“M da tõe n yãame tɩ laafɩ bee b sʋka”

RAO sẽn yit Alemayn kẽnga bab-sak tigis-kãsengẽ a Zeova Kaset rãmbã sẽn sigl sẽn na yɩl n “gũus” Kaset rãmbã. Bõe yĩnga? A bõn-datlã ra yaa “puk tũudum wil-kãngã la a fãag a zo-rãmbã ne bʋdgre.” A sẽn kẽng tigis-kãsengã poore, a gʋlsa lɛt-kãngã a zo-rãmbã:

“Mam sẽn waa n pẽneg tigis-kãsengã zĩigã, m da sʋkda m meng n getẽ sã n da yaa zĩigã la ka. Ned ba a yembr da pa be yɩnga, la sagd bɩ bɛɛr koalba ra pa rɩg tẽng ye. Mam sẽn pẽnegã, m yãa roap a yiib ɛstaadã kõom zĩigẽ. B pʋʋsa maam n bas-m tɩ m kẽ.

“M da tẽedame tɩ m na n wʋma neb tusa wã sẽn be be wã bʋrgo, la ra yaa sɩɩ. M tagsa woto: ‘Tõe tɩ yaa neb bilf bal n yarem taab zĩisã fãa.’

“Mam sẽn waa n kẽ wã, tao-tao bala, dram b sẽn da maand taoorã n nek mam ratmã. Yaa kaoosg poor bal la mam mik tɩ ɛstaadã ra pida pã, ne neb tusa sẽn kelgd sõma. M da tõe n yãame tɩ laafɩ bee b sʋka. Mam sẽn wʋme, n yã la m tags tigis-kãsengã sẽn kellã pʋgẽ wã sɩd paa mam pʋ-tẽerẽ wã hal sõma.

“M sẽn naag m meng ne Kaset rãmbã, m da pa tõe n pa yã b sũ-noogã la b nonglmã ye. Tao-tao, m da pa tõe n yẽes tags-kãngã ye: ‘Bãmbã sɩd yaa Wẽnnaam nin-buiidu!’ ”

Wall t’a ‘fãag a zo-rãmbã tɩ b ra bʋdge,’ bɩ-bɩɩgã kosame n na n zãms Biiblã ne-ba. Rẽ baasa ne bõe? Rũndã-rũndã, a yaa kẽem soab sẽn yaa kiris-neda. Yẽ ne a zakã tʋmda ne Zug tigeng a yembr Sʋɩɩs tẽngã pʋgẽ.