Tõnd tõe n maana bũmb ning a Zeova sẽn baood tɩ d maanã
1. Tags-bʋs la d tõe n wa talle, la bõe yĩnga?
1 Rũndã-rũndã, vɩɩm manesem sẽn yaa sõma ya a Zeova noyã sakre. Rẽ sõngd-d lame tɩ d maan yẽbgr sẽn tar pãnga, wakat sẽn-kõn-sa yĩnga. (Yɩɩl 19:8-12; 1 Tɩm. 6:19) Baasg zãnga, a Sʋɩtãan dũniyã wata ne zu-loees wʋsgo. Tõnd sẽn pa zems zãngã yĩng leb n kɩtame tɩ yaa toogo. D sã n wa makd n na n tũ Biiblã noy n tʋk d zɩɩbã, d tõe n wa tagsdame tɩ rẽ maaneg yɩɩda d pãnga. (Yɩɩl 40:13; 55:2-9) D tõe n wa sokda d meng d sã n sɩd tõe n maana bũmb nins fãa a Zeova sẽn baood tɩ d maana. Wakat kãense bõe n tõe n sõng-d tɩ d tẽebã ra vigsi?
2. Wãn to la a Zeova wilgd t’a sẽn baood tɩ d maan yɛl ninsã pa yɩɩd d pãnga?
2 A Zeova noyã sakr pa toog ye: A Zeova pa baood tɩ d maan yɛl d sẽn pa tõe ye. A noyã sakr pa toog ye, la yaa tõnd nafr yĩnga. (Tõo. 10:12, 13; 1 Zã 5:3) A mii tond pãn-komsmã tiiri, a “tẽegdame tɩ tõnd yaa tẽng tom.” (Yɩɩl 103:13, 14) Wẽnnaam sakda modgr ning fãa tõnd sẽn maand n balemd-a wã ne nimbãan-zoeere, tõnd yɛlã sã n kɩtame tɩ d pa tõe n maan tɩ yɩɩg rẽ. (Maan. 5:7, 11; Mark 14:8) A yet-d lame tɩ d bas d yɛlã ne yẽ, la a kõt-d bas-m-yam t’a na n sõng-d lame tɩ d tõog n kell n tall d kɩs-sɩdã.—Yɩɩl 55:23; 1 Kor. 10:13.
3. Wãn-wãn la a Zeova sõngd-d tɩ d tall sũ-mar toog pʋgẽ?
3 Sũ-mar yaa tɩlae: Kɩbay sẽn be Biiblã pʋgẽ n gomd neb sẽn tall kɩs-sɩd yell wala a Eli, a Zeremi la a Pollã wilgdame tɩ sũ-mar tallg tara yõodo. (Heb. 10:36) A Zeova sõng-b-la toog la sũ-sãoong wakate. (1 Rĩm 19:14-18; Zer. 20:7-11; 2 Kor. 1:8-11) La d saam-biis nins sẽn tõog n tall b kɩs-sɩdã rũndã-rũndã wã me tara pãn-tusdg d zutu. (1 Pɩɛ. 5:9) Mak-kãensã zut bʋgsg tõe n sõng-d lame tɩ d ra koms raood ye.
4. Bõe yĩng tɩ tar yõod tɩ d tall Wẽnnaam kãabsã d yamẽ wakat fãa?
4 Wẽnnaam kãabsã saagr d sẽn tarã yaa “tõnd sɩɩg baare.” (Heb. 6:19) Saag-kãng kɩtame t’a Abrahaam ne a Saara sak a Zeova, n tɩ sig ‘tẽng ning a sẽn kãab bãmbã wa tẽn-sãanga.’ A ra kõo a Moiiz pãng t’a teel baleng hakɩkã ne raoodo. A kõo a Zezi pãng t’a sak namsg ra-luk zugu. (Heb. 11:8-10, 13, 24-26; 12:2, 3) D sã n tall Wẽnnaam sẽn kãab dũni-paalg tɩrlem sẽn na n zĩnd a pʋgẽ wã d yamẽ wakat fãa, na n sõng-d lame tɩ d yals kãn-kãe woto me.—2 Pɩɛ. 3:11-13.
5. Bõe yĩng tɩ tõnd meng pĩnd wẽn-sakr tʋʋmã zut bʋgsg tõe n keng d raoodo?
5 D sã n mi n tẽeg tõnd pĩnd wẽn-sakr tʋʋmã, wala mong-m-meng yam la raood d sẽn da talle, tõe n paasa d keelem tʋʋmdã pʋgẽ. (Heb. 10:32-34) Rẽ tẽeg-d-la sũ-noog ning d sẽn paame, d sẽn maan bũmb ning a Zeova sẽn baood tɩ d maane, sẽn yaa sak yẽ ne d sũur fãa wã.—Mat. 22:37.