Sak 35

Zãmsg sẽn ka mak-n-taaga

AZEZI zĩi tãng pendẽ n kõt a Zãmsg sẽn ka mak-n-taaga. Zĩ-kãng ra pẽe ne Galile Mogrã, n kɛg Kapɛrnawom. Ad wã yaa bũmb b sẽn ka tõe n yĩmi! A ra pʋʋsa yʋng tõre, n nan yãk neb 12 a karen-biisã sʋk tɩ b yɩ a tʋm-tʋmdba. Rẽ poore, yẽ ne bãmb fãa siga tãngã zĩ-kãngã sẽn yaa lamdã.

Masã y tõe n tagsdame t’a Zezi yaame n dat gõeem bilfu. La neb kʋʋng wʋsg n wa, tɩ kẽer yi hal Zide la Zerizalɛm sẽn zãr ne kɩlometr 100 bɩ 110 ne be wã n wa. Neb a taab yii Tɩɩr la Sɩdõ sẽn be rɩtg babgã mogr noor tẽnsẽ n wa. B waame n na n kelg a Zezi la b paam b bãas sãoogre. Neb kẽer meng n da be be tɩ zĩn dãmbã sẽn ya a Sʋɩtãan malɛg-wẽnsã tar-b n namsdẽ.

A Zezi sẽn da wa n sigdã, bãad dãmb n kolg-a n sɩɩs-a, la a sãooga b fãa. Rẽ poore, wõnda a Zezi rʋʋ tãngã zĩig sẽn zãnt n yɩɩdẽ. A zĩnda be n sɩng n zãmsd kʋʋngã sẽn da lagem n zĩ-zĩ yẽ taoor zĩ-lamdẽ wã. Yãmb wee n tagse! Ned ba a yembr ra ka le be kɛlgdbã sʋk tɩ bã-kɛgeng namsd-a ye!

Neba ra yãgdame n dat n kelg karen-saamb ning sẽn tõog n maan yel-solem kãensã wã. La sẽn yɩɩd fãa, ya a karen-biisã yĩng la a Zezi sẽn da zãmsdã. Tõeeme tɩ neba sẽn da gũbg a Zezi wã sʋka, bãmb n da zĩ n kɛg-a n yɩɩda. La a Matɩe ne a Luk gʋlsa zãmsgã goam n bĩng sẽn na yɩl tɩ naf tõnd me.

A Matɩe kɩbarã woglem yɩɩda a Luk rẽndã naoor a naase. Sẽn paase, zãmsgã babs kẽer a Matɩe sẽn gʋlsã, a Luk wilgame t’a Zezi togs-b-la wakat a to a koe-mooneg tʋʋmdã pʋgẽ. D tõe n yãa rẽ, d sã n mak Matɩe 6:9-13 ne Luk 11:1-4, la Matɩe 6:25-34 ne Luk 12:22-31. La rẽ ka segd n ling-d ye. Yaa vẽeneg tɩ ka vugr bal la a Zezi zãms yɛl kẽer ye. La a Luk gʋlsa zãms kãens kẽer n tɩ loe-b ne wakat a to a Zezi koe-moonegã pʋgẽ.

Bũmb ning sẽn kɩt t’a Zezi zãmsgã tar yõod wʋsgã ka a võorã sẽn tagem tẽebã wɛɛngẽ wã bal ye, la ya a Zezi sẽn togsd sɩdã nana-nana la vẽenegã. A tikda daar fãa vɩɩmã yɛla, la yɛl a taab neba sẽn mi sõma zutu. Rẽ kɩtame tɩ neb nins fãa sẽn baood vɩɩm sẽn yaa sõma Wẽnnaam vɩɩm sorã pʋgẽ wã tõe n wʋm a goamã võor nana-nana.

Ãnda n sɩd tar sũ-noogo?

Neba fãa ratame n tall sũ-noogo. A Zezi sẽn mi rẽ wã, a sɩnga a Tãng zug Zãmsgã n wilg sẽn sɩd tar-b sũ-noogã sẽn yaa b rãmba. La woto kɩtame tɩ zĩig pʋgẽ wã, neba wʋsgã da rat n kelg-a sõma n paase. Baasg zãnga, neb wʋsg na n yeelame t’a Zezi sɩngr goamã ra yaa wala goam sẽn kɩɩsd taaba.

A Zezi sɩnga ne a karen-biisã goam n yeele: “Sũ-noog rãmba la yãmba, naong rãmba, tɩ yãmb n so [saasẽ] Rĩungu. Sũ-noog rãmb la yãmba, sẽn kʋmd-b kom rũnda wã, tɩ yãmb n na n tɩge. Sũ-noog rãmb la yãmba, sẽn yãbd-b rũnda, tɩ yãmb n na n la n kaase . . . Wakat kãng bɩ y noog y sũuri la y kɩdem tɩ yãmb dolb na n yɩɩ wʋsg [saasẽ].”—Sebr Sõngo.

Sã n yaa ne a Luk kɩbarã yaa ne gom-kãensã la a Zezi sɩng a zãmsgã. La sã n yaa ne a Matɩe kɩbarã, a Zezi yeelame tɩ sik-m-mens rãmbã, nimbãan-zoɛtbã, pʋ-peelem dãmbã, la sẽn nong-b laafɩ wã me tara sũ-noogo. A Zezi wilgame tɩ nin-kãensã tara sũ-noogo, bala b na n paama tẽngã n sooge, b na n zoe b nimbãanega, b na n yãa Wẽnnaam, la b na n bool-b lame tɩ Wẽnnaam kamba.

Sũ-noog ning yell a Zezi sẽn gomd ka wã pa wala ned sũur sẽn na n noomẽ t’a laad n kaasdẽ wã ye. Sũ-noog hakɩkã yɩɩda woto. Sũ-noog soab getame t’a sẽn tara sek-a lame, t’a vɩɩmã noom-a.

Dẽ a Zezi wilgame tɩ neb nins sẽn sɩd tar sũ-noogã yaa b rãmb nins sẽn sak tɩ tẽeb kom n tar bãmbã, tɩ b sũy sãam b sẽn yaa yel-wẽn-maandbã yĩnga, n wa paam n bãng Wẽnnaam n lebg a sõgen dãmbã. Neba tõe n kis-b lame bɩ n namsd-b meng b sẽn maand Wẽnnaam daabã yĩnga. Ne rẽ fãa b tara sũ-noogo, bala b miimi tɩ b tata Wẽnnaam yam la b na n paama keoor sẽn yaa vɩɩm sẽn ka sɛtã.

Baasg zãnga, a Zezi kɛlgdbã wʋsgo, n paas neb kẽer tõnd wakatã me, tagsdame tɩ yaa ned sẽn yaa arzɛk soab la a noogd a yõor n yaa sũ-noog soaba. A Zezi miimi tɩ ka woto ye. Dẽ a Zezi togsa yɛl sẽn na n ling a kɛlgdbã wʋsgo, n yeele:

“Yãmb sẽn yaa arzɛgs rãmba na n paama toogo, tɩ bõe, yãmb tara y belsgo. Yãmb sẽn dɩt n tɩgda na n paama toogo, tɩ bõe, kom na n yõka yãmba. Yãmb sẽn laad masã, yãmb na paam toogo, tɩ bõe, yãmb na n yãbame n wiisi. Yãmb sẽn tar neb fãa pẽgrã na paam toogo, tɩ bõe, bãmb ba rãmba ra maana zãmb bãngdba me woto.”

A Zezi ra rat n yeelame tɩ bõe? Bõe yĩng tɩ arzɛgs tallgo, yõ-noogr la gɩrma wẽebo, la ninsaalb pẽgr wat ne toogo? Yaa woto, bala ned sã n tar bõn-kãensã la a nong-ba, Wẽnnaam balengã sẽn wat ne sũ-noog hakɩkã lebda poorẽ. A Zezi leb n ka rat n yeel me tɩ ned sã n yaa naong soaba, koamdga, bɩ a yãbd bala a tara sũ-noog ye. Baasg zãnga, naoor wʋsgo nin-kãensã buud sakda a Zezi zãmsgã, tɩ rẽ kɩtdẽ tɩ b paamd sũ-noog hakɩka.

Rẽ poore, a Zezi yeela a karen-biisã: “Yãmb yaa dũniyã yamsem.” Yaa vẽeneg t’a Zezi ra ka rat n yeel tɩ b yaa yamsem sɩd-sɩd ye. La yamsem yaa bũmb sẽn sõngd tɩ rɩɩb ra sãam ye. Yamsem dʋr n da be a Zeova roogã tẽn-kugr sɛɛgẽ, tɩ maan-kʋʋdbã ra yãkd-a n ningd maandã.

A Zezi karen-biisã yaa “dũniyã yamsem,” bala b kogenda nebã. Sɩd me, koɛɛg ning b sẽn moondã kogenda neb nins fãa sẽn sakd-a wã vɩɩm. A na n kɩtame tɩ b yɩ wẽn-sakdb wakat fãa, la kogl b tẽebã la b vɩɩm manesmã tɩ ra sãam ye.

A Zezi yeela karen-biisã: “Yãmb yaa dũniyã vẽenem.” B ka lut fɩtl ne peoog ye, yaa fɩtl doagendg zug la b ningd-a. Rẽ n so t’a Zezi yeele: “Bɩ yãmb vẽenem yãg woto neba sʋka.” Ya a Zezi karen-biisã sẽn na n wa kõt neba kaset la b yãgd b sʋka. Leb n yaa woto me, b sã n tar manesem sẽn yaa sõma wʋsgo, sẽn zems ne Biiblã noyã.

Vɩɩm manesem noy sẽn yaa sõma wʋsg a karen-biisã yĩnga

Tũudmã taoor dãmb ra getame t’a Zezi yaa ned sẽn kɩɩsd Wẽnnaam Tõogã. La sẽn pa kaoos pʋgẽ menga, b sɩɩga taab noor n na n kʋ-a. Dẽ a Zezi kẽnga taoor ne a zãmsgã n yeele: “Bɩ y ra tags tɩ mam waame n na n sãam tõoga ne Wẽnnaam no-rɛɛsdba noy ye. Mam ka wa n na n sãam ye, la a yaa tɩ pids bãmba.”

A Zezi waoogda Wẽnnaam Tõogã wʋsgo, la a yeela neb a taabã me tɩ b maan woto. A yeelame menga: “Ned sã n sãam tõog a yembre tõod kãens sʋka sẽn yaa bõoneg n yɩɩdã la sẽn na n zãms neba tɩ maan woto, b na n boola yẽ tɩ yao-zʋʋg” saasẽ Rĩungã pʋgẽ, sẽn dat n yeel t’a ka na n tol n kẽ Rĩungã pʋgẽ ye.

A Zezi zãr ne a paoog Wẽnnaam Tõogã, a pʋd n yeelame tɩ tagsg la manesem ning sẽn tusd ned t’a kɩɩs-a wã yaa wẽnga. A Zezi wilgame tɩ Tõogã yetame tɩ ned “ra kʋ ye.” La a paase: “La mam yeta yãmba tɩ ned sũur sã n yik [wakat fãa] ne a ba-biiga, a zemsame tɩ bʋ-kaoodba kao a bʋʋdo.”

Sũ-yikr tallg ne f tũud-n-taag wakat fãa yaa yell menga. Rẽ tõeeme n wa kɩt tɩ f yãk ned yõore. Yaa rẽ yĩng la a Zezi sẽn dɩk makr n wilg modgr ning ned sẽn segd n maan sẽn na yɩl tɩ laafɩ tõog n zĩndã. A yeelame: “Dẽ yĩnga, fo sã n wa ne f [maoong] kũun tẽn-kugr taoore, n zĩnd be n tẽeg tɩ f tara yell ne f ba-biiga, bɩ f bas f kũuna tẽn-kugra taoore n kẽng n deng n maneg f yella ne f ba-biigã n yaool n kõ f kũunã.”

Masã a goma Noy Piigã noor a yopoe soab yelle, n paas woto: “Yãmb wʋmame tɩ b rag n yeelame: Ra yo ye.” La a Zezi wilgame tɩ tʋlsem ning meng sẽn kɩtd tɩ ned wa yo wã yaa wẽnga. “Mam yeta yãmba tɩ ned ninga fãa sẽn [ket n] get pag ne datem wẽnga, a maana yoob ne yẽnda a sũur pʋgẽ.”

Ka wã, a Zezi pa gomd yoob tagsa sẽn na n wa ned yamẽ wakat bilf yĩng yell bal ye, a gomda ‘ned sẽn na n ket n get pag’ yelle. Ges-toog a woto nekda tʋlsem wẽnse, tɩ sor sã n paam bɩ wa baas ne yoobo. Wãn-wãn la ned tõe n gil yel-kãensã? A Zezi rɩka makr n wilg modgr ning sẽn tõe n yaa tɩlae rẽ yĩngã, n yeele: “Fo rɩtg nif sã n dat n maan foom tɩ f lʋɩ, bɩ f feoog-a n lob yɩɩga. . . . La fo nug rɩtg sã n dat n maan foo tɩ f lʋɩ, bɩ f fiuug-a n lob yɩɩga.”

Naoor wʋsgo neba sakdame tɩ b fiuug b nug bɩ b karg sẽn tar bãag sẽn na yɩl n fãag b yõore. La sã n yaa ne a Zezi, yaa tɩlae n yɩɩd tɩ ned sak n ‘lob’ sẽn yaa bũmb ning fãa yɩɩga, ba a yõodã zema nifr bɩ nugu, sẽn na yɩl n gil yoob tagsa la a maanego. A Zezi wilgame tɩ sã n pa rẽ, b na n wa loba nin-kãens buudã Zeyɛn (sẽn yaa tãmpʋʋr sẽn dɩt bugum n pẽ Zerizalɛmã) pʋgẽ. Woto rat n yeelame t’a soabã na n paama sãoong wakat sẽn ka sɛt yĩnga.

A Zezi leb n wilga tõnd manesem sẽn segd n yɩ to-to ne neb nins sẽn maand tõnd wẽngã. A kõ-d-la sagl-kãngã: “Ra rok-y y sũur ne ned sẽn maand yãmb wẽng ye, la ned sã n wẽ fo rɩtg yagdg pɛka, bɩ f wẽnemd a to me.” A Zezi ra ka rat n yeel tɩ b sã n wa pigd ned bɩ a zak rãmb bɩ a ra mao n kogl a meng ye. Ned ka wẽed a to pɛk sẽn na yɩl n pogl-a ye, la yaa sẽn na yɩl n tʋʋs-a. Dẽ, a Zezi rat n yeelame tɩ ned sã n dat n bao zabr ne-fo, yaa ne pɛk wẽeb tɩ yaa ne tʋy me, f ka segd n maan n lebs ye.

A Zezi wilgame tɩ Wẽnnaam Tõogã yetame tɩ f nong f to. La a paasame: “La mam yeta yãmb tɩ y nong yãmb bɛɛba la y pʋʋs neb nins sẽn namsd yãmba yĩnga.” A wilga bũmb ning sẽn kɩt tɩ b segd n maan woto wã, n yeele: “Tɩ yãmb tõe n yɩ yãmb Ba sẽn be [saasẽ wã] kamba. Tɩ bõe, bãmb kɩtdame tɩ bãmb wĩntoog zẽk nin-wẽns la nin-tɩrs yĩnga.”

A Zezi baasa a zãmsgã bab-kãngã ne sagl-kãngã: “Dẽ yĩnga, bɩ yãmb zems zãnga a wa yãmb Ba sẽn be [saasẽ wã] sẽn zems zãngã.” A Zezi ra ka rat n yeel tɩ neba tõe n zemsa zãng fas-fas ye. La b tõeeme n maan togs-n-taar ne Wẽnnaam hali n nong b bɛɛbã menga. Sã n yaa ne a Luki, a Zezi yeelame: “Yɩ-y nimbãan-zoetba, wala Ba wã sẽn yaa nimbãan-zoetã.”—Sebr Sõngo.

Pʋʋsgã la bas-yard ne Wẽnnaamã

A Zezi kẽnga taoor ne a zãmsgã, n ning neb nins sẽn wukd b mens n maand wa b yaa wẽn-zoɛtbã taal b pʋ-likã yĩnga. A yeelame: “Fo sã n kõ naong rãmba, da kɩt tɩ b peeb baorg fo taoor wa zãmb dãmba sẽn maand[ã]” ye.

A Zezi leb n paasame: “Yãmb sẽn pʋʋsd wakate, bɩ yãmb da yɩ wa zãmb dãmba sẽn nong tɩ yals karen-dotẽ la so-tiisẽ n pʋʋse tɩ neba ges bãmba ye.” Pa woto ye, a kõo no-kãensã: “La fo sã n pʋʋsdẽ, kẽ f roogẽ n pag kʋɩlenga n pʋʋs fo Ba sẽn be zĩig sẽn solge.” A Zezi ka yeel tɩ b ra pʋʋs zãma sʋk ye, bala yẽ meng maana rẽ. A sẽn yeel tɩ yaa wẽngã yaa pʋʋsg nins b sẽn maand sẽn na yɩl tɩ neb yã n pẽgã.

Rẽ poore a Zezi kõo sagl-kãngã: “Yãmb sã n pʋʋsdẽ, bɩ y ra tar bõn-yɛng togsg n yɩlemdẽ, wala tẽn-tẽnsã neb sẽn maandã ye.” (NW ) A Zezi ka rat n yeel tɩ togs bũmb n yɩlmã meng la wẽng ye. Vugri yẽ mengã togsa “gom-yɛng” n yɩlem a pʋʋsgã pʋgẽ. La a sẽn ka ratã yaa f sẽn na n togsd goam ne zug “n yɩlemd naoor ka tɛka.” Yaa woto la neb nins sẽn sõt tãsbiy bɩ sapele n togsd b pʋʋsgã ne zugã n yɩlemdẽ wã maanda.

Sẽn na yɩl n sõng a kɛlgdbã tɩ b bãng pʋʋsg sẽn maand to-to, a Zezi kõo makr n maan pʋʋsg sẽn tar kosg a yopoe. Wa sẽn zemse, pipi kosg a tãabã wilgdame tɩ pʋʋsdã saka Wẽnnaam naam sẽn ka to wã la a raabã. Kos-kãens baoodame tɩ Wẽnnaam yʋʋr paam waoogre, t’a Rĩungã wa, la t’a raabã maane. Kosg a naasã sẽn ketã yaa d mengã nafr yĩnga. Bãmb yaa kosg sẽn na yɩl n paam d daar fãa rɩɩbo, d yel-wẽna sugri, sẽn na yɩl n da paam makr sẽn yɩɩd d pãnga, la sẽn na yɩl tɩ b fãag-d wẽng soabã nugẽ.

Rẽ poore, a Zezi goma bẽdg ning sẽn yaa laog-baoond sẽn loog noorã yelle. A kõo sagl-kãngã: “Bɩ y ra bĩng paoong dũniyã ka, zĩig ninga mogdo la tẽng-n-piisem sẽn sãamda, la wagda sẽn kẽed n wʋkdẽ wã ye.” Laog a woto yaa bõn-sãamdga, la sẽn paase, a pa kɩtd tɩ ned paam Wẽnnaam lohorem ye.

Rẽ n so t’a Zezi yeele: “Bĩng-y yãmb paoonga [saasẽ].” Yaa ned sẽn na n ningd Wẽnnaam balengã pipi a vɩɩmã pʋgẽ la a bĩngd paoong saasẽ. Ned ba a yembr ka tõe n deeg lohorem a woto f sẽn paam Wẽnnaam nengẽ bɩ keoor sẽn yaa kãseng ning rẽ sẽn wat ne wã ye. Rẽ poore a Zezi paasame: “Fo paoong sẽn be zĩig ninga, fo sũur me na n zĩnda be.”

A leb n maana bilgr n gom laog nonglmã sẽn yaa bẽdgã yelle: “Nif yaa yĩng fɩtla. Fo nif sã n yaa sõama fo yĩnga tõr na pid ne vẽenem. La fo nif sã n ka sõama, fo yĩnga tõr na n yɩɩ lika.” Nif sẽn ne sõma yaa wa fɩtl b sẽn widg likẽ. Sẽn na yɩl n yã sõma, nifã tog n yɩɩ sõma, sẽn dat n yeel t’a segd n geta bõn-yɛnga. Nif sẽn get kɛgr wat n kɩtame tɩ ned tagsg golem, n dɩk laogã baoob n lʋɩɩs taoore, tɩ Wẽnnaam balengã leb poorẽ. La woto wat n kɩtame t’a “yĩngã tõr” lebg lika.

A Zezi baasa a sõasgã yel-kãngã zug ne makr sẽn tar pãnga: “Ned ka be sẽn tõe n sak zu-soben dãmb a yiib ye, yẽ na n kisga a yembre la a nong a yembre, walla yẽ na n nonga a yembre n paoog a yembre. Yãmb ka tõe n sak Wẽnnaam la arzɛgs yiib fãa ye.”

A Zezi sẽn kõ sagl-kãngã poore, a kõo a kɛlgdbã bas-m-yam n yeel tɩ b sã n ning Wẽnnaam balengã pipi b vɩɩmã pʋgẽ, b ka segd n maan yɩɩr b bõn-ratmã wɛɛngẽ ye. A yeela woto: “Bɩ y ges bõn-yɩgdse. Bãmb ka bʋta, la b ka tigisd me ye, la bãmb ka suiid bao pʋsẽ ye. La yãmb Ba sẽn be [saasẽ] rɩlgda bãmba.” La a soke: “Yãmb ka yɩɩd bãmb wʋsg sɩda?”

Rẽ poore a Zezi goma rulg-lɛlmã sẽn be pʋtẽ wã yell n yeel t’a “Salomo menga sẽn da tar naam kãsenga ka tõog n maneg a menga tɩ ta rulg-lelemd a yembr ye.” La a paase: “Yãmb tẽeb bilf rãmba! Wẽnnaam sã n maneg mood tɩ yɩ neer woto, . . . bãmb kõn ges yãmb yell hal wʋsg n yɩɩda?” Rẽ n so t’a Zezi baas a goamã n yeele: “Bɩ yãmb da maan yɩɩr ye, la y ra yeele: Tõnd na n dɩɩ bõe? Tõnd na n yũu bõe? Tõnd na n yeelga bõe? . . . Yãmb Ba sẽn be [saasẽ] miimi tɩ yãmb data bõn-kãense. Bɩ y reng n bao Wẽnnaam [Rĩungã] ne bãmb tɩrlem, la bõn-kãens fãa na paas yãmba.”

Vɩɩmã sore

Ya a Zezi zãmsgã tũub la vɩɩmã sore. La rẽ maaneg ka nana ye. Wala makre, Fariziẽ rãmbã ra nong n kaooda neb a taabã bʋʋd ne toom, la wõnda neb wʋsg me ra maanda wa bãmba. Woto a Zezi kẽnga taoor ne a Tãng zug Zãmsgã, n kõ sagl-kãngã: “Da bʋ-y ned bʋʋd ye, tɩ Wẽnnaam da wa bʋ yãmb bʋʋd ye. Tɩ bõe, yãmb sẽn na n bʋ ned bʋʋd ninga, yãmb na n paama bʋ-kãnga.”

Ned sã n tũ Fariziẽ rãmbã sẽn yaa nin-sãbsdb tɩ loog noorã manesem, yaa yelle. Sã n yaa ne a Luk kɩbarã, a Zezi maana makr n wilg yel-kãng sẽn ya a soab n yeele: “Zõang tõe n tɛɛ zõang bɩ? Bãmb b yiibã fãa kõn lʋɩ bokẽ sɩda?”

Yɩ nin-sãbsd tɩ loog noore, neb a taab yel-wẽn zẽneb la rɩk-b n maan tɩ lebg yell gĩi yaa beeg-kãsenga. Rẽ n so t’a Zezi sok yaa: “La raoog sã n be fo nifẽ wã, fo na n yɩɩ wãn n yeel f ba-biiga: ‘Bas tɩ m yãk mooga sẽn be fo nifẽ wã? Zãmb soaba, deng n yãk raoogã sẽn be fo nifẽ wã n yaool n yã n yãk moogã sẽn be fo ba-biiga nifẽ wã.”

Woto pa rat n yeel t’a Zezi karen-biisã ka segd n gũus ne neb kẽer ye, bala a yeelame: “Da rɩk bõn-sõma n kõ baas ye, la ra rɩk-y kĩndi n lob kurkui taoor . . . ye.” Sɩdã sẽn be Wẽnnaam Gomdã pʋgẽ wã yaa sõngo. Sɩd-kãens yaa wala kĩndi, makr wɛɛngẽ. La neb kẽer manesem sẽn yaa wala baas bɩ kurkui sã n pa nand sɩdã sẽn tar yõodã, a Zezi karen-biisã segd n bas-b lame la b bao neb nins sẽn na n kelgã.

A Zezi zoe n goma pʋʋsgã yell a Tãng zug Zãmsgã pʋgẽ, la masã a wilga vẽeneg tɩ yaa tɩlae tɩ d ket n pẽdgd a pʋgẽ. A yeelame: “Bɩ y [ket n kotẽ], tɩ b na kõ-yã.” A Zezi tũnuga ne makr n wilg tɩ Wẽnnaam deegda pʋʋsgo, n sok woto: “Ãnda n be yãmb sʋka t’a biig kos-a buri, t’a kõ-a kugri? . . . Yãmb nin-wẽnsa sã n bãng . . . kõ yãmb kamba kũun sẽn yaa sõama; dẽ, sẽn yɩɩda, yãmb [saasẽ] Ba kõn kõ neb nins sẽn kos bãmba bũmb neeb bɩ?”

Rẽ poore a Zezi togsa vɩɩm manesem noor sẽn lebg noor neb wʋsg sẽn mi wã. A yeelame: “Yãmb sẽn dat tɩ neba maan yãmb bũmb ninga, bɩ yãmb me maan bãmb boto.” D sã n dat n tũ no-kãngã, d segd n maanda neb a taabã yel-sõmde, n maand-b wa tõnd sẽn dat tɩ bãmb me maan tõndã.

Sagl-kãngã a Zezi sẽn kõ wã sɩd wilgdame tɩ vɩɩmã sor tũub ka nana ye: “Bɩ y kẽ zak noor sẽn yaa sẽka, tɩ bõe, zak noor sẽn yaa yalenga la sor sẽn yaa yalenga rabda sãoong zĩiga, la neb wʋsg kẽeda beenẽ. La zak noor sẽn yaa sẽka la sor sẽn yaa bãanega rabda vɩɩm zĩigẽ, la a yãtb yaa bilfu.”

D sã n pa gũusi, b tõe n tudg-d-la nana-nana, rẽ n so t’a Zezi keoog tõnd woto: “Gũus-y yãmb mens ne zãmb bãngdbã. Bãmb wata yãmb sʋk wa piisi, la bãmb sũyã pʋsẽ, bãmb yaa wa rigd-n-yĩidsi kom sẽn tara.” B bãngda tɩ-sõma la tɩ-yood b biisẽ. Woto me a Zezi wilgame tɩ b tõe n bãnga ziri no-rɛɛsdbã b manesmẽ wã la b zãmsgẽ wã.

A Zezi leb n wilgame tɩ ka bũmb ningã ned sẽn yetã bal n kɩtd t’a yaa yẽ karen-biig ye, la ya a soabã sẽn maandã me. Neb kẽer yetame t’a Zezi yaa bãmb Soaala, la b sã n ka maand a Ba wã raabo, a yetame: “La mam na n yeela bãmb vẽeneg yaa: ‘Mam ka mi yãmb baa bilf ye. Bɩ y bas maam, yãmb tʋʋm wẽns maandba.’ ”

Sẽn na n baase, a Zezi togsa a zãmsgã baasg goam sẽn yaa goam b sẽn pa tõe n yĩmã. A yeelame: “Ned ninga fãa sẽn wʋmd goam ninga mam sẽn togsã n sakd bãmba, yẽ na n yɩɩ wa yam soab sẽn me a roog kugr zugu. La saag niime tɩ koom zoe wʋsgo, la sobg yik n wẽe roogã, la a ka lʋɩ ye, a sẽn yẽbg kugr zuga yĩnga.”

La a Zezi paasame: “La ned ninga fãa sẽn wʋmd bũmb ninga mam sẽn togsdã n ka sakd bãmba, yẽ yaa wa yalem sẽn me a roog bĩisr zugu. La saag niime tɩ koom zoe wʋsgo, la sobg yikame n wẽ ro-kãnga, la a lʋɩɩme, la a lʋɩɩsa yɩɩ kãsenga!”

A Zezi sẽn baas a zãmsgã, a sẽn zãms nebã to-to wã ling-b-la wʋsgo. Bala a ra zãmsd-b-la wala ned sẽn tar tõogo, pa wala bãmb tũudmã taoor dãmb ye. Luk 6:12-23; Matɩe 5:1-12; Luk 6:24-26; Matɩe 5:13-48; 6:1-34; 26:36-45; 7:1-29; Luk 6:27-49.

▪ Yɛ la a Zezi zãmsg ning sẽn ka mak-n-taagã zĩnd-yã, ãnd rãmb n da be be, la bõe la a reng n maane?

▪ Sã n yaa ne a Luki, a Zezi Tãng zug Zãmsgã goam kẽere a togs-b-la wakat a taaba, bõe yĩng tɩ rẽ ka segd n ling-du?

▪ Bõe n kɩt t’a Zezi zãmsgã tar yõod wʋsg woto?

▪ Ãnd rãmb n sɩd tar sũ-noogo, la bõe yĩnga?

▪ Ãnda n paamd toogo, la bõe yĩnga?

▪ Wãn to la a Zezi karen-biisã yaa “dũniyã yamsem” la “dũniyã vẽenem”?

▪ Wãn to la a Zezi wilg t’a waoogda Wẽnnaam Tõogã wʋsgo?

▪ Sagl-bʋs la a Zezi kõ-yã, tɩ tõe n sõng n yiis bũmb nins sẽn wat ne nin-kʋʋr la yoobã?

▪ A Zezi sẽn yeel tɩ b wẽnemd yagdg a to wã n kɩsã, a ra rat n yeelame tɩ bõe?

▪ Wãn-to la d tõe n zems zãng wala Wẽnnaam sẽn zems zãngã?

▪ Sagl-bʋs pʋʋsgã wɛɛngẽ la a Zezi kõ-yã?

▪ Bõe yĩng tɩ saasẽ arzɛgsã yõod yaa kãseng n yɩɩda, la wãn-wãn la d paamd-ba?

▪ Mak-bʋs la b kõ sẽn na yɩl n sõng ned t’a lak a meng ne laog nonglem?

▪ Bõe yĩng t’a Zezi yeel tɩ d ka segd n maan yɩɩre?

▪ Bõe la a Zezi yeel neb a taab bʋʋd kaoobã wɛɛngẽ, baasg zãnga wãn to la a wilg t’a karen-biisã segd n tagsame tɩ bɩ b manesmã ne neb a taabã pʋgẽ?

▪ Bõe la a Zezi leb n yeel pʋʋsgã wɛɛngẽ, la vɩɩm manesem no-bʋg la a Zezi kõ-yã?

▪ Wãn to la a Zezi wilg tɩ vɩɩm sorã tũub ka na n yɩ nana, la tɩ d sã n pa gũusi b tõe n wa tudg-d lame?

▪ Wãn-wãn la a Zezi baas a zãmsgã, la kɩtame tɩ neba manesem yɩ wãn-wãna?