“M tõe n kosa sõngr tẽn-zẽng bɩ?”
1 Wakat-wakate, koe-moondb kẽer n gʋlsd a Zeova Kaset rãmbã tʋʋmd wil sẽn be tẽn-zẽmsã n kot sõngr buud toor-toore. Wala makre, neb kẽer kotame tɩ b sõng-b ne zo-rãmba, kẽed-n-taase, kasɛt rãmba, bɩ tɩ b peng-b ligd menga. D ratame tɩ neba fãa bãng tɩ tʋʋmdã wil ka tõe n deeg kosg a woto buud ye.
2 Wats Tawa Lagem-taabã ka ligd baoor siglg ye. Yaa neb sẽn yit dũniyã gill zug n maand kũun ne yamleoog n sõngd siglgã t’a maand a depãens rãmbã. Kũun kãens tʋʋmd bal yaa kɩt tɩ b moon Wẽnnaam Rĩungã tẽngã gill zugu. (Mat. 24:14) Sẽn mik tɩ b tũnugda ne Kũunã fãa b sẽn kõtã moonegã tʋʋmd yĩngã, b ka tõe n dɩk n peng neb ye.
3 Wakat ninga neb n gʋlsd nin-sãams sẽn be nasaar tẽns n kot-b ligd bɩ laog a taaba. Neb kẽer sẽn ka tar ligd n togd sor tẽn-zẽms bɩ galʋ-tẽn-bɛdẽ, n gũudẽ tɩ tẽng bɩ galʋ-tẽng ning b sẽn na n tɩ zĩndẽ wã saam-biis sõng-ba. Rẽ yĩnga tõnd na n tagsdame tɩ yaa tõnd bal la ‘toog wʋsgã’ paamd n ka paamd neb a taabã, wala tõnd tẽeb saam-biisã sẽn be dũniyã babs a taabã bɩ?—2 Tɩm. 3:1, Sebr Sõngo.
4 Kiris-neb tigingã maana segls n na n sõng neb nins bãmb sʋk sẽn be raab pʋgẽ wã, la sẽn paam-b yell sabaab wẽng yĩngã. B wilga segl-kãens Organisés pour bien remplir notre ministère sebrã, seb-neng 122-3 pʋgẽ. Woto yĩnga, ka zems tɩ b gʋls tigims bɩ tʋʋmdã wilẽ tẽn-zẽms n kos sõngr ye.
5 Sẽn paase, tigimsã la sẽn maan-b abonema rãmbã adɛrs rãmb sẽn be tʋʋmdã wil sɛbẽ wã yaa bũmb b sẽn ka segd n wilg yaar ye. B ka tõe n dɩk-b n kõ sẽn dat-b zo-rãmb tɩ b gʋls-ba, bɩ n kõ neb sẽn baood kẽed-n-taas ye. Y sã n wa kẽng tẽng a to, y tõe n gʋlsa tẽn-kãng tʋʋmdã will n kos t’a wilg-y Rĩung Roog ning sẽn pẽ-a n yɩɩdã adɛrs la a tigiss wakate. D sã n tũ no-kãensã, na n sõng-d lame tɩ d ra sãam d sẽk la d nams d mens wʋsg ye.—1 Kor. 14:20.