Moon-y neba sɩdã a Zezi wɛɛngẽ
1 Kiris-neb nins sẽn zae ne vʋʋsem sõngã la b tũud-n-taasã sẽn yaa piis a taabã ‘tara a Zezi kaset’ kũun tʋʋmde. (Wil. 12:17) Woto yaa tʋʋm kãseng menga, bala yaa ne yẽ maasem bal la fãagr tõe n paame.—Zã 17:3; Tʋʋ. 4:12.
2 ‘A yaa sore, sɩda la vɩɩm’: A Zezi yeelame tɩ “mam yaa sore la sɩda la vɩɩm. Ned ka tõe n ta m Ba nengẽ a sã n ka mam maasem yĩng ye.” (Zã 14:6) Yaa ne a Zezi sẽn yaa ‘sorã’ maasem bal la d tõe n pʋʋs Wẽnnaam la d tall zems-n-taar ne-a. (Zã 15:16) A Zezi yaa ‘sɩdã,’ bala bãngr-goam la mamsg nins sẽn be Hebre Gʋlsgã pʋsẽ wã paama pidsg ne yẽ. (Zã 1:17; Kol. 2:16, 17) Sɩda, bãngr-goam nins sẽn yaa sɩdã bõn-datl yaa kõ vẽnegr n paas tʋʋmd ning a Zezi sẽn tar Wẽnnaam raabã pidsg pʋgẽ wã zugu. (Wil. 19:10, Kãab-paalgã Koe-noogo) A Zezi leb n yaa “vɩɩm.” Sẽn na yɩl n paam vɩɩm sẽn ka sɛtã sẽn yaa Wẽnd kũuna, dẽnda d fãa tall tẽeb ne a Zezi maoongã b sẽn kõ tɩ yɩ rondã.—Zã 3:16, 36; Heb. 2:9.
3 Taoor soaba, la Rĩm sẽn dɩt naam: Neba leb n tog n saka naam sẽn yaa kãseng ning a Zeova sẽn bobl a Biriblã. A Zeova zĩniga a Zezi t’a yɩ Wẽnnaam Rĩungã Rĩma, sẽn yaa Rĩm ning ‘neba sẽn na n sakã.’ (Sɩng. 49:10) Sẽn paase, a Zeova yãk-a lame t’a yɩ tigingã Taoor-soaba. (Ef. 1:22, 23) Tõnd tog n sõnga d Biibl zãmsdbã tɩ b bãng a Zezi sẽn wilgd tigingã sor la a sẽn tʋmd ne ‘tʋm-tʋmd sẽn tũud sɩd la sẽn tar yamã’ to-to n kõt tẽeba rɩɩb “wakat fãa sẽn segde.”—Mat. 24:45-47, Kãab-paalgã Koe-noogo.
4 Maan-kʋʋd kãsem sẽn yaa nimbãan-zoɛta: A Zezi sẽn da yaa ninsaalã a paama makr la namsg buud toor-toore. Rẽ kɩtame t’a tõe n ‘sõng neb nins sẽn tar makrã.’ (Heb. 2:17, 18) Ad sɩd yaa bũmb sẽn sɩd noogd sũuri, tɩ ninsaalb sẽn ka zems zãng bãng t’a Zezi yaa wʋmd b pãn-komslmã wɛɛngẽ, la t’a yõkda Wẽnnaam sɛɛg ne nonglem b yĩnga! (Rom 8:34) D tõe n tika a Zezi maoongã la a maan-kʋʋrã tʋʋmd zug n kolg a Zeova “ne daoodo,” sẽn na yɩl t’a “sõng tõnd d sẽn dat sõngr wakate.”—Heb. 4:15, 16.
5 Bɩ d sẽn modgd sẽn na yɩl tɩ neb a taabã bãng sɩdã a Zezi wɛɛngẽ wã tus-b tɩ b sak-a la b wa naag tõnd n tʋm a yĩnga.—Zã 14:15, 21.