Ning-y a Zeova daarã y yamẽ wakat fãa
1 A Zeova “ra-kãsengã kolgame, a wata tao-tao wʋsgo.” (Sof. 1:14) A Sofoni ne no-rɛɛsdb a taab piig la ye wã ninga a Zeova daarã b yamẽ wakat fãa. Yaa bãmb n gʋls Biiblã babg ning b sẽn gʋls ne hebre wã yaoolem sɛb piig la a yiibã. D sã n tũnug ne Vivez en gardant à l’esprit le jour de Jéhovah sebrã n vaees Gʋlsg Sõamyã sõma d sebrã zãmsg zĩigẽ, na n sõng-d lame tɩ d segl d mens n gũ ra-kãngã sẽn sek rabeemã.—Sof. 2:2, 3.
2 Sebrã sẽn yaa to-to: Le jour de Jéhovah sebrã pa wilgd verse rãmb nins no-rɛɛsdb piig la a yiibã sẽn gʋlsã yembr-yembr võor ye. A wilgda bũmb nins Wẽnnaam sẽn vẽneg-b tɩ b gʋlsã sẽn tõe n sõng tõnd yɛl nins d sẽn segd daar fãa wã pʋsẽ to-to. A leb n wilgda bũmb ning sẽn segd n kɩt tɩ d manesmã, la d sẽn na n yãk yam n maan bũmb ninsã wilg tɩ d miime t’a Zeova daarã kolga wʋsgo. A leb n gomda zakã vɩɩm yelle, tõnd ne d tẽed-n-taasã zems-n-taar yelle, reem nins d sẽn yãkdã yelle, koɛɛgã mooneg yelle, la tʋʋm nins d sẽn yãk n dat n wa tʋmã yelle.
3 Sebrã pipi babgã wilgda no-rɛɛsdb 12 wã sẽn yɩ neb ninsi, la b sẽn gʋls bũmb ninsã me. B yɩɩ ãnda dãmba? Yel-bʋs sẽn be rũndã-rũndã n zĩnd bãmb me wakatẽ wã? Babg a 2 soabã wilgda a Zeova sẽn sɩd yaa a soaba. Bõe la no-rɛɛs-kãensã sõngd tõnd tɩ d bãng a Zeova zugu? Babg a 3 soabã wilgda d sẽn segd n tall manesem ninga. Bõe la d tõe n maan n tõog n ta Wẽnnaam yam daar fãa? Babg a 4 soabã wilgda d sẽn tõe n paam sũ-noog to-to d vɩɩmã pʋgẽ n gũud a Zeova daarã.
4 D modg n dɩ a nafa: Le jour de Jéhovah sebrã zãmsg na n sɩnga yʋʋmd 2008, sa-sik kiuugã rasem a 4 semennã. D maan d sẽn tõe fãa masã n wa tõog n dɩ a nafa. D segend zãmsgã wakat fãa, la d karemd verse rãmbã n get rẽ ne bũmb nins d sẽn zãmsdã sẽn tũud taab to-to. Sẽn na yɩl n bʋgs d sẽn zãmsdã zugu, bɩ d sok d mens woto: ‘Wãn to la m tõe n tũ sagl-kãngã m sã n wa be yiri, lekollẽ, tʋʋmã zĩigẽ, koɛɛgã mooneg sasa, la m sã n wa be ne m tẽed-n-taasã?’ D segl d mens sõma n wa sebrã zãmsg zĩigẽ n kõ leoor n daool taabã.—Rom 1:12.
5 Bɩ Le jour de Jéhovah sebrã zãmsg sõng-d tɩ d tõog n segl d mens sõma n yals a Zeova ra-kãsengã sẽn sek rabeemã sasa. Ra-kãng sɩd kolga wʋsgo!—Zoɛll 2:11.