Sũ-maasem dãmbã na n sooga tẽngã

“M tagsdame tɩ zĩigã na n toeemame n manege. . . . La rẽ pa beoog ye, yaa yʋʋm wʋsg sẽn wate, yĩngr paalg la tẽn-paalg sã n wa wa.”—Yaa a Jean-Marie Pelt sẽn yaa Fãrens ned sẽn yaa tɩɩs la bõn-vɩɩlɩ mitã n yeel woto.

NEB wʋsg sũy sãama tɩɩsã ne bõn-vɩɩlɩ la nebã vɩɩm sẽn yaa to-to wã, la b sũy ra na n yɩẽ-la noogo, tẽngã gill sã n da lebgẽ arzãnã. La pa tõnd zãmaanã bal la nebã tʋlg woto ye. Hal sẽn kaoose, Biiblã kãabame tɩ tẽngã na n wa lebga Arzãna. A Zezi sẽn yeel tɩ ‘sũ-maasem dãmbã na n sooga dũniyã’ la a paas tɩ Wẽnnaam ‘daabã maan dũniyã zug wa a sẽn maand saasẽ’ wã bee Gʋlsg Sõamyã verse nins nebã sẽn mi n yɩɩdã sʋka. (Matɩe 5:5; 6:10) La rũndã-rũndã, pa neb wʋsg n tẽed tɩ tẽngã na n wa lebga arzãn tɩ sũ-maasem dãmb zĩnd a zug ye. Neb wʋsg sẽn yet tɩ b yaa kiris-neb ye pa tẽed tẽng zug Arzãnã ye.

Fãrens zʋrnall (La Vie) b sẽn yiisd semen fãa wã wilgda bũmb ning sẽn kɩt tɩ tũudum wala Katolik Egiliizã neb pa le tẽed tɩ arzãn na n zĩnda tẽng zug bɩ saasẽ wã ye. Zʋrnallã yeela woto: “Katolik rãmbã ra tẽeda zãms-kãngã sẽn zems yʋʋm 1900, la rũndã-rũndã arzãnã zãmsg menema b pʋʋsgã pʋgẽ, wala makre, hat pʋʋsgã, b semineer dãmbẽ wã, la b katesism zãmsgẽ wã.” Arzãnã yaa gom-biig sẽn lebg bũmb sẽn yaa yel-solemd tɩ b ye pa wʋmd a võorã vẽeneg ye. Tũudum taoor dãmb kẽer yãka yam n pa gomd arzãnã yell ye, bala b getame tɩ arzãnã “bilgda sũ-noog buud toor-toor sẽn be tẽngã zugã.”

Sã n yaa ne buud mit a Frédéric Lenoir sẽn mi tũudmã yɛl sõma wã, arzãnã lebga ‘bũmb b sẽn togsd n yɩlemdẽ bal tɩ b pa ye mi a võor takɩ ye.’ Woto me, a Jean Delumeau sẽn yaa pĩnd yɛlã mit la a gʋls sɛb sẽn gomd arzãnã yellã tagsdame tɩ Biiblã kãabs pa na n pids tɩ b yã ne nif woto ye. A gʋlsa woto: “B sã n sok tɩ ‘Arzãnã lebga bõe masã,’ kiris-neb wʋsg na n leokame tɩ ne Soaalã vʋʋgr maasem, daar n wat tɩ nebã fãa na n lagem taab n paam sũ-noogo.”

La ket n tara yõod tɩ d tẽ tẽng zug arzãn bɩ? Bõe n na n paam tẽngã beoog daare? Beoog daarã yaa bũmb tõnd sẽn pa tõe n bãng vẽeneg bɩ, bɩ d tõe n bãng-a lame? Sõsg ning sẽn pʋgdã na n leoka sogs-kãensã.