Tʋʋmdã will biru lɛtre

Rĩungã koe-moondba,

Bãng-y tɩ rɩẽ, seb-kẽengã sẽn fug Etazĩni babg a ye pʋgẽ n sãam teedã, saam-biis la saam-bi-pogs wʋsg paama bõne. Neb wʋsg pʋʋsa saam-biisã b zaamẽ beoog b sẽn sõng-b sababã pʋgẽ wã, tɩ d rat n togs-y sãnda bala.—Zã 13:35.

Saam-biig a ye seb-kẽeng ning b sẽn boond tɩ Katrina wã sẽn kɩt t’a zoe n toeem zĩig yeela woto: “Tõnd zoe n waa ka ne fut nins d sẽn da yerã bala. La saam-biisã la saam-bi-pogsã sõnga tõnd ne bũmb nins sẽn yaa tɩlaeyã. B gesa tõnd yell sõma tɩ lebg wa d bee d yiri. B pʋd n da ratame meng tɩ tõnd ra loog ye.”

Sẽn yɩɩd saam-biis la saam-bi-pogs 8000 tʋma ne meebã sul 60 sẽn yit tẽngã zĩis toɛy-toɛya, n dɩk b sẽkã, b bãngrã la b tarmã n sõng b taabã. B sõngame n me bɩ n maneg Rĩung Rot 86, la ro-gãas 4178. Tʋʋm n kete, bala Rĩung Rot a 5, la ro-gãas 722 n ket n dat meeb wall manegre. Saam-biisã yii Etazĩni ween-vɩɩs a naasã fãa n wa n na n sõng n tʋm. Tõnd fãa pʋʋsd-b-la barka, b nonglem tʋʋmdã yĩnga!—1 Tes. 5:18.

Saam-bi-poak a ye sẽn yi Misigã babgã n wa na n sõng n tʋm yeelame: “Mam sẽn yã zagsã neb sũy sẽn noom b sẽn paam tɩ tõnd lebs n maneg b rotã n ka wã, sɩd kõo maam sũ-noog wʋsgo. M sã n tags m sẽn paam paam n be dũni gill neb sẽn vɩ saam-biir sẽn be yamleoog wʋgs woto pʋgẽ wã yelle, m pa mi m sẽn yɛtg ye.”

D kotame tɩ y ket n pʋʋsd d saam-bi-nongds kãensã fãa yĩnga, rat n yeel tɩ neb nins sebgã sẽn namsã, la neb nins sẽn wa n sõngd-bã yĩnga.—2 Kor. 1:11.

Yãmb saam-biisã,

Tʋʋmdã will biru