Bõe n wilgd tɩ ned vɩɩm yaa sõma?

A JESSE LIVERMORE ra yaa omdafɛɛr sẽn tʋmd Wall Street. A yʋʋrã ra yiime n yɩɩd a taabã, bala a ra mii a tʋʋmdã sõma. Rẽ kɩtame t’a paam arzɛk wʋsgo. A ra yera fut sẽn pa yaare, n vɩ roog sẽn tar ro-pʋs 29 pʋgẽ, n tar mobil-sablg b sẽn boond tɩ Rolls-Royce, la a toor n sofɛɛre.

A Davɩɩda me ra modgd n dat n yɩɩ wa a Jesse. A ra yaa tʋʋmd taoor soab pʋgdga, n dat n wa paam naam n paas a tʋʋmdã zĩigẽ. A ra rata ne a sũur fãa n paam arzɛk la yʋʋre. La a Davɩɩd yãka yam n na n bas a tʋʋmdã. A Davɩɩd yeelame t’a miime t’a pa na n le paam tʋʋmd sẽn yaood wʋsg woto yɛs ye. Yãmb tagsdame t’a Davɩɩd sẽn maanã pa segd bɩ?

Neb wʋsg tagsdame tɩ f sã n tar laog la yʋʋre, f tõogame tɩ f vɩɩm yaa sõma. La neb nins sẽn tar arzɛkã tõe n ket n tagsdame tɩ bũmb n paoog-ba, la tɩ b vɩɩmã pa tar võor ye. Yaa rẽ n paam a Livermore. Baa ne a sẽn da yaa ra-kãagrã, a vɩɩmã ra pida ne sũ-sãams la sabaab rãmba. A sã n da kẽ kãadem fãa la sẽn wat n sãame, yẽ ne a kambã ra pa zemsd taaba, t’a yamã ra leb n ka a mengã ye. A Livermore arzɛkã sẽn wa n satẽ wã, daar a yembre a kẽnga lotɛl-bedr a ye pʋgẽ n na n tɩ yãb a bõnã. A reega rãam n yũ, la a yiis seb-pɛdg n gʋls a yaoolem goam n bĩng a pagã. A sẽn yũ n sa poore, a kẽe ro-lik pʋgẽ n kʋ a meng ne bug-raoogo.

D pa mi bũmb ning takɩ sẽn kɩt t’a kʋ a mengã ye. La yel-kãngã wilgda vẽeneg tɩ Biiblã goam yaa sɩda. Biiblã yeta woto: “Neb nins sẽn dat n yɩ arzɛgs rãmba . . . kẽesda b mens to-kãseng pʋgẽ.”—1 Tɩmote 6:9, 10.

Rẽ yĩnga rat n yeelame tɩ neb nins sẽn tagsd tɩ ned vɩɩm sẽn yaa sõma yaa ned sẽn tar arzɛk bɩ yʋʋrã tudgame bɩ? Yãmb tagsdame tɩ y tõogame tɩ y vɩɩmã yaa sõma bɩ? Bõe yĩng tɩ y tagsd woto? La y tika bõe zug n yet woto? Sõsg ning sẽn pʋgdã na n wilga sagls sẽn yaa sõma sẽn sõng neb milyõ rãmb tɩ b vɩɩm yɩ sõma. Bɩ d ges tõnd me sẽn tõe n maan to-to tɩ d vɩɩmã yɩ sõma.

[Tẽngr note]