Koodã sẽn dat tigsgã waoogame!

A ZEEZI ra pĩnd n yeelame tɩ dũniyã yaoolem wakate, a karen-biisã na n tʋma tʋʋmd sẽn wõnd tigsgu, la tɩ tʋʋmdã na n yɩɩ wʋsgo. (Mat. 9:37; 24:14) D ges a gomdã sẽn pids to-to tɩ be yamleoogo, Tarãnskarpati babgã, Ikrɛn soolmẽ wã. D rɩk makr ne tẽn-yags a tãab bala. B tigimsã sõor sẽn naag taab yaa 50, tɩ koe-moondbã yɩɩd 5400.a Woto rat n yeelame tɩ b sã n naag tẽns a tãabã nin-buiidã taaba, neb a naas zugu, nin-yendã yaa a Zeova Kaset soaba!

Nin-buiidã yaa wãn-wãn be? Ad saam-biig yʋʋr sẽn boond t’a Vazill sẽn yeele: “Ka, nebã nanda Biiblã, b nonga tɩrlem, zagsã rãmb nonga taab hal sõma, nebã maooda ne b sũy fãa n sõngd taaba.” A paasame: “Pa wakat fãa la b sakd tõnd sẽn tẽed bũmb ninsã ye. La f sã n wilg-b bũmb Biiblã pʋgẽ, b sakd n kelga neere.”

Koe-moondbã sõor sẽn yaa wʋsg woto wã kɩtame tɩ d tẽed-n-taasã maood ne yell a ye sẽn pa wae. Wala makre, tiging a ye pʋgẽ, koe-moondbã sõor yaa 134, tɩ zagsã sẽn be b moonegã zĩigẽ wã yaool n yaa bãmb 50 bala. Woto wã, b maanda wãn-wãna?

D tẽed-n-taas wʋsg kẽnd n moonda zĩis koe-moondb sẽn pa waoogẽ. Saam-biig a Yonaas sẽn tar yʋʋmd 90 wã yeelame: “Tõnd moonegã zĩigẽ, b sã n pʋɩ tɩ zemse, koe-moond fãa tog n taasa koɛɛgã zags a yiib bala. M moonda koɛɛgã tẽn-bil ning d sẽn beẽ wã. Sã n pa m keelmã sẽn boog sẽn nan pa kaoosã, m da kẽnda zĩig koe-moondb sẽn ka be n tɩ moon koɛɛgã ne Hõngri buud-gomdã. Yaa hal kilo 160 zĩigẽ.” Koe-moondbã maanda modgr wʋsg sẽn na yɩl n tɩ sõng zĩis a taaba. Ad a Yonaas sẽn yeele: “Sẽn na yɩl n paam tẽrã n kẽ, m da yikda yibeoog 4:00. M da moonda koɛɛgã n tãag zaabr 6:00. Yaa wakat-kãng la tẽrã yikd be n na n lebge. M da maanda woto naoor a yiib bɩ a tãab semen pʋgẽ.” A neeme t’a modgrã pa yɩ zaalem bɩ? Ad a sẽn yeele: “M sẽn da maand woto wã ra kõt-m-la sũ-noog hal wʋsgo! M tõog n sõnga zak a ye rãmb meng sẽn be hal zĩ-zãrgẽ tɩ b bãng sɩdã.”

Yaa sɩd tɩ pa koe-moondbã fãa n tõe n kẽng hal zĩ-zãrsẽ n tɩ moon koɛɛgã ye. La b fãa, baa koe-moondb nins yʋʋm sẽn vẽsgã modgdame n moond koɛɛgã sõma b tigingã moonegã zĩigẽ fãa. Kɩtame tɩ yʋʋmd 2017 wã, b sã n sõd sẽn wa-b a Zeezi kũumã tẽegr tẽns a tãabã fãa pʋgẽ wã n naag taaba, yaa koe-moondbã sõor naoor a yiib la bala. Woto yaa tẽns a tãabã nin-buiidã pʋɩ-sʋka. Hakɩɩka, baa d sẽn moondẽ fãa, d tõe n ket n tʋmda “Zu-soabã tʋʋmd wʋsgo.”—1 Kor. 15:58, Wẽnnaam Sebre, 1983.