Yãmb sogsgã leoore

◼ Bõe yĩng tɩ kãsem dãmbã segd n maan gũusg ne telefõnnã b sẽn tũnugd ne n sõngd kẽer tɩ b kelgd sõssã b zagsẽ wã?

Tigims kẽer rɩka segls sẽn na yɩl tɩ saam-biis bɩ saam-bi-pogs nins sẽn pa tõe n wa tigissã Rĩungã Roogẽ wã bãag bɩ yɛl a taab yĩng tõe n zĩnd b zagsẽ n kelg sõssã ne telefõnne. Sẽn na yɩl n bãng tɩ yaa neb nins sẽn sɩd pa tõe n wa Rĩungã Roogẽ wã n dɩt segl-kãngã yõodo, kãsem dãmbã segd n gũusame la b sigl yɛlã sõma. Woto yĩnga, kãsem dãmb nins sẽn get segl-kãng yellã segd n gesame tɩ “bũmb fãa maan tɩ zemse tɩ burg ra zĩnd ye.”—1 Kor. 14:40.

Yaa koe-moondb nins sẽn bẽed bã-kegemsã bɩ koms rãmbã, la sẽn be-b rotẽ n pa tõe n yi wã la kãsem dãmbã segd n deng n sõnge. Koe-moond sẽn tar bãag sẽn mi n yikd-a, bɩ ned sẽn zãmsd Biiblã sõma la a yaool n be roogẽ n pa tõe n yi bãag yĩng me tõe n paama sõngre. B segd n sõdga nin-kãens n naag sẽn wa-b tigissã. B sã n pa tõe n tũnug ne telefõnnã n sõng nin-kãensã fãa, b tõe n dɩkda sõssã kasɛt zug n kõt kẽer tɩ b kelgdẽ.

Vẽenega, d sẽn na n kẽnd Rĩungã Roogẽ n kelgd sõssã yõod n yɩɩde. Tõnd sã n kẽng n tɩ yã d saam-biisã n sõs ne-ba, kengda d fãa raoodo, la sõngd sẽn nan sɩngd-b tigissã waoongã tɩ b bãng tɩ tigissã tara yõodo. D sã n kẽnd tigissã, sẽn yɩɩd fãa d na n dɩɩ mak-n-wilg rãmbã yõodo, n paam kãsem dãmbã sõngre, la d paam n sõsd ne d saam-biisã tɩ tar yamleoogo. Saam-bi-poak a ye sẽn kʋʋl kẽnga Rĩungã Roogẽ, la b sẽn pʋʋs-a sõma n mobg-a wã, a sũur yɩɩ noog wʋsg tɩ kɩt t’a sẽn wa n yit Rĩungã Roogẽ wã a yeel woto: “F pa tõe n paam tɩ b maan-f woto telefõnnẽ wã ye!”—Rom 1:11, 12.

Wala a Ann sẽn da ‘pa basd Wẽnnaam doogẽ’ wã kẽndã, rũndã-rũndã me, saam-biis la saam-bi-pogs sẽn kʋʋl maanda b sẽn tõe fãa n kẽnd tigissã n pa vaandẽ, baa ne b zu-loeesã. (Luk 2:36, 37) Baa sẽn yaa tɩlae ne nin-kãensã tɩ b kelgd sõssã telefõnnẽ wã, b pa get tɩ rẽ ne b sẽn na n kẽnd Rĩungã Roogẽ n kelgd sõssã yaa yen ye. D rɩk nin-kãensã togs-n-taare, n modg n kẽnd tigissã wakat fãa, n pẽgd Wẽnnaam a Zeova ne sũ-noogo.—Yɩɩl 95:1-3, 6; 122:1.