Bi-bɩɩg sẽn tall raoodo

D na n goma bi-bɩɩg a ye yelle. A maana bũmb n fãag a yasba. Tʋm-tʋmd a Poll n yaa a yasbã. D pa mi bi-bɩɩgã yʋʋr ye. La d miime t’a sẽn maan bũmb ningã wilgdame t’a talla raoodo. Fo rat n bãnga a sẽn maanã bɩ?—

B ra paga a Poll bãens-roog Zerizalɛm. Yaa a sẽn da moond koɛɛgã, n gomd a Zezi yell ne nebã yĩnga. Nin-wẽns n da kis a Polle. B sõsa ne taaba, n yãk b sẽn na n maan to-to n paam-a n kʋ. B yeelame tɩ b na n tɩ yeela sodaasã taoor-soaba, t’a kɩt tɩ sodaasã tall a Poll n kẽng bʋʋdã zĩigẽ. Woto, bãmb na n solga sorã zugu, tɩ b sã n wa loogdẽ bɩ b yek-ba, n kʋ a Polle.

A Poll yagengã wʋma nin-wẽnsã sẽn dat n maan bũmb ningã. Bõe la a maan-yã? A kẽnga bãensã roogẽ n tɩ togs a Polle. Zĩig pʋgẽ, a Poll yeel-a lame t’a tɩ togs sodaasã taoor-soaba. Fo tagsdame tɩ yɩɩ nana ne bi-bɩɩgã t’a tɩ gom ne sodaasã taoor-soab bɩ?— Ayo. Bala ra yaa sodaasã fãa naaba. La a Poll yagengã talla raoodo, n tɩ gom ne-a.

Sodaasã naab bãnga a sẽn na n maane. A kɩtame tɩ sodaas sẽn kolg bãmb 500 na n yãag a Polle. A yeelame tɩ b tall a Poll n kẽng Sezaare baraar yʋngã bala. A Poll tõog n põsame bɩ?— N-ye. Nin-wẽnsã ra pa le tõe n maan-a bũmb ye. B sẽn da ratã pa tõog ye.

Kiba-kãngã zãmsda foo bõe?— Fo me tõe n talla raood wa a Poll yagengã. Tõnd sã n wa gomd a Zeova yell ne nebã, d tog n talla raoodo. Fo na n talla raoodo, n ket n gomd a Zeova yell ne nebã bɩ?— Fo sã n maan woto, tõe tɩ f tõog n sõng ned t’a paam fãagre.