D maan neer n paam pẽgre!
1 “B tara bãan buud mam sẽn zɩ n yã neb a taab nengẽ ye.” “Ad sɩd kõta sũ-noog tɩ d paam nin-kãensã.” Woto yaa pẽgr goam wʋsg neb sẽn pa a Zeova Kaset rãmb sẽn togs rɩẽ tigims gĩn sul tigis-kãsemsã poore. Gom-kãensã wilgdame tɩ tõnd siglgã tara yʋ-sõngo. (Yel. 27:2; 1 Kor. 4:9) La baas n ya a Zeova la neb a woto pẽgda. (Mat. 5:16) Rõandã “Wẽnnaam Gomdã karen-saam dãmba” tigims gĩn sull tigis-kãsengã leb n yaa sor sẽn yaa sõma n kõ-do, tɩ d tõe n pẽg Wẽnnaam.
2 Yʋʋmd fãa b tẽegda tõnd ne nonglem, manesem sẽn zems ning d sẽn segd n tall tigis-kãsengẽ wã. Bõe yĩnga? Dũniyã neb sẽn tar manesem ning la b sẽn yer b futã modɛll ningã lebgda wẽng n paasdẽ. Rẽ n so tɩ d ka segd n maan wa bãmbã. Tõnd ka rat tɩ d yʋʋrã sãam ye. (Ef. 2:2; 4:17) Bɩ d ning sagl-kãensã d yamẽ.
3 D maan neer ro-gãasã zĩisẽ: D bõos tɩ saam-biis bɩ neb sẽn nong sɩdã sã n deeg yãmb b zagsẽ, bɩ y tũ noy nins b sẽn na n kõ-yã. D ra kẽed bãmb mens rot nins b sẽn pa kõ-d sor tɩ d kẽ b pʋsẽ wã ye. D bõos tɩ y sõng y kambã tɩ b wʋm no-kãensã võor la b tũ-ba.
4 Neb nins sẽn pa a Zeova Kaset rãmbã sẽn ne tõnd kambã sẽn waoogd neb to-to la b yaa kom-sakdsã, lingd-b-la wʋsgo. (Ef. 6:1, 2) Roagdba, d bõos tɩ y gũus y kambã neer tɩ b ra wa tiis neb a taabã ye Neba fãa segd n gũusame n da wa pagd kʋɩlemsã kĩ-kĩm-kĩm bɩ n maand bʋrg ye, sẽn yɩɩd fãa zĩigã sã n wa zʋʋge.
5 D maan neer tigis-kãsengã zĩigẽ: B yãame tɩ tigis-kãsengã watb kẽer n zãgs tɩ b kõn tũ neb rɛɛgdbã sagls ye, hal meng n gom ne-b ne manesem sẽn ka kiris-ned manesem. Tigis-kãsengã watb kẽer n zãgs tɩ b kõn tũ neb rɛɛgdbã noy n tɩ gaar b mobila zĩig ning laloa wã sẽn gɩdgã. Rẽ kɩtame tɩ polɩɩs rãmbã wa yõg b mobila n loog ne. Yaa vẽeneg tɩ rat-m-yembr manesem pa kɩtd tɩ d yaa neb sẽn maand neer ye. Rẽ leb n ka pẽgr ne Wẽnnaam a Zeova me ye. Woto yĩnga, bɩ d yɩ neb sẽn tar nonglem, maag-m-menga, la sẽn yaa sakdba.—Gal. 5:22, 23, 25.
6 Tigis-kãsengã zĩigẽ b yãame tɩ saam-biis la saam-bi-pogs kẽer n zoeta, n tusd neb a taaba, la b wẽdgd sẽn na yɩl n paam “zĩ-sõngo.” B sagendame tɩ d ra rɩ rɩ-zɩsd wĩntoog vʋʋsgã wakate ye. D sã n maan woto rẽ tõe n sõng-d-la wʋsgo. D sã n rɩ rɩ-faasense, d ka na n wa n zĩ n suusd wĩnd-kaoorã tigim taab wakat ye. La yaool n nong n yaa woto, d sã n dɩ rɩ-zɩsd wĩntoogo. D na n le paama vɩʋʋg n sõs ne d saam-biisã la d saam-bi-pogsã n yɩɩda. Bala d ka na n namsd d mens ne laase, rʋgdo, la rɩɩb toɛ-toɛ wʋk n yiis la wʋk n kẽes ye.
7 Maan-y neer y futã ningrẽ la y mengã manegrẽ: Rɩẽ bab-sak tigis-kãsemsã a yembr poore, tẽn-kãseng a yembr pʋgẽ zʋrnall gʋlsa woto: “Sẽn yɩɩd fãa, yaa Kaset rãmbã meng manesem n da nekd ratem n yɩɩda. Ad sɩd da yaa bũmb sẽn be yamleoog tɩ f yã neb wʋsg woto tɩ b tar burkĩnd la waoogre. Hatã daare, zags kobs neb sẽn yaa buud toor-toor ninga fu-neeba, n maag b yĩng n debd zãma tigisgã zĩigẽ. B manesmã yaa toor fasɩ ne neb wʋsg sẽn yɩɩd sẽn wat zãma tigisg zĩ-kãngã wã. Sɩda, Kaset rãmbã nong n yaa toor wʋsg ne neb kʋʋng a taabã. D minim n neeme tɩ zãma wã manesem pa lebd be ye. . . . Sɩda, Kaset rãmbã tigis-bɛd bee yamleoogo.” Bɩ d modg tɩ d fu-yerdɩ wã bɩ d manesmã ra tol n gɩdg nebã sɩdã pʋgẽ waoong ye.—Fil. 1:10; 1 Tɩm. 2:9, 10.
8 D maan neer lisgã zĩigẽ: Sẽn dat-b n deeg lisgã segd n talla manesem sẽn be burkĩnd wʋsg ne lisgã. B sã n ning koom deeng fut sẽn zemse, rẽ wilgdame tɩ b tara naneb ne lisgã sẽn yaa baleng yellã. Yɩtẽ-la sõma wʋsg tɩ sẽn zãmsd-b Biiblã ne karen-biis lebg n ges ne-b “Karemdbã Sʋgsgã” sẽn be yʋʋmd 1995, tʋʋl-nif kiuug 1 daar Gũusg Gasgã (farende) pʋgẽ, sẽn deng tɩ b wa tigis-kãsengã.
9 Tõnd sẽn zãad d mengã to-to wã la d wẽn-zoeer manesmã kõta kaset ne tõnd kiris-ned tẽebã, la kɩtdẽ tɩ yaa nana n yɩɩd ne pʋ-peelem dãmbã tɩ b bãng sɩdã sẽn ya a soaba. Woto yĩnga, d sã n wa be “Wẽnnaam Gomdã karen-saam dãmba” tigims gĩn sull tigis-kãsengẽ, bɩ d ‘maan neer’ n paam pẽgre.—Rom 13:3.