D kogl d yʋ-noogã

TAABLO neer gesg sõma tõe n yɩɩ bũmb sẽn be barka. F sã n gẽnes-a sõma, f na n yãa tʋʋm-mitã sẽn tũnug ne gʋlb gʋls-raoog naoor kobs sẽn na yɩl n ning gʋlem toɛ-toɛ taablo wã zugu.

Woto me, sã n yaa ne makr wɛɛngẽ, f paamda yʋ-noogo, pa f sẽn na n dɩk gʋlb gʋls-raoog n bẽeg yaleng ye, la yaa ne tʋʋm bãaneg sõor wʋsg wakat ning pʋgẽ. N-yẽe, bilf-bilfu, tõnd yʋ-noogã paamda meebo, tʋʋm nins tõnd sẽn maandã maasem yĩnga.

Sẽn yaa lebende, gʋlb gʋls-raoog gʋlb zĩig sẽn pa zemsẽ tõe n booga taablo neerem. Yaa woto me ne tõnd yʋʋrã. Rĩm a Salomo sẽn yaa yam soabã yeelame: “Ned yalemd n sãamd a yell[e].” (Yelbũna 19:3) Yalemd bilf bal sekame, tõe tɩ yaa sũ-yikr wʋsgo, rãam yũ-tɩ-looge, bɩ yoob tʋʋm-yɛnga, tɩ yʋ-noog rẽgem. (Yelbũna 6:32; 14:17; 20:1) Woto yĩnga, ad sɩd tara yõod wʋsg tɩ d modg n paam yʋ-noogo, la d tʋm ne yẽesem n kogl-a.—Mak-y ne Wilgri 3:5.