Rĩungã koe-moondb togsdame
Neb buud fãa sõngr Peyiba
A ABRAHAAM ra yaa rao tẽeb buud sẽn pa wõnd a taaba. Tʋm-tʋmd a Poll yeelame tɩ “b sẽn bool a Abrahaam[a],” a saka Wẽnnaam koɛɛgã. “Yẽ yiimi n ka mi a sẽn dabd zĩig ninga ye.” A Abrahaam sẽn yik ne a zakã rãmb fãa poore, a ‘siga tẽn-sãang ning b sẽn kãab-a wã pʋgẽ,’ a yõorã tɛk sẽn kaoos yʋʋm koabg n paasã pʋgẽ.—Hebre dãmba 11:8, 9.
Woto me, rũndã-rũndã, a Zeova Kaset rãmb wʋsg saka tʋʋm-toog ning sẽn yaa kẽng tẽn-zẽng sẽn na yɩl n tʋm zĩig ning ratmã sẽn yaa kãseng n yɩɩdẽ wã. A taab zãmsa buud-gom-zẽng sẽn na yɩl n kõ sãamb nins sẽn yik n wa b tẽngẽ wã kaseto. Wala makre Peyiba, neb milyõ 15 wã sʋka, sẽn zems neb milyõ a yembr n yit tẽn-zẽmse. Rẽ paka ‘kʋɩleng kãseng tɩ [b] maan tʋʋmd sẽn be nafre,’ wala yɛl nins b sẽn vɩɩmd tɩ pʋgdã sẽn wilgdã.—1 Korẽnt dãmba 16:9.
◻ A Bahram sẽn da yaa Kung Fu karen-saambã yii Moyẽnoriã tẽng a yembrẽ n wa. A paama Biibl la Watch Tower sɛb kẽere. Kiuug a yembr pʋgẽ, a Bahram bãngame t’a ra yãa sɩdã. Biibl zãmsg la b sɩng ne yẽ la ne a pagã, la yell n da be be. Ned ning sẽn da zãmsd Biiblã ne bãmba wã ra pa gomd b buud-gomdã ye. B ra gomda ne mugs goam, n gomd ne b “nus la b nao,” woto la b tẽeg yɛlã sẽn yɩ to-to wã. A Bahram ne a pagã wa n tõog n yãa tiging sẽn be ne bãmb buud-gomdẽ wã, la rẽ poore, b bɩʋʋngã yɩɩ tʋʋlle. Masã a Bahram yaa Kaset soab sẽn deeg lisgu.
◻ So-pakdb sẽn yaa kẽed-n-taas sẽn yit Peyiba pẽnega Ẽndonezi rao sẽn da yas butik kẽeng taoore. Ling-a-la ne yamleoog wʋsgo, pagã ne a sɩdã sẽn sõs ne-a yẽ mengã buud-gomd pʋgẽ wã. Rẽ poore, b rɩka segls n lebg n tɩ ges-a a yirã. B wa n mikame t’a ra vɩɩmda Risi n maan sẽn yɩɩd yʋʋm 20, sasa kãngã a lebga mit pagbã rogs wɛɛngẽ. A ra yetame t’a yaa Wẽnd-kae soaba, la a sak n deegdame tɩ wakat ning fãa a sẽn yiis bi-pɛɛlg a ma pʋgẽ, a ra pa tõe n pa yeel ne lingr wʋsg woto ye: “Ninsaal yĩngã sɩd zemsa zãng hal wʋsgo! Ad sɩd yaa yel-solemde!” A sakame n na n zãms Biiblã, la pa kaoos la a wa tẽ tɩ Naand sẽn get ãdem-biisã yell n be ye. (1 Pɩɛɛr 5:6, 7) Masã a yaa saam-biig sẽn deeg lisgu, la a tʋmd ne Ẽndonezi tigingã Ãmstɛrdam.
◻ Rotɛrdam sẽn yaa dũniyã batayo rãmb yalsg zĩig ning sẽn yaa kãseng n yɩɩdã a yembrã, so-pakdb sull n lebg neb sẽn tar minim wʋsgo, sã n yaa ne moon buud-goam toɛ-toɛ neb sẽn wat ne batayo rãmb daar fãa wã wɛɛngẽ. Moondb sul-kãngã sẽn tar yẽesmã tʋʋmd kɩtame tɩ mogr zug so-toagdb wʋsg sak sɩdã. Bãmb sʋkã, kapitɛne, mogr zug soda-naab la ned sẽn da yaa gardkoor n zĩndi. Masã bãmb me sõngdame n yelgd Wẽnnaam Rĩungã koe-noog dũniyã gill zugu.—Matɩe 24:14.
Wala dũniyã zĩis a taab pʋsẽ, a Zeova Kaset rãmbã sẽn be Peyiba wã rɩka sard kãn-kãe n na n kẽes b toog n moon koe-noogã sẽn ka sɛtã tẽng fãa, buud fãa, buud-gomd fãa la neba fãa.—Wilgri 14:6.