Wẽnnaam bãngr-goamã gomd na n paama pidsg zãnga!
1 Wakat fãa a Zeova Kaset rãmbã tʋlgame n na n wʋm Biiblã bãngr-goamã võore. Dẽ, d sũy ra yɩɩ noog d sẽn da wa n wʋm tɩ rɩẽ bab-sak tigis-kãsengã gom-zug ra na n yɩɩ “Wẽnnaam bãngr-goamã gomdã.” D ra tʋlla ne yãgb n na n bãng bũmb ning a Zeova sẽn tar d yĩng tɩ yaa “rɩɩb wakat sẽn zems pʋgẽ” wã. (Mat. 24:45, NW ) Sɩd me, d pa kong rɩ-kãng ye.
2 Tigis-kãsengã tags-kãsemse: Gom-zu-raoog sõasgã b sẽn maan arzũma t’a gom-zugã yaa “Kelg-y Wẽnnaam bãngr-goamã gomdã” talla sõasg sẽn kõ vẽnegr a Zezi tedgrã kɩbar zugu. (Mat. 17:1-9) A wilga vẽeneg tɩ masã menga, tõnd bee wakat ning sẽn yaa sõma n yɩɩdã pʋgẽ, tɩ bõe, saabã wakat baasg kolga wʋsgo, tɩ dũni paalgã wat ka la bilfu! Manesem kãseng a yembr sẽn na yɩl n kelg Wẽnnaam Gomdã yaa d sẽn na n karemd-a n ka vaandẽ ye. Gom-n-dees taab ning gom-zug sẽn yaa “Maan-y sũ-noog ne Wẽnnaam Gomdã karengã” kõo sagls sẽn zems sẽn na yɩl tɩ d Biiblã kareng tall nafa la a zĩnd yamleoog n paase.
3 Sibrã wĩnd-kaoore, tõnd lebg n gesa bʋʋm nins sẽn kɩt tɩ d segd n kɩs sɩd tɩ d vɩɩ yaoolem dayã pʋsẽ wã. Y tẽra bʋʋm kãens fãa bɩ? Hatã yibeoogo, b wilga a Habakuk bãngr-gomdã võor vẽenega, tɩ tõnd bãng tɩ tõnd wakatã wõndã yẽ wakatã wʋsgo, la tɩ yel-kãsems n na n maan ka la bilfu, wakat ning a Zeova sẽn na n sãam nin-wẽnsã la a fãag nin-tɩrsã. Yãmb wʋma drama sẽn tɩ loe ne a Zakoob la a Ezayu wã võor bɩ? D togame n bao a Zeova barkã sõma-sõma, la d kɩɩs yam-kaalgã.
4 Seb-paalg sẽn nekd ratem wʋsgo: Ad d sɩd kɩdm-yã, d sẽn paam seb-paalg ning gom-zug sẽn yaa Prêtons attention à la prophétie de Daniel! Sãmbg kae tɩ yãmb zoe n karemda seb-kãngã sẽn nekd ratem wʋsgã ye. Sõasd ning sẽn wilg sebrã yeelame: “Sã n pa yɛl a wãn bala, bãngr-goam nins fãa sẽn be Daniɛll sebrã pʋgẽ wã paama pidsgu.” Woto ka wilgd vẽeneg tɩ tõnd wakatã yaa yãgdem wakat sɩda?
5 Tigis-kãsengã sõss kenga kɩs-sɩd ning d sẽn tar tɩ Wẽnnaam kãabs nins fãa sẽn nan ka pidsã na n paama pidsgã. Rẽ kenga tõnd pels tɩ d ket n togsd neb a taabã Wẽnnaam bãngr-goamã gomde!