. 4 Malɛkã yeela sẽn da yas-b a taoorã yaa: “Yees-y-yã a fu-rẽgdã.” Rẽ poore, a yeel-a lame yaa: “Gese! Mam yiisa f kongrã* n bas-fo. B na n yeelg-f-la fu-neeba.”+
5 Dẽ, mam yeelame: “Bɩ b vil a zugã ne zu-vindg sẽn yaa yɩlemde.”+ B vila a zugã ne zu-vindg sẽn yaa yɩlemdã, la b yeelg-a futu. A Zeova malɛkã ra yasa yambẽ. 6 Rẽ poore, a Zeova malɛkã yeela a Zozuwe yaa: 7 “Ad a Zeova sẽn yaa tãb-biis naabã sẽn yeele: ‘Fo sã n tũud mam noyã, la f tʋmd tʋʋm nins fãa f sẽn segd n tʋmã mam taoore, fo na n yɩɩ mam nin-buiidã* bʋ-kaooda,+ la f ges mam samanã yelle.* Mam na n kõo foo sor tɩ fo tõe n wat sẽn yas-b ka wã sʋka.’
8 “‘Foom a maan-kʋʋdb kãsem a Zozuwe, m bõos tɩ f kelge, foo ne f tũud-n-taasã sẽn zĩ fo taoorã, bala yãmb yaa bãnde. Kelg-y-yã! Mam na n kɩtame tɩ m tʋm-tʋmd+ ning b sẽn boond t’a Tobengã wa!+ 9 Ges-y kugr ning mam sẽn dɩgl a Zozuwe taoorã! Kug-yɛngã zugu, nin a yopoe n be be. Sẽn paase, mam na n gʋlsa gʋlsem a zugu. M na n yiisa soolem-kãngã taalã daar-n-yɛnga.’+ Yaa a Zeova sẽn yaa tãb-biis naabã n yeele.
10 “‘Baraare, yãmb ned kam fãa na n boola a yak t’a wa a viyn tɩɩg tẽngre, la a kankang tẽngre.’”+ Yaa a Zeova sẽn yaa tãb-biis naabã n yeele.
4 Malɛk ning sẽn da gomd ne maamã lebg n waame, n nek maam wa b sẽn nekd ned sẽn gõe. 2 Dẽ, a soka maam yaa: “Bõe la fo ne-yã?”
Tɩ mam yeel yaa: “Mam nee fɩtl-doagendga, t’a tõrã fãa yaa sãnem,+ tɩ la-bil rog a zugẽ wã. Fɩtl-dãmb a yopoe n be a zugu.+ Yaa bãmb b yopoe. Fɩtl-dãmb nins sẽn be a zugẽ wã tara tuyo-rãmb a yopoe. 3 Oliiv tɩɩs a yiib n be fɩtl-doagendgã sɛɛgẽ.+ A ye n be la-bilã rɩtgo, t’a to be goabga.”
4 Dẽ, mam soka malɛk ning sẽn da gomd ne maamã yaa: “M zu-soaba, bõn-kãensã makda bõe?” 5 Tɩ malɛk ning sẽn da gomd ne maamã sok maam yaa: “Fo pa mi bõn-kãensã sẽn makd bũmb ninga?”
Tɩ mam leok yaa: “M zu-soaba, ayo.”
6 Rẽ la a yeel maam yaa: “Ad a Zeova sẽn yet a Zorobabɛll bũmb ningã: ‘“Pa na n yɩ ne tãb-biis pãnga, wall ne ninsaal pãng ye.+ Na n yɩɩ ne mam vʋʋsmã.”+ Yaa a Zeova sẽn yaa tãb-biis naabã n yeele. 7 Foom a tãn-lug-lugi, fo yaa ãnda? Fo na n lebga tẽn-nabr+ a Zorobabɛll+ taoore. A na n talla wẽnd-doogã yĩngr kugrã n wa, tɩ nebã kaasd n yetẽ yaa: “Ad a sɩd yaa neere! Ad a sɩd yaa neere!”’”
8 A Zeova le goma ne maam n yeele: 9 “A Zorobabɛll nusã n yẽbg ro-kãngã,+ leb n yaa yẽ nusã n na n baas-a.+ Woto, yãmb na n bãngame tɩ sɩd yaa a Zeova sẽn yaa tãb-biis naabã n tʋm maam yãmb nengẽ. 10 Ãnda n paoog wakat ning yɛlã sẽn sɩng bilf-bilfã?*+ Bala b na n kɩdma sũ-noogo, b sã n wa yã wĩ-makdgã* a Zorobabɛll nugẽ. Bõn-kãensã b yopoe wã yaa a Zeova ninã sẽn get dũniyã zĩig fãa wã.”+
11 Mam sok-a lame yaa: “Oliiv tɩɩs a yiibã sẽn be fɩtl-doagendgã rɩtg la a goabgã makda bõe?”+ 12 Mam leb n sok-a lame: “Oliiv wil-poal* a yiibã sẽn kiigd kaam sẽn yaa kõodr-kõodre, tɩ tũud sãnem tuyo-rãmb a yiibã n kẽed la-bilẽ wã makda bõe?”
13 T’a sok maam yaa: “Fo pa mi bõn-kãensã sẽn makd bũmb ninga?”
Tɩ mam leok yaa: “M zu-soaba, ayo.”
14 T’a yeele: “B makda neb a yiib nins Wẽnnaam sẽn yãke,* tɩ b yas yẽ sẽn yaa dũniyã tõr Zu-soabã sɛɛgẽ wã.”+
5 Mam le zẽka m neng n gese, n yã seb-pindem sẽn laande. 2 A soka maam yaa: “Bõe la fo ne-yã?”
Tɩ mam leok yaa: “Mam nee seb-pindem sẽn laande, t’a woglmã yaa kãntɩɩg* pisi, t’a yalmã yaa kãntɩɩg piiga.”
3 Dẽ, a yeela maam yaa: “Yãoã yaa kãab-wẽng sẽn yi n saagd dũniyã gill zugu. Bala ned ning fãa sẽn zuuda,+ b pa sɩbg-a ye. Yaa rẽ la sẽn gʋls seb-pindmã neng a ye wã. Ned ning fãa sẽn wẽend me,+ b pa sɩbg-a ye. Yaa rẽ la sẽn gʋls seb-pindmã neng a to wã. 4 ‘Mam tʋm-a lame t’a yi. A na n tɩ kẽe sẽn zuud-a roogẽ, ne sẽn wẽend-a zirẽ-be-wẽeneg ne mam yʋʋrã roogẽ. A na n paa ro-kãng pʋgẽ n dɩ-a, n dɩ a raadã la a kugã.’ Yaa a Zeova sẽn yaa tãb-biis naabã n yeele.”
5 Dẽ, malɛk ning sẽn da gomd ne maamã kolgame, n yeel maam yaa: “M bõos tɩ f zẽk f neng n ges bũmb ning sẽn yitã.”
6 Tɩ mam sok yaa: “Wã me yaa bõe?”
T’a yeele: “Yaa laok sẽn zems efa* la sẽn yitã.” A paasame: “Nin-wẽnsã yalẽ yaa woto dũniyã gill zugu.” 7 Mam yãame tɩ b zẽka limdã sẽn yaa gilg n maan ne namdã. Pag n da zĩ laokã pʋgẽ. 8 Dẽ, a yeelame: “Pʋg-kãngã yʋʋr boondame t’a Wẽnem.” Rẽ poore, a tus-a lame n lebs laokã sẽn zems efa wã pʋgẽ, la a lebs limdã sẽn maan ne namd tɩ yaa zɩsgã n pag laokã noor ne pãnga.
9 Mam zẽka m neng n yã pagb a yiib sẽn wate. B ra laanda sobgẽ wã. B ra tara pɩgs sẽn wõnd kʋl-yaadg pɩgsa. B zẽka laokã yĩngri.* 10 Mam soka malɛk ning sẽn da gomd ne maamã yaa: “Yɛ la b tar laokã sẽn zems efa wã n dabda?”
11 T’a leok yaa: “B tar-a lame n dabd Sineyaar*+ soolmẽ wã, n na n tɩ me roog n kõ-a. B sã n wa maneg roogã n sa, b na n dɩgl-a-la a zĩigẽ wã be.”
6 Rẽ poore, mam le zẽka m neng n yã saar-dãmb* a naas sẽn yi tãens a yiib sʋk n watẽ. Tãensã ra yaa zũudu. 2 Pipi saarã wed-moosã ra yaa miidu, tɩ saar a yiib-n-soabã wed-moos yaa sabla.+ 3 Saar a tãab-n-soabã wed-moos ra yaa pɛɛla, tɩ saar a naas-n-soabã wed-moos yaa pẽrem-pẽrem la sẽn tẽgse.+
4 Mam soka malɛk ning sẽn da gomd ne maamã yaa: “M zu-soaba, bõn-kãensã makda bõe?”
5 Malɛkã leoka maam yaa: “Yaa vʋʋsem a naasã+ sẽn be saasẽ wã n yi, b sẽn yaas dũniyã tõr Zu-soabã taoorã poore.+ 6 Saar ning sẽn tar wed-mo-sablã yiime n dabd rɩtg soolmẽ wã.+ Wed-mo-pɛɛlã yiime n dabd mogrã rʋʋnde, tɩ wed-mo-pẽrem-pẽrmã yi n dabd goabg soolmẽ wã. 7 Wed-moos nins sẽn tẽgsã ra yãgdame n na n yi n gilg tẽngã.” Dẽ, a yeelame: “Kẽng-y-yã! Gilg-y tẽngã.” B sɩnga tẽngã gilgri.
8 Rẽ poore, a zẽka a koɛɛg n yeel maam yaa: “Gese! Sẽn yi-b n dabd rɩtg soolmẽ wã kɩtame t’a Zeova vʋʋsmã zĩnd rɩtg soolmẽ wã.”
9 A Zeova le goma ne maam n yeele: 10 “Reeg neb nins sẽn be yembdã kũunã a Hɛldayi ne a Tobiza la a Yedaya sẽn tall n wa wã. Baraare, fo segd n tũu nin-kãensã sẽn yi Babilon n wa wã, n kẽng a Sofoni biig a Zoziyas zakẽ wã. 11 Fo segd n dɩka wanzuri ne sãnem n maan maanfo,* n fõgen a Yehozadak biig a Zozuwe+ sẽn yaa maan-kʋʋdb kãsmã. 12 La f yeel-a yaa:
“‘Ad a Zeova sẽn yaa tãb-biis naabã sẽn yeele: “Ad rao ning yʋʋr sẽn boond t’a Tobengã.+ A na n paa a zĩigẽ wã n tobe. A na n mee a Zeova roogã.+ 13 Yaa yẽ la soab ning sẽn na n me a Zeova roogã. Yẽ la soab ning sẽn na n deeg naamã. A na n zĩnda a geerẽ wã n dɩ naam. Sẽn paase, a na n zĩnda a geerẽ wã n yɩ maan-kʋʋda.+ Laafɩ kaool n na n zĩnd b yiibã sʋka.* 14 Maanfã* na n paa a Zeova roogẽ wã, sẽn na yɩl tɩ b tẽegd a Helɛm ne a Tobiza, n paas a Yedaya+ ne a Sofoni biig a Hɛn yelle. 15 Neb nins sẽn be zĩ-zãrsẽ wã na n wa sõng n mee a Zeova roogã.” Woto, yãmb na n bãngame tɩ sɩd yaa a Zeova sẽn yaa tãb-biis naabã n tʋm maam yãmb nengẽ. Yãmb sã n kelg y Wẽnnaam a Zeova koɛɛgã, bõn-kãngã na n yɩɩme.’”
7 Rĩm a Daryuus naamã yʋʋm a naas-n-soabã, kiuug a wɛ soabã sẽn yaa Kislɛɛv* kiuugã rasem a naasã daare, a Zeova goma ne a Zakari.+ 2 Betɛll nebã tʋma a Sarezɛɛr ne a Regɛm-melɛk la a nebã, sẽn na yɩl tɩ b tɩ kos a Zeova t’a zoe b nimbãanega. 3 B soka a Zeova sẽn yaa tãb-biis naabã roogã maan-kʋʋdbã ne no-rɛɛsdbã yaa: “Tõnd segd n yãba kiuug a nu soabã,+ la d loe noor wa d sẽn minim n maand hal yʋʋm wʋsgã bɩ?”
4 A Zeova sẽn yaa tãb-biis naabã le goma ne maam n yeele: 5 “Sok soolmã nin-buiidã fãa ne maan-kʋʋdbã yaa: ‘Yʋʋm pis-yopoe wã pʋgẽ,+ yãmb sẽn da loet noor la y yãbd kiuug a nu soabã ne kiuug a yopoe-n-soabã,+ sɩd-sɩda, yãmb da loeta noorã mam yĩng sɩda? 6 Yãmb sẽn da rɩt la y yũudã, yãmb da pa rɩt la y yũud y mens yĩng sɩda? 7 Yãmb da pa segd n sak goam nins a Zeova sẽn kɩt tɩ pĩnd wẽndẽ no-rɛɛsdbã+ moonã sɩda? Yãmb da pa segd n maan dẽ, neb sẽn wa n be Zerizalɛm ne tẽns nins sẽn gũbg-a wã pʋsẽ n zĩ ne bãane, la Negɛɛbã ne Sefela wã sẽn wa n tar nebã sɩda?’”
8 A Zeova le goma ne a Zakari n yeele: 9 “Ad a Zeova sẽn yaa tãb-biis naabã sẽn yeele: ‘Kaood-y bʋʋd ne tɩrlem hakɩɩka.+ Maand-y taab neer+ la y zoet taab nimbãanega. 10 Ra wẽg-y pʋg-kõor wall kɩɩba,*+ sãan+ wall naong soab ye.+ Ra mag-y n na n maan taab wẽng y sũyã pʋsẽ ye.’+ 11 La b kell n zãgsame tɩ b kõn kelg ye.+ B riglma b sũyã n wẽnemd b poay n tees maam.+ B yẽda b tʋbã sẽn na yɩl n da wʋm ye.+ 12 B kɩtame tɩ b sũyã lebg wa diyama.*+ B ra zãgsdame tɩ b kõn sak tõogã,* la goam nins a Zeova sẽn yaa tãb-biis naabã sẽn da tũnugd ne a vʋʋsmã, n kɩtdẽ tɩ pĩnd wẽndẽ no-rɛɛsdbã+ taasdẽ wã ye. Rẽ n so t’a Zeova sẽn yaa tãb-biis naabã sũurã puug wʋsgo.”+
13 “‘Mam* sẽn da boond tɩ b pa kelgdẽ wã,+ bãmb me sẽn wa n boondẽ wã, mam pa kelg ye.’+ Yaa a Zeova sẽn yaa tãb-biis naabã n yeele. 14 ‘Mam kɩtame tɩ sob-kãseng sãeeg-ba, tɩ b kẽ buud toɛy-toɛyã fãa b sẽn da pa mi wã pʋsẽ.+ Soolmã lebga raboog b loogrã poore. Ned baa a ye ra pa pɩʋʋgd be ye. Ned baa a ye ra pa lebgd n wa be me ye.+ Bala b kɩtame tɩ tẽn-neerã lebg bũmb sẽn kẽesd rabeem.’”
8 A Zeova sẽn yaa tãb-biis naabã le goma ne maam n yeele: 2 “Ad a Zeova sẽn yaa tãb-biis naabã sẽn yeele: ‘Mam na n sõnga Siyõ ne yẽesem wʋsgo.+ Mam na n sõng-a-la ne sũ-yikr wʋsgo.’”
3 “Ad a Zeova sẽn yeele: ‘Mam na n lebg n waa Siyõ,+ n zĩnd Zerizalɛm.+ B na n boola Zerizalɛm tɩ sɩdã* tẽnga,+ la b bool a Zeova sẽn yaa tãb-biis naabã tãngã tɩ tãn-sõngo.’”+
4 “Ad a Zeova sẽn yaa tãb-biis naabã sẽn yeele: ‘Nin-kẽemb ne pʋg-yãans na n le zĩnda Zerizalɛm zãma wã zĩisẽ, tɩ ned kam fãa zãad a rasaare, a yʋʋmã sẽn yaa wʋsgã yĩnga.*+ 5 Tẽngã zãma wã zĩis na n pida ne kom-dibli la kom-pugli sẽn deemde.’”+
6 “Ad a Zeova sẽn yaa tãb-biis naabã sẽn yeele: ‘Baa nin-kãensã sʋkã neb nins sẽn na n ket wakat kãngã sẽn tõe n getẽ tɩ yaa toog wʋsgã, ma-me na n getame tɩ yaa toog wʋsg sɩda?’ Yaa a Zeova sẽn yaa tãb-biis naabã n yeele.”
7 “Ad a Zeova sẽn yaa tãb-biis naabã sẽn yeele: ‘Mam na n fãaga m nebã n yiis yaang soolmẽ wã, la nin-taoor soolmẽ wã.*+ 8 Mam na n tall-b lame n wa, tɩ b zĩnd Zerizalɛm.+ B na n lebga mam nin-buiidu, tɩ mam lebg b Wẽnnaam+ sẽn yaa sɩd soab* la tɩrga.’”
9 “Ad a Zeova sẽn yaa tãb-biis naabã sẽn yeele: ‘Bɩ y tall raoodo,+ yãmb a neb nins sẽn kelgd gom-kãensã sẽn yit no-rɛɛsdbã noyẽ wã.+ Yaa goam nins b sẽn togs a Zeova sẽn yaa tãb-biis naabã roogã yẽbgr daare, daar ning b sẽn yẽbg wẽnd-doogã n na n me wã. 10 Sẽn deng wakat kãnga, ninsaal wall rũng ra pa paamd yaood a tʋʋmd yĩng ye.+ Zabd-n-taagã yĩnga, ned ra pa tõe n kẽng la a lebg n wa ne bãan ye. Bala mam da kɩtame tɩ nebã fãa wẽneg n zabd ne taaba.’
11 “‘La masã, mam pa na n maan nin-kãensã sʋkã neb nins sẽn ketã wa pĩndã ye.’+ Yaa a Zeova sẽn yaa tãb-biis naabã n yeele. 12 ‘Bala b na n bʋda laafɩ bõn-buudu. Viyn tɩɩsã na n woma biisi, tɩ tẽngã bõn-koaadl me wome.+ Saasã na n sika meenem. Mam na n kɩtame tɩ nin-kãensã sʋkã neb nins sẽn ketã soog bõn-kãensã fãa.+ 13 Yãmb a Zida buudã neb ne Israyɛll buudã neba, mam na n fãaga yãmb la m kɩt tɩ y lebg bũmb nebã sẽn tar n ningd barka,+ wa yãmb sẽn da lebg bũmb nebã sẽn tar n kãabd wẽng+ buud toɛy-toɛyã sʋkã. Ra yɛɛs-y ye!+ Tall-y raoodo!’+
14 “Bala ad a Zeova sẽn yaa tãb-biis naabã sẽn yeele: ‘“Mam da yãka yam n na n kɩt tɩ yel-beed wa yãmb zut y yaab-rãmbã sẽn maan n puug mam sũurã yĩnga. Mam pa maan m bãngẽ ye.”+ Yaa a Zeova sẽn yaa tãb-biis naabã n yeele. 15 “Masã, mam yãka yam n na n maan Zerizalɛm ne Zida buudã neb neere.+ Ra yɛɛs-y ye!”’+
16 “‘Ad bũmb nins y sẽn segd n maandẽ: Togsd-y taab sɩda.+ Bʋʋdã y sẽn kaood y tẽnsã rignoyẽ wã segd n kɩtame tɩ sɩd la laafɩ zĩndi.+ 17 Ra tags-y y sũyã pʋsẽ n na n maan y to wẽng ye.+ Ra nong-y zirẽ-be-wẽeneg ye.+ Bala bõn-kãensã fãa yaa bũmb mam sẽn kisi.’+ Yaa a Zeova n yeele.”
18 A Zeova sẽn yaa tãb-biis naabã le goma ne maam n yeele: 19 “Ad a Zeova sẽn yaa tãb-biis naabã sẽn yeele: ‘Kiuug a naas-n-soabã no-loeerã,+ kiuug a nu soabã no-loeerã,+ kiuug a yopoe-n-soabã no-loeerã,+ la kiuug piig soabã no-loeerã+ na n yɩɩ sũ-noog la kɩdeng wakat Zida buudã neb yĩnga: Na n yɩɩ sũ-noog tiga.+ Woto wã, nong-y sɩd la laafɩ.’
20 “Ad a Zeova sẽn yaa tãb-biis naabã sẽn yeele: ‘Wakat n wat tɩ buud toɛy-toɛy neb la tẽns wʋsg neb na n wa ka. 21 Tẽng a yembr neb na n kẽnga tẽng a to neb nengẽ n tɩ yeele: “Wa-y tɩ d kẽng n tɩ bõos a Zeova ne d sũy fãa t’a zoe d nimbãanega. Wa-y tɩ d tɩ bao a Zeova sẽn yaa tãb-biis naabã. Tõnd me na n kẽngame.”+ 22 Buud wʋsg neba, la buud toɛy-toɛy sẽn tar pãng wʋsg neb na n waa Zerizalɛm, n bao a Zeova sẽn yaa tãb-biis naabã.+ B na n waame, n bõos a Zeova t’a zoe b nimbãanega.’
23 “Ad a Zeova sẽn yaa tãb-biis naabã sẽn yeele: ‘Wakat kãnga, buud toɛy-toɛy neb piig sẽn gomd buud-goam toɛy-toɛy+ na n gãda Zʋɩf* fuugu.* B na n gãda fuugã kãn-kãe, n yeele: “Tõnd dat n tũu yãmb n kẽnge,+ bala tõnd wʋmame tɩ Wẽnnaam bee ne yãmba.”’”+
9 Bʋ-kaoor koɛɛga:
“A Zeova gomdame n ningd Hadrak soolmã taale.
Sẽn yɩɩd fãa yaa Damaas la a ningd taale.*+
Bala a Zeova ninã bee ninsaalbã zutu,+
la Israyɛll buud toɛy-toɛyã fãa zutu.
2 A ningda Hamat+ sẽn yaa toadg ne-a wã me taale,
n paas Tɩɩr+ ne Sɩdõ,+ bala b tagsdame tɩ b tara yam wʋsgo.+
3 Tɩɩr mee lal-bedr* n na n kogl a menga.
A zama wanzuri wa tom,
la a zam sãnem wa soayã zut bɛgdã.+
4 Kelg-y-yã! A Zeova na n deesa a paoongã.
A na n kʋʋ a tãb-biisã n lob mogrã pʋgẽ.*+
Tɩɩr mengã na n dɩɩ bugum.+
5 Askalon na n yãa rẽ tɩ rabeem yõk-a.
Gaaza na n maana yɩɩr wʋsgo,
ne Ekron me, bala a sẽn da teeg a soabã paama yãnde.
Gaaza rĩmã n na n kiime.
Ned pa na n le zĩnd Askalon ye.+
7 Mam na n yiisa bũmb nins zɩɩmã sẽn madã b noyẽ wã,
la m yiis bõn-yoodã b yẽnẽ wã.
Filisti neb nins sẽn na n kellã na n yɩɩ tõnd Wẽnnaamã rẽnda.
B na n yɩɩ wa buud nanambs* Zida,+
tɩ Ekron nebã lebg wa Zebuus nebã.+
8 Mam na n tilga sik-zĩig n gũ m doogã,+
sẽn na yɩl tɩ ned baa a ye ra kẽ be, wall a yi be ye.
Tʋʋm taoor soab* pa na n le kẽ be ye.+
Bala masã, mam yãa rẽ* ne m nifu.
9 Foom a Siyõ bi-pugla, kɩdem sũ-noog wʋsgo.
Foom a Zerizalɛm bi-pugla, kaas f tõogrã yĩnga.
Gese! Fo rĩmã wata fo nengẽ.+
10 Mam na n yiisa zabr saar-dãmbã* Efrayim,
la m yiis wed-moosã Zerizalɛm.
B na n yiisa zabr tãbdã.
A na n moona buud toɛy-toɛyã neb n gom laafɩ yelle.+
A na n dɩɩ naam sẽn sɩng ne mogr n tɩ tãag mogre,
11 La foom a paga, fo kaoolã zɩɩm maasem yĩnga,
mam na n yiisa fo neb nins b sẽn pag bog-koɛɛngẽ wã.+
12 Yãmb a neb nins b sẽn pag tɩ y tẽed manegrã,+ lebg-y n leb-y soondgã zĩigẽ.
Mam yeta foo rũndã yaa:
‘Foom a paga, mam na n kõo foo pʋɩɩr a yiib tɩ yɩ f keoore.+
13 Bala mam na n yãaga* Zida wa m tãpo.
Mam na n dɩka Efrayim n ning tãpã pʋgẽ.*
Foom a Siyõ, mam na n neka fo kom-dibli wã,
tɩ b zab ne foom a Gɛrɛs kom-dibli wã.
Mam na n kɩtame me tɩ fo lebg wa zabr gãndaoog sʋʋga.’
14 Nebã na n yãa a Zeova sẽn be b zugẽ.
A peemdã na n yii wa sa-yãgbo.
A Zeova sẽn yaa Zu-soab sẽn ka to wã na n peeba baorgã.+
A na n tũu goabg sob-kãsemsã n wa.
15 A Zeova sẽn yaa tãb-biis naabã na n sõng-b lame.
Bɛɛb n na n zab ne-b ne loobs kuga, la b na n tõoga bɛɛbã.+
B na n yũume n kaasd ne sũ-noog wa b yũu divẽ.
B na n yɩɩ wa la-bil sẽn pid ne divẽ,
la wa zɩɩm b sẽn daag tẽn-kugrã kɩremsẽ.+
16 Baraare, b Wẽnnaam a Zeova na n fãag-b lame,
wa pe-kɩɩm sẽn fãagd a piis to-to wã.+
Bala b na n zĩnda a tẽn-gãongã zugu, n pɩnd wa maanf kug-neeba.+
17 Ad a sõmblmã sɩd yaa kãsenga!+
A sɩd bee rasãnd wʋsgo!
Koodã na n kɩtame tɩ kom-bɩɩsã paam pãnga.
Divẽ-paalgã na n kõo pʋg-sadb nins sẽn pa mi raoã keelem.”+
10 “Kos-y-yã a Zeova saaga, yaoolem saas wakate.
Yaa a Zeova n maand sa-kãsemsã sawato.
Yaa yẽ n kõt ninsaalbã saaga,+
la a kɩtdẽ tɩ tɩɩs la mood yit weoogẽ wã bõn-vɩɩsã fãa yĩnga.
2 Bala bõn-naandsã* goma belgr goama.
Bag-bʋgdbã paama zirẽ-be-vẽnegre.
B gomda zãmsd sẽn pa tar yõod yelle.
B makd n na n belsa b taabã, la yaa zaalem.
Rẽ n so tɩ b na n yeeb wa piisi.
B na n namsame, bala b pa tar pe-kɩɩm ye.
3 Mam sũurã puuda wʋsg ne pe-kɩɩmbã.
Mam na n soka taoor dãmb nins sẽn yaa nin-toosã.*
Bala a Zeova sẽn yaa tãb-biis naabã wẽnemda a neng n tees a piisã,+ rat n yeel tɩ Zida buudã neba.
A kɩtame tɩ b lebg wa a wed-moaagã sẽn tar ziirã zabrã pʋgẽ.
4 Taoor soabã* yita yẽ nengẽ.
Naab ning sẽn sõngd-a wã* yita a nengẽ.
Zabr tãpã yita yẽ nengẽ.
Yaa yẽ nengẽ la yel-gɛt fãa* yita. B fãa zãnga.
5 B na n lebga wa zabr gãndaad
sẽn tabd bɛgd soayã zut zabr sasa.
6 Mam na n kɩtame tɩ Zida buudã lebg kãsenga.
Mam na n fãaga a Zozɛf buudã.+
Mam na n tall-b lame n lebg n wa b soolmẽ wã,
bala mam na n zoee b nimbãanega.+
B na n yɩɩ wa mam zɩ n daag-b n bas ye.+
Bala mam yaa b Wẽnnaam a Zeova. Mam na n deega b kosgã.
7 Efrayim nebã segd n lebga wa zabr gãndaad sẽn tar pãnga.
B sũyã na n yɩɩ noog wa b yũu divẽ.+
B kambã na n yãa rẽ n kɩdem sũ-noogo.
Bãmb mensã sũy na n yɩɩ noog a Zeova maasem yĩnga.+
8 ‘Mam na n fɩɩl n bool-b lame, n tigm-ba.
Bala mam na n fãag-b lame.+ B na n lebga wʋsgo.
B sõorã na n ket n paasdame.
9 Baa mam sẽn sãeeg-b wa bõn-buud buud toɛy-toɛyã sʋkã,
b na n paa zĩ-zãrsẽ wã n tẽeg mam yelle.
Bãmb ne b kambã na n paama pãng n lebg n wa.
10 Mam na n yiis-b-la Ezɩpt soolmẽ wã n tall n wa.
Mam na n tigm-b lame n yiis Asiiri.+
M na n tall-b lame n wa Galaad+ soolmẽ wã ne Libã,
la zĩigã pa na n sek-b ye.+
11 Mam segd n pasga mogrã n kɩt t’a rãmbe.
Mam na n kɩtame tɩ mogrã ko-pɛmã sigi.+
Nill kʋɩlgã zĩ-zulumsã fãa na n kʋɩɩme.
11 “Foom a Libã, pak f kʋɩlensã,
sẽn na yɩl tɩ bugum dɩ f sɛɛdr tɩɩsã.
2 Foom a zenevirie tɩɩga, wiisi, bala sɛɛdr tɩɩgã lʋɩɩme.
B sãama tɩ-kãsemsã!
Yãmb a Basan sɛnn tɩɩse, wiis-y-yã,
bala b kɛɛ kãgrã sẽn yaa taokã n lubi!
3 Kelg-y-yã! Pe-kɩɩmbã wiisdame,
bala b sãama b ziirã.
Kelg-y-yã! Gɩgem-poalã kelemdame,
bala b sãama Zʋrdẽ kʋɩlgã wogellã kãgrã.
4 “Ad mam Wẽnnaam a Zeova sẽn yeele: ‘Kɩɩm piis nins b sẽn segd n koodã.+ 5 B raadbã koot-b lame,+ tɩ ned pa ningd-b taal ye. Neb nins sẽn koosd-bã+ ned kam fãa yetame yaa: “Bɩ a Zeova paam pẽgre, bala mam lebga arzɛk soaba.” B pe-kɩɩmbã pa zoet b nimbãaneg baa bilf ye.’+
6 “A Zeova yeelame: ‘Mam pa na n le zoe soolmã neb nimbãaneg ye. Mam na n kɩtame tɩ ned fãa yak la a rĩm soog-a. B na n sãama soolmã. Mam pa na n fãag bãmb b nusẽ ye.’”
7 Yãmb a piis nins b sẽn namsdã, mam sɩngame n kɩɩmd piis nins b sẽn segd n koodã,+ yãmb yĩnga. Dẽ, mam dɩka rasab a yiib n bool a yembr tɩ Yamleoogo, la m bool a to wã tɩ Zems-n-taare,+ la m sɩng piisã kɩɩngo. 8 Mam diga pe-kɩɩmb a tãab ki-yɛng pʋgẽ, bala mam* da pa le tõe n maan sũ-mar ne-b ye. Bãmb* me ra kisa maam. 9 Sẽn paase, mam yeelame yaa: “Mam pa na n kell n kɩɩm yãmb ye. Bɩ sẽn dat n ki-a wã ki, tɩ sẽn dat n sãam-a wã sãame. Sã n yaa ne sẽn kell-bã, bɩ b wẽneg n wãb taab nemdo.” 10 Dẽ, mam dɩka m dasaar ning sẽn boond tɩ Yamleoogã+ n kɛɛg n kʋrge. Woto, mam sãama kaool ning mam sẽn da maan ne buudã tõrã. 11 Kaoolã sãama baraare, tɩ piis nins b sẽn namsdã sẽn da get maamã bãng tɩ ra yaa a Zeova gomde.
12 Dẽ, mam yeel-b lame yaa: “Sã n taa yãmb yam, bɩ y kõ maam m yaoodã. Sã n pa rẽ, bɩ y talle.” B yaoo maam m yaoodã.* Yɩɩ wanzuri ligd-koeems pis-tã.+
13 Dẽ, a Zeova yeela maam yaa: “Lob yaoodã ligdã bĩngr zĩigẽ. Yaa yaood a woto bal la b tags tɩ mam zemsa ne.”+ Rẽ n so tɩ mam dɩk wanzuri ligd-koeems pis-tã wã n lob a Zeova roogã pʋgẽ,+ ligdã bĩngr zĩigẽ.
14 Rẽ poore, mam kɛɛ m dasaar a yiib-n-soabã b sẽn boond tɩ Zems-n-taarã+ n kʋrge. Woto, mam sãama Zida ne Israyɛll saam-biirã.+
15 A Zeova yeela maam yaa: “Masã, rɩk pe-kɩɩm sẽn pa tar yõod tʋʋm-teedo.+ 16 Bala mam na n basame tɩ pe-kɩɩm yik soolmã pʋgẽ. A pa na n ges piis nins sẽn sãamdã yell ye.+ A pa na n gẽes pe-bi wã, wall a tɩp sẽn pogl-bã ye.+ A pa na n dɩlg sẽn tõe n yals-bã ye. A na n wãba sẽn nob b rãmbã nemdo,+ la a feeb piisã nao-bendã.+
17 Toog bee ne mam pe-kɩɩm ning sẽn ka võorã+ sẽn basd piisã!+
B na n kɛɛ a kangã ne sʋʋga, la b kõs a rɩtg nifrã.
A kangã na n kii zãnga.
A rɩtg nifrã pa na n tol n le yã baa fʋɩ ye.”*
12 Bʋ-kaoor koɛɛga:
“Ad a Zeova koɛɛg Israyɛll wɛɛngẽ.” Yaa a Zeova n yeele.
Yẽ n yaa soab ning sẽn yɛdg saasã,+
Soab ning sẽn yẽbg tẽngã,+
la sẽn maan-a vʋʋsmã sẽn be ninsaal pʋgẽ wã.
2 “Mam na n kɩtame tɩ Zerizalɛm lebg bõn-yũudl* sẽn na n kɩt tɩ buud nins fãa sẽn gũbg-a wã kẽnd n lengdẽ. B na n gũbga Zida n na n zabe, la b gũbg Zerizalɛm me.+ 3 Baraare, mam na n kɩtame tɩ Zerizalɛm lebg wa kugr sẽn zɩs buud toɛy-toɛyã fãa yĩnga. Hakɩɩka, neb nins fãa sẽn na n zẽk-a wã na n pogla wʋsgo.+ Tẽngã buud toɛy-toɛyã fãa na n tigma taab n zab ne-a.”+ 4 A Zeova yeelame: “Baraare, mam na n kɩtame tɩ rabeem yõk wed-moosã fãa, la m kɩt tɩ wed-rʋʋdbã gãeeme. Mam ninã na n kell n zĩnda Zida buudã zugu, la m na n loba buud toɛy-toɛyã wed-moosã zondo. 5 Zida buud nanambsã* ned kam fãa na n yeela a sũurẽ yaa: ‘Zerizalɛm nebã yaa mam pãnga, b Wẽnnaam a Zeova sẽn yaa tãb-biis naabã maasem yĩnga.’+ 6 Daar-n-kãnga, mam na n kɩtame tɩ Zida buud nanambsã lebg wa bug-saal sẽn be raad sʋka, la wa bug-vɩleng sẽn be ka-gĩn b sẽn kẽeb n dʋʋg sʋka.+ B na n dɩɩ buud nins fãa sẽn gũbg-b goabg la rɩtgã.+ Zerizalɛm nebã na n kell n zĩnda b zĩigẽ wã,* rat n yeel tɩ Zerizalɛm.+
7 “A Zeova na n deng n fãaga Zida fu-rotã, sẽn na yɩl t’a Davɩɩd buudã neb* neerem,* ne Zerizalɛm nebã neerem* ra yɩɩg Zida wʋsg ye. 8 Baraare, a Zeova na n yɩɩ gãong n gũbg Zerizalɛm nebã.+ Daar-n-kanga, ned ning sẽn na n lak n lʋɩ b sʋkã* na n yɩɩ wa a Davɩɩde, t’a Davɩɩd buudã neb yɩ wa Wẽnnaam, wa a Zeova malɛkã sẽn kẽnd bãmb taoorã.+ 9 Baraare, mam na n sãama buud nins fãa sẽn na n wa zab ne Zerizalɛmmã zãng tɩ sãmbg kae ye.+
10 “Mam na n pʋdga lohorem la se-yõkr yam a Davɩɩd buudã neb zutu, la Zerizalɛm nebã zutu. B na n gesa soab ning b sẽn kõsã,+ la b yãb a yĩng wa ned sẽn yãbd a bi-ribl-yend kũum yĩnga. B na n maana sũ-sãang wʋsg a yĩnga, wa ned sẽn maand sũ-sãang a bi-ribl-kãseng kũum yĩnga. 11 Baraare, yãbrã na n yɩɩ wʋsg Zerizalɛm, wa sẽn yɩ to-to Hadadrimon sẽn be Megido+ tẽn-nabrẽ wã. 12 Soolmã neb na n yãbame. Buud fãa na n welga toor n yãbe: A Davɩɩd buudã neb na n welga toor n yãbe, tɩ b pagbã me welg toor n yãbe. A Natã+ buudã neb na n welga toor n yãbe, tɩ b pagbã me welg toor n yãbe. 13 A Levi buudã neb+ na n welga toor n yãbe, tɩ b pagbã me welg toor n yãbe. A Simeyi yagensã+ na n welga toor n yãbe, tɩ b pagbã me welg toor n yãbe. 14 Buud nins fãa sẽn ketã na n welga toor-toor n yãbe, tɩ b pagbã me welg toor-toor n yãbe.
13 “Baraare, b na n tuka bulg n kõ a Davɩɩd buudã la Zerizalɛm nebã, yel-wẽnã la rẽgdã yɩlgr yĩnga.+
2 A Zeova sẽn yaa tãb-biis naabã yeelame yaa: “Daar-n-kãnga, mam na n yẽesa bõn-naandsã yʋyã soolmã pʋgẽ.+ B pa na n le tẽeg b yell ye. M na n yiisa no-rɛɛsdbã+ ne rẽgdã tʋlsem* soolmã pʋgẽ. 3 La ned sã n le togs bãngr-gomde, a ba wã ne a ma wã sẽn dog-a wã na n yeel-a lame yaa: ‘Fo pa na n kell n vɩɩmd ye. Bala fo togsa ziri ne a Zeova yʋʋre.’ A ba wã ne a ma wã sẽn dog-a wã na n kõs-a-la ne sʋʋga, a sẽn togs bãngr-goamã yĩnga.+
4 “Baraare, no-rɛɛsdbã ned kam fãa sã n wa togsd bãngr-gomde, vẽnegr ning a sẽn paamã yãnd na n yõk-a lame. B pa na n le yeelg fut* sẽn wʋg ne rũms kõbd+ sẽn na yɩl n belg nebã ye. 5 B ned kam fãa na n yeelame yaa: ‘Mam pa no-rɛɛs ye. Mam yaa ka-koaada, bala ned n da maam hal m bi-bɩɩlmẽ.’ 6 Ned sã n sok-a yaa: ‘Yaa bõe noad la sẽn be fo bãgdã sʋkã?’* A na n yeelame: ‘Yaa m zo-rãmbã* zakẽ la b pogl maam.’”
7 “Foom a sʋʋga, yik n zab ne mam pe-kɩɩmã.+
Zab ne rao ning sẽn yaa mam tũud-n-taagã.” Yaa a Zeova sẽn yaa tãb-biis naabã n yeele.
9 Mam na n dɩka neb a tãab fãa sʋkã nin-yendã, n kɩt tɩ b pasg bugmẽ.
Mam na n yɩlg-b-la wa b sẽn yɩlgd wanzuri.
Mam na n mak-b-la wa b sẽn makd sãnem to-to wã.+
B na n boola mam yʋʋrã,
tɩ mam leok-ba.
Mam na n yeelame: ‘B yaa mam nin-buiidu,’+
tɩ bãmb yeele: ‘A Zeova yaa tõnd Wẽnnaam.’”
14 “Kelge! Daar n wate. Yaa a Zeova daare. Yaa daar ning b sẽn na n pʋɩ fo* teedã b sẽn da zɛ wã fo pʋgẽ. 2 Mam na n tigma buud toɛy-toɛyã fãa tɩ b zab ne Zerizalɛm. B na n deega tẽngã, n zɛ rotã teedo, la b yõg pagbã. Tẽngã nebã pʋɩ-sʋk na n kẽnga yembdo, la b pa na n yiis neb nins sẽn kellã tẽngã pʋgẽ ye.
3 “A Zeova na n yiime n zab ne bu-kãense,+ wa a sẽn zabd zabr daare.+ 4 Baraare, a naoã na n yalsa Oliiv tɩɩs tãngã+ sẽn be yaang n tees Zerizalɛmmã zugu. Oliiv tɩɩs tãngã na n welga a yiibu, sẽn sɩng yaang* n tãag nin-taoore,* tɩ long sẽn yaa kẽeng wʋsg be sʋka. Tãngã pʋɩ-sʋk a ye na n serg n kẽnga rɩtgo, t’a pʋɩ-sʋk a to wã serg n kẽng goabga. 5 Yãmb na n zoee n kẽnga mam tãensã longẽ, bala mam tãensã long na n yalgame n tãag Azɛlle. Yãmb na n zoee wa y sẽn zoe to-to tẽn-digimdgã yĩnga, Zida rĩm a Ozɩyas wakatẽ wã.+ Mam Wẽnnaam a Zeova na n waame, tɩ sẽn yaa-b sõamyã wã fãa be ne-a.+
6 “Baraare, vẽenem sẽn yãgd pa na n zĩnd ye.+ Bũmb fãa na n yalsame. 7 Na n yɩɩ daar b sẽn mi tɩ yaa a Zeova daare.+ Pa na n yɩ wĩndga, la pa na n yɩ yʋng me ye. Vẽenem na n zĩnda zĩ-sobdo. 8 Daar-n-kãnga, vɩɩm koom+ n na n zoe n yi Zerizalɛm.+ Pʋɩ-sʋk a ye wã na n zoe n teesa yaang sẽnes mogrã,*+ tɩ pʋɩ-sʋk a to wã tees nin-taoor sẽnes mogrã.*+ Na n yɩɩ woto tʋʋlg wakat la waood wakate. 9 A Zeova na n yɩɩ Rĩm n dɩ naam dũniyã gill zugu.+ Baraare, a Zeova na n yɩɩ a ye tãa,+ t’a yʋʋrã me yɩ a ye tãa.+
10 “Soolmã tõr na n lebga wa Araba wã,+ sẽn sɩng ne Geba+ n tɩ tãag Rimon+ sẽn be Zerizalɛm goabgã. Zerizalɛm na n zẽka a zĩigẽ wã, tɩ neb le zĩnd a pʋgẽ,+ sẽn sɩng ne Bẽnzame rignoorã+ n tãag Pipi rignoorã zĩigẽ, hal n tãag Gõdrã zĩigẽ rignoorã, la sẽn sɩng ne Hananɛll gasgã+ n tãag rĩmã vẽ wẽkr bogdã. 11 Neb n na n zĩnd a pʋgẽ. A pa na n le yɩ tẽng b sẽn segd n sãam ye.+ Nebã na n zĩnda Zerizalɛm ne bãane.+
12 “Ad bãag ning a Zeova sẽn na n kɩt tɩ yõk buud nins fãa sẽn na n zab ne Zerizalɛmmã:+ B yĩn-nemsã na n põogame tɩ b ket n yas b naoã zutu. B ninã na n põoga b nin-bogdẽ wã, tɩ b zɩlma wã põog b noyẽ wã.
13 “Baraare, a Zeova na n kɩtame tɩ zũnd-zãnd zĩnd b sʋka. Ned kam fãa na n gãda a tũud-n-taag nugu. Ned fãa na n zaba ne a to.+ 14 Zida nebã me na n naaga zabr ning sẽn na n zĩnd Zerizalɛmmã pʋgẽ. B na n tigma buud nins fãa sẽn karg n gũbgã arzɛgsã: Yaa sãnem, wanzuri la fut zem bala.+
15 “Bã-kãng buud n na n yõk wed-moosã, bõn-weesã,* yʋgma wã, bõensã, la rũmsã fãa sẽn be sik-zĩ-kãens pʋsẽ wã.
16 “Ned ning fãa sẽn na n kell buud nins sẽn na n wa zab ne Zerizalɛmmã sʋkã na n wata yʋʋmd-yʋʋmde,+ n wõgemded Rĩm a Zeova sẽn yaa tãb-biis naabã taoore,+ la a maand Zãn tigrã.+ 17 La dũniyã buud toɛy-toɛyã sʋka, ned sã n pa kẽng Zerizalɛm n tɩ wõgemd Rĩm a Zeova sẽn yaa tãb-biis naabã taoore, b kõn paam saag ye.+ 18 Ezɩpt buudã neb sã n pa wa kẽ tẽngã pʋgẽ, b pa na n paam saag ye. Bãag ning a Zeova sẽn kɩtd tɩ yõkd buud nins sẽn pa wat n maand Zãn tigrã n na n yõk-ba. 19 Rẽ n na n yɩ Ezɩpt yel-wẽndã sɩbgre, la buud nins fãa sẽn pa wat n maand Zãn tigrã yel-wẽndã sɩbgre.
20 “Baraare, b na n gʋlsa wed-moosã loamba wã zut yaa: ‘Sõmblem yita a Zeova nengẽ!’+ Rʋgd*+ nins sẽn be a Zeova roogẽ wã na n yɩɩ wa la-bõones+ nins sẽn be tẽn-kugrã taoorã. 21 Zerizalɛm la Zida rʋgdã* fãa na n yɩɩ sõamyã, la b yɩ a Zeova sẽn yaa tãb-biis naabã rẽnda. Neb nins fãa sẽn wat n maand maandã na n tara kẽer n dʋgd nemdã. Wakat kãnga, Kanaã ned* pa na n le zĩnd a Zeova sẽn yaa tãb-biis naabã roogẽ wã ye.”+
Rat n yeel t’a “Zeova tẽegame.”
Ges-y vẽnegr ning sẽn yaa B15.
Ebre, “saasẽ sobd a naasã.”
Ebre, “yĩn-nemsã.”
Bɩ, “taalã.”
Ebre, “mam zakã.”
Bɩ, “gũ mam samanã.”
Bɩ, “bõn-kɩdsã wakate?”
Yaa wĩir b sẽn sẽbg a noorã ne kutu, kugr wall yagdo, tɩ b tar n makd lalg n na n bãng a sã n yasa tɩrga.
Rat n yeel tɩ wil-poal sẽn wom biisi.
Ebre, “zae.” Ges-y gom-biis võor bilgrã zĩigẽ.
Kãntɩɩg zemsa sãntimetr 44,5. Ges-y vẽnegr ning sẽn yaa B14.
Ebre, “efa.” Ka wã, yaa laok wall peoog b sẽn da tar n magda. Efa zemsa litr 22. Ges-y vẽnegr ning sẽn yaa B14.
Ebre, “saasã ne tẽngã sʋka.”
Rat n yeel tɩ Babiloni.
Yaa bũmb sẽn wõnd sarɛt tɩ wed-moos tatẽ.
Bɩ, “maanf-bedre.”
Rat n yeel t’a naamã ne a maan-kʋʋrã sʋka.
Bɩ, “Maanf-bedrã.”
Ges-y vẽnegr ning sẽn yaa B15.
Ebre, “biig sẽn pa tar ba.”
Pa rẽ bɩ, “kug-kɛgenga,” wala makre, emeri kugri.
Bɩ, “zãmsgã.”
Ebre, “Yẽ.”
Bɩ, “maan-sɩdã.”
Ebre, “rayã sõor sẽn yaa wʋsgã yĩnga.”
Bɩ, “wĩndg sẽn yitẽ soolmẽ wã, la wĩndg sẽn lʋɩtẽ soolmẽ wã.”
Bɩ, “maan-sɩd soab.”
Ebre, “Zʋɩf sẽn yaa rao.”
Bɩ, “fuug noore.”
Ebre, “la a vʋʋsg zĩiga.”
Bɩ, “tãn-soben-doog.”
Pa rẽ bɩ, “A na n tõoga a tãb-biisã mogrã zugu.”
Bɩ, “Tãmpĩir.”
Ebre, “sɛk-rãmb.”
Bɩ, “Weoogd.”
Vẽenega, yaa a nin-buiidã namsgã yell la b gomda.
Bɩ, “la tõaagda. A paama fãagre.”
Bɩ, “bõn-daoogo.”
Yaa bũmb sẽn wõnd sarɛt tɩ wed-moos tatẽ.
Rat n yeel tɩ Efrate.
Ebre, “taba.”
Rat n yeel tɩ wa peemde.
Ebre, “terafim-dãmbã.” Bɩ, “zak neb wẽnnaam-dãmbã.”
Ebre, “boeesã.”
Ebre, “Gõdrã zĩigẽ gasgã.” Bilgda ned sẽn tar yõod wʋsgo. Naaba.
Ebre, “Baafã.” Bilgda ned sẽn teend a taaba. Naaba.
Bɩ, “tʋʋm taoor soab fãa.”
Ebre, “dasaarã.”
Bɩ, “mam sɩɩgã.”
Bɩ, “B sɩɩsã.”
Ebre, “maka mam yaoodã.”
Ebre, “pãng na n boogame.”
Bɩ, “la-bil.”
Ebre, “sɛk-rãmbã.”
Bɩ, “zĩig ning b sẽn segd n zĩndã.”
Ebre, “roogã.”
Bɩ, “ziiri.”
Bɩ, “ziir.”
Bɩ, “pãng sẽn pa ta a taabã.”
Ebre, “rẽgdã vʋʋsem.”
Bɩ, “no-rɛɛsdb fut.”
Ebre, “fo nusã sʋkã?” Rat n yeel tɩ yãoogẽ wã, wall poorã zugu.
Bɩ, “Yaa sẽn nong-b maamã.”
Rat n yeel tɩ tẽng ning yell b sẽn gomd vɛrse a yiibẽ wã.
Bɩ, “wĩndg sẽn yitẽ.”
Ebre, “mogrã.”
Rat n yeel tɩ Mog-kɩɩngã.
Rat n yeel tɩ Mediterane mogrã.
Yaa wed-moaag ne bõang biiga.
Bɩ, “Rʋgd b sẽn tar n segendẽ tɩ b noyã yaa yalems.”
Bɩ, “rʋgd b sẽn tar n segendẽ tɩ b noyã yaa yalemsã.”
Pa rẽ bɩ, “toand.”