Zãmsg a 7

Pʋʋsgã pẽnegda tõnd ne Wẽnnaam

Bõe yĩng tɩ tar yõod tɩ d pʋʋs Wẽnnaam wakat fãa? (1)

Ãnd soab la d segd n pʋʋse, la wãn to? (2, 3)

Bõe la y tõe n kos Wẽnnaam y pʋʋsgã pʋgẽ? (4)

Wakat bʋg la y tõe n pʋʋse? (5, 6)

Wẽnnaam kelgda pʋʋsg buud fãa bɩ? (7)

1. Pʋʋs rat n yeelame tɩ f sik f meng n gom ne Wẽnnaam. Y segd n pʋʋsa Wẽnnaam wakat fãa. Y sã n maand woto, y na n yãame tɩ y pẽe ne-a sõma wa y sẽn pẽ ne y zo-nongr to-to wã. A Zeova yaa kãseng n tar pãng wʋsgo, la ne rẽ fãa, a kelgda tõnd pʋʋsgã. Yãmb pʋʋsda Wẽnnaam wakat fãa bɩ?—Yɩɩl Sõamyã 65:3; 1 Tesalonik rãmba 5:17.

2. Pʋʋsgã naaga Wẽnnaam balengã pʋgẽ. Yaa rẽ n so tɩ d segd n pʋʋs Wẽnnaam a Zeova bala. A Zezi sẽn da wa n be tẽng zugu, a ra pʋʋsda a Ba wã wakat fãa. A ra pa pʋʋsd ned a to ye. Tõnd me segd n maana woto. (Matɩe 4:10; 6:9) La tõnd segd n pʋʋsa Wẽnnaam ne a Zezi yʋʋre. Rẽ wilgdame tɩ d nanda a tʋʋmdã, la leb n wilgdẽ tɩ d sɩd tẽedame tɩ yaa a maoongã n yɩ rondã.—Zã 14:6; 1 Zã 2:1, 2.

3. D sã n pʋʋsdẽ d segd n pelga d pʋg ne Wẽnnaam. D pa segd n zãms d pʋʋsgã ne zug bɩ d karemd-a pʋʋsg sebr pʋgẽ ye. (Matɩe 6:7, 8) D tõe n pʋʋsa Wẽnnaam wakat fãa la zĩig fãa, la segd n yɩɩ ne manesem sẽn be waoogre. Baa d sã n pʋʋsd d sũurẽ Wẽnnaam wʋmdame. (1 Sãmwɛll 1:12, 13) D sã n na n pʋʋs d yembre, yaa sõma tɩ d bao zĩig neb la bʋrg sẽn kaẽ n pʋʋse.—Mark 1:35.

4. Yel-bʋs yĩng la y tõe n pʋʋs Wẽnnaam? Y tõe n pʋʋsa bũmb ning fãa sẽn tõe n maneg yãmb ne Wẽnnaam zoodã yĩnga. Bũmb sã n wa rat n sãam zood kãng me, y tõe n pʋʋsa rẽ yĩnga. (Filip rãmba 4:6, 7) Pʋʋsg ning a Zezi sẽn zãms a karen-biisã wilgdame tɩ d segd n pʋʋsa a Zeova yʋʋrã la a raabã yĩnga. Tõnd tõeeme me n pʋʋs n kos bũmb nins sẽn yaa tɩlae ne d vɩɩmã, n kos d yel-wẽna sugri, la d kos t’a sõng-d tɩ d yals kãn-kãe makr pʋgẽ. (Matɩe 6:9-13) Tõnd pʋʋsgã pa segd n wilgdẽ tɩ yaa tõnd mengã yell bal n pak-d ye. Bũmb nins fãa d sẽn kot d pʋʋsgã pʋgẽ wã segd n zemsa ne Wẽnnaam daabã.—1 Zã 5:14.

5. Y sũurã sã n wa tusd-y tɩ y pʋʋs Wẽnnaam bark bɩ y pẽg-a fãa, y tõe n pʋʋsame. (1 Kibaya 29:10-13) Y sã n wa tar zu-loees tɩ y tẽebã be makr pʋgẽ, y segd n pʋʋsame. (Yɩɩl Sõamyã 55:23; 120:1) Segdame tɩ y pʋʋs la y yaool n dɩ. (Matɩe 14:19) A Zeova yet-d lame tɩ d pʋʋsd “wakat fãa.”—Efɛɛz rãmba 6:18.

6. Sẽn yɩɩd fãa, d sã n wa maan yel-wẽn-kãsenga, yaa tɩlae tɩ d pʋʋse. Wakat kãnga, d segd n bõosa a Zeova t’a zoe d nimbãaneg la a kõ-d sugri. Tõnd sã n vẽneg d yel-wẽnã n togs-a la d maan d sẽn tõe fãa n da ye paas a to, Wẽnnaam na n kõ-d-la sugri.—Yɩɩl Sõamyã 86:5; Yelbũna 28:13.

7. Yaa nin-tɩrsã pʋʋsg bal la a Zeova kelgda. Y sã n dat tɩ Wẽnnaam kelg y pʋʋsgã, y segdame n mao ne y pãng tɛk n sak a noyã. (Yelbũna 15:29; 28:9) Y segd n pʋʋsa ne sik-m-menga. (Luk 18:9-14) Y segd n modgame tɩ y tʋʋmã zems ne y kosgã. Woto y wilgdame tɩ y tara tẽebo, la tɩ y kɩsa sɩd ne y sẽn yet bũmb ning y pʋʋsgã pʋgẽ wã. Yaa y sẽn na n maan woto bal la a Zeova na n deeg y pʋʋsgã.—Hebre dãmba 11:6.