RĨUNGÃ KOƐƐGA: D paamda sẽn yaa tɩlae d tẽebã kengr yĩngã

MAMS-Y wa yãmb sẽn na n kẽng n na n tɩ zãms ned Biiblã. Y naaga taab n karem vɛrse, tɩ yãmb bilgd a võorã. Y mikame t’a sũur yaa noogo, a sẽn wʋm vɛrse wã võor sõma wã. A soka yãmb yaa: “Dẽnd Biiblã yetame tɩ d na n wa vɩɩmda wakat sẽn kõn sa, arzãn pʋgẽ, tẽngã zug ka wɛ?” Saam-biig ning sẽn yãag-a yãmbã laame, n yeele: “Fo sẽn karmã, b pa yeel woto sɩda?” Karen-biigã gõmsa a zugu, n yeele: “Pa sɩd ye. Mam da zɩ n wʋm ye!” Yãmb tẽegame tɩ semen a wãn sẽn looge, yɩɩ woto la karen-biigã yeel-yã, y sẽn wa n wilg-a tɩ Wẽnnaam yʋʋr la a Zeova wã.

Rẽ yĩnga woto buud zoe n paama yãmb bɩ? Wẽnnaam nin-buiidã sʋka, neb wʋsg zoe n yãa a buudu. Pa daar fãa la d yãt bũmb sẽn tẽegd tõnd tɩ d sẽn paam n bãng a Zeova wã yaa bark ye. La sok-y y meng woto: Tũu ne bõe tɩ mam wa paam bark-kãnga? D na n leoka sokrã sags a tãabã sẽn pʋgdã pʋsẽ. Wẽnnaam sẽn sõng a nin-buiidã bilf-bilf tɩ b paam vẽenem b tẽebã kengr yĩngã yaa kaset tɩ Rĩungã sɩd beeme. Sẽn na maan yʋʋm koabg masã, a Zezi Kirist sẽn yaa Rĩungã Rĩmã sõngda Wẽnnaam nin-buiidã tɩ b wʋmd Biiblã goamã võor sõma.