Rĩungã koe-moondb togsdame

Ẽnde, “nebã yɛl yaa toɛ-toɛya, tɩ b yaool n tar zems-n-taare”

“NEBÃ yɛl yaa toɛ-toɛya, tɩ b yaool n tar zems-n-taare.” Woto yaa gomd b sẽn nong n yetẽ, sẽn na yɩl n bilg buudã zems-n-taar Ẽnd tẽngã pʋgẽ. Tõog n paam zems-n-taar tẽn-kãseng kãngã pʋgẽ pa nana ye. Bala b buudã vɩɩm, b buud-goamã, tũudmã, b buudã, b fu-yerdɩ wã la b rɩɩbã yaa toor-toore. La d nee zems-n-taar a woto a Zeova Kaset rãmbã biru sẽn be Ẽndã pʋgẽ, baa yamleoog tʋm-tʋmdb nins sẽn vɩ la b tʋmd be wã sã n yit babs wʋsg la b gomd buud-goam toɛ-toɛya.

• Bɩ d bao n bãng a Rajrani sẽn yaa pʋg-bɩɩg sẽn yit Pẽndzab sẽn be Ẽnd rɩtg babgã. A Rajrani sẽn da wa n be lekolle, a karen-bi-taag a yembr n sɩng Biiblã zãmsg ne a Zeova Kaset rãmbã. Bipugl kãngã makame n na n kɩt tɩ Biiblã tall yamleoog ne a Rajrani. Sẽn mik t’a karen-bi-taagã ãngilind wʋmb pa zãag tɩ Gũusg Gasgã ra pa be ne Pẽndzabi rẽ wẽndã yĩnga, a kosa a Rajrani sõngr me sẽn na yɩl n lebg sebrã goam n kõ-a. A Rajrani sẽn karem bũmb ning Gũusg Gasgã pʋgẽ wã sɩngame n talld pãng a zugu, hal tɩ baa ne a roagdbã sẽn da kɩɩsd-a wã, a kẽnga taoor hal n wa rɩk a vɩɩmã n kõ Wẽnnaam a Zeova. A sõgenda Ẽnd Betɛllẽ wã rũndã-rũndã, n maand bũmb ning sẽn yok a ninã t’a bãng sɩdã. A lebgda kiris-neb sɛbã ne Pẽndzabi!

• D gom a Bijoe yell me. Yẽ yita Ẽnd babg ning sẽn yaa Kerala wã. B yiisa a Bijoe kolɛɛse, a sẽn pa kẽes a toog tãb-kaoorã yɛl pʋgẽ wã yĩnga. Bʋ-kaoor n zĩnd yellã poorẽ, tɩ baleng sẽn yaa yɩlemdã paam bʋʋm, t’a Bijoe leb lekollẽ wã.a A kẽnga inivɛrsite me. La nebã yoob manesem beenẽ wã tiisa a sũur kasetã, t’a yãk a toorẽ yam n yi be. Masã, a sẽn maan yʋʋm piig Betɛllẽ wã poore, a tagsdame t’a sẽn yɩ Betɛllã ned nebã yɛl sẽn yaa toɛ-toɛ n yaool n tar zems-n-taarã sʋkã naf-a lame n yɩɩg a sẽn da na n maan karen-bɛda.

• A Norma la a Lily b yiibã fãa tara sẽn yɩɩd yʋʋm 70, la b yaa pʋg-kõap sẽn na maan yʋʋm wʋsgo. Bãmb ned fãa maana sẽn yɩɩd yʋʋm 40 wakat fãa koe-noogã mooneg tʋʋmd pʋgẽ. A Lily tʋmda Betɛllẽ wã sẽn na maan yʋʋm 20, n lebgd sɛbã Tamull buud-gomdã pʋgẽ. A Norma waa Betɛllẽ wã yʋʋm 13 sẽn loog masã, a sɩdã sẽn wa n maan kaalem poore. B sẽn yaa mak-sõma la neb sẽn tʋmd ne b sũy fãa wã toor sẽn ka be, b sõngd n paasda zems-n-taarã Betɛllã zak fãa pʋgẽ. B nonga sãamb reegre, la b nonga Betɛllã zak neb nins sẽn yaa kom-bɩɩsã tũud-n-taare, n togsd-b kiris-ned vɩɩm yʋʋm wʋsg pʋgẽ wã sũ-noodo. La kom-bɩɩsã me yãkda wakat n sõsd ne-b la b kõt-b sõngre, raab sã n wa beẽ. Ad sɩd yaa mak-sõma tɛkẽ!

Yamleoog tʋm-tʋmdb kãensã tõoga yɛlã sẽn yaa toɛ-toɛ sẽn wat ne zab la mo-yõs zĩis wʋsgã. B tʋmda ne taab sũ-noog pʋgẽ n sõngd neb a taabã Ẽnd Betɛllã zak sẽn tar zems-n-taarã pʋgẽ.—Yɩɩl Sõamyã 133:1.

[Tẽngr note]

[Fotã soaadbã, seb-neng 18]

Background: Mountain High Maps® Copyright © 1997 Digital Wisdom, Inc.