Y tõe n pẽnega Wẽnnaam y nin sẽn pa ne bɩ?

‘Wãn to la m tõe n tall zood sẽn tar pãng ne ned m sẽn pa tõe n yã?’ tõe tɩ y sʋk woto. Tõe n wõnda sʋk-kãngã tara tikri. La bɩ y gese:

HAL sẽn ta zĩ-bʋg la ned yãab tar yõodo, sẽn na yɩl n tõog n nong-a la f tall zood sẽn kaoosd ne-a? Bũmb nins nif sẽn pa ne wã pa zem woto, bɩ b yɩɩd menga? Sɩd yaa woto! Yaa woto yĩng la neb kẽer tall zood sẽn tar pãng ne neb a taaba, b sẽn gʋls taab lɛta wakat fãa wã yĩnga. Sɩd-sɩda, b lɛta wã ra wilgda yɛl b fãa sẽn lagem n nongẽ, yɛl b sẽn pa nonge, bõn-datɩ, noya, lɛta sẽn tar kʋʋsem la nedemd nens a taab bɩ yɛl a taab sẽn be yamleoog ne-ba.

Zoensã me wilgdame tɩ pa tɩlae tɩ f yã f to n yaool n tõog n tall zood sẽn tar pãng ne-a ye. Ges-y a Edward la a Gwen makrã. B fãa yaa zoens n kẽ kãadem ne taaba.a A Edward sega a Gwen zoens lekollẽ. A Gwen da yaa karen-biig be wa yẽ. A Gwen zʋg-sõma wã yamleoog kẽ-a-la wʋsgo, sẽn yɩɩd fãa pʋ-peelem ning a sẽn pukd a no-goamẽ wã la a manesmã pʋgẽ wã, la a sẽn tar manesem sõng ne tʋʋmã. A Edward me yamleoog kẽe a Gwen, bala yẽ meng yeelame tɩ “a puka zʋg-sõma nins fãa b sẽn zãms maam tɩ m ges tɩ ra tara yõodã.” B sɩnga taab roobo, n kẽ kãadem yʋʋm a tãab poore.

Ad a Edward sẽn yeele: “Y sã n be ne taaba, f yaa zoang tɩ f pa zoang me, y tõe n talla zood ne taaba. Y tõeeme n pa ne taab ye, la nonglem pa zoang ye.” Masã, yʋʋm 57 loogr poore, b ket n nonga taab wʋsgo. B wilgdame tɩ nonglem kãsengã b sẽn tar ne taabã yaa sẽn na ta yɛl a naas yĩnga: 1) b sẽn yã ned a to wã zʋg-sõma wã, 2) b sẽn tagsd zʋg-sõma kãens yell la b yamleoog sẽn kẽ-bã, 3) b sẽn ket n yẽsd ne taab sõma wã, la 4) b sẽn naagd taab n maand yɛlã.

Bõn-kãensã b naasã tara yõod wʋsg sẽn na yɩl n tall zoodo, yaa zo-rãmb ne taaba, ned ne a pag sʋka, bɩ sẽn yɩɩd fãa, ninsaalb ne Wẽnnaam sʋka.

[Tẽngr note]