Babg a 5 soaba: D sẽn na n zãms nebã Biiblã to-to tɩ b bɩ tẽebã pʋgẽ
D sẽn na n bãng d sẽn na n sõs zãmsgã bɩ sakã zug n ta zĩig ning to-to
1 A Zezi sẽn da wa n zãmsd nebã, a ra gũusdame n ka zãmsd a karen-biisã tɩ zʋʋgd b sẽn tõe n deeg ye. A ra zãmsd-b lame tɩ “zems bãmb sẽn tõe n wʋm.” (Mark 4:33; Zã 16:12) Rũndã-rũndã me, zãmsg fãa wakate, Wẽnnaam Gomdã karen-saam dãmb segdame n mag n ges zãmsgã woglem sẽn segd n yɩ to-to. Zãmsgã woglem bee ne karen-saambã la Biibl zãmsdã yɛl sẽn yaa to-to.
2 Kɩt-y tɩ Biibl zãmsdã tall tẽeb sẽn tar pãnga: Tõe n yaa tɩlae ne karen-biis kẽer tɩ b sõs babg ning zug naoor a yiib bɩ a tãab n yaool n wʋm zãmsgã võore, tɩ karen-biis a taab yaool n na n zãms bab-kãng vugr bal n wʋm a võor nana-nana. Yaa karen-biigã sẽn na n wʋm zãmsgã võor n tar yõod n yɩɩd d sẽn na n maan zãmsgã tao-tao t’a ka wʋm a võor ye. Karen-biig fãa segd n paama tikr sẽn tar pãng tẽeb paalgã a sẽn nan paam ne Wẽnnaam Gomdã yĩnga.—Yel. 4:7; Rom 12:2.
3 Semen ne a to fãa, rɩk-y sẽk ning sẽn yaa tɩlae wã n sõng karen-biigã t’a wʋm la a sak bũmb ning a sẽn zãmsd Wẽnnaam Gomdã pʋgẽ wã. Ra maan-y zãmsgã yãg-yãg tɩ karen-biigã ka paam n dɩ sɩdã b sẽn zãmsd-a wã yõod zãng ye. Rɩk-y sẽk tɩ sek n gom n tadg tags-kãsemsã zut la y sõs verse yẽg nins zãmsgã sẽn tikã zutu.—2 Tɩm. 3:16, 17.
4 Kell-y n kẽng taoor ne zãmsgã n da bʋdg ye: Yaa sɩd tɩ d ka rat n maan zãmsgã yãg-yãg ye, la d leb n ka rat me n bas tɩ bũmb tiis-d tɩ d wa bʋdg n pa kell n kẽng taoor ne zãmsgã ye. Biibl zãmsd sã n nong n dɩkd sẽk wʋsg n gomd a meng yɛl yelle, d tõe n seglame n sõs ne-a rẽ zug zãmsgã poore.—Koɛ. 3:1.
5 Sẽn paase, tõnd mengã sẽn tar yẽesem wʋsg ne sɩdã, tõe n kɩtame tɩ yaa toog ne-d tɩ d ka gom wʋsg zãmsgã wakat ye. (Yɩɩl 145:6, 7) Wakat ninga d tõe n goma bũmb yell bɩ d togs kɩbar n kɩt tɩ zãmsgã tall yõod n paase, la d ka rat tɩ bõn-kãens bɩ kɩba-kãens yɩ wʋsg bɩ wogd tɩ looge, tɩ wa gɩdg Biibl zãmsdã t’a ka bãng Biiblã zãms-kãsemsã ye.
6 D sã n maand zãmsg woglem sẽn zems zãmsg fãa sasa, d sõngda Biibl zãmsdã t’a “kẽn Zusoaba vẽenem pʋgẽ.”—Ezai 2:5.