Wakat n wat tɩ d na n paam bãan hakɩk bɩ?

ÃND soab n na n yã kamb sẽn deemd ne b roagdb sẽn nong-ba, tɩ pa tall yamleoog ne-a? Kambã sã n be ne b roagdbã sẽn nong-bã, rabeem baa bilf pa tar-b ye. Kamb wʋsg pa wae n paamd sũ-no-kãngã buud ye. Kamb n be n maand yɩɩr be-vẽer fãa, bala b pa mi b sẽn na n gãandẽ zĩig ning yʋng ye. Rẽ yĩnga saagr bee kom-kãensã sẽn pa tar zagsã la neb a taab sẽn pa tar koglgã yĩng bɩ?

Baa sã n wõnd saagr kae tɩ yɛlã na n manega beoog-daare, Wẽnnaam Gomdã pʋgẽ, saagr beeme. No-rɛɛs a Ezai ra reng n togsame tɩ daar n wat tɩ nebã fãa na n vɩɩmd bãan hakɩk pʋgẽ. A gʋlsame: “B na n mee zags n zĩnd b pʋsẽ. Bãmb na n sela tɩɩse n dɩ b biisã. Bãmb ka na n me yir tɩ ned a to reeg n kẽ ye. Bãmb ka na n sel tɩɩs tɩ ned a to reeg n wob ye. Tɩ bõe, mam neba na n kaoosa wa tɩɩse. La neb nins mam sẽn yãka na n paama b tʋʋma nafre.”—Ezai 65:21, 22.

La rẽ yĩnga saag-kãngã sɩd tika bũmb zug bɩ? Bala pa wakat fãa la “saagr” yaa bũmb sẽn sɩd na n pids ye. Wala makre, Berzilli, nebã nong n wʋmdame tɩ b yetẽ tɩ “A esperança é a última que morre.” B sã n lebg ne moore yaa: “Saagr yaa yaoolem bũmb sẽn wat n vaale.” Woto rat n yeelame tɩ neb wʋsg kelld n tẽeme bal tɩ b yell na manege, baa b saagrã sã n pa tar tikr vẽenega. La Wẽnnaam ning sẽn vɩ wã sẽn kõ tõnd saagr ningã yaa toore. Tʋm-tʋmd a Poll gʋlsame tɩ “ned ninga fãa sẽn tẽed [Wẽnnaam] kõn paam yãnd ye.” (Rom dãmba 10:11) Biiblã bãngr-goam nins sẽn zoe n pidsã kõt-d-la bas-m-yam tɩ Wẽnnaam a Zeova sẽn kãab bũmb ninsã fãa me na n pidsame. Bãngr-gom-kãens fãa sã n wa pidsi, bũmb nins sẽn kɩtd tɩ kambã gãe soayã zutã pa na n ye zĩnd ye.

Rũndã-rũndã menga, Biiblã sagls sẽn zemsã tõe n sõnga neb nins sẽn pa tar saagrã tɩ b maneg b vɩɩmã la b paam bãan hakɩka. Wãn to la rẽ tõe n yɩ? A Zeova kaset rãmbã sẽn be yãmb babgẽ wã tõe n sõng-y lame tɩ y paam sok-kãngã leoore.