Wakat n na n wa tɩ kãabsã lebg waaziba

NINSAALB sẽn be tẽng zug tɛka, kãabs neb sẽn maan tɩ vaal yaa ka tɛka. Naoor wʋsgo, tẽns n sĩyn sɛb n pʋlem tɩ b ka na n zab ne taaba, n yaool n ka pids b pʋlengã tɩ rẽ kẽes b nin-buiidã zab-toos pʋsẽ. Vugri, a Napoleõ yeelame: “Goosneem dãmbã sã n wa pidsd b kãabsã, rẽ tɩ yaa b sẽn modg-ba, bɩ rẽ tɩ b mikame tɩ b sã pids-ba, na n naf-b lame.”

Yaa wãn to ne kãabs nins nebã yembr-yembrã sẽn maandã? Ad yaa bũmb sẽn sãamd sũuri, ned sã n ka pids a kãabs a sẽn maan-yã, sẽn yɩɩd fãa sã n mikame t’a soabã yaa ned y sẽn mi la y tar bas-yard ne! Yaa sɩda, tõeeme tɩ neba ka tõe n pids b kãabsã, bɩ b ka rat n maan dẽ ye.

Ad ninsaal kãabsã yaa toor zãng fasɩ ne Wẽnnaam kãabsã! D tõe n teega Wẽnnaam kãabsã, la d tall bas-yard zãng-zãng ne-ba. Kãabg buud fãa a Zeova sẽn maan yaa bũmb sẽn pa tõe n vaale. A pidsgã yaa waaziba. Ezai 55:11 pʋgẽ, b yeela Wẽnnaam kãabsã sẽn ka vaand pidsgã wɛɛngẽ woto: “Woto me, gomd ninga sẽn yit mam noorẽ wã ka na n le wa mam nengẽ zaalem ye. A na n maana bũmb ninga mam sẽn datã. La a na n tõoga bũmb ninga mam sẽn tʋm-a t’a tɩ maana.”

Dẽ, wãn-wãn la d segd n ges Wẽnnaam kãabsã sẽn be Biiblã pʋgẽ wã? Sik kae tɩ d tõe n talla bas-yard ne-b ye. Wala makre, tʋm-tʋmd a Zã gʋlsa woto: “Gese, Wẽnnaam yir bee neba sʋka. La bãmb na n zĩnda ne bãmba, la bãmb na n yɩɩ bãmb neba, la bãmb menga na n paa ne bãmba. Bãmb na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la su-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.” (Wilgri 21:3, 4) Y tõe n paama bark a woto buudu, y sã n tũ a Zezi sagl-kãngã: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.”—Zã 17:3.