D ra tũus neb d koe-moonegã wakat ye
1 A Pɩɛɛr yeelame tɩ ‘Wẽnnaam ka tũusd neb ye, la buuda fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.’ (Tʋʋ. 10:34, 35) Rũndã-rũndã tõnd koe-noogã mooneg pʋgẽ, d sak n deega sɩd-kãngã b sẽn togs vẽenegã. Rẽnd tara yõod tɩ d maan d sẽn tõe tɛk n yiis gɩdgr nins fãa sẽn na n maan tɩ d ka tõog n taas koe-noogã neba fãa wã.
2 D sã n moond zak-zak bɩ ne manesem sẽn ka yãk wakat zĩis kẽere, d nong n segda neb sẽn pa wʋmd buud-gomd ning tõnd sẽn gomd d tigingã pʋgẽ wã. D leb n tõe n goma ne neb sẽn dat n bãng n paase, la sẽn ka vɩ tõnd moonegã zĩigẽ ye. Buud-goama sẽn pa yembrã kɩtdame tɩ neb kẽer pa rɩt Rĩungã koɛɛg tõnd sẽn moondã yõod zãng ye. Wʋmsã sẽn tũnugd ne mugs goam n gomd ne nebã bee bãmb sʋka. D tõe n maana wãn sẽn na yɩl tɩ baa buud-goama sẽn pa yembrã bɩ d tõog n taas nin-kãensã koe-noogã sõma? Sẽn paase, bõe la d segd n maan n sõng neb nins sẽn dat n bãng sɩdã n yaool n ka vɩ tõnd moonegã zĩigẽ wã?
3 Rõandã sa-sik kiuugã, Sosiete wã toola tigimsã fãa Veuillez suivre l’intérêt sɛbã (S-43). B toola seb-kãensã sẽn na yɩl n sõng neb nins sẽn be tigingã mooneg zĩigẽ n yaool n pa gomd tigingã buud-gomdã la wʋmsã tɩ b paam Rĩungã koɛɛg b mens goam pʋgẽ. Y leb n tõe n tũnuga ne seb-kãng n kɩt tɩ ned y sẽn moone, t’a rat n bãng sɩdã n paas n yaool n pa vɩ yãmb tigingã mooneg zĩigẽ paam sõngr n paase.
4 Yãmb sã n seg wʋng bɩ ned sẽn ka wʋmd tigingã buud-gomd koe-moonegã wakate, y segd n pidsa seb-kãensã vẽenega. Baa a soabã sã n ka wilg t’a nonga sɩdã, b segd n maana woto. Pa wakat fãa la y na n tõog n bãng a soabã yʋʋr ye, la y segd n gʋlsa a soabã adɛrs la a buud-gomde. Y tõe n ninga sebrã moonegã tʋʋmd sɛb koglgẽ Rĩungã Roogẽ. Sekertɛɛrã na n tigma seb-kãens n ges b sẽn gʋls b pʋsẽ wã sã n yaa vẽenes la takɩ, la a tool-b tigims bɩ sul sẽn pẽ-a n yɩɩd n get nedã sẽn gomd buud-gomd ningã yelle.
5 Wakat ninga woto maaneg tõeeme n ka tɩlae ye. Wala makre, ãngilindã buud-gomd tigims nins sẽn be galʋ-tẽn-bɛdã pʋsẽ wã wʋsg mii sẽn gomd-b ãngilindã sẽn beẽ tẽngã pʋgẽ. La neb a taab sẽn gomd buud-gomd a to tõeeme n lagem n be be zĩis toɛy-toɛy galʋ-tẽngã tõr pʋgẽ. Tõe n yaa tɩlae tɩ tiging bɩ sull ning sẽn get buud-gom-kãng yellã saag mooneg zĩig sẽn yaa yaleng wʋsg n moone. Dẽ tigims-kãens neb sũy na n yɩɩ noog tɩ b sõng-b tɩ b tõog n yã buud-gom-kãng nebã zĩisi.
6 Tiging bɩ sull sã n ka be yãmb babgẽ wã n tõe n kõ nedã kaset a buud-gomdã pʋgẽ, tõeeme tɩ saam-biig be tiging ning pʋgẽ n mi buud-gomdã n tõe n tɩ ges nedã. Baa ne galʋ-tẽngã yel-gɛt sõngre, b sã n ka tõog n paam saam-biig sẽn gomd a soabã buud-gomde, tẽngã saam-biis segd n maana b sẽn na maan n kɩt tɩ nedã wʋm koe-noogã. Seb-bil ning gom-zug sẽn yaa Vɩɩnd-y ne sũ-noog wakat sẽn kõn sa tẽng zugu! zoe n sõnga saam-biis wʋsg yɛl a woto pʋsẽ.
7 Koe-moond fãa segd n yɩɩ tao-tao n tʋm ne Veuillez suivre l’intérêt sɛbã, sã n yaa tɩlae. Tigingã sã n ka tar S-43 sɛbã, koe-moondã tõe n gʋlsa bũmb nins sẽn yaa tɩlae wã seb-zaalg zug bal n ning koglgã pʋgẽ wa b sẽn yeel zugẽ wã. D sã n modgd n taasd neba fãa koe-noogã baa ne b buud-gomda sẽn ya a soab fãa, d wilgdame tɩ d tara tõnd Wẽnnaam a Zeova nonglmã buudu, yẽ sẽn dat tɩ ‘neba [buud] fãa paam fãagr la b bãng sẽn yaa sɩdã.’—1 Tɩm. 2:4.