Nonglem ne neb nins

‘sẽn kĩ ne tõnd tẽebã pʋgẽ wã’

KIRIS-NEB hakɩkã tara loets sẽn wõnd zak pʋgẽ dẽndã bãmb ne taab sʋka. Sɩda, yʋʋm kob-yendẽ T.W. tɛka, b boonda taab tɩ ‘saam-biis’ la ‘saam-bi-pogse.’ (Mark 3:31-35, NW; Filemo 1, 2) Pa goam bal ye. Gom-kãensã bilgda Wẽnnaam balemdba tagsg sẽn yaa to-to ne taaba. (Mak-y ne 1 Zã 4:7, 8.) A Zezi yeelame: “Yãmb sã n nong taaba, neba fãa na n bãngame tɩ yãmb yaa mam karem-biisi.”—Zã 13:35.

Nonglem a woto puka vẽeneg yʋʋmd 1997, sẽoog kiuugã, war sẽn kaoos sẽn pʋgl ne sa-kẽeng ne ko-limdem Sili tẽngã. Zĩig pʋgẽ wã, rɩɩbo, fut la teed a taab paooga nebã. Yel-beed sã n wa maane, a Zeova Kaset rãmbã modgdame n tũud tʋm-tʋmd a Poll saglg ning a sẽn taas Galat dãmbã: “Woto yĩnga, tõnd sã n paam weere, bɩ d maan neba fãa yel-sõmde, la neb nins sẽn yaa tõnd ba-biis a Zezi tẽeba yĩngã (kĩ ne tõnd tẽebã pʋgẽ wã, NW) n yɩɩda.”—Galat dãmba 6:10.

Woto yĩnga, a Zeova Kaset rãmbã yɩɩ tao-tao n sigl b mens n maan bũmbu. Rɩɩbo, fut la teed a taab sẽn wõnd woto la b tigim-yã, n tũusi, n loe n tall n kẽng yel-beedã zĩigẽ. Kamb kõo reem-teed menga! Linga saam-bi-poak a yembr hal wʋsgo, a sẽn yã tɩ Rĩungã Roog ra pida ne te-kõtmã yĩnga. “Mam yaasa wʋmm, n pa mi m sã n na n laame bɩ m sã n na n yãbame ye. Ra yaa tõnd sẽn da ratã bala,” woto la a yeel-yã.

Rẽ poore, tẽn-digimdg n maan bab-kãng ko-limdmã sẽn da zĩndẽ wã zĩig a yembr ne lingri. Rot wʋsg n siigi. Sẽn na yɩl n ges ratmã yelle, b maana sõngr tʋʋm sul n paase. Babs Meeb Sul sẽn nong n get a Zeova Kaset rãmbã tigiss zĩis meeb yellã wa n loba b nug n kõ b teelgo. A biisã yɩɩ bõe? Rot sẽn zems bal saam-biisã sẽn tags n maan pãla la b me n kõ neb nins rot sẽn sãama. Baa ne ro-kãens sẽn pa neeb wʋsgã, b ra yaa toor wʋsg ne dũniyã rãmb sẽn modg n kõ b sõngr n me rot b sẽn pa ning sap la sẽn pa tar fẽneta la sẽn pa ning pẽntiirã, n kõ-b wakat bilf yĩngã.

Saam-biis kẽer yii zĩ-zãrsẽ n wa sõnge. Babg meeb sull a yembr perzidã gilgame n ges sãoongã sẽn yɩ to-to wã rasem a yiib sẽn pʋgl taab pʋsẽ, baa ne a sẽn da zao põor weefã. Saam-biig sẽn yaa zoang tʋma wʋsgo, n dɩkd raad n tʋgd n kõt ra-wãadã t’a wãad-b tɩ b bedrmã zems b sẽn datã. Saam-biig sẽn yaa wʋng tigma raadã n tall n kẽng zĩig ning b sẽn dat-bã.

Sõngr ning saam-biisã sẽn kõ wã linga gɛtb wʋsgo. Galʋ-tẽng a yembrẽ, polɩɩs rãmbã mobill n da gaar n kɛg saam-bi-poak roog b sẽn da manegde. Polɩɩs rãmbã ra rat n bãnga sẽn maand be wã. A yembr n sʋk saam-biig woto: “Tʋm-tʋmdb kãensã sẽn wõnd b tara sũ-noog wʋsgã yaa ãnd dãmba, la b yaood-b-la wãna?” Saam-biigã wilgame tɩ b fãa ra yaa yamleoog tʋm-tʋmdba. Polɩɩs a yembr sẽn yaa ofisie wilgame t’a kõo a egiliizã kiuug-kiuug piig pʋɩɩrã, la tɩ ne rẽ fãa a pastɛɛrã pa wa ges-a tẽn-digimdgã sẽn maana tɛk meng ye! Daar ning sẽn pʋglã, saam-bi-poakã paama telefon booll sẽn yit polɩɩs taoor soab a ye nengẽ. Yẽ me ra gesa tʋm-tʋmdbã tɩ b tʋmdẽ. A yeelame tɩ tʋm-tʋmdbã sẽn da tʋmd ne yamleoogã kẽe a sũur sõma hal t’a ra rat n naag-b n tʋme!

Sɩd-sɩda, sõngrã kũun b sẽn maan modgr n kõ Sili wã ra yaa bũmb sẽn kõ yamleoog tʋm-tʋmdbã sũ-noogo, la a ra yaa kaset sẽn yaa sõma wʋsg ne sẽn da get-bã.