Yʋʋmd 2020 rasem a tãab tigis-kãsengã video-rãmb maanego

Rasem a tãab tigis-kãsemsã video-rãmbã kẽeda d sũyã sõma, la sõngd-d tɩ d manegd n wʋmd Biiblã goamã võor sõma. Yʋʋmd 2020 rasem a tãab tigis-kãsengã video-rãmbã yaa bãmb 114. Sõss 43 siglgã taoor lʋɩtb sull neb la b sõngdbã sẽn wɛgsã me naagame. Rẽ yĩnga, yãmb zoe n tagsa tʋʋmd ning b sẽn tʋm video-kãensã yiisg yĩngã, la ligd ning b sẽn kẽes a pʋgẽ wã bɩ?

Dũniyã gill zugu, yaa d tẽed-n-taas sẽn kolg bãmb 900 n sak n kẽes b meng tʋʋmdã pʋgẽ ne yamleoogo. B tʋma sẽn kolg lɛɛr tus koabga, yʋʋm a yiib la kiis a wãn pʋgẽ. Wala makre, yaa lɛɛr tus pis-yopoe la b tʋm sẽn na yɩl n tõog n maan d video-wokã sẽn kaoosd minit 76. A Gom-zugã yaa: A Neemi: ‘Sũ-noog ning a Zeova sẽn kõtã n yaa yãmb pãnga.’

Sãmbg kae tɩ yɩɩ tɩlɛ tɩ b yiis ligd wʋsgo, n tõog n ges yamleoog tʋm-tʋmdbã yelle, b rɩɩbã la tʋʋm-teedã yelle, la b paam zĩis b tʋʋmã yĩnga.

A Jared Gossman sẽn tʋmd odiyo-video wã zĩigẽ wã yeelame yaa: “Siglgã taoor lʋɩtb sull ning sẽn get nebã zãmsg yellã ratame tɩ b maan video-rãmbã tẽns toɛy-toɛya, tɩ buud toor-toor neb be be. B ratame tɩ yɩ woto video-rãmbã pʋsẽ, bala tõnd fãa yaa wa zak a ye neba. Sẽn na yɩl tɩ yɩ woto, sull toor-toor bãmb 24 sẽn be tẽns 11 pʋsẽ n naag taab n tʋme. Tʋʋm-kẽeng a woto baooda ligd wʋsgo, la bũmb toor-toor siglgu.”

Sẽn na yɩl n tõog n maan video-rãmb kẽere, yɩɩ tɩlɛ tɩ d paam tʋʋm-teed sẽn yaa sõma, la d maneg zĩis takɩ rẽ yĩnga. Wala makre, tõnd manega zĩig Ebo tãngẽ wã sẽn pẽ Patɛrsõnnã, Niuyork soolmẽ wã, n na n maan video-wokã gom-zug sẽn yaa: A Neemi: ‘Sũ-noog ning a Zeova sẽn kõtã n yaa yãmb pãnga.’ Sẽn na yɩl n kẽgs ligdã nebã sẽn kõtã, la d tõog me n maan video wã tɩ zems ne yɛlã sẽn da yaa to-to pĩnd wẽndẽ wã, d tẽed-n-taasã kaa raado, n maan tɩ yaa wa Zerizalɛm lalsã. Lalg fãa woglem taa metr a yoobe, tɩ b rɩk sɩfõ buud n ningi, la b sõog pẽntiir tɩ wõnd lalg b sẽn me ne kuga. Lal-kãensã b sẽn tõe n dɩk n toeem zĩigã sõngame tɩ b toeem video wã maaneg zĩisã wa b sẽn date, tɩ pa yɩ tɩlɛ tɩ b yi n kẽng zĩig a to ye. La baa ne rẽ, yɩɩ tɩlɛ tɩ b yiis sẽn kolg dolaarã ligdã tus koabga, video wã maaneg yĩng bala.a

D sẽn bãng bõn-kãensã fãa wã kɩtame tɩ d sũur maneg n yaa noog ne rõandã rasem a tãab tigis-kãsengã. D kɩsa sɩd zãng-zãng tɩ modgr nins fãa d tẽed-n-taasã sẽn maan tigis-kãsengã yĩngã, na n sõngame t’a Zeova yʋʋrã paam pẽgr zĩig zãnga. D pʋʋsd-y-la bark y kũun toor-toorã y tũnugd ne donate.jw.org la soay a taab n kõtẽ wã.