Koe-noogã yõod ne yãmb sakã neba
RŨNDÃ-RŨNDÃ zãmaana pʋgẽ, d nong n wʋmda nebã sẽn yet woto: “Kiris-nedemdã noy pa tar yõod ye. B ye pa tar yõod tõnd rũndã-rũndã vɩɩmã sẽn tar yɛl wʋsgã pʋgẽ ye.” La b yeelame tɩ sõsg sẽn zĩnd Ẽnd taoor lʋɩt a Mohandas Gandhi la a Lord Irwin Ãngeletɛɛr sẽn da yãk t’a rɩ naam Ẽnd zugã sʋka, tagsg sẽn yaa toor wʋsg la b wilg-yã. B yeelame t’a Lord Irwin sʋka a Gandhi n gese, sã n yaa ne yẽ tagsgo, yaa bõe n da na n welg zu-loees nins sẽn be Gãrãnd Bertayn ne Ẽnd sʋkã. A Gandhi rɩka Biibl n lak Matɩe sak a nu soabã zĩigẽ, n yeele: “Yãmb tẽngã ne mam tẽngã sã n wa naag taab n tũ zãmsg ning Kirist sẽn kõ Tãng zug Zãmsgẽ wã, tõnd tẽnsã zu-loees na n welgame, la dũniyã gill zu-loees me na n welgame.”
Zãms-kãng yetame tɩ d bao tẽeb la d tall sũ-bʋgsem, laafɩ, ninbãan-zoeer la tɩrlem. A pa gɩdg nin-kʋʋr bal ye, a gɩdgame tɩ f ra yik f sũur meng ne ned ye. A pa gɩdg yoob bal ye, a gɩdga yoob yell tagsg menga. A gɩdga kãadem kaoob sẽn pa tar tikri, sẽn wãad zags tɩ namsd kamba. A yeta tõnd woto: ‘Nong-y neb nins sẽn pa nong-y wã menga, kõ-y ned ning sẽn be ratem pʋgẽ, kao-y neb a taabã bʋʋd ne nimbãan-zoeere, maan-y neb a taabã wa yãmb sẽn dat tɩ b maan to-to ne-yã.’ Y sã n tũ sagl-kãngã fãa, na n naf-y-la wʋsgo. Yãmb sakã neb wʋsg sã n maand woto n paasdẽ fãa, la sakã sẽn na n maneg n paase!
A Zeova Kaset rãmbã sõngda nebã tɩ b maan woto. Biiblã zãmsd-b lame tɩ b tall waoogr ne kãadem. B zãmsda b kambã no-tɩrsã tũubu. B tẽegda wakat fãa tɩ zak pʋgẽ vɩɩmã tara yõod wʋsgo. Zags sẽn tar zems-n-taar yaa bark n kõ yãmb saka la y tẽngã menga. Pĩndã makr wʋsg beeme sẽn wilgd dũniyã soolem bɛd sẽn dʋʋge, zagsã zems-n-taar sẽn boog tɩ yoobã paasa yĩnga. A Zeova Kaset rãmbã sã n sõngd zagsã neb tɩ b tũud Biiblã noyã n paasdẽ, bi-beerã, yoobã la tʋʋm beedã sẽn be yãmb sakẽ wã na n boogame.
Yel-kãseng a yembr sẽn namsd nebã la tẽnsã yaa bu-welsgã. Sẽn yaa lebend ne woto, tʋm-tʋmd a Pɩɛɛr yeelame: “Mam bãnga masã tɩ Wẽnnaam ka tũusd neb ye. La buud fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.” T’a Poll gʋlse: “Ka le be tɩ m yaa Zʋɩf bɩ Gerɛk ye; ka le be tɩ m yaa yamb bɩ burkĩn ye; ka le be tɩ m yaa rao bɩ pag ye; tɩ bõe, yãmb fãa yaa yembr Kirist Zezi pʋgẽ.” (Tʋʋma 10:34, 35; Galat dãmba 3:28) A Zeova Kaset rãmbã saka woto. Buud toɛy-toɛy la neb yĩn-kõbg toɛy-toɛy vɩɩ ne taab la b naag taab n tʋmd b dũni gill tʋʋmdã yẽgrẽ wã, tʋʋm wilẽ wã la tigimsẽ wã.
Afiriki, yaa toog ne buud kẽer tɩ b lagem taab tɩ pa wulumd ye. La a Zeova Kaset rãmbã tigis-kãsemsẽ, neb sẽn yaa buud toor-toor naagda taaba, n dɩt ne taaba, la b naagd taab n balemd Wẽnnaam, n tar zems-n-taar sõma-sõma la tũud-n-taar sẽn be yamleoog ne taab tɩ koɛɛg kaẽ ye. Tẽn-soaadbã sã n yã rẽ, yaa lingr ne-ba. Makr n wilgd tɩ kiris-nedemd hakɩkã tara pãng n tõe n wa ne zems-n-taare, tɩ Niu York zʋrnall sẽn boond tɩ Amsterdam News sẽn yi sa-sik kiuug rasem a 2, yʋʋmd 1958 wã gom a yelle. B sẽn gom woto wã yaa b sẽn yã tẽn-tẽns tigis-kãsengã yell d sẽn gom tɩ loogã, tɩ sẽn yɩɩd Kaset rãmb tus 250 tigim Niu York galʋ-tẽngã pʋgẽ wã.
“Zĩig fãa, nin-sablse, nasaar dãmb la Azi neba, tals la nin-bɛda, la neb sẽn yit dũniyã babs toɛy-toɛyẽ naaga taab ne sũ-noog la yamleoogo . . . Kaset rãmbã yii tẽns 120 pʋsẽ n wa lagem taab ne laafɩ n balem Wẽnde, n wilg Amerik nebã rẽ sẽn tõe n maan nana-nana to-to. . . . Tigis-kãsengã yaa makr sẽn wilg vẽenega, neb sẽn tõe n naag taab n tʋm la b vɩɩmd ne taab to-to.”
Tõe tɩ neb wʋsg yeel tɩ kiris-nedemdã noy pa tar yõod rũndã-rũndã zãmaanã pʋgẽ ye. La sã n pa no-kãense, bõe me n tall yõodo, bɩ n na n tall yõodo? Kiris-nedemdã noy sɩd tõe n talla yõodo, y sakã neb sã n tũ-b masã. La yaa no-kãens zut la b na n tik n lagem ‘soolem fãa, buud fãa, la neb sẽn gomd goam toɛy-toɛya fãa’ tẽngã gill zugu, Wẽnnaam Rĩungã sã n wa rɩt naam ãdem-biisã zutu.—Wilgri 7:9, 10.
[Goam sẽn tar pãngã, seb-neng 23]
Buudã fãa la neb yĩn-kõbg sẽn yaa toor-toor tara zems-n-taare
[Goam sẽn tar pãngã, seb-neng 24]
Kiris-nedemdã tara yõodo. Bũmb a to bʋg n tõog n toeem neb woto?