Sak 79

Buud sẽn meneme, la ka a zãng ye

AZEZI sẽn sõs ne b rãmb nins sẽn da tigim Fariziẽ wã zak noor n sa poor bilfu, neb kẽer n wa n togs-a ‘bũmb nins sẽn da maan Galile rãmba kẽer [Rom guvɛrneer a Põns] Pɩlat sẽn lagem bãmb zɩɩm ne bãmb maand dẽnda.’ Tõe tɩ Galile nin-kãensã yaa b rãmb nins b sẽn kʋ, Zʋɩf rãmb tusa sẽn wa n yik n kɩɩs a Pɩlate, a sẽn da rɩk wẽnd–doogã ligd n na n me ko-sor n tall koom n wa Zerizalɛm pʋgẽ wã. Tõe tɩ Zʋɩf rãmb nins sẽn da togsd a Zezi yel-kãnga wã ra tagsdame tɩ Galile rãmbã sẽn paam yel-beed woto wã, yaa b wẽnemã yĩnga.

La a Zezi rems-b lame, n sok-ba: ‘Yãmb tẽedame tɩ nin-kãens yaa yel-wẽn dãmb n yɩɩd Galile neba fãa la b sẽn paam namsg woto wã bɩ? . . . Ayo,’ a Zezi sẽn leoke. Rẽ poore, a tũnuga ne yel-kãngã n keoog Zʋɩf rãmbã woto: “La yãmb sã n ka tek yam n kos sugri, yãmb fãa me na n sãamame.”

A Zezi kẽnga taoor ne a goamã n tẽeg yel-beed a to sẽn maan tẽngẽ wã. Tõe tɩ rẽ me ra tɩ loee ne ko-sorã meebo. A sokame: “Wala neb piig la a nii Siloe gasg sẽn lʋɩ n kʋ wã, yãmb tẽedame tɩ bãmb yaa yel-wẽn dãmba n yɩɩd neba fãa sẽn be Zerizalɛma bɩ?” Ayo, a Zezi yeelame tɩ ra ka b wẽnem n kɩt tɩ b ki ye. Naoor wʋsgo yaa “zu-beed” n wat ne yel-beed a woto. Baasg zãnga, a Zezi leb n tũnuga ne yel-kãngã n keoog-ba: “La yãmb sã n ka tek yam n kos sugri, yãmb fãa me na n sãamame.”

Rẽ poore a Zezi rɩka makr sẽn zemse, n wilgi: ‘Ned a ye n da tar kankang a viyn pʋʋgẽ. La a wa n baoo biis n ka yã ye. La a yeela viyn pʋʋg gũuda yaa: Gese, yaa yʋʋm a tãab masã la mam wat n baood kankang kãngã biis n ka yãt ye. Keeg-a. Yaa bõe t’a yãmb zĩig zaalem woto? La gũuda leoka a zu-soab yaa: Zusoaba bɩ y bas-a rõanda tɩ m tu bok n gilg-a n ning birga. Daar ninga, y sã n maan woto a na n woma biisi, la a sã n ka wome, y na kɛ-a.’

Sẽn yɩɩd yʋʋm a tãabo, a Zezi makame n na n kɩt tɩ Zʋɩf rãmbã buud paam tẽebo. La ne a tʋʋm-toogã fãa karen-biis kobs a wãn bal la a paam-yã. Masã a bee a tʋʋmdã yʋʋmd a naas-n-soab pʋgẽ. Makr wɛɛngẽ, a wɩnga ne tʋʋmdã n paase, n tuud bok n gilgd kankangã sẽn makd Zʋɩf rãmbã buudã n ningd birga. A ra maanda woto, a sẽn da moond la a zãmsd neba ne yẽesem Zide la Peere wã. La baas n pa yãk neng ye! Buudã zãgsame tɩ b kõn tek yam n kos sugr ye. Rẽnd b ra zemsa ne sãoongo. Yaa buudã neb bilf bal n sake.

Rẽ loogr poor bilfu, a Zezi kẽngame n tɩ zãms neb karen-doogẽ vʋʋsg daare. Beenẽ a yãa pag zĩn sẽn da namsda, t’a kuudẽ n ka tõe n doog sẽn na maan yʋʋm 18. A Zezi zoee pagã nimbãanega, n yeel-a: “Paga, fo paama f meng ne f bãagã.” A sẽn yeel dẽ a rɩka a nug n tik pagã. Zĩig pʋgẽ, pagã roogame n sɩng Wẽnnaam pẽgre.

La karen-doogã naab sũur puuga ne yellã, t’a zab n yeele: “Dasem a yoob bee be neb sẽn tõe n tʋm. Bɩ y wa rasem kãens n wa paam maagre, la y ra le wa vʋʋsg raar ye.” Woto, naabã ra sak n deegame t’a Zezi tõe n sãooga neb bãase, la a ninga nebã taal b sẽn wa tɩ b sãoog-b vʋʋsg daarã!

A Zezi leokame: “Zãmb dãmba! Yãmb ka lokd y niig ne y bõens b baarẽ n kẽnd n yũnugd koom vʋʋsg raar bɩ? La pʋg-kãnga sẽn ya a Abrahaam bi-pugla tɩ Sʋɩtãana loe-a hal yʋʋm piig la a nii wã, a ka tog n paam lokr ne sẽbr kãng vʋʋsg raar sɩda?”

Neb nins sẽn da kɩɩsd a Zezi wã sẽn wʋm woto, yãnd yõk-b lame. La kʋʋngã sẽn yã bõn-kãsems kãensã a Zezi sẽn maanã, b kɩdmame. Rẽ kɩtame t’a Zezi leb n tẽeg makr a yiib sẽn yaa bãngr goam Wẽnnaam Rĩungã wɛɛngẽ. A ra zoe n zĩnda koom koglg pʋgẽ Galile Mogrẽ wã n dɩk mak-kãensã, sẽn zems yʋʋmd la woto. Luk 13:1-21; Koɛɛg Soaba 9:11; Matɩe 13:31-33.

▪ Yel-be-bʋs yell la b gom ka, la a Zezi tika rẽ zug n zãms neba bõe?

▪ Kankangã sẽn ka womd biisã, la b sẽn mak n na n kɩt t’a wom biisã võor yaa bõe?

▪ Wãn-wãn la karen-doogã naab sak n deeg t’a Zezi tõe n sãooga neb bãase, la baasgo wãn to la a Zezi wilg tɩ rao wã yaa pʋ-lik soaba?