Bõe la pag ne a sɩd tõe n maan tɩ b zĩid-n-taarã yɩ noog n paase

A Abrahaam ne a Saara ra nonga taab la b waoogd taab sõma, tɩ woto yaa mak-sõng sẽn kẽ-b kãadmã yĩnga. (Sɩng. 12:11-13; 1 Pɩy. 3:6) Baasgo, b zĩid-n-taarã pa yɩ nana zãng ye. B maoo ne zu-loees buud a taab me. Yam-bʋg la sẽn kẽ-b kãadmã tõe n dɩk a Abrahaam ne a Saara nengẽ?

Sõsd-y ne taab noog-noogo. Baa y to wã sã n wa gomd ne sũ-yikri, sik-y y meng n leok-a. (Sɩng. 16:5, 6) Baood-y weer n naagd taab n maand bũmb kẽere. Ne y no-goamã la y tʋʋm-tʋmdɩ wã, maan-y tɩ y to wã bas a yam tɩ y nong-a lame. La sẽn yɩɩd fãa, naagd-y taab n zãmsd Biiblã, n pʋʋsdẽ la y tʋmd tũudmã tʋʋm a taaba, tɩ sõng tɩ y yiibã fãa tall zood sõma ne a Zeova. (Koɛ. 4:12) Pag ne a sɩd sã n wʋmd taab sõma, tɩ b zĩid-n-taar noomẽ, waoogda a Zeova sẽn yaa kãadmã lugundã.

GES-Y VIDEO WÃ: PAG NE A SƖD SẼN TÕE N MAAN TƖ B ZĨID-N-TAARÃ YƖ NOOG N PAASE. RẼ POOR BƖ Y LEOK SOGSGÃ:

• Video wã pʋgẽ, bõe n wilgd t’a Saan ne a Kiyara pa le noom ne taaba, la tɩ yellã tara kengre?

• Pag ne a sɩd sã n pelgd b pʋs n sõsd ne taaba, bõe yĩng tɩ rẽ nafd-b sõma?

• Wãn to la a Abrahaam ne a Saara kibarã sõng a Saan ne a Kiayara?

• Bõe la a Saan ne a Kiayara maan sẽn na yɩl tɩ b zĩid-n-taarã maneg n yɩ noogo?

• Bõe yĩng tɩ pag ne a sɩd pa segd n tags tɩ yell pa na n tol n zĩnd b kãadmã pʋgẽ?